11

விடுதலைப் புலிகளின் புதிய தலைவர் செல்வராஜா பத்மநாதன் மலேசியாவில் எவ்வாறு தடுத்து வைக்கப்பட்டு, இலங்கைக்கு கொண்டு சென்றமை தொடர்பாக விசாரணை நடத்தப்பட வேண்டுமென புலிகளின் சட்ட ஆலோசகர் விஸ்வநாதன் ருத்திரகுமாரன் தெரிவித்துள்ளார். செல்வராஜா பத்மநாதன் தொடர்பான விபரத்தை மலேசியா வெளியிட வேண்டுமென்றும் அவர் கேட்டுள்ளதாக ஏ.எவ்.பி. செய்திச்சேவை தெரிவித்துள்ளது.

செல்வராஜா பத்மநாதன் கோலாலம்பூரில் புதன்கிழமை கைது செய்யப்பட்டு பாங்கொக் ஊடாக இலங்கைக்கு கொண்டு செல்லப்பட்டதாக தாய்லாந்து அரசாங்கம் தெரிவித்திருந்தது. இந்த விடயம் குறித்து மலேசியரசு எந்தத் தகவலையும் கொண்டிருக்காவிடின் முழு விடயம் தொடர்பாகவும் விசாரணை நடத்த வேண்டுமென நாம் வலியுறுத்துகிறோம் என்று ருத்திரகுமாரன் கூறியுள்ளார்.

பிலிப்பைன்ஸ், தாய்வான், சீனா ஆகிய நாடுகளில் கடந்த சில நாட்களாக வீசிய மொராக்கோ என்ற சூறாவளி காரணமாக தாய்வானில் உள்ள ஷியோலின் என்ற மலைக் கிராமம் முழுவதும்  மண்ணில் புதைந்ததுள்ளதாக அறிவிக்கப்பட்டுள்ளது.

நேற்று அதிகாலை அங்கு மக்கள் அயர்ந்து தூங்கிகொண்டிருந்த போது திடீரென அக்கிராமமே மண்ணில் புதைந்துள்ளது.

இக்கிராமத்தில்  200 வீடுகளில் தங்கியிருந்த 600 பேரும் பலியானார்கள். தகவல் அறிந்ததும் அதிகாரிகளும்,  மீட்புக் குழுவினரும் விரைந்து சென்று சடலங்களை மீட்கும் பணியில்  தீவிரமாக ஈடுபட்டுள்ளனர் என அங்கிருந்துவரும் செய்திகள் தெரிவிக்கின்றன.

யாழ் மாநகர சபையின் மேயராக யோகேஸ்வரி பற்குணராசாவும்,  துணை மேயராக துரைராஜா இளங்கோவும் (றீகன்) அமைச்சர் டக்ளஸ் தேவானந்தாவினால் நியமிக்கப்பட்டுள்ளனர். நடந்து முடிந்த யாழ் மாநகரசபைக்கான தேர்தலில் ஐக்கிய மக்கள் சுதந்திரக் கூட்டமைப்புடன் இணைந்து போட்டியிட்ட ஈழமக்கள் ஜனநாயகக் கட்சியின் வேட்பாளர்களாகிய இந்த இருவரும் வெற்றியடைந்திருந்தமை குறிப்பிடத்தக்கதாகும்.

சிறந்த கல்விமானாகிய யோகேஸ்வரி பற்குணராஜா சுமார் 28 வருட காலமாக கிளிநொச்சி யாழ்ப்பாணம் கொழும்பு மாவட்டங்களிலுள்ள பல்வேறு கல்லூரிகளில் ஆசிரியராகவும், அதிபராகவும் பணியாற்றியுள்ளார்.

அத்துடன் அமைச்சுக்களில் உயரிய பதவிகளையும் இவர் வகித்துள்ளார். சர்வதேச லயன்ஸ் கழகம் இவருக்கு சிறந்த ஆலோசகர் என்ற பட்டத்தை வழங்கிக் கௌரவித்துள்ளது. யாழ் மாநகர சபையின் முன்னாள் உறுப்பினரான துரைராஜா இளங்கோ (றீகன்) சிறந்த சமூக சேவையாளர். சகல சமூக மக்கள் மத்தியிலும் தனது சேவையால் மக்களின் நன்மதிப்பைப் பெற்றவர்.

