25

கிளிநொச்சி மாவட்டத்துக்கான மின் விநியோக நடவடிக்கைகளை முன்னெடுப்பதற்கு சுமார் 500 மில்லியன் ரூபா தேவையென மதிப்பிடப்பட்டிருப்பதாக மின்சார சபை தெரிவித்துள்ளது. இம் மாவட்டத்திற்கான மின் விநியோக நடவடிக்கைகளை நிறைவு செய்ய சுமார் ஒரு வருட காலம் தேவையென மின்சார சபை உயர் அதிகாரி ஒருவர் தெரிவித்தார்.

வவுனியாவில் இருந்து மாங்குளத்திற்கான மின் விநியோக வேலைத்திட்டங்கள் ஆரம்பிக்கப்பட்டுள்ள நிலையில், புளியங்குளத்தில் அதிசக்திவாய்ந்த மின்சார கேபிள்கள், மின் கோபுரங்கள் நிர்மாணிக்கப்படவுள்ளதாக அவர் குறிப்பிட்டார். ஜப்பானின் நிதி உதவியுடன் முன்னெடுக்கப்படும் இத்திட்டத்தின் கீழ், புளியங்குளத்துக்கும் வவுனியாவுக்கு மிடையே 66 கிலோ மீற்றர் நீளத்துக்கு மின் இணைப்பு வேலைகள் முன்னெடுக்கப்படவுள்ளதாக அவர் தெரிவித்தார். கிளிநொச்சி மாவட்டத்துக்கான முழு மின்விநியோகம், அங்கு உப மின்நிலையம் ஒன்று நிர்மாணப்படுத்தப்பட்டதன் பின்னரே இடம் பெறுமெனவும், அதற்கு முன்னர் தற்காலிக மின் இணைப்புக்களை வழங்க அரசாங்கம் திட்டமிட்டுள்ளதாக அவர் தெரிவித்தார்.

மேலும், மோதல் காரணமாக கிளிநொச்சியில் அமைக்கப்பட்டிருந்த உப மின் நிலையம் சேதமடைந்துள்ள நிலையில், மீண்டும் அதே இடத்தில் அதனை மீள நிர்மாணிப்பதற்கும் மின்சார சபை திட்டமிட்டுள்ளது. அதேசமயம், இடம் பெயர்ந்த மக்களை மீளவும் குடியமர்த்துவதற்கு முன்பதாக, அம்மக்களுக்கான குடிநீர், மின்சாரம் போன்ற அனைத்து அடிப்படை வசதிகளையும் ஏற்படுத்திக் கொடுப்பதற்கான முயற்சிகள் மேற்கொள்ளப்படுவதாக மீள்குடியேற்ற அமைச்சு தெரிவித்துள்ளது.

135 பயணிகளுடன் சென்ற துருக்கி விமானம் விழுந்து நொறுங்கியது. நெதர்லாந்து நாட்டில் உள்ள ஆம்ஸ்டர்டாம் விமான நிலையத்தில் 3 துண்டுகளாக நொறுங்கியது.

இந்த விபத்தில் ஒருவர் பலியானர். 20 பேர் படுகாயம் அடைந்தனர். விமானம் தீ பிடிக்காததால் விமானத்தில் பயணம்  செய்த பயணிகள் பலர் அதிர்ஷ்டவசமாக உயிர் தப்பியதாக தகவல்கள் தெரிவிக்கின்றன.

இலங்கைத் தமிழர்களைக் காக்கக் கோரி திமுகவைச் சேர்ந்த தொண்டர் கோகுல்ரத்தினம் என்பவர் விருதுநகர் மாவட்ட ஆட்சியர் அலுவலக வளாகத்தில் தீக்குளித்து உயிரிழந்தார். கடந்த சில நாட்களில் இதுபோல தீக்குளித்து உயிரிழந்த இரண்டாவது திமுக தொண்டர் இவர் என்பது குறிப்பிடத்தக்கது.

