25

பௌத்த தேரர்களுக்கு ஆங்கிலம், கணணி மற்றும் தொழில்நுட்ப அறிவு மேம்பாட்டிற்கு ஜனாதிபதி கோட்டாபய ராஜபக்ஷ நடவடிக்கை எடுத்துள்ளார்.

தேரர்களுக்கு ஆங்கிலம், கணணி மற்றும் தொழில்நுட்ப அறிவு மேம்பாடு உட்பட பிரிவினா ஆசிரியர்களின் நியமனங்கள் , சம்பளம் மற்றும் கொடுப்பனவுகள் குறித்த பிரச்சினைகளை தீர்த்து வைப்பதற்கும் யோசனைகளையும் திட்டங்களையும் முன்வைக்குமாறு ஜனாதிபதி கோட்டாபய ராஜபக்ஷ சம்பந்தப்பட்டவர்களுக்கு ஆலோசனை விடுத்துள்ளார்;.

இது குறித்த பேச்சுவார்த்தை ஜனாதிபதி கோட்டாபய ராஜபக்ச தலைமையில் ஜனாதிபதி அலுவலகத்தில் இடம்பெற்றது.

அதற்கு சகல சமய ரீதியிலான பதிவு செய்யப்பட்ட அறநெறி பாடசாலைகளில் காணப்படுகின்ற குறைபாடுகளை நிவர்த்தி செய்வதற்கும் ஒழுங்கு படுத்துவதற்கும் ராஜாங்க அமைச்சின் பூரண தலையீடு காணப்பட வேண்டுமென ஜனாதிபதி வலியுறுத்தியுள்ளார்.

அறநெறி பாடசாலை ஆசிரியர்களின் தேவைகளை இனங்கண்டு அவர்களை ஊக்குவிக்க எடுக்கக்கூடிய நடவடிக்கைகளை கண்டறிந்து அதனை அமுல்படுத்துமாறு ஜனாதிபதி ஆலோசனை வழங்கினார்.

பல்கலைக்கழகங்களுக்கும், தொழில்களுக்கும் இணைத்துக்கொள்ளும் போது அறநெறி சான்றிதழுக்கு முக்கியத்துவம் வழங்குவது குறித்தும் இதன்போது கலந்துரையாடப்பட்டது.

உயிர் நீர்தவர்களை நினைவு கூர்வதற்கு உள்ள அடிப்படை உரிமையினை அரசாங்கம் மறுக்கக்கூடாது என வலிகாமம் கிழக்கு பிரதேச சபையில் தீர்மானம் நிறைவேற்றப்பட்டுள்ளது. அத் தீர்மானம் உடனடியாகவே ஜனாதிபதிக்கு கிடைக்கத்தக்கவாறு ஜனாதிபதி செயலகத்திற்கு தொலைநகல் மூலம் அனுப்பி வைக்கப்பட்டுள்ளது.

இது குறித்து மேலும் தெரியவருவதாவது,

வலிகாமம் கிழக்கு பிரதேச சபையின் மாதாந்த அமர்வு இன்று (25.09.2020) நடைபெற்றது. இவ் அமர்வில் தவிசாளர் தியாகராஜா நிரோஷினால் உயிர் நீத்தவர்களை நினைவு கூர்வதற்கான விசேட பிரேரணை சபையில் முன்வைக்கப்பட்டது.

இப்பிரேரணைக்கு சபை ஆதரவு கோரப்பட்ட போது சபையில் பிரசன்னமாயிருந்த உறுப்பினர்கள் ஏகமனதாக அங்கீகரித்து ஏற்றுக்கொண்டனர்.

இவ்விடயத்தில் பிரேரணையினைச் சமர்ப்பித்து கருத்துரைத்த தவிசாளர், போரில் நேரடியாகத் தொடர்பு பட்டும் தொடர்புராமலும் உயிர் நீத்தவர்களை அஞ்சலிப்பதற்கு எமது மக்களுக்கு உரிமை உண்டு. நினைவு கூர்தல் என்பது அடிப்படை உரிமைகளில் ஒன்றாகும். சர்வதேச சமவாயங்கள் ரீதியிலும் உயிர் நீத்தவர்களை நினைவு கூர்வதற்கான சகல உரிமையும் எமக்கு இருக்குறது.

