07

புறக்கோட்டை நடைபாதையில் அமைக்கப்பட்டிருந்த வியாபார நிலையங்கள் அகற்றப்படுமுன்னர் அந்த வர்த்தகர்களுக்காக மாற்று இடங்கள் ஒதுக்கப்பட்டிருந்ததாக அரசாங்கத்தின் பிரதம கொரடாவான அமைச்சர் தினேஷ் குணவர்தன நேற்று  பாராளுமன்றத்தில் தெரிவித்தார். எதிர்க்கட்சி உறுப்பினர் ஒருவர் எழுப்பிய கேள்வியொன்றுக்கு பதிலளிக்கும்போதே அவர் இவ்வாறு கூறினார். இங்கு அமைச்சர் தொடர்ந்தும் உரையாற்றுகையில்,

சட்டவிரேதமாக அமைக்கப்பட்டிருந்த நடைபாதைக் கடைகள் அகற்றப்படு முன்னர் சம்பந்தப்பட்ட வர்த்தகர்களுடன் பேச்சு வார்த்தை நடத்தப்பட்டது. கடைகள் அகற்றப்பட்ட இடத்தில் வேறு எவருக்கும் கடைகள் அமைக்க இடமளிக்கப்படமாட்டாது என்றும் அமைச்சர் கூறினார். 

மோதல்கள் காரணமாக வடக்கில் இடம்பெயர்ந்துள்ள மக்களுக்குத் தேவையான சிகிச்சைகளை வழங்குவதற்காக 268 வைத்தியர்களும் 500 தாதியரும் வடக்குப் பிரதேசங்களுக்கு அனுப்பி வைக்கப்பட்டுள்ளதாக சுகாதார அமைச்சர் நிமல் சிறிபால டி சில்வா நேற்று பாராளுமன்றத்தில் தெரிவித்தார். அவர் இங்கு தொடர்ந்தும் உரையாற்றுகையில், உள்நாட்டில் பற்றாக்குறையாக உள்ள துறைகளுக்கே வெளிநாடுகளிலிருந்து வைத்தியர்கள் அழைக்கப்பட்டுள்ளனர். அவர்கள் இலங்கை வைத்தியர்கள் சபையில் தற்காலிகப் பதிவை மேற்கொண்டுள்ளார்களா என்பதைக் கண்டறிய அரசாங்கம் கவணம் செலுத்துகின்றது.

அத்துடன் சுகாதார சேவைகளுக்காக வடக்குக்கு அனுப்பிவைக்கப்பட்டுள்ள உபகரணங்கள் உரிய இடங்களுக்குச் சென்றடைந்துள்ளனவா என்பதையும் அரசு உண்ணிப்பாக அவதானித்து வருகின்றது. அறுவை சிகிச்சைக்காக அரசாங்க ஆஸ்பத்திரிகளில் நிலவும் நெருக்கடியை நீக்கும் வகையில் சுகாதார அமைச்சின் செலவில் 30 நோயாளிகள் ஸ்ரீ ஜயவர்தனபுர ஆஸ்பத்திரிக்கு மாற்றப்பட்டுள்ளனர்

கொழும்பு சிறுவர் ஆஸ்பத்திரியில் 600 மில்லியன் ரூபா செலவில் அறுவை சிகிச்சை நிலையம் ஒன்று அமைக்கப்பட்டுள்ளதாகவும் அமைச்சர் மேலும் தெரிவித்தார்.

யுத்தம் தொடர்பான கருத்துக்களை ஐக்கிய தேசியக் கட்சிப் பாராளுமன்ற உறுப்பினர்கள் தனது ஆலோசனையின்றி வெளியிடக் கூடாது என கட்சியின் தலைவரும், எதிர்க்கட்சி தலைவருமான ரணில் விக்கிரமசிங்க அறிவுறுத்தியுள்ளார்.  அத்துடன் கனரக ஆயுதங்களை பயன்படுத்தி பாதுகாப்பு வலயத்தின் மீது தாக்குதல் நடத்துமாறு பாலித்த ரங்கே பண்டார கோரவில்லை எனவும் அவர் சுட்டிக்காட்டியுள்ளார்.