அந்த மானில் ஏற்பட்ட பெரும் நிலநடுக்கம் காரணமாக இலங்கையில் சுனாமி ஏற்படும் ஆபத்தில்லையென இலங்கையின் தேசிய சுனாமி முன்னெச்சரிக்கை நிலையம் அறிவித்துள்ளது. இலங்கையின் கரையோரப் பகுதியில் வசிக்கும் மக்கள் வீண் பதற்றம் இன்றி அமைதியாக இருக்குமாறும் அந்த நிலையம் அறிவுறுத்தியுள்ளது.

அந்தமான் கடல் பகுதியில் நேற்று நள்ளிரவு கடும் நிலநடுக்கம் ஏற்பட்டது. ரிச்டர் அளவுகோலில் இது 7.7 ஆக பதிவாகியிருந்தது. நிலநடுக்கத்தால் அங்கு பெருத்த சேதம் ஏற்பட்டுள்ளது. தமிழகத்திலும் கடலோர மாவட்டங்களில் நிலநடுக்கம் உணரப்பட்டுள்ளது. இதனால் நாகை,  கடலூர் மாவட்டங்களில் சுனாமி எச்சரிக்கை விடப்பட்டு பின்னர் திரும்பப் பெறப்பட்டது.

ஜப்பானிலும் ‘சுகுரு’ என்ற தீவுக்கு அருகே நேற்று பெரும் நிலநடுக்கம் ஏற்பட்டது. ரிக்டர் அளவுகோலில் இது 6.6 ஆக பதிவாகி இருந்தது. இதனால் கட்டடங்கள் குலுங்கின. பொருட்கள் கீழே விழுந்தன. இந்த நிலநடுக்கத்தில் 60 பேர் படுகாயமடைந்துள்ளனர். கட்டங்களுக்கும் பெரும் சேதம் ஏற்பட்டுள்ளது. இந்தோனேசியாவிலும் நேற்று  5.7 ரிக்டர் அளவிலான நிலநடுக்கம் ஏற்பட்டதாக அறிவிக்கப்பட்டுள்ளது. 

வடக்கு யுத்தத்தினால் பாதிக்கப்பட்டு தற்போது வவுனியா நலன்புரிநிலையங்களில் தங்கியுள்ள தரம் 05 மாணவர்களின் கல்விநிலையை மேம்படுத்த தேசம்நெற் உம், சிந்தனைவட்டமும் மேற்கொண்டுவந்த முதல்கட்ட கல்வி நிவாரண செயற்றிட்டம் நிறைவுபெற்றுள்ளது.

இந்த கல்வி நிவாரண திட்டத்தின் கீழ் வவுனியா நலன்புரிநிலையங்களில் அமைக்கப்பட்டுள்ள பாடசாலைகளில் கற்கும் 4872 மாணவர்களுக்கும் தனித்தனியே ஒவ்வொரு மாணவனுக்கு  30 மாதிரி வினாத்தாள்களும், 04 வழிகாட்டிப் புத்தகங்களும் வழங்கப்பட்டுள்ளன.

இந்த மாதிரி வினாத்தாள்களும், 04 வழிகாட்டிப் புத்தகங்களும் நலன்புரி நிலைய பாடசாலைகளின் இணைப்பதிகாரியும்,  கல்வி அதிகாரியுமான திருவாளர் த. மேகநாதன் அவர்களின் நேரடி கண்காணிப்பின் கீழ் நலன்புரி நிலையத்திலுள்ள மாணவர்களுக்கு வழங்கப்பட்டு நலன்புரி நிலைய ஆசியர்களின் ஊடாக மாணவர்கள் வழிகாட்டப்பட்டு வருகின்றனர். தரம் 05 புலமைப்பரிசில் மாணவர்களுக்கான அரசாங்கப் பரீட்சை எதிர்வரும் 23ஆம் திகதி நடைபெறவுள்ளது. 

