2025

தையிட்டி விகாரை விவகாரம் நேர்மையாக அணுகப்படும்: புத்த சாசன அமைச்சு !

யாழ்ப்பாணம்-திஸ்ஸ விகாரையின் பிரச்சினையைத் தீர்க்க அரசாங்கம் மிகவும் நேர்மையாகச் செயல்பட்டு வருகிறது. ஆனால், சிலர் மத நல்லிணக்கத்திற்குத் தீங்கு விளைவிக்க முயற்சித்து வருவதாகவும் புத்தசாசன, சமய மற்றும் கலாசார அலுவல்கள் அமைச்சர் பேராசிரியர் ஹினிதும சுனில் செனவி ஊடகவியலாளர் சந்திப்பு ஒன்றில் தெரிவித்துள்ளார்.

அங்கு மேலும் கருத்து வெளியிட்டுள்ள அவர், “யாழ்ப்பாண திஸ்ஸ விகாரை பற்றி நிறையச் செய்திகள் இருந்தாலும், அந்த விகாரை தொடர்பான தகவல்களும் எங்கள் தலையீடுகளும் நீண்ட காலமாக நடந்து வருகின்றன. ஓர் அரசாங்கமாக, திஸ்ஸ விகாரை தொடர்பான பிரச்சினையில் தேவையான நேர்மையான தலையீட்டை நாங்கள் எடுத்துள்ளோம். திஸ்ஸவிகாரை தொடர்பில் அப்பகுதி மக்கள் எங்களைச் சந்தித்தனர். அத்துடன், யாழ்ப்பாண மாவட்ட அமைச்சர் இராமலிங்கம் சந்திரசேகரனும் எங்களைச் சந்தித்தார். அவர்களுடன் நாங்கள் சுமுகமான கலந்துரையாடல்களை மேற்கொண்டுள்ளோம்.

……………………..

இனவாதத்தை தூண்டும் கருணா அம்மான் எச்சரிக்கிறார் முன்னாள் போராளி !

கிழக்கு தமிழ் கூட்டமைப்பு உருவாக்கப்பட்டதையடுத்து எனக்கு பிரித்தானிய அரசாங்கம் தடை விதித்தமை ஒரு அரசியல் நாடகம் என்கிறார் கருணா அம்மான். கிழக்கு மாகாண சபையை தவறவிடுவோமாக இருந்தால் முஸ்லிம் தலைவர்களுடைய ஆதிக்கம் அதிகரிக்கும். அதேநேரம் தமிழர்களுடைய நிலப் பிரதேசங்கள் அபகரிக்கப்பட்டு இருப்பே கேள்விக்குறியாகும் என்று முன்னாள் பிரதி அமைச்சரான கருணா அம்மான் என்றழைக்கப்படும் விநாயகமூர்த்தி முரளீதரன் கிழக்கு தமிழர் கூட்டணியின் கல்குடா தொகுதிக்கான வேட்பாளர் அறிமுக விழாவில் தெரிவித்தார்.

அங்கு மேலும் உரையாற்றிய கருணா அம்மான், புலம்பெயர்ந்து வாழ்கின்ற படித்தவர்கள், புத்திஜீவிகள், வர்த்தகர்கள் சிந்திப்பதில்லை. தமிழ் தேசிய கூட்டமைப்பை முதலில் தோற்கடிக்க வேண்டும். அவர்கள் போலித் தேசியத்தை பேசிக்கொண்டு மக்களை ஏமாற்றி இலஞ்சம் ஊழல் எல்லாவற்றையும் செய்கின்றனர். உண்மையில் போராளிகளாக இருந்தவர்கள், மாவீரர் குடும்பங்களாக இருந்து வந்தவர்கள் தான் எங்கள் மக்களை ஆளவேண்டும். அவர்களுக்குத் தான் இந்த உரிமையும் மக்களை நடத்தும் திறமையும் இருக்கின்றது.

