தேர்தல் கள் வரலாம், போகலாம். ஆனால், தமிழ் மக்களின் அடிப்படைக் கொள்கைகளை ஒருபோதும் விட்டுக்கொடுக்க முடியாது. சுயநிர்ணய உரிமை அடிப்படையில் சகல அதிகாரங்களுடனும் கூடிய சுயாட்சித் தீர்வை தமிழ்க் கூட்டமைப்பு தயாரித்துக் கொண்டிருக்கிறது. அதனை விரைவில் ஜனாதிபதியிடமும் இந்திய அரசிடமும் தமிழ்க் கூட்டமைப்பு முன்வைக்கும் என்று அக்கட்சியின் பாராளுமன்றக் குழுவின் தலைவரும் திருமலை மாவட்ட எம்.பி.யுமான இரா.சம்பந்தன் தெரிவித்தார்.
தமிழ்த் தேசியக் கூட்டமைப்பின் யாழ். அலுவலகத்தில் நேற்று செவ்வாய்க்கிழமை இடம்பெற்ற செய்தியாளர் மாநாட்டில் கலந்து கொண்டு உரையாற்றிய சம்பந்தன், யாழ்ப்பாண மாநகரசபைத் தேர்தலை முழு உலகும் உன்னிப்பாக அவதானித்துக் கொண்டிருக்கிறது. அதனாலேயே தேர்தலில் போட்டியிடுகின்றோம் என்றும் தெரிவித்தார். அவர் மேலும் கூறியதாவது;
தனித்துவமான வகையில் சுய நிர்ணய உரிமை அடிப்படையில் தமிழ் மக்களுக்கு சகல அதிகாரங்களுடனுமான முழுமையான சுயாட்சி வழங்கப்பட வேண்டும். காணி, பாதுகாப்பு, விவசாயம், கல்வி, கைத்தொழில்கள் அனைத்தும் உள்ளடங்கிய ஆட்சி எமது மக்களின் கைகளில் இருக்க வேண்டும். இவற்றை நிர்வகிப்பதற்கான நிதியை உள்நாட்டிலும் வெளிநாடுகளிலும் திரட்டுவதற்கு அனுமதி இருக்க வேண்டும். இனப்பிரச்சினைக்குத் தமிழ்த் தேசியக் கூட்டமைப்பு முன்வைக்கின்ற தீர்வுத் திட்டம் இதுவேயாகும்.
ஏற்கனவே, இந்திய வெளிவிவகார அமைச்சருடன் இடம்பெற்ற சந்திப்பின் போது இந்தியாவுடன் இணைந்தே இலங்கை இனப்பிரச்சினைக்குத் தீர்வு காண முடியும் என்று நாம் வலியுறுத்தியுள்ளோம். இந்தியாவும் அதற்குச் சம்மதித்துள்ளது. எமது இனப்பிரச்சினைக்கு 13 ஆவது அரசியல் திருத்தம் தீர்வாக அமையாது. 1997 மற்றும் 2004 ஆம் ஆண்டுகளில் இடம்பெற்ற தேர்தல்களின் போது தங்களைத் தாங்களே ஆள்கின்ற சுய நிர்ணய உரிமைக்காகவே கூட்டமைப்புக்கும் அதனோடிணைந்த கட்சிகளுக்கும் தமிழ் மக்கள் வாக்களித்தனர். இது தொடர்பாக அரசுடனும் சர்வதேசத்துடனும் பேசுவதற்கு கூட்டமைப்பு தயாராக இருக்கின்றது என்று குறிப்பிட்டார்.
