June

தமிழ் கட்சிகள் சில பொது உடன்பாடு ஒன்றை காண்பதற்கான முயற்சிகளில் ஈடுபட்டு வரும் வேளையில் தமிழ் தேசியக் கூட்டமைப்பினருக்கும் இதில் கலந்து கொள்ள அழைப்பு விடுக்கப்பட்டுள்ளது. இது தொடர்பாக ஈ.பி.டி.பி கட்சியின் செயலாளர் நாயகமும் அமைச்சருமான டக்ளஸ் தேவானந்தா தமிழ் தேசியக் கூட்டமைப்பின் தலைவர் இரா.சம்பந்தனுடன் நேற்று (June 27 2010) தொலைபேசியில் கலந்துரையாடியதாக தெரிவிக்கப்படுகிறது.

இது தொடர்பாக தமது கட்சி கூடி ஆராய்ந்து முடிவெடுக்கும் என இரா.சம்பந்தன் தெரிவித்ததாகவும் தெரியவருகின்றது. இதேவேளை, கஜேந்திரகுமார் பொன்னம்பலம் தலைமையிலான தமிழ்தேசிய மக்கள் முன்னணியினரையும் இதில் இணைத்துக்கொள்ள முயற்சிகள் மேற்கொள்ளப்பட்டு வருவதாகவும் தெரிவிக்கப்படுகிறது.

கடந்த சில தினங்களுக்கு முன்பு ஈழமக்கள் ஜனநாயகக் கட்சியின் சார்பில் அதன் செயலாளர் நாயகமும் அமைச்சருமான கே.என். டக்ளஸ் தேவானந்தா, தமிழர்விடுதலைக்கூட்டணியின் தலைவர் வீ.ஆனந்தசங்கரி, புளொட் தலைவர் த.சித்தார்த்தன், ஈ.பி.ஆர்.எல்.எவ் (வரதர் அணி) சார்பில் என். சிறிதரன், தமிழ்த் தேசிய விடுதலைக் கூட்டமைப்பு சார்பில் எம்.கே. சிவாஜிலிங்கம், என் சிறிகாந்தா, சிறிரெலோ சார்பில் எஸ்.உதயன், ஈரோஸ் சார்பில் பிரபா ஆகியோர் பொது இணக்கப்பாட்டிற்கான சந்திப்பு ஒன்றை கொழம்பில்  மேற்கொண்டமை இங்கு குறிப்பிடத்தக்கது.

Related News:  இனப்பிரச்சினைத் தீர்வுக்கான பொது உடன்பாடு காண்பதற்காக தமிழ் கட்சிகள் கொழும்பில் ஒன்றுகூடின.

யாழ். கொக்குவில் பொற்பதி வீதியில் இடம்பெற்ற வாள்வெட்டு சம்பவத்தில் கணவன் மனைவி உட்பட மூவர் படுகாயமடைந்துள்ளனர். நேற்றிரவு (June 27 2010) 9 மணியளவில் இச்சம்பவம் இடம்பெற்றுள்ளது.  வாகனம் ஒன்றில் வந்த இனந்தெரியாத சிலர்  வீட்டிற்குள் புகுந்து அங்கிருந்தவர்களை வாளால் வெட்டிவிட்டு சென்றுள்ளனர்.

மண்கும்பானைச் சேர்ந்த ப.சாந்தலிங்கம், (வயது60) அவரது மனைவி (வயது 44) ஆகியோரே வாள்வெட்டில் காயமடைந்து மருத்துவமனையில் அனுமதிக்கப்பட்டுள்ளனர்.

இதே வேளை, நேற்றிரவு மது போதையினால் ஏற்பட்ட வாகன  விபத்து மற்றும், குழு மோதல்களினால் காயமடைந்த  7பேர் யாழ் மருத்துவமனையில் அனுமதிக்கப்பட்டுள்ளனர்.