நாங்கள் கூட்டமைப்பை உருவாக்கியது உலகம் முழுக்க பேசும் பொருளாக பார்க்கப்படுகிறது. அண்மையில் பிரித்தானியா அரசாங்கம் கருணா அம்மானாகிய எனக்கு தடை விதித்தது. நாங்கள் என்ன பிச்சை எடுக்கப்போறோமா? இவ்வளவு நாளும் இல்லாத தடை எதற்காக இப்போது விதிக்கின்றனர்? இது ஒரு அரசியலுக்கான நாடகம் தான். கிழக்கு மாகாண சபையை தவறவிடுவோமாக இருந்தால் முஸ்லிம் தலைவர்களுடைய ஆதிக்கம் வளர்ச்சியடைந்து தமிழர்களுடைய நிலப் பிரதேசங்கள் குட்டிச்சுவராகி இருப்பே கேள்விக்குறியாகும் என்றார்.

இதேவேளை அண்மையில் தேசம் திரை நேர்காணலில் கருத்து வெளியிட்டிருந்த முன்னாள் ஈபிஆர்எல்எப் போராளி சோலையூரான் , கருணா அம்மான் , பிள்ளையான் ஆகியோரின் கூட்டணி மீள ஓர் இனவாத அரசியலையும் முஸ்லீம்கள் மீதான வெறுப்பு உணர்வையும் விதைத்து அரசியல் செய்ய முற்படுவதாக குற்றஞ்சாட்டியிருந்ததுடன் இதேநபர்கள் கிழக்கில் செய்த படுகொலைகள் ஏராளமானவை எனவும் குற்றஞ்சாட்டினார் . அத்துடன் உங்களால் இத்தனை பெரிய படுகொலைகளை செய்த ரணிலுடனும் , மகிந்தவுடனும் கூட்டணி அமைக்க முடியுமானால் எங்களுடன் கூடவே வாழும் முஸ்லீம்களுடன் பேசுவதில் என்ன சிக்கல் இருக்கப்போகிறது எனவும் சோலையூரான் கேள்வி எழுப்பியுள்ளார் .

காணாமல் போன பதினேழாயிரம் பேரில் 19 பேர் கண்டுபிடிக்கப்பட்டுள்ளனர்!

காணாமல் போனோரை கண்டறியும் ஆணைக்குழுவினால் காணாமல் போனவர்களில் இதுவரையில் 19 பேரை கண்டறிந்துள்ளதாக காணாமல்போனோரைக் கண்டறியும் ஆணைக் குழுவின் நிறைவேற்றுப் பணிப்பாளர் சட்டத்தரணி தற்பரன் நல்லூர் பிரதேச செயலகத்தில் இடம்பெற்ற கலந்துரையாடலில் தெரிவித்துள்ளார்.

சட்டத்தரணி தற்பரன் அங்கு மேலும் கருத்து தெரிவிக்கையில், “காணாமல் போனோரைக் கண்டறியும் செயலகங்களில் இதுவரை 16 ஆயிரத்து 966 பேர் காணாமல் போயுள்ளதாக பதிவு செய்யப்பட்டுள்ளதாகவும், மேலும் மூன்றாயிரத்து 742 பேர் படையினர் மற்றும் காவல்துறையினர் என பாதுகாப்பு தரப்பினராக காணாமல் போயுள்ளதாகவும் பதிவு செய்யப்பட்டுள்ளது. அதில் ஆறாயிரத்து 449 பேரின் விசாரணைகள் நிறைவு பெற்றுள்ள நிலையில் , 10 ஆயிரத்து 517 பேர் தொடர்பான விசாரணைகள் நடைபெற்று வருகின்றன.