சர்வதேச அழுத்தத்தின் காரணமாக சர்வதேச மகாநாட்டைக் கூட்டிய ஜனாதிபதி 13 ஆவது திருத்தச் சட்டம் தொடர்பாக பேச்சை ஆரம்பிக்கலாமென்று கூறியதாகவும் இதனால் ஜே.வி.பி. வெளியேறியதாகவும் ஏனைய தரப்புகளும் ஜனாதிபதியை இரகசியமாகச் சந்தித்து எச்சரித்ததாகவும் தெரிவித்த சம்பந்தன் இவ்விடயங்களைத் தொடர்ந்து 13 ஆவது திருத்தச் சட்டம் குப்பைத் தொட்டிக்குள் வீசப்பட்டதாகவும் கூறினார். தமிழ் மக்கள் யாருக்கும் அடிமைகள் அல்லவென்றும் அவர்களை யாரும் ஏமாற்ற முடியாதென்றும் கூறிய சம்பந்தன் அங்கு தொடர்ந்தும் தெரிவித்ததாவது;
தேர்தல்கள் வரலாம், போகலாம். ஆனால், நாங்கள் எமது அடிப்படைக் கொள்கைகளை விட்டுக் கொடுக்க முடியாது. எங்களுடைய எதிர்காலச் சந்ததி சுதந்திரமாகவும் கௌரவமாகவும் வாழ வேண்டும் என்பதே எமது நோக்கம். தென்னிலங்கையிலிருந்து யாழ்ப்பாணத்திற்கு வருகின்ற அமைச்சர்கள் மக்களுக்குச் சில உதவிகளை வழங்குகிறார்கள். குறிப்பாக நாங்கள் யாழ்ப்பாணம் சென்ற விமானத்தில் கூட சில கணினிகளைக் கொண்டு வந்த அமைச்சர்கள் அதனை யாழ்ப்பாணத்தில் வைத்து வழங்கியிருக்கிறார்கள்.
சர்வதேச ரீதியாக இது பாரிய குற்றமாகும். தேர்தல் காலங்களில் இவ்வாறான உதவிகளைச் செய்ய முடியாது. இந்தியா உள்ளிட்ட வெளிநாடுகளிளெல்லாம் இதற்கான தடைகள் இருக்கின்றன. ஆனால், யாழ்ப்பாணத்தில் அவை மீறப்படுகின்றன. விடுதலைப் புலிகள் அழிக்கப்பட்டு பயங்கரவாதம் முடிவுக்குக் கொண்டு வரப்பட்டு விட்டது. அதனோடு எல்லாப் பிரச்சினையும் முடிந்து விட்டது என்பதை உலகுக்கு வெளிக்காட்டவே அரசாங்கம் இந்தத் தேர்தலை நடத்துகின்றது.
ஐக்கிய நாடுகள் பாதுகாப்புசபை, ஐ.நா. செயலாளர் நாயகம், ஐரோப்பிய ஒன்றியம், கனடா, அவுஸ்திரேலியா, ஐக்கிய இராஜ்ஜியம் உட்பட பல உலக நாடுகள் இந்தத் தேர்தலை உன்னிப்பாக அவதானித்துக் கொண்டிருக்கின்றன. இதனாலேயே இந்தத் தேர்தல் முக்கியமானதாக இருக்கின்றது. இதற்காகவே நாங்கள் இந்தத் தேர்தல்களில் போட்டியிடுகின்றோம்.
வவுனியா நகரசபை, யாழ்ப்பாணம் மாநகரசபை போன்றவற்றுக்காக நடைபெறவுள்ள இந்தத் தேர்தல்களில் தமிழ்த் தேசியக் கூட்டமைப்பு வெற்றி பெறும் என்ற நம்பிக்கை எங்களுக்கு இருக்கின்றது. தமிழ் மக்களுக்கு உள்ளக சுய நிர்ணய உரிமையுடனான தீர்வு வழங்கப்பட வேண்டுமென்று ஒஸ்லோவில் எடுக்கப்பட்ட தீர்மானத்தினை ஸ்ரீலங்கா சுதந்திரக் கட்சியோ, ஜனாதிபதி மகிந்த ராஜபக்ஷவோ அப்போது எதிர்க்கவில்லை. ஏனெனில், தமிழ் மக்களுக்கான தீர்வு அதுவே என்பது அவர்களுக்கும் தெரியும்.