குருநாகலில் இடம்பெற்ற வாகன விபத்தில் யாழ். வந்து திரும்பிக்கொண்டிருந்த சுற்றுலாப் பயணிகள் 6 பேர் பலியாகினர். யாழ்ப்பாணத்திலிருந்து குருநாகல் நோக்கி சென்று கொண்டிருந்த வான் ஒன்று குருநாகல் கிரியேல்ல பகுதியில் வைத்து லொறி ஒன்றுடன் மோதி விபத்துக்குள்ளானதில் 6 பேர் பலியாகினர். 10 பேர் படுகாயமடைந்துள்ளனர். இதில் பலியானவர்கள் காயப்பட்டவர்கள் அனைவரும் குருநாகல் பகுதியைச் சேர்ந்தவர்கள் என தெரிவிக்கப்பட்டுள்ளது.

நேற்று (June 27 2010) அதிகாலை இச்சம்பவம் இடம்பெற்றுள்ளது. குருநாகலில் இருந்து யாழ்ப்பாணத்திற்கு சுற்றுலா வந்துவிட்டு திரும்பியவர்களுக்கே வழியில் இக்கதி ஏற்பட்டுள்ளது. தென்னிலங்கைப் பகுதிகளிலிருந்து வடபகுதிகளுக்கு சுற்றுலா வரும் பயணிகளின் வாகனங்களை ஏ-9 வீதியில் தற்போது அதிகளவில் காணக்கூடியதாகவுள்ளமை இங்கு குறிப்பிடத்தக்கது.

நெருக்கடியான காலகட்டத்தில் பணியாற்றிய யாழ்ப்பாண நாடகக் கலைஞர்கள் ‘மக்கள் களரி’ நாடகக் குழுவினரால் நேற்று ஞாயிற்றுக்கிழமை கௌரவிக்கப்பட்டுள்ளனர். யுத்த நெருக்கடி காலகட்டங்களில் யாழ்ப்பாணத்தில் தங்கியிருந்து நாடகப் பாரம்பரியத்தை வளர்த்தமைக்காக இவர்கள் கௌரவிக்கப்பட்டுள்ளார்கள். இந்நிகழ்வு செம்மணி வீதியுள்ள பாடசாலை ஒன்றில் நடைபெற்றது.

எஸ்.திருநாவுக்கரசு, பிரான்சிஸ் யூல்ஸ் கொலின், மரியாம்பிள்ளை, பொனிபஸ், தைரியநாதன், கேசுறி பிலிப் பேர்மினஸ், கந்தையா நாகப்பு, நவாலியூர் என். செல்லத்துரை, சரவணமுத்து சந்திரா, முருகேசு சிவப்பிரகாசம் அகியோரும், திருமறைக்கலாமன்றம், செயற்திறன் அரங்க இயக்கம், யாழ்.பல்கலைக்கழக நுண்கலைத்துறையின் வெறுவெளி அரங்கக் குழு ஆகிய அமைப்புக்களும் கௌரவிக்கப்பட்டன.

கிளிநொச்சி மாவட்டத்தின் ஸ்கந்தபுரம் கரும்புத் தோட்டம் கிராமத்தில் இருபத்திரண்டு  வருடங்களுக்கு முன் இயங்கி வந்த சீனி உற்பத்தித் தொழிற்சாலையை மீண்டும் இயங்கச் செய்வதற்கான முயற்சிகள் மேற்கொள்ளப்பட்டு வருகின்றன. யுத்தம் காரணமாக இத்தொழிற்சாலை செயலிழந்த நிலையில் காணப்படுகின்றது.

இத்தொழிற்சாலையில் இருந்த இயந்திரங்கள் களவாடப்பட்டுள்ளன. முன்னர் இத்தொழிற்சாலை அமைந்துள்ள பகுதியை அண்டிய 100 ஏக்கர் நிலப்பரப்பில் கரும்புச் செய்கை மேற்கொள்ளப்பட்டது. இவையும் தற்போது அழிக்கப்பட்டு விட்டன. இத்தொழிற்சாலையை மீண்டும் இயக்கினால் அப்பகுதி மக்களுக்கு வேலைவாய்ப்புகள் கிட்டக்கூடிய நிலையும் ஏற்படும் என எதிர்பார்க்கப்படுகிறது. இத்தொழிற்சாலை கந்தளாய் சீனித் தொழிற்சாலை நிர்வாகத்தின் கீழ் உள்ளமை குறிப்பிடத்தக்கது.

