2009

திரு கோணமலை சம்பவம் தொடர்பாக விசாரணைகளை மேற்கொள்வதற்கென கொழும்பிலிருந்து தொற்று நோய்ப் பிரிவு பிரதிப் பணிப்பாளர் ஒருவர் அங்கு அனுப்பப்பட்டுள்ளார்.

 இவர் திருகோணமலையில் தற்போது விசாரணைகளில் ஈடுபட்டுள்ள மருத்துவக் குழுவுடன் இணைந்து செயற்படவுள்ளதாக சுகாதார அமைச்சின் செயலாளர் கஹந்த லியனகே தெரிவித்தார்.

இச்சம்பவம் தொடர்பில் இரசாயன பரிசோதனை மற்றும் சம்பந்தப்பட்ட உணவுப் பொருள் பரிசோதனைகள் இடம்பெறுவதுடன் அதன் அறிக்கைகளை விரைவாக சுகாதார அமைச்சுக்கு அனுப்பும்படி சம்பந்தப்பட்ட அதிகாரிகளிடம் சுகாதார அமைச்சு பணிப்புரை விடுத்துள்ளதாகவும் அவர் தெரிவித்தார்.

கடவுச் சீட்டு தயாரிக்கப்பட்டதும் அதனை யைடக்கத் தொலைபேசியில் குறுந் தகவல் மூலம் விண்ணப்பதாரிகளுக்கு அறிவிக்க குடிவரவு குடியகல்வு திணைக்களம் நடவடிக்கை எடுத்துள்ளது. இன்று முதல் இந்த புதிய நடைமுறை அமுலுக்கு வருவதாக உள்துறை அமைச்சின் உயரதிகாரியொருவர் தெரிவித்தார்.

குடிவரவுகுடியகல்வு திணைக்களம் மக்களுக்கான தமது சேவையை விரிவுபடுத்தும் பல்வேறு நடவடிக்கைகளை முன்னெடுத்துவருகிறது. அதன் ஒரு அம்சமாகவே மேற்படி திட்டம் இன்று முதல் நடைமுறைக்குவருவதாக அவர் தெரிவித்தார்.

அத்துடன் திணைக்களத்தின் முதலாவது மாடி மக்களை வரவேற்று, அவர்களின் தேவைகளைக் கேட்டறியும் பிரிவாக இன்று முதல் இயங்கவுள்ளது. சேவைகளைப் பெற்றுக் கொள்வதற்காக வரும் மக்களின் நலன் கருதி விசேட வசதிகள் இங்கு ஏற்பாடு செய்யப்பட்டுள்ளதாகவும் அவர் தெரிவித்தார்.

இது தொடர்பான விசேட நிகழ்வொன்று இன்று கொழும்பு புஞ்சிபொரளையிலுள்ள குடிவரவு குடியகல்வு திணைக்களத்தில் இடம்பெறவுள்ளது. இந்நிகழ்வில் குடியவரவு குடியகல்வு நிர்வாகச் செயலாளர் நாயகம் பி. பீ. அபேயகோன் ஸ்ரீலங்கா டெலிகொம் நிறுவனத் தலைவர் லேஹா டீ சில்வா ஆகியோரும் கலந்து கொள்ளவுள்ளனர்.

பாடசாலை அதிபர்கள் பதவி விலகல் கடிதங்களைக் கையளித்தால், அவற்றை ஏற்றுக்கொள்ள தயாராக உள்ளதாக கல்வி அமைச்சர் சுசில் பிரேம்ஜயந்த் தெரிவித்தார்.

அதிபர்களின் பிரச்சினைகள் பெரும்பாலும் தீர்க்கப்பட்டு விட்டதாகவும், எட்டப்பட்டுள்ள தீர்வினை அரசசேவை ஆணைக்குழு மூலம் நடைமுறைப்படுத்த நடவடிக்கைகள் முன்னெடுக்கப்படுவதாக கூறிய அமைச்சர் சுசில் பிரேம்ஜயந்த், அதிபர்களுக்குச் சம்பந்தமில்லாத ஆசிரிய சங்கமொன்று, பதவிகளை இராஜினாமா செய்யப் போவதாக அறிவித்துள்ளதாகவும் கூறினார்.