13 ஆவது திருத்தச் சட்டத்தின் படி காணி வழங்கல், பொலிஸ் உட்பட விவசாயம், கைத்தொழில் போன்ற அனைத்தும் மத்திய அரசிடம் இருக்கின்ற நிலையில் அங்கு பொறுப்பாக இருக்கின்ற ஒருவரைச் சார்ந்ததாக இருக்கின்ற நிலையிலான தீர்வு இந்தப் பிரச்சினைக்குத் தீர்வாக அமையாது. குறிப்பாக கிழக்கு மாகாண முதலமைச்சர் பிள்ளையான் போன்றோர் தனித்து எந்தவிதமான முடிவையும் எடுக்க முடியாத நிலையில் இருக்கின்றமை இன்று அனைவருக்கும் தெரியும்.
இந்நிலையில், தமிழ் மக்கள் வரலாற்று ரீதியாக வாழ்ந்து வந்த பிரதேசங்களில் சுய நிர்ணய உரிமையுடன் கூடிய ஆட்சியே இனப்பிரச்சினைக்குத் தீர்வாக அமையும். இது எங்களால் பெற முடியாதது அல்ல. பெற முடியாதென்று கருதுபவர்கள் ஒதுங்கியிருங்கள். தமிழ்த் தேசியக்கூட்டமைப்பானது இந்தத் தீர்வுத் திட்டத்தையே தயாரித்துக் கொண்டிருக்கின்றது. மிக விரைவில் இதனை அரசிடமும் இந்தியா உட்பட்ட சர்வதேச சமூகத்திடமும் முன்வைப்போம் என்றும் தெரிவித்தார்.
இவ்ஊடகவியலாளர் சந்திப்பில் தமிழ்த் தேசியக் கூட்டமைப்பின் பாராளுமன்ற உறுப்பினர்களான மாவை சேனாதிராஜா, சுரேஸ் பிரேமச்சந்திரன், கஜேந்திரகுமார், பொன்னம்பலம், பத்மினி சிதம்பரநாதன், சொலமன் சு.சிறில், துரைரட்ணசிங்கம் ஆகியோர் கலந்து கொண்டனர்.
ஒவ்வொரு மனிதனும் அவனது வாழ்க்கைக் காலத்தின் ஒரு கட்டத்தில் உள நெருகடிக்கு உள்ளாகிறார்கள். தமிழ் சமூகத்திலும் கணிசமான பகுதியினர் உளப் பாதிப்புக்கு உள்ளாகி உள்ளனர். ஆனால் உளப் பாதிப்பு தொடர்பான சமூகப் பார்வை காரணமாக அதனை பலரும் வெளிப்படுத்த விரும்புவதில்லை. அதனால் விளைவுகள் பாராதூரமாகின்றது. புலம்பெயர்ந்த நாடுகளின் வாழ்நிலை அவர்கள் மத்தியில் பல்வேறு வாழ்வியல் சவால்களை விட்டுள்ளது. அதில் முக்கியமானது இந்த உளவியல் பாதிப்பு.
ஆகஸ்ட் 4ல் பன்னிரண்டு மாதங்களுக்கு முன் அகிலன் கோபாலகிருஸ்ணன் மருத்துவ காரணங்களால் ஏற்பட்ட மன அழுத்தம் காரணத்தினால் தன்னுயிரை தானே மாய்த்துக் கொண்டார். நேற்று (ஓகஸ்ட் 4ல்) அகிலனை நினைவு கூரும் வகையில் உள ஆலோசனை வழங்குவதற்கான தொலைபேசிச் சேவை ஆரம்பித்து வைக்கப்பட்டு உள்ளது. அகிலன் கோபாலகிருஸ்ணனின் பெற்றோர்கள் அகிலன் பவுண்டேசனூடாக இந்தத் தொலைபேசிச் சேவையை ஆரம்பித்து வைத்தனர். கிழக்கு லண்டன் நியூஹாமில் அலுவலகத்தைக் கொண்டுள்ள இச்சேவையை வெளிநாடுகளில் உள்ளவர்களும் அணுக முடியும். ஆனால் நேரடியான சந்திப்புக்கள் லண்டனிலேயே தற்போது ஏற்பாடு செய்யப்பட்டு உள்ளது.
