16

வட மாகாணத்தின் கல்வித்துறையுடன் தொடர்புடைய உயர்மட்ட மாநாடொன்று இன்று (16.01.2009) காலை சமூக சேவைகள் மற்றும் சமூக நலத்துறை அமைச்சரும் வட மாகாணத்திற்கான விசேட செயலணியின் தலைவருமான டக்ளஸ் தேவானந்தா அவர்களது தலைமையில் இடம் பெற்றது.

இம்மாநாட்டின்போது வட மாகாணத்தின் கல்வித்துறைத் தொடர்பான விடயங்களுடன் யாழ் குடாநாட்டின் கல்வித்துறை சார்ந்த பல்வேறு விடயங்களும் மிகவும் விரிவாக ஆராயப்பட்டன.  மேற்படி உயர்மாநாட்டில் கல்வித்துறை சார்ந்த விடயங்கள் பற்றி விரிவாக ஆராயப்பட்டதுடன் ஏனைய விடயங்கள் குறித்து தனித்தனியாக அடுத்தடுத்த கட்டங்களில் ஆராயப்பட்டு நடைமுறைச் சாத்தியமான தீர்வுகள் எட்டப்படவுள்ளமை குறிப்பிடத்தக்கதாகும்.

மும்பை தாக்குல் சம்பவத்தில் தொடர்புடைய தீவிரவாதிகளையும், பிறரையும், இந்தியாவுக்கு நாடு கடத்த வேண்டும் என்ற இந்தியாவின் நிலையில் எந்த குழப்பமும், மாற்றமும், தொய்வும் இல்லை என்று மத்திய வெளியுறவுத்துறை அமைச்சர் பிரணாப் முகர்ஜி விளக்கியுள்ளார். தனியார் தொலைக்காட்சி ஒன்றுக்கு பிரணாப் முகர்ஜி அளித்த பேட்டியில், தீவிரவாதிகளை நாடு கடத்துவது பாகிஸ்தானால் இயலாத காரியம் என்றால், சிக்கல் இருப்பதாக கூறினால், அவர்களை பாகி்ஸ்தானிலேயே வைத்து விசாரிக்க இந்தியா சம்மதிக்கும். ஆனால் விசாரணையில் நேர்மை இருக்க வேண்டும்.

ஒப்புக்காக விசாரணை நடத்தப்பட்டால் அதனால் எந்த பயனும் கிடையாது. கேலிக்கூத்தாகி விடும். விசாரணை வெளிப்படையாகவும், நியாயமாகவும், நேர்மையாகவும் அமைய வேண்டும் என்று கூறியிருந்தார். இதனால், இதுவரை தீவிரவாதிகளை ஒப்படைக்க வேண்டும் என்று கோரி வந்த இந்தியாவின் நிலையில் பெரும் மாற்றம் ஏற்பட்டிருப்பதாக கருதப்பட்டது. அமெரிக்காவின் ‘அட்வைஸ்’படி இந்தியா இப்படி ஒரு முடிவை எடுத்திருக்கலாம் எனவும் பேச்சு எழுந்தது. இந்தியா தனது நிலையிலிருந்து இறங்கி வந்திருப்பதாகவும் பேச்சு எழுந்தது. ஆனால் இந்தியாவின் நிலையில் எந்த தொய்வும், குழப்பமும் இல்லை என்று பிரணாப் முகர்ஜி விளக்கியுள்ளார்.

தனது டிவி பேட்டி குறித்து விளக்கி செய்தியாளர்களிடம் இன்று பேசினார் பிரணாப் முகர்ஜி. அப்போது அவர் கூறுகையில், மும்பைத் தாக்குதலில் ஈடுபட்ட தீவிரவாதிகளுடன் தொடர்புடையவர்களை, இந்தத் தாக்குதலுக்குத் திட்டமிட்ட பாகிஸ்தானியர்களை, நம்மிடம் ஒப்படைக்க வேண்டும் என்ற இந்தியாவின் கோரிக்கையில் எந்த மாற்றமும் இல்லை.

அவர்களை இந்திய சட்டத்திற்கு முன்பு நிறுத்த வேண்டும். அவர்களுக்கு தண்டனை பெற்றுத் தர வேண்டும் என்ற நிலையிலும் மாற்றம் இல்லை.

