2009

கிளிநொச்சி மற்றும் முல்லைத்தீவு மாவட்டங்களைத் துரிதமாக மீளக் கட்டியெழுப்பும் நோக்கிலான மதிப்பீட்டு நடவடிக்கைகள் துரிதப்படுத்தப்பட்டுள்ளன. கிளிநொச்சி மற்றும் முல்லைத்தீவு மாவட்டங்களின் அரசாங்க அதிபர்கள் தலைமையில் அந்தந்த மாவட்டங்களைச் சேர்ந்த திணைக்களங்களின் தலைவர்களும், பொறியியலாளர்களும், தொழில்நுட்பவியலாளர்களும் அந்தந்தப் பிரதேசங்களுக்கு நேரில் சென்று மதிப்பீடுகளை மேற்கொண்டு வருகின்றனர்.

இதனடிப்படையில் கிளிநொச்சி மாவட்ட அரசாங்க அதிபர் நா. வேதநாயகன் தலைமையில் அம்மாவட்டத்தின் கல்வி, விவசாயம், சுகாதாரம், உள்ளூராட்சி மன்றங்கள் கட்டிடம் ஆகிய திணைக்களங்களின் தலைவர்கள் இன்று 20ம் திகதி கிளிநொச்சி மாவட்டத்தின் உருத்திரபுரம், சிவநகர், புதுமுறிப்பு, கோணவில், யூனியன்குளம், மலையாளபுரம், பாரதிபுரம் ஆகிய பிரதேசங்களுக்கு நேரில் சென்று மதிப்பீடுகளை மேற்கொள்ளவிருக்கின்றனர்.

அதேவேளை இவர்கள் நாளை பளைப் பிரதேச மதிப்பீடுகளைச் செய்யவுள்ளனர். இதேநேரம் முல்லைத்தீவு அரசாங்க அதிபர் திருமதி இமெல்டா சுகுமார் தலைமையில் அம்மாவட்டத்தின் திணைக்களத் தலைவர்களும், பொறியியலாளர்களும், தொழில்நுட்பவியலாளர்களும் நாளை மறுதினம் புதன்கிழமை துணுக்களாய் பிரதேசத்திற்கு நேரில் சென்று மதிப்பீடுகளை மேற்கொள்ளவிருக்கின்றனர்.

பயங்கரவாத செயற்பாடுகள் காரணமாக ஏற்பட்டுள்ள சேதங்கள், அழிவுகள் குறித்து இவர்கள் மதிப்பீட்டின்போது விஷேட கவனம் செலுத்துவர்.

இம்மதிப்பீட்டு நடவடிக்கைகளைத் துரிதமாகப் பூர்த்தி செய்து அது தொடர்பான அறிக்கை வடக்கு அபிவிருத்திக்கான ஜனாதிபதி செயலணியிடம் விரைவில் கையளிக்கப்படும் என்றும் அரசாங்க அதிபர்கள் தெரிவித்தனர்.

மோசடி இடம் பெறும் வாக்குச் சாவடிகளை உடனடியாக இரத்துச் செய்யுமாறு தேர்தல் ஆணையாளர் தயானந்த திஸாநாயக்க உதவித் தேர்தல் ஆணையாளர்களுக்கு உத்தரவு பிறப்பித்துள்ளார்.

யாழ்ப்பாணம் மற்றும் வவுனியா உள்ளூராட்சி சபைத் தேர்தல்களை முன்னிட்டு தேர்தல் திணைக்களத்தில் நேற்று முன்தினம் தேர்தல் ஆணையாளர் தலைமையில் விசேட சந்திப்பொன்று நடைபெற்றது. இக்கூட்டத்துக்கு வவுனியா மற்றும் யாழ்ப்பாணத்துக்கான தேர்தல் தெரிவத்தாட்சி அலுவலர்கள் கலந்து கொண்டனர்.