குறித்த சங்கத்திற்குப் பேச்சு நடத்த வருமாறு அழைப்பு விடுத்திருந்ததாகவும், எனினும், அந்த அழைப்பை ஏற்காது தொழிற்சங்க நடவடிக்கையில் இறங்கியிருப்பதாகவும் அமைச்சர் தெரிவித்தார். எவ்வாறெனினும், அவர்களின் பதவி விலகல் கடிதங்களை ஏற்றுக்கொள்வதற்கு கல்வி அமைச்சின் செயலாளர் தயாராகவே உள்ளாரென்று அமைச்சர் தெரிவித்தார்.

இதேவேளை, திட்டமிட்டபடி அதிபர்கள் தமது பதவி விலகல் கடிதங்களைக் கையளிப்பதற்கு சகல ஏற்பாடுகளும் பூர்த்தி செய்யப்பட்டுள்ளதாக இலங்கை ஆசிரிய தொழில் சார்ந்தோர் சங்கத்தின் பொதுச் செயலாளர் வசந்த தர்மசிறி தெரிவித்தார்.

சேவை மூப்பின் அடிப்படையில் அதிபர்களுக்குப் பதவி உயர்வு வழங்கப்படவில்லை என்று தெரிவித்த சங்கத்தின் பொதுச் செயலாளர், நீண்டகாலமாகத் தீர்க்கப்படாமலிருக்கும் இந்தப் பிரச்சினையை கல்வி அமைச்சர் கண்டுகொள்ளவில்லை என்றும் தெரிவித்தார்.  இந்தக் குற்றச்சாட்டை முற்றாக நிராகரித்த கல்வி அமைச்சர், ஏற்கனவே, தீர்க்கப்பட்டுவிட்ட பிரச்சினைகள் தொடர்பில் இந்தச் சங்கம் பிரபல்யத்தைத் தேட முனைவதாகவும் தெரிவித்தார்.

இன்றைய தினம் முற்பகல் 11 மணிக்கு அதிபர்களைக் கல்வி அமைச்சுக்கு வரவழைத்துள்ள இந்தத் தொழிற்சங்கம், பதவி விலகல் கடிதங்களைத் தனியே கையளிக்குமாறும் கேட்டுக்கொண்டுள்ளது.

தடுப்பு மருந்தில் எவ்வித பிழையுமில்லை. ஒவ்வாமையினால் ஏற்பட்ட அதிர்ச்சியே சிறுமியின் மரணத்துக்குக் காரணம் என்பது ஆரம்ப விசாரணைகளிலிருந்து தெரியவந்துள்ளதாக சுகாதார அமைச்சின் செயலாளர் டாக்டர் கஹந்த லியனகே தெரிவித்தார்.

கொழும்பிலிருந்து அனுப்பப்பட்ட சுகாதார அமைச்சு மருத்துவர்கள் குழுவின் அறிக்கை, மரண பரிசோதனை அறிக்கை, இரத்த பரிசோதனை அறிக்கை, உலக சுகாதார நிறுவன நிபுணர்களின் பரிசோதனை அறிக்கை அனைத்தையும் ஒப்பிட்டுப் பார்த்த பின்னரே இறுதி முடிவொன்றுக்கு வரமுடியுமெனவும் அவர் தெரிவித்தார். சம்பவ தினத்தன்று குறித்த சிறுமியின் தாய் எழுதியிருந்த கடிதக் குறிப்பில் சம்பந்த ப்பட்ட டாக்டர் கவனமெடுத்தல் அவசிய மென்பதையும் சுட்டிக்காட்ட விரும்புவ தாகவும் அவர் தெரிவித்தார்.