இந் நிலையில் தற்போது நினைவு கூர்தலுக்கு பல்வேறுபட்ட இடையூறுகள் ஏற்படுத்தப்படுகின்றன. இந் நிலையில் அரசாங்கம் நாட்டில் நினைவு கூர்தலுக்கான உரிமையைக் கேள்விக்குட்படுத்துவதையும் நிறுத்தவேண்டும் என மக்களால் தெரிவு செய்யப்பட்ட உள்ளுராட்சி அலகு என்ற வகையில் நாம் கோரிக்கை விடுக்கின்றோம் என வலிகாமம் கிழக்குப் பிரதேச சபைத் தவிசாளர் தியாகராஜா நிரோஷ் மேலும் தெரிவித்துள்ளமை குறிப்பிடத்தக்கது

தமிழ் கட்சிகள் திட்டமிட்ட உண்ணாவிரத போராட்டம் நாளை திட்டமிட்டபடி நடைபெறும்.  ஆனால் மாற்று இடமொன்றில் போராட்டத்தை நாளை காலையில் ஆரம்பிப்பதென தமிழ் கட்சிகள் முடிவு செய்துள்ளன.

இந்த முடிவை இன்று (25.09.2020) மாலை தமிழ் கட்சிகளின் சார்பில் சட்டத்தரணி என்.சிறிகாந்தா தெரிவித்துள்ளார்.

பருத்தித்துறை நீதிவானின் கட்டளையில் பிரதிவாதிகளாக யாரையும் குறிப்பிடவில்லையென்ற போதும், நீதிமன்ற உத்தரவிற்கு மதிப்பளித்து நீதிமன்ற கட்டளையை மீறாமல் திட்டமிட்டபடி உண்ணாவிரத போராட்டம் நடக்கும் என அவர் மேலும் தெரிவித்துள்ளார்.

மட்டக்களப்பு அம்பிட்டிய சுமணரத்ன தேரருக்கு எதிராக தமிழில் நீதிமன்ற அழைப்பாணை அனுப்பப்பட்டுள்ளதாகவும், அதனால் தான் நீதிமன்றம் செல்லப் போவதில்லை எனவும் அவர் தெரிவித்துள்ளார்.

இது தொடர்பில் அவர் காணொளி ஒன்றையும் பதிவிட்டுள்ளார்.

மட்டக்களப்பில் தொல்லியல் திணைக்கள அதிகாரி தடுத்து வைக்கப்பட்ட சம்பவம் தொடர்பில், இந்த அழைப்பாணையினை நீதிமன்றம் அனுப்பியுள்ளது.

குறித்த அழைப்பாணை கடிதம் மூன்று தாள்களில் கிடைத்துள்ளது, அதில் தமிழ் மொழியில் உள்ளதால் என்னால் புரிந்து கொள்ள முடியவில்லை, அதனால் என்னால் நீதிமன்றம் செல்லமுடியாது என கூறி குறித்த அழைப்பாணை கடிதத்தினை பொலிஸாரிடமே கொடுத்துள்ளார். சிங்கள மொழியில் குறித்த அழைப்பாணை அனுப்பப்பட்டால் மட்டுமே என்னால் நீதிமன்றம் செல்ல முடியும் எனவும் அந்த காணொளி பதிவில் குறிப்பிட்டுள்ளார்.

கடந்த வாரம் கிழக்கில் தொல்பொருள் திணைக்கள அதிகாரிகளை தாக்க முயற்சித்ததுயும் அவர்களை ஒரு கொட்டிலுக்குள் தடுத்து வைத்திருந்ததும் காணொளி வெளி வந்திருந்ததமை குறிப்பிடத்தக்கது.

கல்வித் தகைமைகளை வைத்து அன்றி சமூக சேவைகளை கருத்திற் கொண்டதாகவே சமாதான நீதவான்கள் பதவி வழங்கப்படுகின்றன என நீதியமைச்சர் அலி சப்ரி நேற்று பாராளுமன்றத்தில் தெரிவித்தார்.

சமூக செயற்பாடுகளுடன் கல்விப் பொதுத் தராதர சாதாரண தரப் பரீட்சை சித்தியடைந்தவர்கள் சமாதான நீதவான்களாக நியமிக்கப்படுகின்றனர் என்றும் அமைச்சர் தெரிவித்தார்.

பாராளுமன்றத்தில் நேற்று வாய்மூல விடைக்கான வினாக்கள் வேளையில் சாந்த பண்டார எம்.பி எழுப்பிய கேள்வி ஒன்றுக்கு பதிலளிக்கையிலேயே அமைச்சர் இவ்வாறு தெரிவித்தார்.  சாந்த பண்டார எம்.பி தமது கேள்வியின் போது,

சமாதான நீதவான்களை நியமிக்கும் போது கருத்திற்கொள்ளும் ஆகக்குறைந்த கல்வித் தகைமைகள் எவை என்பதை தெளிவுபடுத்துமாறு கோரினார்.