இச் சந்திப்பின்போதே தேர்தல் ஆணையாளர் மோசடி இடம் பெறும் வாக்குச் சாவடிகளை உடனடியாக ரத்துச் செய்யுமாறும் அப் பகுதிகளுக்கு பிறிதொரு தினத்தில் தேர்தலை நடத்த ஏற்பாடுகளை முன்னெடுக்குமாறும் கூறியதாக வவுனியா உதவித் தேர்தல் ஆணையாளர் ஏ. எஸ். கருணாநிதி கூறினார்.

நீதியானதும் நேர்மையானதுமான முறையிலும் வாக்காளர்கள் சுமுகமாக வாக்களிக்கும் வகையிலும் தேர்தல் நடத்தப்பட வேண்டுமெனவும் தேர்தல் ஆணையாளர் இச் சந்திப்பின் போது கேட்டுக் கொண்டுள்ளார். மேலும் வாக்குப் பெட்டிகளை எடுத்துச் செல்வதற்கான வாகன மற்றும் போக்குவரத்து ஏற்பாடுகள், பணியாளர்கள் என்பன குறித்தும் இச் சந்திப்பின் போது கலந்துரையாடப்பட்டது.

ஆதிவாசி சமூகத்தினரின் பிரச்சினைகளை தீர்த்து வைக்குமாறு ஜனாதிபதி மஹிந்த ராஜபக்ஷ அதிகாரிகளுக்கு பணிப்புரை விடுத்ததுடன், அவர்களது பிரதான பிரச்சினைகள் குறித்து அதிகாரிகளுடன் தொலைபேசி ஊடாக தொடர்பு கொண்டு நேற்று முன்தினம் தீர்வு பெற்றுக் கொடுத்தார். மஹியங்கணையிலுள்ள ஜனாதிபதி மாளிகைக்கு வருகை தந்த தம்பான ஆதிவாசி மக்கள் தங்களது பிரச்சினைகளை ஜனாதிபதியிடம் எடுத்துக் கூறிய போது இந் நடவடிக்கைகளை ஜனாதிபதி மேற்கொண்டார். அதனைத் தொடர்ந்து ஆதிவாசிகள் அவர்களது சம்பிரதாயப்படி தயாரித்த உணவுகளை ஜனாதிபதிக்கு வழங்கினர். அரச தலைவர் ஒருவர் ஆதிவாசிகளுடன் ஒன்றாக அமர்ந்து உணவருந்திய முதலாவது நிகழ்வு இதுவாகும்.

அல் ஜெஸிரா தொலைக்காட்சி சேவை ஒளிபரப்புக்கு அனுமதியளிக்கப்படுமெனத் தெரிவித்துள்ள பலஸ்தீன அரசாங்கம் இச் சேவையை முன்னர் தடைசெய்ய வில்லையென்றும் தெரிவித்துள்ளது.

அல் ஜெஸிராவின் தொலைக்காட்சி ஆதாரமில்லாத செய்தியை ஒளிபரப்பியமை தொடர்பாக அந்நிறுவனத்துக் கெதிராக கடுமையான சட்ட நடவடிக்கை எடுக்கப்படு மெனவும் பலஸ்தீன அரசாங்கம் அறிவித்துள்ளது. பலஸ்தீன ஜனாதிபதி மஃமூத் அப்பாஸ் மற்றும் அவரது நிர்வாகம் தொடர்பாக அல் ஜெஸிரா மோசமான செய்தியை கடந்த வாரம் ஒளிபரப்பியது.