ருபெல்லா தடுப்பு மருந்து ஒவ்வாமை காரணமாக மாத்தறை பாடசாலை மாணவி மரணமடைந்தமை தொடர்பில் நேற்று சுகாதார அமைச்சு ஒழுங்கு செய்திருந்த செய்தியாளர் மாநாட்டின் போதே அவர் இதனைத் தெரிவித்தார்.

ருபெல்லா தடுப்பு மருந்து ஒவ்வாமை தொடர்பில் பல்வேறு தரப்பட்ட விசாரணைகள் முன்னெடுக்கப்படுகின்றன.

இதன் விசாரணை அறிக்கைகள் உலக சுகாதார அமைப்பின் பார்வைக்கு உட்படுத்தப்பட்ட பின்னரே மீண்டும் இத் தடுப்பு மருந்து ஏற்றல் திட்டத்தை ஆரம்பிப்பது பற்றி முடிவு செய்யப்படும் எனவும் சுகாதார அமைச்சின் செயலாளர் தெரிவித்தார்.

இம் மாநாட்டில் அவர் மேலும் விளக்கமளித்த போது :-

பசுப்பால் சம்பந்தப்பட்ட ஆகாரங்கள் தமது மகளின் உடலுக்கு ஒவ்வாததெனவும் ருபெல்லா தடுப்பூசி வழங்குபவர்கள் இது விடயத்தில் அவதானம் செலுத்த வேண்டுமெனவும் மரணமடைந்த சிறுமியின் தாயார் கடிதக் குறிப்பொன்றை அனுப்பியிருந்தார். இதனை தடுப்பூசி வழங்கிய டாக்டர் கவனத்திலெடுத்திருக்கலாம் என்பதே பலரதும் கருத்தாகிறது.

ருபெல்லா தடுப்பு மருந்து 1996ம் ஆண்டில் அறிமுகப்படுத்தப்பட்டு தொடர்ச்சியாக வழங்கப்பட்டு வருகின்றது. இலங்கையில் இலட்சக்கணக்கானவர்களுக்கு இது வழங்கப்பட்டுள்ளது.

பல்வேறு விமர்சனங்களை மேற் கொள்வோர் இது விடயத்தில் கவனம் செலுத்த வேண்டும்.எவ்வாறெனினும் இது தொடர்பான விசாரணைகள் பாரபட்சமின்றி சுயாதீனமாக இடம்பெற்று வருகின்றன. விசாரணை முடிவில் குற்றம் ஒப்புவிக்கப்பட்டால் அதற்குரிய சட்ட நடவடிக்கைகள் எடுப்பதில் பின்னிற்கப் போவதில்லை எனவும் அவர் தெரிவித்தார்.

நேற்றைய இச்செய்தியாளர் மாநாட்டிற்கு மேற்படி தடுப்பு மருந்துடன் தொடர்புபடும் சுகாதார நிறுவனங்களின் அதிகாரிகள் அழைக்கப்பட்டிருந்ததுடன், அவர்கள் ஊடகவியலாளர்களுக்கு இது குறித்து விளக்கமளித்தமை குறிப்பிடத்தக்கது.

ரணில் விக்ரமசிங்கவின் தலைமையை மாற்ற முன்வந்துள்ள அக்கட்சி செயற் குழுவினரின் துணிச்சலை நாம் பாராட்டுவதோடு இது போன்ற துணிவு சமூகப்பற்றற்ற ரவூப் ஹக்கீமின் தலைமையையும் மாற்ற முஸ்லிம் காங்கிரஸ் அங்கத்தவர்களுக்கும் ஏற்பட வேண்டும் என உலமா கட்சி தலைவர் மெளலவி முபாறக் அப்துல் மஜீத் தெரிவித்துள்ளார்.