2000 ஆம் ஆண்டிற்கு பின்பு 7 ஆயிரத்து 406 பேரும், 2000 ஆம் ஆண்டிற்குப் முன்னர் 9 ஆயிரத்து 560 பேரும் காணாமல் போயுள்ளதாக ஆணைக்குழுவில் பதிவு செய்யப்பட்டுள்ளது. இதிலே 2000 ஆம் ஆண்டிற்குப் பின்னர் காணாமல்போன ஏழாயிரத்து 406 பேரில் ஆறாயிரத்து 449 பேர் தொடர்பான விசாரணைகள் நிறைவு பெற்றுள்ளது. நிறைவு பெற்ற விசாரணைகளில் இருந்து 19 பேர் உயிரோடு இருப்பதனையும் கண்டறிந்துள்ளோம். அவர்களது விபரங்களை 2024 ஆம் ஆண்டிற்கான அறிக்கையில் இணைத்துள்ளோம், அவை விரைவில் வெளிவரும். அதேவேளை இரண்டாயிரத்து, 604 பேர் காணாமல் ஆக்கப்பட்டவர்களுக்கான சான்றிதழ்களை பெற்றுள்ளனர், 407 பேர் மரணச் சான்றிதழிற்கான சிபாரிசை பெற்றுள்ளனர். காணாமல் ஆக்கப்பட்டவர்களின் குடும்பங்களுக்கு வழங்கப்பட்ட இடைக்கால நிவாரணத்திற்கு நான்காயிரத்து 408 பேர் விண்ணப்பித்துள்ளனர்” என அவர் தெரிவித்துள்ளார்.

சாவகச்சேரியில் பாராளுமன்ற பொடியன்களை திருத்திய சாவகச்சேரி மக்கள் !

நேற்றைய தினம் மார்ச் 27 ஆம் திகதி பாராளுமன்ற உறுப்பினர் இளங்குமரன் கருணநாதன் தலைமையில் நடைபெற்ற சாவகச்சேரி பிரதேச சபை அபிவிருத்தி ஒருங்கிணைப்பு கூட்டம் பெரியளவிலான முரண்பாடுகள் இன்றி சுமூகமாக நடைபெற்று முடிந்தது. அவ்வப்போது எம்பி இளங்குமரனுக்கும் எம்பி அர்ச்சுனாவுக்கும் முட்டிக் கொண்டாலும் இருவரும் நகைச்சுவையோடு ஆக்கபூர்வமாக கூட்டத்தை நடத்தி முடித்தனர். எம்பி அர்ச்சுனா இராமநாதன் எப்பவும் போல மூச்சுக்கு முன்னூறுதரம் நான் வைத்தியர் நீ பில் போடுகிறனி என மற்றவர்களின் தொழிலை தரம்தாழ்த்தி கதைத்தார். எம்பி இளங்குமரனும் உடனடியாக துடுக்காக பதில் கொடுத்துக் கொண்டே இருந்தார். சில இடங்களில் எம்பி இளங்குமரன் வம்புக்கு அலைகிறவர்களுக்கு வாய்ப்புக் கொடுத்துக் கொண்டிருந்தார். இப்படி எம்பி இளங்குமரனும் எம்பி அர்ச்சுனாவும் வாயாடிக் கொண்டிருக்கும் போது பொதுமக்கள் குறுக்கிட்டு கண்டிக்க வேண்டியும் ஏற்பட்டது.

எம்பி இளங்குமரன் கருணாந்தன் தலைமை ஏற்று நடத்திய முதலாவது கூட்டம் சாவகச்சேரி பிரதேச சபையை இரண்டாக பிரிக்க வேண்டும் என்ற முக்கியமான தீர்மானத்துடன் முடிவடைந்துள்ளது. 60 கிராம சேவகர் அலுவலர் பிரிவை கொண்ட சாவகச்சேரி பிரதேச சபையின் அபிவிருத்தியை அடிப்படையாக கொண்டு சாவகச்சேரி மக்களின் நீண்ட கால கோரிக்கையான ,, சாவகச்சேரி பிரதேச சபையை இரண்டாக “ பிரிக்க கூட்டத்தில் கலந்து கொண்ட ரஜீவன் ஜெயசந்திரமூர்த்தி உட்பட்ட மூன்று பாராளுமன்ற உறுப்பினர்களும் தமது ஏகோபித்த ஆதரவைத் தெரிவித்தனர்.