இந்த கல்வி நிவாரண செயற்றிட்டத்துக்கு லண்டனில் தேசம்நெற் இணையத்தளம், அகிலன் பவுண்டேஷன் மற்றும் லிட்டில் எய்ட் போன்ற அமைப்புகளினதும், சில பரோபகாரிகளினதும் உதவி பெறப்பட்டது. இலங்கையில் சிந்தனைவட்டம் இத்திட்டத்தை நேரடிப் பராமரிப்பின் கீழ் நடைமுறைப்படுத்தியது. மேலும் மத்திய இலங்கை முஸ்லிம் பட்டதாரிகள் ஒன்றியமும் இதற்கான நிதியுதவிகளை வழங்கியது. இந்த கல்வி நிவாரண செயற்றிட்டத்தின்போது ஒவ்வொரு மாணவனுக்கும் 570ரூபாய் பெறுமதிமிக்க 30 மாதிரிவினாத்தாள்களும்,  4 வழிகாட்டி புத்தகங்களும் கிடைக்க வழி செய்யப்பட்டன.

இத்திட்டத்தில் மொத்தப் பணப் பெறுமதி 27இலட்சத்து 77ஆயிரத்து 40 ரூபாவாகும். இச்செலவில் மூன்றிலொரு பங்கான 9 இலட்சத்து 25ஆயிரத்து 680 ரூபாவை சிந்தனைவட்டம் பொறுப்பேற்றதுடன்,  மாதிரி வினாத்தாள்கள் தயாரித்தல், அச்சிடல்,  பொதியிடல்,  நலன்புரிநிலையத்தில் ஒப்படைத்தல் போன்ற பணிகளையும் மேற்கொண்டது. இத்திட்டத்திற்கு மத்திய இலங்கை முஸ்லிம் பட்டதாரிகள் ஒன்றியம் 7இலட்சம் ரூபாவை வழங்கியது.

மீதமான 11 இலட்சத்து 51ஆயிரத்து 360 ரூபாவை தேசம்நெற் பொறுப்பேற்றது. இத்தொகையில் இரண்டு இலட்சம் ரூபாவினை நேரடியாக தேசம்நெற் வழங்கியது. மீதமான தொகையில் 3000 பவுண்களை லண்டன் அகிலன் பவுண்டேசன் நிறுவனத்தினரும்,  1000 பவுண்களை லிட்டில் எய்ட் நிறுவனத்தினரும் மீதித் தொகையான 1000 பவுண்களை சில பரோபகாரிகளும் ஏற்றுக் கொண்டனர். இவர்கள் அனைவருக்குமான விரிவான கணக்கறிக்கைகளும்,  செயற்பாட்டறிக்கைகளும் நலன்புரிநிலையத்திலிருந்து பெறப்பட்ட உறுதிப்பாட்டுக் கடிதங்களும் தனித்தனியாக விரைவில் அனுப்புவதற்கான ஏற்பாடுகள் மேற்கொள்ளப்பட்டுள்ளன.

வடபுலத்து மண்ணில் தமிழர்கள் செறிவாக வாழ்ந்து வந்த கிளிநொச்சி மாவட்டத்தில் கரைச்சி, பூநகரி, கண்டாவலை ஆகிய கல்விக் கோட்டங்களைச் சேர்ந்த அனைத்துப் பாடசாலை மாணவர்களும்,  அதேபோல முல்லைத்தீவு மாவட்டத்தில் புதுக்குடியிருப்பு கல்வி வலயத்தைச் சேர்ந்த பாடசாலை மாணவர்களும்,  துணுக்காய் கல்வி வலயத்தைச் சேர்ந்த துணுக்காய்,   ஒட்டிசுட்டான்,   மாந்தை கிழக்கு ஆகிய கோட்டங்களைச் சேர்ந்த பாடசாலை மாணவர்களும் இடம்பெயர்ந்து  நலன்புரிநிலையங்களில் வாழ்ந்து வருகின்றனர். வவுனியாவில் அமைக்கப்பட்டுள்ள நலன்புரி நிலையங்களில் சுமார் 53 பாடசாலைகளில் இம்மாணவர்களின் கற்பித்தல் நடவடிக்கைகள் மேற்கொள்ளப்படுகின்றன.