மும்பைத் தாக்குதல் தொடர்பாக பாகிஸ்தான் முழுமையான விசாரணையை நடத்த வேண்டும். அக்கறையுடன், ஒளிவுமறைவுற்ற வகையில், அது நடந்து கொள்ள வேண்டும். இந்த சதித் திட்டத்தை அது வெளிப்படையாக பகிரங்கப்படுத்த வேண்டும்.

மும்பை சம்பவத்திற்குக் காரணமான பாகிஸ்தானியர்களை நம்மிடம் பாகிஸ்தான் ஒப்படைக்கவேண்டும் என்ற கோரிக்கையிலிருந்து அரசு மாறி விட்டது என்ற பேச்சுக்கே இடமில்லை.சதிகாரர்களை ஒப்படைக்க வேண்டும் என்ற நிலையிலிருந்து இந்தியா இறங்கி வரவில்லை. அந்தக் கோரிக்கையை நாம் இன்னும் கைவிடவில்லை. குற்றம் இந்தியாவில்தான் நடந்துள்ளது. எனவே இங்குதான் விசாரணை நடத்தப்பட வேண்டும். இங்குதான் அவர்கள் விசாரணையை சந்திக்க வேண்டும் என்றார் பிரணாப்.

பிரணாப் முகர்ஜியின் இந்த முன்னுக்குப் பின் முரணான பேச்சு குழப்பத்தை அதிகரித்துள்ளது.

இலங் கையில் போர் நிறுத்தத்தை உடனடியாக அமல் செய்யக் கோரி விடுதலைச் சிறுத்தைகள் இயக்கத் தலைவர் தொல். திருமாவளவன் இன்று 2வது நாளாக தொடர்ந்து உண்ணாவிரதம் மேற்கொண்டிருந்தார். சென்னை அருகே உள்ள மறைமலை நகரில் நேற்று காலை தனது சாகும் வரை உண்ணாவிரதத்தைத் தொடங்கினார் திருமாவளவன். பெரும் திரளான விடுதலைச் சிறுத்தைகள் கட்சித் தொண்டர்கள் புடை சூழ அவர் உண்ணாவிரதம் மேற்கொண்டுள்ளார். இலங்கையில் போர் நிறுத்தத்தை அமல் செய்ய வேண்டும். அவ்வாறு செய்ய இலங்கை அரசை இந்தியா நிர்ப்பந்திக்க வேண்டும் என்ற கோரிக்கைகளுடன் அவர் உண்ணாவிரதப் போராட்டத்தில் ஈடுபட்டுள்ளார்.

ஒட்டு மொத்த தமிழ் சமுதாயத்தையும் மத்திய அரசு புறம் தள்ளி விட்டது. இதற்கு தமிழக மக்கள் தக்க சமயத்தில் தக்க பாடம் கற்பிப்பார்கள். பிரணாப் முகர்ஜியை அனுப்புங்கள் என்று கூறினால் மேனனை அனுப்பி வைத்துள்ளது மத்திய அரசு. யார் சொன்னாலும் கேட்க மாட்டேன் என்கிறார் ராஜபக்சே. இப்படிப்பட்ட நிலையில் ஐந்து லட்சம் தமிழர்களின் உயிர் அங்கு கேள்விக்குறியாகியுள்ளது. இந்த நிலையிலும் இந்திய அரசு பெருத்த மெளனம் காப்பது மிகவும் வேதனையாக உள்ளது என்று செய்தியாளர்களிடம் இன்று தெரிவித்தார் திருமாவளவன்.

கண்டி ஜனாதிபதி மாளிகையில் இன்று (16.01.2009) ஜனாதிபதி அவர்களின் தலைமையில் அரச பொங்கல் விழா எனும் தேசிய தைப்பொங்கல் விழா கொண்டாடப்பட்டது. அந்நிகழ்வில் ஜனாதிபதியின் பாரியார் ஷிரந்தி ராஜபக்ஷ உட்பட ஏராளமான அமைச்சர்களும் பாராளுமன்ற உறுப்பினர்களும் கலந்து கொண்டனர்.ஜனாதிபதி அவர்கள் பொங்கல் பானையில் அரிசியிட்டு சம்பிரதாயபூர்வமாக வைபவத்தைத் தொடக்கி வைத்தார்.பொங்கல் நிகழ்வைத் தொடர்ந்து கலை நிகழ்வுகளும் இடம்பெற்றன.