சில நாட்களுக்கு முன்பு, சென்னை தரமணியைச் சேர்ந்த சிவப்பிரகாசம் என்ற திமுக தொண்டர், சென்னையில் திமுக இளைஞர் அணி நடத்திய மனிதச் சங்கிலிப் போராட்டத்தின்போது தீக்குளித்து தற்கொலை செய்து கொண்டார். இந்த நிலையில், இன்னும் ஒரு திமுக தொண்டர் தற்கொலை செய்து கொண்டுள்ளார்.

சிவகாசி அருகே உள்ள ஆனையூரைச் சேர்ந்தவர் கோகுல்ரத்தினம் (44). தி.மு.க. தொண்டரான இவர் இன்று மதியம் விருதுநகர் ஆட்சித் தலைவர் அலுவலகத்திற்கு வந்தார். கையில் மண்ணெண்ணையை வைத்திருந்தார். உள்ளே வந்த அவர் திடீரென உடலில் மண்ணெண்ணையை ஊற்றிக்கொண்டு தீ வைத்துக் கொண்டார். தீப்பற்றிய உடலுடன் தி.மு.க. கொடியை பிடித்தபடி ஓடி வந்தார். அப்போது அந்தப் பகுதி வழியாக ரோந்து வந்த போலீஸார் அதிர்ச்சி அடைந்து கோகுல்ரத்தினத்தை காப்பாற்ற முயன்றனர்.  ஆனால் உடல் முழுவதும் கருகிப் போன கோகுல் ரத்தினம் சம்பவ இடத்திலேயே  உயிரிழந்தார்.

இலங்கையின் வடபகுதியிலிருந்து இடம்பெயர்ந்துள்ள தமிழ் மக்களுக்கு நிவாரணப் பொருட்களை சேகரிக்குமாறு காங்கிரஸ் தலைவி சோனியா காந்தி நேற்று முன்தினம் திங்கட்கிழமை தனது கட்யின் தென்மாநிலப் பிரிவுகளுக்கு அறிவுறுத்தியுள்ளார். இலங்கைத் தமிழர் பிரச்சினையில் மத்திய அரசு தூர விலகி நிற்பதாக ஆத்திரமடைந்துள்ள தமிழ்நாட்டின் விசனத்தைத் தணிப்பதற்காகவே அவர் இந்த நடவடிக்கை எடுத்துள்ளதாக நம்பப்படுகின்றது.

மேலும் பாதிக்கப்பட்ட மக்களுக்கு உதவுவதற்காக வெளிநாட்டு அமைச்சுடன் இணைந்து பணியாற்றும்படி தனது சகாக்களுக்கும் சோனியா காந்தி அறிவுறுத்தியுள்ளார். இலங்கைத் தமிழ் மக்களின் அவல நிலை தொடர்பாக தமிழ் நாட்டில் போராட்டங்கள் அதிகரித்து வரும் நிலையில் இந்த நடவடிக்கை முன்னெடுக்கப்பட்டுள்ளது.

மோதலை இடைநிறுத்தி பொது மக்கள் பாதுகாப்புடன் வெளியேறுவதற்கு இடமளிக்குமாறு ஐ.நா. செயலாளர் நாயகம் பான் கி மூன் இலங்கை அரசாங்கத்தையும் விடுதலைப்புலிகளையும் மீண்டும் வலியுறுத்தியுள்ளார். தேவையற்ற விதத்தில் பொது மக்களுக்கு மேலும் இழப்புகளையும் இலங்கை சமூகத்திற்கு அழிவையும் ஏற்படுத்தாமல் இந்த மோதலை முடிவுக்கு கொண்டு வர வேண்டிய அவசியத் தேவை இருப்பதாக ஐ.நா.வில் நிருபர்கள் மத்தியில் பான் கி மூன் தெரிவித்திருக்கிறார்.

மோதல் அதிகரித்திருப்பதால் அங்கு அகப்பட்டிருக்கும் பொது மக்களின் இறப்புகள் அதிகரித்து வருவதையிட்டு ஐ.நா. கவலையடைந்துள்ளது. மோதல் பகுதியிலிருந்து வெளியேற முயற்சிக்கும் பொது மக்கள் பாதுகாப்பாக வெளியேற இடமளிப்பதற்காக யுத்தத்தை இடைநிறுத்துவதற்கு ஐ.நா. ஆதரவளிக்கின்றது என்று பான் கி மூன் கூறியுள்ளார்.