சிந்தனைவட்டம் தேசம்நெற் ஆகியவற்றால் வழங்கப்பட்ட மாதிரிவினாத்தாள்களும், வழிகாட்டிப் புத்தகங்களும் வலயம் 0, வலயம் 1,  வலயம் 2 , வலயம் 3, வலயம் 4, வலயம் 5 நலன்புரி நிலையங்களில் அமைக்கப்பட்டுள்ள பாடசாலை மாணவர்களுக்கும் மேலும் சுமதிபுரம்,  தரம்புரம், வீரபுரம் நலன்புரி நிலைய மாணவர்களுக்கும் நகர்ப்புறங்களிலுள்ள 07 பாடசாலையில் தங்கியிருக்கும் இடம்பெயர்ந்த மாணவர்களுக்கும் நேரடியாக விநியோகிக்கப்பட்டுள்ளமை குறிப்பிடத்தக்கது.

கைது செய்யப்பட்டுள்ள விடுதலைப் புலிகளின் புதிய தலைவர் செல்வராஜா பத்மநாதனை நாடு கடத்துமாறு உத்தியோகபூர்வமாக இலங்கையைக் கோருவதற்கு காலம் எடுக்கக்கூடும் என்பதால் அவர் மீதான விசாரணை தொடர்பான விபரங்களைக் கடிதம் மூலம் கொழும்பிடம் இந்தியா விரைவில் கோரக்கூடும் என்று ரைம்ஸ் ஒவ் இந்தியா பத்திரிகை ஞாயிற்றுக்கிழமை தெரிவித்துள்ளது.

கே.பி.யின் கைது தொடர்பாக இந்தியா எடுத்துள்ள நடவடிக்கை தொடர்பாக பதிலளித்துள்ள வட்டாரங்களே இதனைக் கூறியுள்ளதாக அப்பத்திரிகை குறிப்பிட்டுள்ளது. இந்தத் தருணத்தில் நாடு கடத்தும் கோரிக்கை உடனடியாக விடுக்கப்படுமெனத் தோன்றவில்லை. முதலாவதாக கே.பி. விவகாரத்தை இலங்கை கையாள்வதற்கே சர்வதேச சாசனங்கள் இடமளிக்கின்றன. இதனைக் கருத்தில்கொண்டு கே.பி.யை நாடு கடத்துவதற்கான கோரிக்கையை இந்தியா உடனடியாக விடுக்காது. சென்னையில் கே.பி.யை கைது செய்வதற்கான ஆணையை இந்தியா விடுத்திருந்தது. ராஜீவ்காந்தி படுகொலை சதியின் பின்னணி தொடர்பாக அதிகளவு விபரங்களைப் பெற்றுக்கொள்ள கடிதம் மூலம் விபரங்களை இந்தியா பெற்றுக்கொள்ளும் என்று அந்த வட்டாரங்கள் தெரிவித்தன.

கடிதத்தில் கேட்டல் (Letter Rogatory) என்பது உள்ளூர் நீதிமன்றத்தின் மூலம் எடுத்துக் கொள்ளப்படும் விடயமாகும். இது சட்ட ரீதியான வழிமுறையாகும். வெளிநாட்டில் சில தொடர்புகள் இருந்தால் வழக்கு விசாரணைக்கு உதவியாக ஒரு நாடு மற்றொரு நாட்டிலிருந்து உதவி பெறுவதற்கு இது இடமளிக்கிறது.

கே.பி.யை நாடு கடத்துவது தொடர்பாக பரிசீலனை செய்வதற்கு முன்பாக பூர்வாங்க விசாரணைகளை நடத்த வேண்டிய தேவை இருப்பதாக இலங்கை தெரிவித்திருந்தது.  இந்தியா கே.பி.யை நாடு கடத்துமாறு கோரிக்கை விடுத்தால் இலங்கை தனது விசாரணைகளை நிறைவு செய்த பின் சர்வதேச விதிமுறைகளுக்கு அமையச் செயற்படும் என்று பாதுகாப்பு விவகாரப் பேச்சாளரும் அமைச்சருமான கெஹலிய ரம்புக்வெல கூறியிருந்தார்.

இந்திய மத்திய புலனாய்வுப் பணியகத்தின் பல்தரப்பு ஒழுக்காற்று கண்காணிப்பு முகவரமைப்புக்கு கே.பி. தேவைப்படுவதாக வட்டாரங்கள் தெரிவித்தன.