இஸ்ரேலுக்கும் அதன் நேச நாடுகளுக்கும் விசுவாசமாக மஃமூத் அப்பாஸ் நடந்து கொள்வார் என்பதே அந்தச் செய்தியாகும். இச் செய்தி வெளியான பின்னர் அல் ஜெஸிரா தொலைக்காட்சிச் சேவை பலஸ்தீனத்தில் தடை செய்யப்பட்டதாகச் செய்திகள் வெளியாகின. இது சம்பந்தமாக பலஸ்தீனப் பிரதமர் சலாம் பயாத் கூறிய தாவது:-

அல் ஜெஸிராவுக்கெதிராக சட்ட நடவடிக்கை எடுக்க ஆலோசித்து வருகிறோம். அதைத் தடை செய்வதற்கான முயற்சிகளும் தொடரலாம். ஆனால் இதுவரை அல் ஜெஸிரா ஒளிபரப்பு பலஸ்தீனில் தடை செய்யப்படவில்லையெனக் கூறினார். தொடர்பாடல் அமைச்சர் இது பற்றிக் கூறுகையில், மேற்குக் கரை மக்களை அல் ஜெஸிரா தவறுதலாக வழிநடத்த முற்படுவதாகவும் இந்தச் செய்தியை வாசித்த ஊடகவியலாளர் மீது சட்ட நடவடிக்கை எடுக்கப்படுமென்றார்.

வவுனியா இடைத்தங்கல் முகாம்களில் தங்கியுள்ள தமிழ் மக்களுக்கு தொடராக ஆயுர்வேத சிகிச்சை பெறுவதற்கு வழி ஏற்படுத்தப்பட்டுள்ளதுடன் வடக்கின் வசந்தம் அபிவிருத்தித் திட்டத்துடன் கூடியதாக வட பகுதியில் பல சித்த ஆயுர்வேத வைத்தியசாலைகள் அமைக்கப்படும், என சுதேச வைத்தியத்துறை அமைச்சர் திஸ்ஸ கரலியத்த தெரிவித்தார்.

கலன்பிந்துனுவெவ, படிகாரமடுவ பகுதியில் வசிக்கும் 780 குடும்பங்களுக்கு இலவசமாக மண் பாத்திரங்களை பகிர்ந்தளிக்கும் வைபவத்தில் பிரதம அதிதியாகக் கலந்துகொண்டு உரையாற்றுகையிலேயே அமைச்சர் மேற்கண்டவாறு கூறினார். அவர் இங்கு தொடர்ந்தும் உரையாற்றுகையில், இன்று நாடு முழுவதும் ஒன்றுபடுத்தப்பட்டுள்ளது. மக்களனைவரும் ஒற்றுமையாக ஒன்றுபட்டு வாழக்கூடிய சூழல் ஏற்பட்டுள்ளது.

பிரபாகரன் இன்னும் உயிருடன் தான் இருக்கின்றார் என சிலர் கூறி வருகின்றனர். எமது நாட்டில் பயங்கரவாதம் தொடர்ந்தும் இருக்க வேண்டும் என்று கூறுவோரே இவ்வாறு கூறிவருகின்றனர். பயங்கரவாதத்தினால் நன்மை பெற்றவர்களே இவ்வாறு பொய்யான பிரசாரங்களைப் பரப்பி வருகின்றவர்களாவர். சிறுநீரக நோயினால் வருடாந்தம் பெருமளவு உயிரிழப்புக்கள் இடம்பெறுகின்றன. ஜனாதிபதியின் விசேட பணிப்புரைக்கமைய அனுராதபுர மாவட்ட வாழ் மக்களுக்கு இலவசமாக மண்பாத்திரங்கள் சுதேச வைத்தியத்துறை அமைச்சினூடாக பகிர்ந்தளிக்கப்பட்டு வருகின்றது. அநுராதபுர மாவட்டத்தில் வாழும் எண்பதாயிரம் (80000) குடும்பங்களுக்கு இதுவரையில் மண் பாத்திரங்கள் பகிர்ந்தளிக்கப்பட்டுள்ளன.

பாப் இசை உலகின் சக்கரவர்த்தி மைக்கேல் ஜாக்சனின் மரணத்திற்கு காரணமாக அமைந்த ஓவர்-டோஸ் ஊசி மருந்தை அவருக்கு வழங்கிய நபர் மீது கொலைக் குற்றம் பதிவு செய்ய காவல்துறையினர் முடிவு செய்துள்ளதாக தகவல்கள் தெரிவிக்கின்றன.