யுத்த நிறுத்தம் என்ற வார்த்தையை ஐ.நா. செயலாளர் நாயகம் பயன்படுத்தவில்லை. ஆனால், பொது மக்களைப் பாதுகாக்குமாறு மோதலில் ஈடுபடும் இரு தரப்பினரையும் வலியுறுத்தி முன்னர் அவர் விடுத்த அறிக்கைகளிலும் பார்க்க அவர் இப்போது தெரிவித்துள்ள கருத்துக்கள் அதிகமானதாக இருப்பதாக ராய்ட்டர் செய்திச் சேவை குறிப்பிட்டுள்ளது. “சகல தரப்பினரும் மோதலை முடிவுக்கு கொண்டு வருவதற்கான அரசியல் பேச்சுவார்த்தையை முன்னெடுக்க வேண்டும்’ என்ற தனது அழைப்பை மீண்டும் ஐ.நா. விடுப்பதாக பான் கி மூன் தெரிவித்துள்ளார

புலம்பெயர் தொழிலாளர்களுக்கென தேசியக் கொள்கையொன்று நேற்று அறிமுகப்படுத்தப்பட்டுள்ளது. இலங்கையின் பொருளாதாரத்திற்கு முதுகெலும்பாக இருக்கின்ற புலம்பெயர் தொழிலாளர்களின் நலன் மற்றும் அவர்களது குடும்ப நலன்களைக் கருத்திற்கொண்டு இந்த கொள்கை அறிமுகப்படுத்தப்படுவதாக வெளிநாட்டு வேலைவாய்ப்பு ஊக்குவிப்பு நலத்துறை அமைச்சர் கெஹெலிய ரம்புக்வெல்ல கூறினார்.

இது தொடர்பாக அமைச்சில் நடந்த நிகழ்வில் கருத்துத் தெரிவித்த அமைச்சர் கூறியதாவது, வெளிநாட்டு வேலைவாய்ப்பு முகவர் நிறுவனங்களுடனான வருடாந்த அனுமதிப்பத்திரத்தை புதுப்பிப்பதற்கு உத்தரவு பெற்ற வெளிநாட்டு வேலைவாய்ப்பு முகவர் சங்கத்தின் கடிதம் அவசியமில்லை.

இந்த நடைமுறை இன்று முதல் அமுல்படுத்தப்படுகிறது. இனிவரும் காலங்களில் வெளிநாட்டு வேலைவாய்ப்பு முகவர்களுக்கு புதிதாக அனுமதிப்பத்திரம் வழங்குதல், அனுமதிப் பத்திரத்தை புதுப்பித்தல் போன்ற தொடர்பில் வெளிநாட்டு வேலைவாய்ப்புப் பணியகமே தீர்மானங்கள் மேற்கொள்ளும் என்று அமைச்சர் கூறினார்.

அரசாங்கம் வெளிநாடுகளுக்கு வேலைவாய்ப்பு பெற்றுச் செல்லும் தொழிலாளர்களுக்காக குரல் கொடுக்குமேயன்றி தொழில் வழங்குநர்களுக்கு உதவ முன்வரமாட்டாது. பல்வேறு அமைப்புகளின் தேவைகளுக்கமைய கொள்கைகளை மாற்றுவதற்கு அரசாங்கம் தயாராக வில்லையென்றும் அமைச்சர் தெரிவித்தார்.
குவைத் நாட்டுக்கு பணிப்பெண்களாக செல்வோர் காப்புறுதி செய்து கொள்வது கட்டாயமாக்கப்படும் எனக் கூறியமைக்கு காரணம் அவர்களின் நலனைக் கருத்திற்கொண்டமையால் தான் எனவும் அமைச்சர் தெரிவித்தார். இந்தக் கட்டணங்களை செலுத்த தவறும் தொழில் வழங்குநர்களின் கீழ் பணியாளர்கள் சேவைக்கு அமர்த்தப் படமாட்டார்களென்றும் அமைச்சர் கெஹெலிய ரம்புக் வெல்ல கூறியுள்ளார்.