கல்முனை கட்சிக் காரியாலயத்தில் இடம்பெற்ற உலமாக்களுடனான கூட்டத்தில் உரையாற்றும் போதே மேற்கண்டவாறு குறிப்பிட்டார். தொடர்ந்து உரையாற்றிய அவர், ஐ. தே. க. என்ற வண்டியின் சாரதியாக ரணில் இருக்கும் வரை அதில் நான் ஒரு போதும் ஏற மாட்டேன் என அன்று தலைவர் அஷ்ரப் கூறியதை மு. காவின் தலைமையும் அதன் உறுப்பினர்களும் உதாசீனம் செய்த போதும் இன்று அக்கருத்தை ஐ. தே. கவின் செயற் குழு உறுப்பினர்கள் ஏற்று செயற்படுத்த முன்வந்துள்ளமை பாராட்டுக்குரியதாகும்.

இது போன்ற துணிவு மு. காவினருக்கு வருமா என்பது சந்தேகமே. என்றாலும் அத்தகைய துணிவு வந்தால் மட்டுமே அவர்களுக்கு சமூகப்பற்று இருக்கின்றது என்பது தெளிவாகும். அத்தகைய துணிவை ஏற்படுத்த வேண்டுமாயின் முஸ்லிம் சமூகமும் ஒன்றுபட்டு மு. காவின் தேர்தல் வேட்பாளர்களை நிராகரிக்க முன்வரவேண்டும்.
எவ்வாறு ஐ. தே. க. ஆதரவாளர்கள் கடந்த தேர்தல்களில் அக்கட்சிக்கு வாக்களிப்பதை தவிர்த்து அதன் செயற் குழுவினருக்கு இத்தகைய தைரியத்தை அளித்தார்களோ அதே போல் முஸ்லிம் சமூகமும் மு. காவுக்கு வாக்களிப்பதை தவிர்த்துக்கொள்வதன் மூலம் அக்கட்சி உயர் உறுப்பினர்களுக்கும் தைரியத்தை வரவழைக்க முடியும்.
இல்லையேல் ரவூப் ஹக்கீமும் அவரை சார்ந்துள்ளோரும் இந்த சமூகத்தை அதளபாதாளத்தில் தான் கொண்டு போய் நிறுத்துவார்கள் என்பதை எச்சரிக்கின்றோம் என்றும் தெரிவித்துள்ளார்.

உலக மரபுரிமை அமைப்பினது பணிப்பாளர் சபையின் சர்வதேச மட்டத் திலான மாநாடு நாளையும் நாளை மறுதினம் கண்டி மாநகர சபை மண்டபத்தில் நடைபெறவுள்ளது.

ரஷ்யா, ஐக்கிய அமெரிக்கா, நெதர்லாந்து, அவுஸ்திரேலியா, கனடா, கிரீஸ், இங்கிலாந்து மற்றும் இலங்கை ஆகிய நாடு கள்s கலந்து கொள்கின்றன.

வன்னி யிலிருந்து யாழ்ப்பாணம் வந்துள்ள அகதிகளின் நலன் கருதி, அரச கூட்டுத்தாபன நியதிச் சபை பணியாளர்கள் மட்டுமல்ல தனியார்துறை ஊழியர்களும் தமது ஒருநாள் ஊதியத்தை வழங்குமாறு யாழ்.இந்து அமைப்புகளின் ஒன்றியம் கோரிக்கைவிடுத்துள்ளது.  இக்கோரிக்கையை சனிக்கிழமை நல்லூர் திருஞானசம்பந்தர் ஆதீனகலாசார மண்டபத்தில் கூடிய இந்து அமைப்புகளின் ஒன்றியம் விடுத்துள்ளது.

இக் கூட்டத்துக்கு நல்லை ஆதீன முதல்வர் ஸ்ரீலஸ்ரீ சோமசுந்தர பரமாசாரிய தம்பிரான் சுவாமிகள் தலைமை தாங்கினார்.