போரில் விடுதலைப் புலிகள் தோற்கடிக்கப்பட்ட பின்னரும் அவர்களின் புலனாய்வுப் பிரிவினர் தொடர்ந்து செயற்படுவதாக சிறிலங்காப் புலனாய்வுப் பிரிவினர் கருதுகின்றனர். இது தொடர்பாக அவர்கள் விழிப்புடன் இருப்பதாகவும் செய்திகள் தெரிவிக்கின்றன. விடுதலைப் புலிகளின் புலனாய்வுப் பிரிவினருக்கு நிதியுதவி வழங்கி வருகின்றவர்கள் தொடர்பாக சிறிலங்கா புலனாய்வுப் பிரிவின்ர் விசாரணைகளை நடத்தியும் வருகின்றனர்.

அண்மையில் மாத்தறைப் பகுதியில் பிச்சைக்காரர் தோற்றத்தில் நடமாடிய  விடுதலைப் புலிகளின் புலனாய்வுப் பிரிவின் உறுப்பினர் ஒருவர் கைது செய்யப்பட்டமை குறிப்பிடத்தக்கது. குறிப்பிட்ட நபரான ஈஸ்வரன் சந்திரகுமாரன் என்பவர் வவுனியா மாவட்டத்தைச் சேர்ந்தவர் எனவும், முல்லைத்தீவில்  கடும் பயிற்சி பெற்றவர் எனவும், விடுதலைப் புலிகளின் தலைவர் சார்ள்ஸ் அன்ரனிப் படைப்பிரிவின் போராளி எனவும் தெரிவிக்கப்படுகின்றது.

ஆனால், சார்ள்ஸ் அன்ரனி படைப்பிரிவு பிரபாகரனின் மகனான சாள்ஸ் அன்ரனியின் தலைமையிலானதல்ல. சாள்ஸ் அன்ரனி விடுதலைப் புலிகளின் கணனி தொழில் நுட்பப்பிரிவிற்கு பொறுப்பாக இருந்தார் என்பது குறிப்பிடத்தக்கது.

விடுதலைப் புலிகளின் முன்னாள் போராளிகள் 26 பேர் நேற்று கே.பி எனப்படும் குமரன் பத்மநாதனின் சிபார்சின் பேரில் விடுவிக்கப்பட்டுள்ளதாக தெரிவிக்கப்பட்டுள்ளது. வவுனியா பம்பைமடு தடுப்பு முகாமில் வைக்கப்பட்டிருந்த விடுதலைப் புலிகள் சந்தேக நபர்களே இவ்வாறு விடுவிக்கப்பட்டுள்ளனர். குமரன் பத்மநாதன் வடமாகாண தேர்தலில் ஆளும் கட்சியின் முதலமைச்சர் வேட்பாளராக போட்டியிடவுள்ளார் என வெளியான தகவல்களையடுத்து அவரைக்கொண்டு சில நடவடிக்கைகளை மேற்கொள்ள அரசாங்கம் திட்டமிட்டுள்ளதாக தெரிவிக்கப்படுகின்றது.

கடந்த 10ஆம் திகதி வவுனியா தடுப்பு முகாம்களுக்குச் சென்று அங்கு தடுத்து வைக்கபட்டுள்ள விடுதலைப் புலிகளின் உறுப்பினர்களைப் பார்வையிட்டு தனது அரசியல் நடவடிக்கைகளுக்கு அவர்களின் ஆதரவைக் கோரியதாகத் தெரிவிக்கப்படுகிறது. அந்த வகையில் விடுவிக்கப்பட்டவர்களில் 50 வயதிற்கு மேற்பட்ட விடுதலைப் புலிப் போராளிகள் அடங்குகின்றனர் என தெரிவிக்கப்படுகின்றது.