இந்த விழாவின் போது பெருந்தொகையான தமிழ் மக்கள் கலந்து கொண்டிருந்தனர். மேலும் கண்டியில் அமைந்துள்ள ஜனாதிபதி மாளிகையில் நடைபெற்ற தமிழ் மக்கள் சார்ந்த முதலாவது நிகழ்வு இதுவென்பதுடன் கண்டி ஜனாதிபதி மாளிகைக்கு சாதாரண தமிழ் மக்கள் வருகை தந்த முதலாவது சந்தர்ப்பமும் இதுவென்பது குறிப்பிடத்தக்கது. அந்த விழாவின் போது ஜனாதிபதி அவர்கள் சுமார் ஐந்து நிமிடங்கள் வரையில் தமிழில் சரளமாக உரையாற்றினார். அந்த உரையின் சாராம்சம் வருமாறு:

கெளரவ மதகுருமார்களே அன்பர்களே பிள்ளைகளே.

உங்கள் அனைவருக்கும் இனிய பொங்கல் வாழ்த்துக்கள இந்தப் பொங்கல் விழாவில் கலந்து கொள்ள இங்கு வருகை தந்த உங்கள் எல்லோரையும் நான் அன்புடன் வரவேற்கிறேன். பொங்கல் நாள் உழவர் திருநாள். தமிழர் பெருநாள். தை பிறந்தால் வழி பிறக்கும் என்பார்கள். அது போல இந்த வருடம் இந்து மக்கள் அனைவருக்கும் நிச்சயமாக நல்ல வழி பிறக்கும் என உறுதியாக நான் நம்புகின்றேன்.

இந்த நாட்டில் வாழும் எல்லா இன மக்களும் சந்தேகமில்லாமல் பயமில்லாமல் வாழக் கூடிய சூழ்நிலை நிச்சயமாக வெகு விரைவில் உருவாகும். எமது அரசியல் யாப்பில் உள்ளபடி எல்லா மக்களும் சம உரிமையோடு சமத்துவமாக வாழ வேண்டும். அந்த நிலையை நான் நிச்சயமாக உருவாக்குவேன். இந்த நாட்டின் எந்தப் பகுதியில் வசித்தாலும் நாம் எல்லோரும் இந்த நாட்டு மன்னர்களே. இன மத பேதம் எதுவுமில்லை. நாம் எல்லோரும் ஒரு தாய் பிள்ளைகள். எல்லா மக்களையும் பாதுகாக்க வேண்டியது எனது பொறுப்பு எனது கடமை. நான் அதை உறுதியாக செய்வேன்.நாட்டு மக்கள் எல்லோருக்கும் ஒளிமயமான எதிர்காலம் உருவாகட்டும். மீண்டும் எனது இனிய பொங்கல் வாழ்த்துக்கள்.

ஊடக அடக்குமுறையைக் கண்டித்து ஜே.வி.பி. தொழிற்சங்கம், மனித உரிமை அமைப்பு உட்பட ஐந்து அமைப்புகளுடன் இணைந்து பாரிய ஆர்ப்பாட்டப் பேரணியை நுகேகொட ஆனந்த சமரக்கோன் திறந்தவெளியரங்கில் எதிர்வரும் திங்கட்கிழமை மாலை மூன்று மணிக்கு நடத்தவுள்ளது. இது தொடர்பாக கொழும்பு தேசிய நூலகத்தில் ஜே.வி.பி. நடத்திய ஊடகவியலாளர் மகாநாட்டில் அதன் பாராளுமன்ற உறுப்பினர் அநுர திஸாநாயக்கா கலந்துகொண்டு பேசுகையிலேயே மேற்கண்டவாறு தெரிவித்தார்