அரச, தனியார் வங்கி, கூட்டுறவுச் சபை பணியாளர்கள் தமது ஒருநாள் ஊதியத்தை வழங்குவதற்கான பட்டியல் சகல திணைக்கள, வங்கி தனியார் நிறுவனத் தலைவர்களுக்கும் அனுப்பி வைக்கப்பட்டிருப்பதாக தெரிவித்துள்ளனர்.

இதேவேளை, யாழ்.மாவட்ட இந்து அமைப்பு ஒன்றியம் தம்மால் சேகரிக்கப்பட்ட இருபது இலட்சம் ரூபா பெறுமதியான உணவுப்பொருட்களை அகதிகளுக்கு வழங்க யாழ்.மாவட்ட அரசாங்கம் அதிபர் கே.கணேஷிடம் கையளித்துள்ளது.

தலவாக்கலை – லிந்துலை, தங்கக்கலை தோட்டத்தில் நேற்று (24) முற்பகல் திடீரென வீசிய பலத்த காற்று மழையினால் மரங்கள் சரிந்து வீழ்ந்ததில் இரண்டு இளைஞர்கள் ஸ்லத்திலேயே உயிரிழந்தனர். நேற்று முற்பகல் 11.30 அளவில் தங்கக்கலை ரேப்பன்ரைன்ற் (கருப்பந்தைல) மரக் காட்டுப் பகுதிக்கு விறகு வெட்டச் சென்றபோதே இந்தப் பரிதாப சம்பவம் நிகழ்ந்துள்ளது.

திடீரென வீசிய பலத்த காற்று மழையால் இரு இளைஞர்களும் அருகிலிருந்த குடிசையொன்றுக்குள் ஒதுங்கியிருந்துள்ளனர். அப்போது ஐந்தாறு மரங்கள் வேருடன் பிடுங்கப்பட்டு சரிந்து வீழ்ந்துள்ளன. இதில் பாரிய மரமொன்று குடிசை மீது வீழ்ந்ததில் இளைஞர்கள் இருவரும் ஸ்தலத்திலேயே கொல்லப்பட்டதாக பொலிஸார் தெரிவித்தனர்.

சம்பவத்தில் உயிரிழந்த இருவரில் ஒருவரான தங்கக்கலை, கேம்பிரிட்ஜ் கீழ்ப்பிரிவைச் சேர்ந்த செல்வராஜ் சந்திரமோகன் (17) க. பொ. த. சாதாரணதரப் பரீட்சை எழுதிவிட்டு பெறுபேற்றுக்காகக் காத்திருந்தவரெனத் தெரியவருகிறது. மற்றையவரான அதே தோட்டத்தைச் சேர்ந்த சதாசிவம் ரகுவரன் (18) கடந்த வருடம் சாதாரண தரப் பரீட்சை எழுதியவராவார்.

இருவரது சடலங்களும் லிந்துலை ஆதார வைத்தியசாலைக்குக் கொண்டு செல்லப்பட்டு மேலதிக பரிசோதனைகளுக்காக நுவரெலியாவுக்கு அனுப்பி வைக்கப்பட்டுள்ளது. மரங்கள் சரிந்து வீழ்ந்ததால் மறேயா – எல்கின் வீதியில் போக்குவரத்து பாதிக்கப்பட்டது. இதனால், தோட்டத் தொழிலாளர்கள் மரங்களை வெட்டி அப்புறப்படுத்தும் பணியில் ஈடுபட்டனர். மேலதிக விசாரணைகளை லிந்துலை பொலிஸார் மேற்கொண்டு வருகின்றனர்.

பிரிட்டனில் அடுத்த மாதம் இடம்பெறவுள்ள ஜி20 உச்சி மாநாட்டில் சந்திக்கும் இந்தியப் பிரதமர் மன்மோகன் சிங்கும் அமெரிக்க ஜனாதிபதி பராக் ஒபாமாவும் இலங்கை உட்பட்ட தெற்காசிய பிராந்திய நிலைவரங்கள் தொடர்பாக பேசும் சாத்தியம் உள்ளது.