விடுதலைப் புலிகளின் அரசியல்துறைப் பொறுப்பாளராகவிருந்த சு.ப. தமிழ்ச் செல்வனின் சகோதரரான மூர்த்தி எனபவரும் விடுவிக்கப்பட்டுள்ளதாக  தகவல்கள் வெளியாகியுள்ளன. மூர்த்தி தனது சகோதரனான தமிழ்செல்வனின் அரசியல் நடவடிக்கைகளில் முரண்பாடுடையவராக இருந்தவர் என்பது இங்கு குறிப்பிடத்தக்கது.

விடுதலைப் புலிகளின் கட்டுப்பாட்டிலிருந்து விடுவிக்கப்பட்ட வடக்கு கிழக்குப் பிரதேசங்களில் புதிய இராணுவ முகாம்கள் அமைக்கப்படும் எனவும், இராணுவ குடியிருப்புக்கள் அமைக்கப்படும் எனவும் இலங்கையின் இராணுவத்தளபதி ஜகத் ஜயசூரிய தெரிவித்துள்ளார்.

பொஸன் தினமான நேற்று கண்டி மல்வத்த அஸ்கிரிய பிடாதிபதிகளை சந்தித்து ஆசிபெற்ற இராணுவத்தளபதி இத்தகவலை அவர்களிடம் தெரிவித்துள்ளார். படையினருக்கு வீடுகள் அமைத்துக் கொடுக்கப்படும் எனவும்,  அவர்கள் விவசாய நடவடிக்கைகளில் ஈடுபட வசதிகள் செய்து கொடுக்கப்படும் எனவும் அவர் தெரிவித்துள்ளார்.

போரினால் இடம் பெயர்ந்து வவனியா மாவட்டத்தில் உறவினர் நண்பர்கள் வீடுகளில் தங்கியிருக்கம் முல்லை மாவட்டதைச் சேர்ந்த ஒரு தொகுதி மக்கள் நாளை (28-06-2010) அவர்களது சொந்த இடங்களில் மீள் குடியேற்றப்படவுள்ளனர். 195 குடும்பங்களைச் சேர்ந்த 556 பேர் நாளை மீள்குடியேற்றப்படவுள்ளனர்.

முல்லைத்தீவு கரைதுறைப்பற்று பிரதேசச் செயலர் பிரிவுக்குட்பட்ட 19 கிராம சேவகர் பிரிவுகளில் இவர்கள் மீள் குடியேற்றப்படவுள்ளனர் என முல்லைத்தீவு மாவட்ட உதவித் திட்டமிடல் பணிப்பாளர் சிறீரங்கன் தெரிவித்துள்ளார்.

வன்னியில் மக்கள் மீள்குடியேற்றப்பட்டு வரும் சில பகுதிகளில் காட்டு யானைகளினால் மக்கள் தொல்லைகளை அனுபவித்து வருகின்றனர். வட்டக்கச்சி. இராமநாதபுரம், கண்டாவளை. கலமடுநகர் விசுவமடு. பிரபந்தனாறு முதலான பகுதிகளில் காட்டு யானைகளின் தொல்லை அதிகரித்துள்ளது. அங்கு மக்களின் பயன்தரு மரங்களை இக்காட்டு யானைகள் நாசப்படுத்தி வருகின்றன.

சுமார் 10 வருடங்களுக்கு முன்னர் இப்பகுதி பொதுமக்கள் காட்டு யானைகளின் தொல்லைகளுக்கு முகம் கொடுத்த வந்ததாகவும் தற்போது மீண்டும் யானைகளின் தொல்லை அதிகரித்துள்ளதாகவும் இப்பகுதி மக்கள் தெரிவிக்கின்றனர்.