எம்பி அர்ச்சுனா இராமநாதன் சாவகச்சேரி வைத்தியசாலையை பிரச்சினைகளை முன்னிறுத்தியே மக்கள் மத்தியில் பிரபல்யமானார். அந்தவகையில் சாவகச்சேரிப் பிரதேசத்திலேயே அவருக்கு அதிகளவான வாக்குகள் கிடைத்து அவர் பாராளுமன்றத்திற்கு தெரிவாகியிருந்தார். அதற்கேற்ப நேற்றைய அபிவிருத்தி ஒருங்கிணைப்புக் குழு கூட்டத்தில் சிறப்பாக செயற்பட்டு மக்களின் கைதட்டல்களைப் பெற்றுக் கொண்டார். சாவகச்சேரி வைத்தியசாலை தொடர்பான கோரிக்கைகளை சாவகச்சேரி பதில் வைத்தியசாலைப் பணிப்பாளர் ரஜீவ் கோபாலமூர்த்தி முன்வைத்த போது, அர்ச்சுனா தனது வழமையான குதர்க்க கேள்விகளை தவிர்த்துக் கொண்டு பொறுப்போடு நடந்து கொண்டார்.

வைத்தியர் ரஜீவ் கோபால மூர்த்தியின் நிர்வாகத்தில் சாவகச்சேரி வைத்தியசாலை தூய்மையாக உள்ளதாகவும் சிறப்பாக இயங்குவதாகவும் பாராட்டினார். அதேநேரம் எம்பி இளங்குமரனும் மகப்பேறு மருத்துவர் உள்ளாரா? , மகப்பேறு பிரிவு இயங்குகிறதா?, சத்திர சிகிச்சைப்பிரிவு இயங்குகிறதா? அறுவைச் சிகிச்சை நிபுணர்கள் உள்ளார்களா? என உருப்படியான கேள்விகளைக் கேட்டு மக்களுக்கும் அறியும்படியாக தகவல்களைப் பெற்றுக் கொடுத்தார். ஒருவகையில் சாவகச்சேரி வைத்தியசாலை ஓரளவு சீராக இயங்க வைத்தியர் இராமநாதன் அர்ச்சுனாவும் காரணம் என சாவகச்சேரி பிரதேச மக்கள் தெரிவிக்கின்றனர்.

மேலும் சாவகச்சேரி வைத்தியசாலை விடயத்தில் கூடுதல் கரிசனை காட்டிய எம்பி இராமநாதன் அர்ச்சுனா, சில வாக்குறுதிகளையும் கொடுத்தார்.

மேலும் நேற்றைய சாவகச்சேரி பிரதேச அபிவிருத்தி ஒருங்கிணைப்பு கூட்டத்தில் அப்பிரதேச வீதி அபிவிருத்தி, இராணுவத்தால் கையகப்படுத்தப்பட்ட காணிகள் விடுப்பு, சாவகச்சேரி சந்தைத் தொகுதி கடைகள் குத்தகை விவகாரம் மற்றும் வன ஜீவராசிகள் திணைக்களத்தினால் தனியார் காணிகள் கையகப்படுத்தப்பட்டு விற்கப்படும் விவகாரம் எனப் பல விடயங்கள் கலந்துரையாடப்பட்டன.

IBC கந்தையா பாஸ்கரனின் “றீச்சா” பண்ணைக்கு ஏக்கர் கணக்கில் வந்த காணிகளின் பின்னணி தொடர்பிலும் நிலவும் சர்ச்சையும் குறிப்பிடத்தக்கது. புலம்பெயர் தமிழர் எஸ்.கே. ரி. நாதன் கிளிநொச்சியில் முதியோர் இல்லம் மற்றும் சிறுவர் இல்லம் நடத்துகிற போர்வையில் விடுதலைப் புலிகளின் பராமரிப்பில் பாவணையில் இருந்த பெருந்தொகையான ஏக்கர் நிலங்களை ரணில் விக்கிரமசிங்கவின் ஆதரவில் கையகப்படுத்தியிருந்தாகவும் தகவல் வெளியாகியுள்ளது. இப்படி பல்வேறு வெளிநாட்டு முதலீட்டாளர்களுக்கு சட்டவிரோதமாக மக்கள் காணிகள் அபகரிக்கப்பட்டு வழங்கப்பட்டுள்ளதாக கூறப்படுகிறது. கடந்த காலங்களில் இவ்வாறு வழங்கப்பட்ட காணிகள் தொடர்பில் விசாரணைகளை முன்னெடுப்பது அவசியமானதாகும்.