இனப் பிரச்சினைக்கான தீர்வுத் திட்டம் தொடர்பில், சர்வகட்சிப் பிரதிநிதிகள் குழு இவ்வாரம் தீர்மானமொன்றை மேற்கொள்ளவுள்ளதாக குழுவின் தலைவர் அமைச்சர் பேராசிரியர் திஸ்ஸ விதாரண தெரிவித்தார்.

இவ்வாரத்துடன் குழுவின் பேச்சுவார்த்தைகளை நிறைவு செய்ய எதிர்பார்ப்பதாகக் கூறிய அமைச்சர் விதாரண, அதன் பின்னர் ஐ. தே. க. வின் கருத்தை அறிய, அவர்களைப் பேச்சுவார்த்தைக்கு அழைக்கவுள்ளதாகக் கூறினார்.  சர்வகட்சிப் பிரதிநிதிகள் குழுவின் கூட்டம் கடந்த இரு வாரங்களாக நடைபெறவில்லை. எனவே, இந்த வார இறுதிக்குள் கூடி கட்சிகளிடையே இணக்கப்பாடொன்றை ஏற்படுத்த எதிர் பார்ப்பதாக அமைச்சர் தெரிவித்தார்.

தீர்வுத் திட்டம் தொடர்பில் ஐ. தே. க. வுடன் பேச்சு நடத்தப்பட்டதன் பின்னர், தமிழ்த் தேசிய கூட்டமைப்பினரை அழைத்துப் பேச உள்ளதாக அமைச்சர் கூறினார். அதனைத் தொடர்ந்து தீர்வு யோசனைகள் ஜனாதிபதியிடம் கையளிக்கப்படுமென்று அமைச்சர் தெரிவித்தார்.

இலங்கையில் மோதல் பகுதியிலிருந்து பொதுமக்களை வெளியேற்றுவதற்குப் பொருத்தமானதும் நம்பிக்கையூட்டுவதுமான நடவடிக்கைகளை மேற்கொள்ளுமாறு கொழும்பைக் கேட்டிருக்கும் இந்திய அரசாங்கம் இதற்கு உதவியளிக்கத் தயாராக இருப்பதாகவும் அறிவித்துள்ளது. மோதல் பகுதியில் அகப்பட்டுள்ள இடம்பெயர்ந்த மக்கள் பாதுகாப்பாக வெளியேற அனுமதியளிக்க வேண்டுமென்று சர்வதேச ரீதியாக வேண்டுகோள் விடுக்கப்பட்டுள்ளது. இது தொடர்பாக கலந்துரையாடுவதற்கான விருப்பத்தைப் புலிகள் தெரிவித்திருப்பதாக செய்திகளில் நாம் பார்த்தோம் என்று இந்திய வெளிவிவகார அமைச்சுப் பேச்சாளர் விஷ்ணு பிரகாஷ் நேற்று செவ்வாய்க்கிழமை தெரிவித்திருக்கிறார்.

இதனடிப்படையிலேயே இடம்பெயர்ந்த மக்கள் பாதுகாப்பாக வெளியேறுவதற்குப் பொருத்தமானதும் நம்பிக்கையானதுமான நடவடிக்கைகளை மேற்கொள்ளுமாறு இலங்கையையும் அக்கறையுடைய ஏனையவர்களையும் இந்தியா கேட்டுக் கொள்கின்றது என்றும் விஷ்ணு பிரகாஷ் கூறியுள்ளார்.