அவர் அங்குமேலும் பேசுகையில்; “அரசாங்கம் ஜனநாயகத்தை இல்லாதொழித்து சர்வாதிகார போக்கில் செயற்பட்டுவருகின்றது. இதற்காகவே நாட்டில் ஜனநாயகத்தை நிலைநாட்டுகின்ற 17வது அரசியலமைப்பு திருத்தச்சட்டத்தை அமுல்படுத்தாமலிருக்கிறது. இதனை அமுல்படுத்துவது மூலம் அரசியலமைப்பு பேரவை உருவாக்கப்பட்டு சுயாதீன பொலிஸ் மற்றும் தேர்தல் ஆணைக்குழுக்கள் உட்பட சுயாதீன ஆணைக்குழுக்கள் இயங்கும் என்பதால் இதனை செய்யாதுள்ளது. அதேசமயம் நீதிமன்ற தீர்ப்பையும் அரசாங்கம் அவமதித்து வருகின்றது.

அரசின் ஊழல் மோசடிகளை வெளிக்கொண்டு வருகின்ற ஊடகங்களும் ஊடகவியலாளர்களும் தாக்கப்பட்டுள்ளனர். இதன் உச்சமாக சிரச எரியூட்டப்பட்டும் லசந்த விக்கிரமதுங்க என்ற பத்திரிகையாளர் கொலை செய்யப்பட்டுமுள்ளார். இவ்வாறான தாக்குதல் மக்களின் செய்தியை அறிந்து கொள்ளும் மற்றும் வெளியிடும் அடிப்படை உரிமைகளை இல்லாமல் செய்துள்ளது. இந்த மக்களின் உரிமைகளை மதிக்காது ஜனநாயகத்தை இல்லாதொழிக்கும் செயற்பாட்டுக்கு இடமளிக்க முடியாது.

இதனை தடுப்பதற்கு தேசப்பற்றுள்ள தேசிய நிலையம் ஊடகதொழிற்சங்கம் மற்றும் மனித உரிமை அமைப்பு உட்பட ஐந்து அமைபுகள் எம்முடன் இணைந்துள்ளன. எதிர்வரும் திங்கட்கிழமை நுகேகொட ஆனந்த சமரகோன் திறந்தவெளியரங்கில் ஊடக அடக்குமுறையைக் கண்டித்து பாரிய ஆர்ப்பாட்டத்தினை நடத்தவுள்ளோம். தமிழ் மக்களுக்கு விடுதலையை பெற்றுக்கொடுக்கும் முகமாக யுத்தத்தை நடத்துவதாகக் கூறும் அரசாங்கம் இந்த விடுதலையின் பின் அம்மக்களுக்கு எதனை செய்யப்போகின்றதென கேட்கின்றேன்.

நாட்டில் எழுத்துச் சுதந்திரத்தை தடுக்கின்றவகையில் செயற்படும் அரசு அம்மக்களுக்கு ஜனநாயகத்தை பெற்றுக்கொடுக்குமாவென நான் கேட்கின்றேன். எனவே நாட்டில் ஜனநாயகத்தை இல்லாதொழித்து சர்வாதிகாரப்போக்கில் செயற்படுவதனை தடுப்பதற்குரிய தேவையேற்பட்டுள்ள நிலையில் தேசப்பற்றாளர்கள் மற்றும் பொது அமைப்புகள் எம்முடன் கைகோர்க்க வேண்டும். இந்த ஊடகவியலாளர் மகாநாட்டில் தேசப்பற்றுள்ள தேசிய நிலையத்தின் தம்பிர அமிலதேரர், உழைக்கும் பத்திரிகையாளர் சங்கத்தின் தலைவர் பாலசூரிய மற்றும் மனித உரிமை அமைப்பின் அநுர கருணாதிலக ஆகியோரும் உரையாற்றினர்.

விடுதலைப் புலிகளிடமிருந்து மீட்கப்பட்டுள்ள பிரதேசங்களில் சட்டத்தையும் ஒழுங்கையும் நிலைநாட்டும் வகையில் வன்னியில் மூன்று புதிய பொலிஸ் நிர்வாகப் பிரிவுகளை ஏற்படுத்த அரசாங்கம் தீர்மானித்துள்ளது.