பெண்களுக்கு எதிராக யாழ் மையவாத ஆணாதிக்க சக்திகள் ஓரணியில் திரள்கின்றன ! ஆனால் முறத்தால் விரட்டப் போகின்றனர் எம் தமிழ் பெண்கள் !
மூத்த ஆய்வாளர் வி சிவலிங்கம் அவர்களுடனான உரையாடல்

ஹமாஸ் அமைப்புக்கு எதிராக காசா எங்கிலும் பாலஸ்தீனியர்கள் போராட்டம் !

ஹமாஸ் அமைப்பு காசாவை விட்டு வெளியேற வேண்டும் என வலியுறுத்தி பாலஸ்தீனத்தில் போராட்டம் ஒன்று நடைபெற்றுள்ளதாக சர்வதேச ஊடகங்கள் செய்தி வெளியிட்டுள்ள.

காசா மக்களைப் பாதுகாக்க ஹமாஸ் விரும்பினால் அந்தப் பகுதியை விட்டு வெளியேற வேண்டும் எனப் போராட்டக்காரர்கள் வலியுறுத்தியுள்ளனர். இந்த போராட்டம் போரை நிறுத்த கோரி வடக்கு காசாவின் பல்வேறு பகுதிகளிலும் பரவுவதாகவும் சர்வதேச ஊடகங்கள் செய்தி வெளியிட்டுள்ளன.

உள்ளூராட்சி சபைத் தேர்தலில் இருந்து நிராகரிக்கப்பட்டவர்கள் உயர் நீதிமன்றத்தில் முறைப்பாடு !

யாழ்ப்பாண மாநகர சபை உள்ளிட்ட உள்ளூராட்சி சபைகளில் போட்டியிடுவதற்கான வேட்பு மனுக்கள் நிராகரிக்கப்பட்டமைக்கு எதிராக உயர் நீதிமன்றில் தமிழ் மக்கள் கூட்டணி மற்றும் ஜனநாயகத் தமிழ் தேசியக் கூட்டமைப்பு என்பன வழக்கு தொடர்ந்துள்ளன.

தமிழ் மக்கள் கூட்டணியினால் வழங்கப்பட்ட வேட்பு மனுவில் பெண் வேட்பாளர் ஒருவரின் சத்திய கூற்றில் தவறு உள்ளதாக கூறி அந்த பெண் வேட்பாளரை பட்டியலில் இருந்து நீக்கியமையால், தேவையான பெண் பிரதிநிதித்துவம் இல்லை என மாநகர சபைக்கான வேட்பு மனுவை தேர்தல்கள் திணைக்களம் முற்றாக நிராகரித்துள்ளது என குறிப்பிட்டு, ஜனாதிபதி சட்டத்தரணி ஜெப்ரி அழகரட்ணம் ஊடாக உயர் நீதிமன்றில் வழக்கு தொடரப்பட்டுள்ளது.

யாழ்ப்பாண மாநகர சபையில், முன்னாள் முதல்வர் சட்டத்தரணி வி. மணிவண்ணன் முதல்வர் வேட்பாளராக கொண்டு களமிறங்கிய தமிழ் மக்கள் கூட்டணியின் வேட்பு மனுவே நிராகரிக்கப்பட்டுள்ளமை குறிப்பிடத்தக்கது.

யாழில் வெப்பநிலை திடீர் அதிகரிப்பு !

யாழ்.குடா நாட்டில் வெப்பநிலை அதிகரித்துள்ளமையால் உடல் வெப்பத்தை தணிக்க கூடிய நீராகாரங்களை அதிகமாக அருந்துமாறு யாழ் மாவட்ட அனர்த்த முகாமைத்துவ மத்திய நிலைய உதவி பணிப்பாளர் என். சூரியராஜா அறிவுறுத்தியுள்ளார்.