இதன் காரணமாக மைக்கேல் ஜாக்சனுக்கு டிப்ரிவன் எனப்படும் ஓவர்-டோஸ் வலிநிவாரணி மருந்தை அளித்தவர்கள், இன்னும் 2 நாளில் கைது செய்யப்படலாம் என நியூஸ் ஆஃப் தி வேர்ல்ட் நாளிதழ் செய்தி வெளியிட்டுள்ளது.

ஜாக்சனின் குடும்ப நண்பரான டெர்ரி ஹார்வி நாளிதழ் ஒன்றுக்கு அளித்துள்ள பேட்டியில், டிப்ரிவன் என்ற வலிநிவாரணி ஊசி மருந்து மற்றும் சில மாத்திரைகளால்தான் ஜாக்சன் உயிரிழந்தார் என அவரின் பிரேதப் பரிசோதனை முடிவுகள் தெரிவிக்கின்றன.

இதையடுத்து அந்த மருந்தை அவருக்கு வழங்கியவர்கள் மீது கிரிமினல் குற்றம்சுமத்த அதிகாரிகள் முடிவு செய்துள்ளதாக அவர் கூறியுள்ளார்.

குவைத்தில் வேலை வாய்ப்புப் பெற்றுச் செல்பவர்கள் இனிமேல் பொலிஸ் அனுமதிச் சான்றிதழ் பெற்றிருக்க வேண்டியது கட்டாயம் என்று அறிவுறுத்தப்பட்டுள்ளது. இந்த நடைமுறை எதிர்வரும் முதலாம் திகதி அமுலுக்கு வருவதாக வெளிநாட்டு வேலைவாய்ப்புப் பணியகத் தலைவர் கிங்ஸ்லி ரணவக்க தெரிவித்தார்.

குவைத்தில் 10 ஆயிரத்துக்கும் மேற்பட்ட இலங்கையர்கள் பணியாற்றுகிறார்கள். அவர்கள் வன்செயல்களில் ஈடுபடுகின்றனர் என்று புகார்கள் கிடைத்துள்ளன. எனினும் வன்செயல்களில் ஈடுபடுவர்களை இனங்காண முடியாத நிலை காணப்படுகின்றது. இதன் காரணமாக புதிய நடை முறை கொண்டு வரப்படுவதாக குவைத் உள்துறை அமைச்சு இலங்கை அரசுக்கு அறிவித்தது. அதனை அடுத்தே பெலிஸ் அனுமதி சான்றிதழ் கோரப்படுவதாக பணியகத் தலைவர் ரணவக்க மேலும் தெரிவித்தார்.

இலங்கை வேகப் பந்து வீச்சாளர் சமிந்தா வாஸ் டெஸ்ட் போட்டிகளிலிருந்து ஓய்வு பெறுகிறார்.பாகிஸ்தான் அணியுடனான 3வது மற்றும் கடைசி டெஸ்ட் போட்டியுடன் ஓய்வு பெறுகிறார் வாஸ்.

இதுகுறித்து 35 வயதாகும் வாஸ் கூறுகையில், பாகிஸ்தான் அணியுடனான 3வது டெஸ்ட் போட்டியுடன் டெஸ்ட் போட்டிகளிலிருந்து முறைப்படி ஓய்வு பெறுகிறேன். இருப்பினும் 2011 உலகக் கோப்பைப் போட்டி வரை ஒருநாள் போட்டிகள், 20-20 போட்டிகளில் தொடர்ந்து ஆடுவேன்.