மீட்கப்பட்ட பிரதேசங்களில் இயல்பு நிலையை ஏற்படுத்த அரசாங்கம் பல்வேறு நடவடிக்கைகளை மேற்கொள்வதுடன் விரைவில் இப்புதிய பொலிஸ் நிர்வாகப் பிரிவுகளை ஏற்படுத்தவும் நடவடிக்கை எடுக்கப்படுமென பொலிஸ் ஊடகப் பேச்சாளர் ரஞ்சித் குணசேகர தெரிவித்தார்.பல தசாப்தங்களாகச் சீர்குலைந்திருந்த நிர்வாக நடவடிக்கைகளை மீள சீரமைப்பதற்கு வசதியாகவே மேற்படி பொலிஸ் பிரிவுகளை ஏற்படுத்தவுள்ளதாகவும் அவர் தெரிவித்தார்.

மீட்கப்பட்ட பகுதிகளில் அரச நிர்வாகத்தை மீளக்கட்டியெழுப்பவும், சிவில் நிர்வாகத்தை ஏற்படுத்துவதற்குத் தேவையான ஒழுங்குகளை மேற்கொள்ளவும் பொது நிர்வாக உள்நாட்டலுவல்கள் அமைச்சு உரிய நடவடிக்கைகளை மேற்கொள்ளுமென அமைச்சின் செயலாளர் டி. திசாநாயக்க தெரிவித்தார். முல்லைத்தீவும் மீட்கப்பட்ட பின் உடனடியாகவே இதற்கான செயற்பாடுகளை ஆரம்பிக்கவுள்ளதாகவும் அவர் தெரிவித்தார்.

இதேவேளை, கிளிநொச்சி, முல்லைத்தீவு பகுதிகளிலிருந்து இடம்பெயர்ந்து வரும் பொது மக்களின் நலன்கள் தொடர்பாக ஆராய்வதற்காக அனர்த்த நிவாரண சேவைகள் மீள்குடியேற்ற அமைச்சர் ரிஷாட் பதியுதீன் தலைமையிலான அமைச்சின் அதிகாரிகள் குழுவொன்று நேற்று முன்தினம் வவுனியாவிற்கு சென்றது. வவுனியா மாவட்டச் செயலகத்தில் கிளிநொச்சி, முல்லைத்தீவு, வவுனியா மாவட்டச் செயலாளர்களைச் சந்தித்துள்ள அமைச்சர் பதியுதீன், இடம்பெயர்ந்து வருவோர் தொடர்பில் மேற்கொள்ள வேண்டிய செயற்திட்டங்கள் குறித்தும் விளக்கியுள்ளார்.

இது சம்பந்தமாகத் தெரிவித்த அமைச்சர் ரிஷாட் பதியுதீன், கிளிநொச்சி முல்லைத்தீவுப் பகுதிகளிலிருந்து தொடர்ந்தும் பொதுமக்கள் வருகை தந்த வண்ணமே உள்ளனர். இவர்களுக்கான உணவு, தங்குமிடம், மருத்துப் பொருட்கள் போன்ற அடிப்படை வசதிகள் பெற்றுக் கொடுக்கப்பட்டு வருகின்றன.

இவற்றைத் தடையின்றி பெற்றுக் கொடுப்பதற்காகவும் மக்களின் நலன்புரி நடவடிக்கைகளுக்காகவும் மீள்குடியேற்ற அமைச்சினால் மாவட்டச் செயலாளர்களுக்கு நிதிவழங்கப்பட்டுள்ளது. வவுனியா மாவட்டச் செயலகத்தில் இடம்பெற்ற சந்திப்பில் கிளிநொச்சி, முல்லைத்தீவு, வவுனியா மாவட்டங்களின் மாவட்டச் செயலாளர்கள், அப்பகுதிக்குப் பொறுப்பான பொலிஸ் மற்றும் இராணுவப் பிரிவு உயரதிகாரிகள், மீள்குடியேற்ற அமைச்சின் செயலாளர் ஏ. சீ. எம். ராசீக், வட மாகாண ஆளுநர் டிக்ஷன் தால ஆகியோரும் கலந்து கொண்டுள்ளனர். இதன் போது சுகாதாரம், கல்வி, போக்குவரத்து, மின்சாரம் உட்பட சகல வசதிகளையும் அம்மக்களுக்கு ஏற்படுத்திக் கொடுப்பது சம்பந்தமான விடயங்கள் முக்கியத்துவம் பெற்றிருந்தன. இடம்பெயர்ந்துள்ள மக்களுக்கு வீடுகளை அமைத்துக் கொடுப்பதற்கு மூன்று இடங்களைத் தெரிவு செய்துள்ளதாகவும் அமைச்சர் தெரிவித்தார்.