அதேசமயம் இடம்பெயர்ந்தவர்கள் வெளியேற்றப்படுவதை சர்வதேச நிறுவனங்களும் மேற்பார்வை செய்யும் ஏற்பாடுகளும் உள்ளடக்கப்படக் கூடியதாக இருக்க வேண்டும் என்றும் அந்த அறிக்கையில் குறிப்பிடப்பட்டுள்ளது. அதேவேளை, பாதுகாப்பு வலயங்களுக்கு இருதரப்பும் மதிப்பளிக்க வேண்டும் என்றும் குறிப்பிடப்பட்டுள்ளது.
காயமடைந்தவர்களில் சிறிய தொகையினர் கடல் மார்க்கமாக வெளியேற்றப்பட்டிருப்பதைச் சுட்டிக் காட்டியிருப்பதுடன் தரை, கடல்மார்க்கமாக அதிக எண்ணிக்கையானோரை வெளியே கொண்டு வரும் நடவடிக்கையை சாத்தியமானதாக மாற்றுமாறு சம்பந்தப்பட்ட தரப்பினரிடம் புதுடில்லி வேண்டுகோள் விடுத்திருக்கிறது. அதேவேளை, அப்பாவிப் பொதுமக்களை வெளியே கொண்டு வரும் நடவடிக்கைகளுக்குத் தேவையான உதவிகளை வழங்க இந்தியா ஆயத்தமாக இருப்பதாகவும் அத்துடன், அவர்களுக்குத் தேவையான நிவாரணப் பொருட்கள், மருந்துகள், மருத்துவ உதவிகளை வழங்கத் தயாரெனவும் வெளிவிவகார அமைச்சுப் பேச்சாளர் கூறியுள்ளார். மேலும், காயமடைந்த மற்றும் நோயாளிகளுக்கு மருத்துவ உதவிகளை வழங்கும் ஏற்பாடுகள் தொடர்பாக இலங்கை அரசாங்கத்துடன் நடவடிக்கைகளை மேற்கொண்டிருப்பதாகவும் அவர் தெரிவித்திருக்கிறார்.

விடுதலைப் புலிகள் தென்னிந்தியாவின் பொருளாதார மற்றும் பொதுமக்கள் இலக்குகள் மீது விமானத்தாக்குதல்களை நடத்தக் கூடுமென இராணுவத் தளபதி லெப்.ஜெனரல் சரத் பொன்சேகா எச்சரித்துள்ளார். படையினரின் தாக்குதல்களால் ஏற்பட்டிருக்கும் விரக்தி நிலை காரணமாகவே விடுதலைப்புலிகள் இந்தியாவை இலக்காகக் கொள்ளக் கூடுமென இந்திய தினசரி பத்திரிகையொன்றுக்கு வழங்கியிருக்கும் பேட்டியில் லெப். ஜெனரல் சரத் பொன்சேகா சுட்டிக்காட்டியிருக்கிறார்.

அண்மையில் கொழும்பு மீது மேற்கொள்ளப்பட்ட விமானத் தாக்குதல் முயற்சியின் போது விடுதலைப்புலிகளின் இரு விமானங்களும் சுட்டு வீழ்த்தப்பட்டதையடுத்து, புலிகளின் வான் பலம் அதிகளவில் குறைக்கப்பட்டுள்ள போதிலும் இந்திய இலக்குகளைத் தாக்கும் திறன் இன்னும் இருப்பதாகவும் அவர் குறிப்பிட்டிருக்கிறார். இந்திய மத்திய அரசாங்கம் விடுதலைப்புலிகளின் வழியில் நீண்டு இழுபட்டுக் கொண்டிராமல் தற்போது பொதுமக்களின் நிலைமைகள் பற்றி மட்டுமே பேசுவதால் விடுதலைப் புலிகளும் தென்னிந்தியாவிலுள்ள அவர்களது அனுதாபிகளும் ஆத்திரமடைந்துள்ளனர் என்று இலங்கை இராணுவத் தளபதி தெரிவித்திருப்பதாகவும் அந்தப் பத்திரிகையில் செய்தி வெளியிடப்பட்டிருக்கிறது.