இதேவேளை அண்மையில் உடலில் நீர் இழப்பு ஏற்பட்டு இருவர் மரணமடைந்தமையும் குறிப்பிடத்தக்கது.

பாதிக்கப்படுவது மீனவர்கள் தான் – இரு நாட்டு மீனவர்கள் சந்திப்பு !

இலங்கை – இந்திய மீனவர் பிரச்சினைக்குத் தீர்வு காண்பதற்காக இந்தியாவின் இராமநாதபுரம் மாவட்டத்திலிருந்து வந்த ஐவர் கொண்ட குழு – இலங்கை மீனவ மீனவ பிரதிநிதிகளுடன் வவுனியாவில் கலந்துரையாடியிருந்தனர் .

மீனவர் பிரச்சினையைத் தீர்ப்பதற்கு அரசமட்ட பேச்சுவார்த்தையை முன்னெடுத்து நிரந்தர தீர்வை எட்ட வேண்டும் என கலந்துரையாடப்பட்டுள்ளது.

2016 ஆம் ஆண்டு டெல்லியில் நடைபெற்ற இலங்கை இந்திய வெளிவிவகார அமைச்சு மட்டத்தில் எடுக்கப்பட்ட தீர்மானங்கள் இன்று நடைமுறைப்படுத்தாமையால் வரை தமிழ்நாட்டிலும் வடமாகாணத்திலும் மீனவர்கள் பாதிக்கப்படுவதாக குறிப்பிட்டுள்ள, வடமாகாண கடற்றொழிலாளர் இணையத்தின் அன்னலிங்கம் இந்திய மீனவர்களுடன் வவுனியாவில் இடம்பெற்ற சந்திப்பு திருப்தி அளிப்பதாகவும் தெரிவித்துள்ளார்.

கோப்பாய் அபிவிருத்தி குழு கூட்டம் – அடக்கி வாசித்த எம்.பி இராமநாதன் அர்ச்சுனா

கோப்பாய் பிரதேச ஒருங்கிணைப்புக் குழுக் கூட்டம் ஒருங்கிணைப்புக் குழுத் தலைவரும் நாடாளுமன்ற உறுப்பினருமான ஜெயச்சந்திரமூர்த்தி ரஜீவன் தலைமையில் கோப்பாய் பிரதேச செயலகத்தில் நடைபெற்றுள்ளது.

குறித்த கூட்டத்தில், வீதி அபிவிருத்தி, வீடமைப்பு, விவசாயம், கல்வி, நீர்ப்பாசனம் சம்பந்தமான வேலைத்திட்டங்கள் குறித்து இதன்போது கலந்துரையாடப்பட்டது.

இந்தக் கூட்டத்தில் நாடாளுமன்ற உறுப்பினர்களான இராமநாதன் அர்ச்சுனா, ஜெயச்சந்திரமூர்த்தி ரஜீவன், பிரதேச செயலாளர், மற்றும் துறை சார்ந்த உத்தியோகத்தர்கள் எனப் பலர் கலந்து கொண்டனர். அடுத்தடுத்து நல்லூர் பிரதேச செயலக கூட்டம், யாழ்ப்பாண மாவட்ட அபிவிருத்தி குழு கூட்டம் ஆகியவற்றில் எம்.பி இராமநாதன் அர்ச்சுனா பலத்த குழப்பங்களை ஏற்படுத்தியிருந்த போதும் கூட கோப்பாய் அபிவிருத்தி குழு கூட்டத்தில் எம்.பி இராமநாதன் அர்ச்சுனா அமைதி காத்ததுடன், முக்கியமான விடயங்களை நீங்கள் முன்வைப்பதற்கு எந்த ஆட்சேபனையும் இல்லை என எம்.பி அர்ச்சுனாவை நோக்கி எம்.பி ரஜீவன் தெரிவித்திருந்தமை குறிப்பிடத்தக்கது.