பல்தரப்பு ஒழுக்காற்று கண்காணிப்பு முகவரமைப்பே ராஜீவ் காந்தி படுகொலையின் பின்னாலுள்ள பாரிய சதியில் கே.பி.யின் பங்களிப்புத் தொடர்பாக விசாரணை நடத்தி வருகிறது. ராஜீவ் காந்தி கொலை தொடர்பாக முன்கூட்டியே கே.பி.க்கு தெரியுமென்ற சந்தேகம் விசாரணை முகவரமைப்புகளிடம் உள்ளன.

கொழும்பு மறை மாவட்டப் பேராயராகப் பதவி வகித்து அண்மையில் ஓய்வு பெற்ற அதி வணக்கத்துக்குரிய பேராயர் பேரருட்திரு ஒஸ்கோல்ட் கோமிஸ் ஆண்டகைக்கு அரசாங்கம் முத்திரை வெளியிட்டு கெளரவித்தது. அத்துடன் சமய அலுவல்கள் பண்பாட்டுத்துறை அமைச்சும், கிறிஸ்தவ சமய அலுவல்கள் திணைக்களமும் சேவை பாராட்டு விருதுகளை வழங்கி கெளரவித்தன.

அத்துடன் தபால் தொலைத் தொடர்பு அமைச்சு விசேட தபால் முத்திரை யொன்றையும் வெளியிட்டு ஒஸ்வோல்ட் ஆண்டகையின் சேவையைக் கெளரவித்தது. ஜனாதிபதி மஹிந்த ராஜபக்ஷவின் தலைமையில் நேற்றுக் கொழும்பில் நடைபெற்ற புதிய பேராயர் பேரருட்திரு மெல்கம் ரஞ்சித் ஆண்டகையை கெளரவிக்கும் நிகழ்வில் மேற்படி கெளரவமளிப்பும் இடம் பெற்றது.

புதிய மற்றும் முன்னாள் பேராயர்களுக்கு மத அலுவல்கள் அமைச்சும், கிறிஸ்தவ சமய விவகார திணைக்களமும் நினைவு விருதுகளை வழங்கி கெளரவித்தன. அமைச்சர்கள் பண்டு பண்டாரநாயக்க, ஜீ. எல். பீரிஸ் ஆகியோர் இவ்விருதுகளை வழங்கியதுடன் அமைச்சர்கள், முக்கியஸ்தர்களுடன் பாப்பரசரின் இலங்கைக்கான அப்போஸ்தலிக்கப் பிரதிநிதி பேரருட்திரு ஜோசப் ஸ்டப்ஸனும் இந் நிகழ்வில் சிறப்பதிதியாகக் கலந்து கொண்டமை குறிப்பிடத்தக்கது.

விடுதலைப் புலிகளின் தலைவர் வேலுப்பிள்ளை பிரபாகரன் இலங்கைக்கு அப்பாற்பட்ட நோக்கங்களைக் கொண்டிருந்ததாகவும் தென்னிந்தியாவில் உள்ள சில சக்திகளின் ஆதரவுடன் “தமிழ் ஈழத்தின் மன்னராக’ வருவதற்கு விரும்பி இருந்ததாகவும் ஜனாதிபதி மகிந்த ராஜபக்ஷ கூறியுள்ளார்.  புலிகளின் தலைவர் சேகரித்து இருந்த பெருந்தொகையான ஆயுதங்கள் தனது சொந்த தேசத்தை நிர்வகிப்பதற்கு அப்பால் அதாவது இலங்கைக்கு அப்பாற்பட்ட விருப்பத்தை அவர் கொண்டிருந்ததை வெளிப்படுத்துவதாக அமைந்துள்ளது என்று ஜனாதிபதி கூறியுள்ளார்.  அவர் (பிரபாகரன்) பெரிய கனவை கொண்டிருந்தார். இலங்கை… நான் நினைக்கவில்லை. (இது இலங்கை மட்டுமென) அவர் பாரிய நோக்கத்தை கொண்டிருந்தார். அவர் தமிழ் ஈழத்தின் மன்னராக வர விரும்பியிருந்தார் என்று ஜனாதிபதி கூறியுள்ளார்.