அவர்கள் (புலிகள்) இலங்கையின் வடக்கு, கிழக்கு முழுவதுமாக பறந்து வந்து கொழும்பிலுள்ள இலக்குகள் மீது தாக்குதல் நடத்திவிட்டு மீண்டும் திரும்பிச் செல்லும் திறனைக் கொண்டிருக்கின்றனர். அவர்கள் இந்தியாவிலும் இதையே செய்ய முடியும் என்றும் இராணுவத் தளபதி சரத் பொன்சேகா சுட்டிக்காட்டியிருக்கிறார். இலங்கை இராணுவத்தினரால் மேற்கொள்ளப்பட்டுவரும் தாக்குதல் நடவடிக்கை மூலம் விடுதலைப் புலிகளின் 7 விமான ஓடுபாதைகளும் கைப்பற்றப்பட்டுவிட்ட போதிலும் கூட அவர்களால் கொழும்பு மீது விமானத் தாக்குதல் நடத்த முடிந்தமையானது இந்தியாவுக்கான அச்சுறுத்தல் நம்பக் கூடியதாக இருப்பதாகவும் தெரிவிக்கப்பட்டுள்ளது.

அத்துடன், விடுதலைப் புலிகளின் தாழப் பறக்கும் விமானத்தைக் கண்டறிவது கடினமென்பதுடன் அதற்கு இந்தியாவினுள் 150170 கிலோ மீற்றரை விட அதிகமான தூரம் சென்று இலகுவாகத் தாக்குதல்களை நடத்த முடியுமென்று சரத் பொன்சேகா கூறியிருக்கிறார். இதேநேரம் அது தற்கொலைத் தாக்குதல் நடவடிக்கையாக இருந்தால் விமானத்துக்கு மேலும் நீண்ட தூரம் உள்ளே பயணிக்க முடிவதுடன் விமானம் திரும்பியும் வராது என்றும் அவர் எச்சரித்திருக்கிறார்.

இதேவேளை, இடம்பெயர்ந்த தமிழ்ப் பொதுமக்களை மோதல்கள் நடைபெறும் பிரதேசத்திலிருந்து வெளியேற அனுமதிப்பதில்லையென குற்றஞ்சாட்டி விமர்சனங்கள் அதிகரித்திருக்கும் நிலையில், இந்தியாவை இலக்கு வைப்பதால் விடுதலைப் புலிகளுக்கு ஏதேனும் பயன் இருக்கிறதா என்ற கேள்விக்கு பதிலளித்திருக்கும் லெப். ஜெனரல் பொன்சேகா; ராஜீவ் காந்தியை (இந்திய முன்னாள் பிரதமர்) இந்திய மண்ணிலேயே படுகொலை செய்யுமளவிற்கு போதுமானளவு துணிச்சலோ அல்லது முட்டாள்த்தனமோ புலிகளுக்கு இருந்தது. அவர்கள் சமாதானத்தையோ அல்லது பேச்சுகளையோ நம்பவில்லை. தற்போது, அவர்கள் முல்லைத்தீவில் வெறும் சுமார் 35 சது கிலோமீற்றர் பரப்புடைய நிலப்பரப்பிற்குள்ளும் 20 சதுர கிலோமீற்றர் பரப்புடைய கடற்கரை பிரதேசத்திற்குள்ளும் முடக்கப்பட்டுள்ளனர். அவர்கள் விரக்தியடைந்துள்ளனர் என்று கூறியிருக்கிறார்.

இலங்கையில் நடைபெறவுள்ள சார்க் வெளிவிவகார அமைச்சர்களின் மாநாட்டில் இந்திய வெளிவிவகார அமைச்சர் பிரணாப் முகர்ஜீ கலந்து கொள்ள மாட்டார் என அறிவிக்கப்பட்டுள்ளது. இந்தியாவில் ஏற்பட்டுள்ள அரசியல் குழப்ப நிலைமைகளின் காரணமாக இந்தத் தீர்மானம் எடுக்கப்பட்டுள்ளதாகத் தெரிவிக்கப்படுகிறது.

கொழும்பில் நடைபெறவுள்ள சார்க் வெளிவிவகார அமைச்சர்களின் மாநாட்டில் கலந்துகொள்ளப் போவதில்லை என அவர் இறுதி நேரத்தில் முகர்ஜீ அறிவித்துள்ளார். பிரணாப் முகர்ஜீக்கு பதிலாக மத்திய வெளியுறவுத்துறை அமைச்சர் ஈ.அஹமட் கலந்துகொள்வார் எனத் தெரிவிக்கப்படுகிறது.