ஐக்கிய தேசிய கட்சியின் செயற்குழு கூட்டம் இன்று நடைபெற்றபோது கட்சியின் பொருளாளர் டி.எம். சுவாமிநாதன் வன்னி பாதுகாப்பு வலயத்தின் மீது கனரக ஆயுதங்களை பயன்படுத்தி தாக்குதல் நடத்துமாறு புத்தளம் மாவட்ட பாராளுமன்ற உறுப்பினர் பாலித்த ரங்க பண்டார கூறியதாக பத்திரிகைகளில் செய்திகள் பிரசுரமாகியுள்ளமை குறித்து சுட்டிக்காட்டினார்.

இதற்கு எதிர்க்கட்சி தலைவர் ரணில் விக்ரமசிங்க பதிலளிக்கையில் யுத்தம் தொடர்பான செய்திகள் குறித்து கருத்து தெரிவிக்கும் போது தமது ஆலோசனையின்றி அவற்றை உறுப்பினர்கள் வெளியிட கூடாது எனவும் அதேவேளை கடந்த ஊடகவியலாளர் மாநாட்டில் பாலித்த ரங்கே பண்டார கருத்து வெளியிடுகையில் கனரக ஆயுதங்களைக்கொண்டு பாதுகாப்பு வலயத்தின் மீது தாக்குதல் நடத்துமாறு அவர் கூறவில்லை எனவும் விளக்கியுள்ளார்.

தமிழ்த் தேசிய கூட்டமைப்பின் பாராளுமன்ற உறுப்பி னர்களுக்கு இனிமேல் விடுமுறை வழங்குவதை மீள்பரி சீலனை செய்ய வேண்டி வருமென்று அரசாங்கத்தின் பிரதம கொறடாவான அமைச்சர் தினேஷ் குணவர்தன நேற்று (06) பாராளுமன்றத்தில் தெரிவித்தார்.

கூட்டமைப்பு உறுப்பினர் எம். கே. சிவாஜிலிங்கத் திற்கு மூன்று மாத காலம் விடுமுறை வழங்குவதற்கான பிரேரணை நேற்று சபையில் சமர்ப்பிக்கப்பட்ட போதே அமைச்சர் இதனைத் தெரிவித்தார். சிவாஜிலிங்கம் எம்.பியின் சார்பில் சொலமன் சிறில் எம். பி. விடுமுறை விண்ணப்பத்தை சபையின் அங்கீகாரத்துக்காக சமர்ப்பித்தார்.

இதன் போது கருத்துத் தெரிவித்த அமைச்சர் தினேஷ், ‘கூட்டமைப்பு எம்.பிக்கள் இங்கு விடுமுறை எடுத்துக்கொண்டு போய், வெளிநாடுகளில் இருந்து நமது நாட்டுக்கு எதிராகவும், சத்திய உரைக்கு எதிராகவும் பிரிவினைவாதத்துக்கு ஆதரவாகவும் பிரசாரம் செய்து வருகிறார்கள். அரசியலமைப்புக்கு முரணான விதத்தில் செயற்படுவோருக்கு நாம் இன்னமும் விடுமுறையை அங்கீகரிக்க வேண்டுமா? சிந்திக்க வேண்டும். என்று அமைச்சர் கூறினார்.

இதன்போது குறுக்கிட்ட எதிர்க் கட்சி பிரதம கொறடா ஜோசப் மைக்கல் பெரேரா, ‘நீங்கள் இந்த விடயத்தை ஏற்கனவே குறப்பிட்டிருக்க வேண்டும். எதிரணி உறுப்பினரின் பிரச்சினை என்பதால் இதனைக் கூறுகிறேன். அவருக்கு (சிவாஜீக்கு) எதிராக சட்டப்படியான குற்றச்சாட்டுகள் எதுவும் இல்லையே! எனவே இப்போதைக்கு விடுமுறையை அங்கீகரிப்போம்’ என்றார். இதற்கு உடன்பட்ட அமைச்சர் தினேஷ், உறுப்பினர்களின் சிறப்பு உரிமையைப் பறிக்குமாறு நான் சொல்லவில்லை.

எதிர்காலத்தில் இதுபற்றிக் கவனம் செலுத்த வேண்டும் என்றுதான் கூறுகிறேன்’ என்றார். அதற்கமைய சிவாஜிலிங்கம் எம்.பிக்கு விடுமுறை வழங்கப்பட்டது. அதேநேரம், கனகரட்ணம் எம்.பியின் விடுமுறை விண்ணப்பத்தை, துரை ரெட்ணசிங்கம் எம்.பி. சமர்ப்பிக்க சபை அங்கீகரித்தது.