இல்லாவிடில் எமது இலங்கை இராணுவத்துடன் சண்டையிட இவ்வளவு ஆயுதங்கள் தேவைப்பட்டிருக்கும் என்று நான் நினைக்கவில்லை. அவருக்கு தென்னிந்தியாவில் சில அனுதாபிகள் இருந்தனர். அவருடைய திட்டம் இலங்கைக்கு அப்பாற்பட்டது என்றும் ஜனாதிபதி கூறியுள்ளார்.

கே.பி.கைதானமை இலங்கைக்கு மிகவும் முக்கியமானதாகும். வெளிநாடுகளில் இருந்து பெருந்தொகை நவீன ஆயுதங்கள் எவ்வாறு புலிகளுக்கு கிடைத்தன என்பது தொடர்பாக அவர் வெளிப்படுத்தக்கூடியதாக இருக்கும். இந்த தலைவர்கள் சிலர் இவற்றுக்கு பதில் கூறக் கூடும் என்று நான் நினைக்கிறேன். கே.பி.இந்தக் கேள்விக்கு பதிலளிக்க முடியும் என்று நான் நினைக்கிறேன்.

யார் ஆயுதங்களைப் பெற்றனர்?, யார் அவர்களுக்கு பணம் கொடுத்தனர்?, யார் அவர்களுடன் பேசினர்? அவரால் எமக்கு கூறமுடியும். முழு கட்டமைப்பு தொடர்பான உண்மையும் வெளிவரும் என்று நான் நினைக்கிறேன். ஆகக்குறைந்தது இந்த விபரமாவது வெளிவரும் என்று நான் கருதுகிறேன் என்றும் ஜனாதிபதி கூறியுள்ளார். இந்தியாவின் நியூஸ் எக்ஸ் தொலைக்காட்சிக்கு அளித்த பேட்டியிலேயே ஜனாதிபதி இதனை கூறியுள்ளார்.

புலிகள் இயக்கத்தை தொடர்ந்து வலுப்படுத்தும் பொருட்டு பெரும் தொகையான உதவிகளையும் ஆரவையும் வழங்கிய உள்நாட்டு, வெளிநாட்டு நபர்களை பற்றியும் அமைப்புக்கள் பற்றியும் இப்பொழுது கைதாகி உள்ள கே. பியிடமிருந்து பல தகவல்கள் வெளிவந்தவண்ணம் இருப்பதாக வெளிநாட்டு வேலை வாய்ப்பு மேம்பாட்டு மற்றும் நலன்புரி அமைச்சரும் தேசிய பாதுகாப்பு விவகாரங்களுக்கான ஊடகப் பேச்சாளருமான கெஹலிய ரம்புக்வெல்ல தெரிவித்தார்.

கண்டி பொல்கொல்லை கூட்டுறவு பயிற்சிப் பாடசாலை மண்டபத்தில் நேற்று நடைபெற்ற நிகழ்வில் அவர் இதனைத் தெரிவித்தார். பிரதேச செயலகப் பிரிவுடன் இணைக்கப்பட்டு வெளிநாட்டு வேலைவாய்ப்பைப் பெற்றுள்ள குடும்பங்களின் நலன்கள் மற்றும் புதிய வேலை வாய்ப்புகளை எவ்வாறு பெற்றுக்கொள்வது என்பது தொடர்பாக தெளிவுறுத்தும் செயலமர்வில் கலந்துகொண்டு அமைச்சர் உரையாற்றினார். அதன் பின்னர் நடைபெற்ற செய்தியாளர் மாநாட்டில் பேசும்பொழுதே அவர் மேற்கண்டவாறு கூறினார்.

அங்கு அவர் மேலும் கூறியதாவது, புலிகள் அமைப்பு கடந்த காலத்தில் மேற்கொண்ட ஆயுதக் கொள்வனவு, போதைப் பொருள் கடத்தல், நிதி மோசடி போன்றவை தொடர்பான பல தகவல்கள் இப்பொழுது வெளிவந்த வண்ணம் இருக்கின்றன. இந்த அமைப்பின் தலைவர்களில் ஒருவர் எனக் கருதப்படும் கே. பி. என்ற குமரன் பத்மநாதன் இப்பொழுது தொடர்ந்து விசாரிக்கப்பட்டு வருகின்றார். இந்த அமைப்புக்கு உதவி ஒத்தாசை புரிந்த உள்ளூர், வெளியூர் பிரமுகர்கள், அமைப்புக்கள் என்பன பற்றி தகவல்கள் கிட்டியுள்ளன. பல அரச சார்பற்ற நிறுவனங்களும் இவற்றில் அடங்குகின்றன.