அதற்கு பதிலளித்த போதே நீதியமைச்சர் அலி சப்ரி இவ்வாறு தெரிவித்தார். அது தொடர்பில் மேலும் தெரிவித்த அமைச்சர்,

சமாதான நீதவான் பதவிகளை வழங்கும்போது 60 வயதுக்கு குறைந்தவர்களானால் கல்விப் பொது தராதர சாதாரண தரப் பரீட்சையில் சித்தி பெற்றுள்ளமை, 60 வயதுக்கு மேற்பட்டவர்களானால் அவர்களின் சமூக சேவை, நன்னடத்தை ஆகியவையே கருத்தில் கொள்ளப்படும். பாரிய சமூக சேவைகளை செய்தவர்கள் கிராமப்புறங்களிலும் உள்ளனர் என்றும் அவர் மேலும் தெரிவித்தார்.

பிரித்தானியாவில் தொடர்ச்சியாக இரண்டாவது நாளாகவும் ஆறாயிரத்திற்கும் மேற்பட்டோர் கொரோனா வைரஸ் தொற்றினால் பாதிக்கப்பட்டுள்ளனர்.

கடந்த 24 மணித்தியாலத்தில் மட்டும் பிரித்தானியாவில் ஆறாயிரத்து 634பேர் வைரஸ் தொற்றினால் பாதிக்கப்பட்டுள்ளனர். மேலும், 40பேர் உயிரிழந்துள்ளனர்.

பிரித்தானியாவில் வைரஸ் தொற்று பரவியதற்கு பிறகு பதிவான இரண்டாவது நாளொன்றுக்கான அதிகப்பட்ச பாதிப்பு எண்ணிக்கை இதுவாகும். முன்னதாக கடந்த ஏப்ரல் மாதம் 10ஆம் திகதி (7,860பேர்) வைரஸ் தொற்றினால் பாதிக்கப்பட்டிருந்தனர்.

உலகளவில் கொவிட்-19 தொற்றினால் அதிக பாதிப்பை எதிர்கொண்ட 14ஆவது நாடாக விளங்கும் பிரித்தானியாவில், நான்கு இலட்சத்து 16 ஆயிரத்து 363பேர் பாதிக்கப்பட்டுள்ளனர். மேலும், 41ஆயிரத்து 902பேர் உயிரிழந்துள்ளனர்.

மேலும், 228பேர் தீவிர சிகிச்சை பிரிவில் சிகிச்சை பெற்று வருகின்றனர்.

நேற்றைய பாராளுமன்ற அமர்வின் போது தமிழ் தேசிய மக்கள் முன்னணியின் பாராளுமன்ற உறுப்பினர் கஜேந்திரகுமார் பொன்னம்பலம் அவர்கள் திலீபன் நினைவேந்தல் பற்றி பாராளுமன்றில் கதைக்க முற்ப்பட்டமையை பல பாராளுமன்ற உறுப்பினர்கள் கூச்சலிட்டு தடை செய்ய முயன்ற போது தமிழ் தேசிய கூட்டமைப்பின் பாராளுமன்ற உறுப்பினர் எம்.ஏ. சுமந்திரன் அவர்கள் குறுக்கிட்டு  கஜேந்திரகுமார் பொன்னம்பலத்திற்கு சார்பாக பேசியிருந்தார்.

அங்கு உரையாற்றிய சுமந்திரன் அவர்கள்…,

“டக்ளஸ் தேவானந்தா கதைக்கும் போது எவரும் தடுப்பதில்லை . ஆனால் கஜேந்திரகுமார் பொன்னம்பலம் அவர்கள் கதைக்கும் போது மட்டும் தடுக்கமுற்படுகிறீர்கள். ஒரு கட்சியின் தலைவராக மக்கள் பிரச்சினையை கதைப்பதற்கும் பாராளுமன்றில் குரல்கொடுப்பதற்கும்  கஜேந்திரகுமார் பொன்னம்பலம் அவர்களிற்கு அனைத்து உரிமைகளும்  உள்ளது. அவர் பேசுவதை  தடுக்க எவராலும் முடியாது ” எனவும் அவர் குறிப்பிட்டுள்ளார்.

இது தமிழ் அரசியல் ஆர்வளர்கள் பலராலும் பாராட்டப்பட்டிருப்பதுடன் சமூகவலைதளங்களிலும் பரவலான பேசுபொருளாகியுள்ளதும் குறிப்பிடத்தக்கது.