ஜி20 உச்சி மாநாட்டுக்கு புறம்பாக இரு நாடுகளின் தலைவர்களும் சந்தித்து பேசவிருப்பதாகவும் கல்வித்துறை பங்கு?டமை, உயர் தொழில்நுட்பம், காலநிலை மாற்றம், பொருளாதார உறவுகளை வலுப்படுத்துதல் என்பன இவ்விருவரின் பேச்சுக்களில் முன்னுரிமைவகிக்கும் என்றும் அகில இந்திய வானொலி செய்திச் சேவை ஞாயிற்றுக்கிழமை தெரிவித்தது.

அத்துடன் உலக பொருளாதார நெருக்கடியால் தொழில் வாய்ப்புகளை இழப்போருக்கான பாதுகாப்பு ஏற்பாடுகளை மேற்கொள்வது பற்றியும் ஆராயப்படுமென தெரிவிக்கப்படுகிறது.

சர்வதேச நிதி நிறுவனங்களுக்கு ஜி20 நாடுகள் அதிகளவு நிதி ஒதுக்கீட்டை ஒதுக்கீடு செய்வது தொடர்பாகவும் ஆராயப்படவுள்ளது. அதேசமயம், இலங்கை, ஆப்கானிஸ்தான், பாகிஸ்தான், பங்களாதேஷ் நிலைவரம் குறித்து இரு தலைவர்களும் ஆராய்வார்ளெனவும் எதிர்பார்க்ப்படுகிறது.

மொரவெவ, வேப்பங்குளம் பிரதேசத்தில் ஊடுருவ முயன்ற புலிகளின் குழுவொன்றுக்கும் விமானப் படையினருக்கும் இடையில் மோதல்கள் இடம்பெற்றுள்ளன.

நேற்று அதிகாலை 4.45 மணியளவில் இடம்பெற்ற இந்த சம்பவத்தின் போது விமானப் படையினர் நடத்திய கடுமையான தாக்குதல்களில் படுகாயமடைந்த புலிகள் காட்டுப்பகுதிக்கு தப்பிச் சென்றுள்ளதாக விமானப் படைப் பேச்சாளர் விங் கமாண்டர் ஜனக நாணயக்கார தெரிவித்தார்.

இந்தச் சம்பவத்தில் விமானப் படைவீரர் ஒருவர் சிறு காயங்களுக்குள்ளாகியுள்ளதாக அவர் மேலும் தெரிவித்தார். திருமலை, மொரவெவ பிரதேசத்திலுள்ள விமானப் படையின் இணை முகாமிற்குள் ஊடுருவும் நோக்குடனேயே புலிகள் வந்துள்னர்.

அந்தப் பிரதேசத்தில் வீதி ரோந்து கடமையில் ஈடுபட்டிருந்த விமானப் படையினர், குழுவொன்று வருவதை அவதானித்துள்ளனர். பொது மக்கள் போன்று வந்த அவர்கள் ரோந்து நடவடிக்கையில் ஈடுபட்டிருந்த விமானப் படையினரை இலக்கு வைத்து தாக்குதல் நடத்தியுள்ளனர்.

இதனையடுத்து விமானப் படையினர் நடத்திய பதில் தாக்குதல்களின் பின்னர் அங்கிருந்து காட்டு வழியாக தப்பிச் சென்றுள்ளனர். இந்தச் சம்பவத்தையடுத்து பொலிஸாரும், விமானப் படையினரும் இணைந்து காட்டுப் பகுதியில் மேற்கொண்ட தேடுதலின் போது இரத்தக் கறைகளையும் முதலுதவி செய்தமைக்கான தடயங்களையும் கண்டுள்ளனர்.

காயமடைந்த நிலையில் புலிகள் தப்பிச் சென்றிருக்கலாம் என்று விமானப் படைப்பேச்சாளர் மேலும் தெரிவித்தார்.