முல்லைத்தீவு பிரதேசத்திலிருந்து இராணுவ கட்டுப் பாட்டு பிரதேசத்தை நோக்கி 27 குடும்பங்களைச் சேர்ந்த 78 சிவிலியன்கள் வருகை தந்துள்ளதாக பொலிஸ் ஊடக பேச்சாளர், சிரேஷ்ட பொலிஸ் அத்தியட்சகர் ரஞ்சித் குணசேகர தெரிவித்தார். 78 சிவிலியன்களும் நேற்று முன்தினம் மாலை ஓமந்தை சோதனைச் சாவடியை வந்தடைந்துள்ளதாக அவர் மேலும் தெரிவித்தார்.

18 சிறுமிகள், 13 சிறுவர்கள், 29 ஆண்கள் மற்றும் 18 பெண்கள் இவர்களில் அடங்குவர். வருகை தந்த சிவிலி யன்கள் வழக்கமான விசாரணைகளுக்கு பின்னர் நலன்புரி நிலையங்களுக்கு அனுப்பி வைக்கப்பட்டுள்ளதாக பொலிஸ் ஊடக பேச்சாளர் மேலும் தெரிவித்தார்.

ஈழத் தமிழரைப் பாதுகாக்க கோரி சென்னை மறைமலை நகரில் உண்ணாவிரதம் மேற்கொண்டுள்ள திருமாவளவன் நிருபர்களிடம் பேசிய போது, ஈழத்தில் தமிழ் மக்களை கொன்று குவிக்கும் செயலில் இறங்கியிருக்கிறது சிங்கள இராணுவம். இதைக் கண்டித்து இலங்கை கிரிக்கெட் அணியுடனான சுற்றுப் பயணத்தை ரத்து செய்ய வேண்டும் எனக் கூறியுள்ளார்.

மும்பை குண்டுவெடிப்பில் ஈடுபட்டது பாகிஸ்தான் தீவிரவாதிகள் என்பதால் அந்த நாட்டுக்கு செல்ல இருந்த இந்திய கிரிக்கெட் அணியின் சுற்றுப்பயணம் ரத்து செய்யப்பட்டது.

அதேபோன்று இப்போது, ஈழத்தில் தமிழ் மக்களை கொன்று குவிக்கும் செயலில் இறங்கியிருக்கிறது சிங்கள் ராணுவம். இதைக் கண்டித்து இலங்கை கிரிக்கெட் அணியுடனான சுற்றுப் பயணத்தை ரத்து செய்ய வேண்டும் எனக் கூறியுள்ளார்.

வன்னியிலிருந்து இதுவரை ஆயிரத்து நானூறு பேர் இடம் பெயர்ந்து வவுனியாவுக்கு வந்துள்ளனர் என்று அரசு தெரிவிக்கின்றது. இவர்களுக்கான அடிப்படை வசதிகளைச் செய்து கொடுக்கும் நோக்கில் மீள் குடியேற்ற அமைச்சர் ரிசாத் பதியுதீன் நேற்று வவுனியாவுக்குச் சென்று அந்த மக்களைப் பார்வையிட்டார்.

இது தொடர்பாக அமைச்சர் கூறியவை வருமாறு:-வன்னியிலிருந்து மக்கள் வவுனியாவுக்கு வர ஆரம்பித்துள்ளனர். தற்போது வரை 540 குடும்பங்களைச் சேர்ந்த 1400 பேர் வவுனியாவை வந்தடைந்துள்ளனர். அவர்கள் அனைவரும் வவுனியா பார்மில் அமைக்கப்பட்டுள்ள  தற்காலிக தங்குமிடங்களில் தங்கவைக்கப் பட்டுள்ளனர்.இந்த மக்களுக்குத் தேவையான வசதிகள் அனைத்தையும் செய்து கொடுக்கும் நடவடிக்கையில் எனது அமைச்சு முழு மூச்சுடன் ஈடுபட்டு வருகின்றது.