110 டெஸ்ட் போட்டிகளில் ஆடியுள்ள வாஸ், 354 விக்கெட்களை வீழ்த்தியுள்ளார் 1994ம் ஆண்டு கண்டியில் நடந்த பாகிஸ்தான் அணிக்கு எதிரான டெஸ்ட்தான் வாஸின் முதல் டெஸ்ட் போட்டி. 12 முறை ஐந்து விக்கெட்களை வீழ்த்தியுள்ளார். 2 முறை பத்து விக்கெட்களை வீழ்த்தியுள்ளார்.

100 டெஸ்ட்களுக்கு மேல் ஆடியுள்ள 3வது இலங்கை வீரர் வாஸ். மற்ற இருவர்- முரளிதரன், ஜெயசூர்யா.

அம்பாறையிலிருந்து கொழும்பு திருமலை செல்லும் வாகனங்கள் மீதான ‘பாஸ்’ நடைமுறையை நீக்குவது குறித்து சிவில் பாதுகாப்புக் குழுவின் கல்முனை மற்றும் சாய்ந்தமருது பகுதிகளுக்கான அபிவிருத் தித் திட்ட ஆலோசகர் இஸட் ஏ. எச். ரஹ்மான் பாதுகாப்புத் திணைக்களப் பணிப்பாளர் நாயகம் ரியர் அட்மிரல் சரத் வீரசேகரவுடன் பேச்சு நடத்தியுள்ளார்.

அம்பாறை விவசாய திணைக்களத்தில் கடந்த வாரம் இச்சந்திப்பு இடம்பெற்று ள்ளது. மருதமுனை மற்றும் சாய்ந்தமருது பிர தேச வர்த்தக சங்கப் பிரதிநிதிகள் ஆலோச கர் ரஹ்மானை அண்மையில் சந்தித்து ‘பாஸ்’ நடைமுறையால் தாம் எதிர்நோக் கும் பிரச்சினைகள் குறித்து விரிவாக எடுத்துரைத்தனர். இதனையடுத்தே சிவில் பாதுகாப்பு குழுவின் அபிவிருத்தி திட்ட ஆலோசகர் ரஹ்மான் ரியர் அட்மிரல் சரத் வீரசேகரவை சந்தித்து உரையாடினார்.

இவ்விடயத்தை கவனமாக செவிமடு த்த ரியர் அட்மிரல் சரத் வீரசேகர, ஜனா திபதி மற்றும் பாதுகாப்புச் செயலகத்தின் நேரடிக் கவனத்துக்கு இவ்விடயத்தை கொண்டுசென்று விரைவாக இப் பாஸ் நடைமுறையை நீக்க நடவடிக்கை எடுப்ப தாக வாக்குறுதியளித்துள்ளார்.

இது குறித்து இப்பிரதேச வர்த்தக பிர முகர்கள் ஆலோசகர் ரஹ்மானுக்கு நன்றி தெரிவித்துள்ளனர்.

ஜெனீவாவுக்கான ஐ.நா.வின் நிரந்தரப் பிரதிநிதி கலாநிதி தயான் ஜெயதிலகவின் சேவை முடிவுக்கு வரவுள்ளதாக வெளிவிவகார அமைச்சு வட்டாரங்கள் தெரிவிக்கின்றன.

2007 ஆம் ஆண்டு நடுப்பகுதியில் ஐ.நா.வின் நிரந்தரப் பிரதிநிதியாக தயான் ஜெயதிலக நியமிக்கப்பட்டார். சுமார் இரண்டு வருடகால சேவையைப் பூர்த்தி செய்த நிலையில் எதிர்வரும் ஆகஸ்ட் மாதம் 20 ஆம் திகதியுடன் இவரது சேவை முடிவுக்கு வரவுள்ளதாகவும் அந்த வட்டாரங்கள் தெரிவித்தன. இது தொடர்பான கடிதம் அவருக்கு அனுப்பிவைக்கப்பட்டுள்ளதாகவும் தெரிவிக்கப்படுகிறது. அடுத்த நிரந்தரப் பிரதிநிதி யார் என்பது குறித்து எதுவும் தெரிவிக்கப்படவில்லை.