விசாரிக்கப்பட்டு வருகின்ற கே. பி இந்தியாவிடம் இப்போதைக்கு ஒப்படைக்கப்பட மாட்டார். பதிலாக அந்நாட்டைச் சேர்ந்தவர்கள் இங்கு வந்து அரசிடம் விசாரணைகளை மேற்கொள்ளலாம். சர்வதேச புரிந்துணர்வு அடிப்படையின் கீழ் இது அமையும். பல தசாப்தங்களாக பதுங்கியிருந்த பிரபாகரனை மகாவீரன் என பூதாகரமாகக் காட்டி உலகை ஏமாற்றிய பலர் உள்ளனர். இதே நிலைக்கு கே. பி. யையும் கொண்டுவர பலர் முயற்சித்த விபரங்களையும் நாம் அறிவோம்.

பிரபாகரன் மரணித்த பின்னர் அதன் தலைமைப் பீடத்தை ஏற்றுக்கொள்ள இருப்பவரென கே. பி.யை உள்ளூரிலும் சர்வதேச மட்டத்திலும் பிரபல்யப்படுத்த மேற்கொள்ளப்பட்ட பிரசாரங்கள் யாவும் பொய்த்துவிட்டன என்பது இப்பொழுது தெளிவாகியுள்ளது. இவ்வாறு புலிகள் அமைப்பையும் அதன் தலைவர் களையும் பூதாகரமாகக் காட்டியதை எமது புலனாய்வுத்துறையைச் சேர்ந்தவர்கள் நிர்மூலமாக்கிவிட்டனர்.

உலகுக்கு அதன் உண்மையை வெளிக்காட்டியதன் மூலம் சர்வதேச மட்டத்தில் இலங்கை முக்கிய இடத்தைப் பெறுகிறது. இவ்வாறு அமைச்சர் தெரிவித்தார்.

ஜிம்பாப்வேயில் உள்ள பலவாயோ மைதானத்தில் நேற்று முன்தினம் நடைபெற்ற வங்கதேச-ஜிம்பாப்வே அணிகளுக்கு இடையிலான முதல் ஒரு நாள் சர்வதேச கிரிக்கெட் போட்டியில் அஷ்ரஃபுல் 103 ரன்கள் எடுத்து வங்கதேச அணியை 8 விக்கெட்டுகள் வித்தியாசத்தில் வெற்றிபெறச் செய்தார்.

வெற்றி பெறத் தேவையான 208 ரன்களை எடுக்க களமிறங்கிய வங்கதேசம் தமீம் இக்பால், சித்திக் மூலம் 4 ஓவர்களில் 30 ரன்கள் என்ற அதிரடித் துவக்கத்தை பெற்றது. சித்திக் 12 பந்துகளில் 5 பவுண்டரிகளுடன் 21 ரன்கள் எடுத்து ஆட்டமிழந்தார்.

ஆனால் அதன் பிறகு ஜோடி சேர்ந்த அஷ்ரஃபுல்-தமீம் இணை 22 ஓவர்களில் 137 ரன்களைச் சேர்த்தனர். தமீம் இக்பால் 68 பந்துகளில் 7 பவுண்டரிகளுடன் 63 ரன்கள் எடுத்து ஆட்டமிழந்தபோது வங்கதேசம் 25.4 ஓவர்களில் 167 ரன்கள் எடுத்து வெற்றிக்கு அருகில் வந்தது.

மொகமது அஷ்ரஃபுல் 102 பந்துகளில் 12 பவுண்டரிகள் 2 சிக்சர் சகிதம் தன் சதத்தை எட்டினார். மறு முனையில் ராகிபுல் ஹஸன் 11 ரன் எடுத்து ஆட்டமிழக்காமல் இருந்தார். வங்கதேசம் 34.3 ஓவர்களில் 211/2 என்று அபார வெற்றி பெற்றது. 5 போட்டிகள் கொண்ட இந்த ஒரு நாள் தொடரில் வங்கதேசம் 1- 0 என்று முன்னிலை பெற்றுள்ளது.