இவர்களுக்குத் தேவையான உணவுப் பொருட்கள் மற்றும் தங்குமிட வசதிகள் போன்றவற்றை வழங்குவதற்கான நடவடிக்கைகளை உடன் மேற்கொள்ளுமாறு நான் வவுனியா அரச அதிபருக்கு உத்தரவிட்டுள்ளேன். வன்னியில் இருந்து வவுனியாவுக்குத் தொடர்ந்தும் மக்கள் வந்தால் அவர்களுக்குத் தேவையான வசதிகள் அனைத்தையும் வழங்குவதற்கு எனது அமைச்சு தயார் நிலையில் உள்ளது – என்றார்.

முல்லைத்
தீவிலுள்ள புலிகளின் முக்கிய பிரதேசங்களில் ஒன்றான தர்மபுரம் பிரதேசத்தை பாதுகாப்பு படையினர் நேற்று கைப்பற்றியுள்ளதாக இராணுவப் பேச்சாளர் பிரிகேடியர் உதய நாணயக்கார தெரிவித்தார். முல்லைத்தீவை புலிகளிடமிருந்து முழுமையாக மீட்டெடுக்கும் நோக்குடன் முன்னேறிவரும் இராணுவத்தின் 58வது படைப் பிரிவினர் தர்மபுரம் பிரதேசத்தைத் தமது பூரண கட்டுப்பாட்டின் கீழ் கொண்டு வந்துள்ளதாக அவர் மேலும் தெரிவித்தார்.

இந்தப் பிரதேசத்தில் படை நடவடிக்கைகளில் ஈடுபட்டுள்ள இராணுத்தின் 58வது படைப்பிரிவின் கட்டளைத் தளபதி பிரிகேடியர் சாவிந்திர டி சில்வா தலைமையிலான படையினர் நேற்றுப் பிற்பகல் 2 மணியளவில் தர்மபுரம் நகரை கைப்பற்றி அங்கு தமது நிலைகளை பலப்படுத்தி வருவதாக பிரிகேடியர் மேலும் தெரிவித்தார். பரந்தன்-முல்லைத்தீவு நெடுஞ்சாலையிலுள்ள மிகப் பெரிய நகரங்களில் ஒன்றாக தர்மபுரம் பிரதேசம் கருதப்படுவதாக தெரிவித்த இராணுவப் பேச்சாளர், ஏ-9 நெடுஞ்சாலைக்கு கிழக்கே 15 கிலோ மீற்றர் தொலைவிலும் ஏ-35 பரந்தன்-முல்லைத்தீவு வீதியில் அமைந்துள்ளதாகவும் அவர் குறிப்பிட்டார்.

கடந்த சில தினங்களாகப் பாதுகாப்புப் படையினருக்கும், புலிகளுக்கும் இடையில் இந்தப் பிரதேசத்தில் இடம்பெற்ற கடுமையான மோதல்களின் போது இராணுவத்தின் கவனத்தை மிகவும் ஈர்த்திருந்த தர்மபுரம் பல வருடங்களுக்கு பின்னர் படையினரின் கட்டுப்பாட்டின் கீழ் கொண்டு வரப்பட்டுள்ளதாகவும் இராணுவப் பேச்சாளர் குறிப்பிட்டார்.

தர்மபுரம் நகரை கைப்பற்றும் படை நடவடிக்கைகளின் போது படையினர் மேற்கொண்ட தாக்குதல்களில் கொல்லப்பட்ட புலிகளின் 4 சடலங்களையும், புலிகளின் பெருந்தொகையான ஆயுதங்களையும் படையினர் மீட்டெடுத்துள்ளதாகவும் அவர் குறிப்பிட்டார்.

கைப்பற்றப்பட்ட தர்மபுரத்திலிருந்து முல்லைத்தீவை நோக்கிய படை நடவடிக்கைகள் தொடர்ந்தும் இடம்பெற்று வருவதாக குறிப்பிட்ட பிரிகேடியர், இந்தப் பிரதேசத்தில் புலிகளால் மனிதக் கேடயங்களாக வைத்திருந்த பொது மக்களையும் புலிகள் அழைத்துச் சென்றுள்ளனர் என்றும் தெரிவித்தார்.