பயங்கரவாதப் பிடியிலிருந்து தாய்நாட்டைப் பாதுகாப்பதற்காகப் போராடி உயிர்நீத்த மற்றும் காயமடைந்த படைவீரர்களைக் கௌரவிக்கும் வகையில் இன்று முதல் அடுத்த மாதம் 7ஆம் திகதி வரையான ஒரு மாத காலத்தைத் தேசிய படை வீரர்கள் மாதமாக அனுஷ்டிக்க அரசாங்கம் தீர்மானித்துள்ளது.

தேசிய படை வீரர்கள் மாதத்தை முன்னிட்டு அரசாங்கம்,  பாதுகாப்பு அமைச்சு, ரணவிரு அதிகார சபை ஆகியன இணைந்து ஏற்பாடு செய்துள்ள வேலைத் திட்டங்கள் தொடர்பாக விளக்கமளிக்கும் செய்தியாளர் சந்திப்பு இன்று தேசிய பாதுகாப்புக்கான ஊடக மத்திய நிலையத்தில் நடைபெற்றது. இதில் கலந்துகொண்டு கருத்துத் தெரிவித்த தேசிய பாதுகாப்புக்கான ஊடக மத்திய நிலையத்தின் பணிப்பாளர் லக்ஷ்மன் ஹலுகல்லே இதனைக் குறிப்பிட்டார். இதுபற்றி அவர் மேலும் குறிப்பிடுகையில், தேசிய படை வீரர்கள் மாதத்துக்கான பிரகடனத்தை ஜனாதிபதி மஹிந்த ராஜபக்ஷ நாளைக்(இன்று)  காலை 10.30 மணிக்கு உத்தியோகபூர்வமாக வெளியிடவுள்ளார். படை வீரர்கள் ஞாபகர்த்தக் கொடியும் நமக்காக நாம்| என மும்மொழிகளிலும் பொறிக்கப்பட்ட மஞ்சல் நிறக் கைப்பட்டியொன்றும் நாளை (இன்று)  ஜனாதிபதிக்கு அணிவிக்கப்படும்.

படை வீரர்களுக்காக 100 மில்லியன் ரூபாவை சேகரிக்கும் நோக்கில் நமக்காக நாம் கைப்பட்டிகளை நாடு முழுவதும் விற்பனை செய்ய நடவடிக்கை எடுக்கப்பட்டுள்ளது. இந்நிதி படை வீரர்களின் நலன்புரி மற்றும் உதவித் திட்டங்களுக்காக வழங்கப்படும். தேசிய படை வீரர்கள் தினம் அடுத்த மாதம் 17ஆம் திகதியாகும். இதனை முன்னிட்டு பாராளுமன்றத்துக்கு முன்னால் அமைக்கப்பட்டுள்ள ஸ்ரீஜயவர்தனபுர கோட்டே படை வீரர் நினைவுத் தூபி முன்றலில் அன்றைய தினம் ஜனாதிபதி தலைமையில் பிரதான வைபவம் நடைபெறவுள்ளது என்றும் அவர் மேலும் குறிப்பிட்டார். 

மட்டக்களப்பு கோட்டைமுறை கனிஷ்ட வித்தியாலய மாணவி கடத்தப்பட்டு கொலை செய்தமையைக் கண்டித்து மட்டக்களப்பு மாவட்டத்தில் கடந்த ஞாயிற்றுக்கிழமை தொடக்கம் நடைபெற்றுவந்த ஹர்த்தால் செவ்வாய்க்கிழமை முடிவுற்று வழமை நிலை ஏற்பட்டுள்ள போதிலும் பாடசாலைகளில் இயல்பு நிலை திரும்பவில்லை.

நேற்று புதன்கிழமை கோட்டைமுனை கனிஷ்ட வித்தியாலயத்துக்கு 3 மாணவர்கள் மட்டுமே பெற்றோருடன் சமுகமளித்திருந்தனர். பல பாடசாலைகள் நேற்று 3வது நாளாகவும் இயங்கவில்லை. அநேகமான பாடசாலைகளில் மிக சிறுதொகை மாணவர்களே சமுகமளித்திருந்தனர். இதேவேளை, கோட்டைமுனை கனிஷ்ட வித்தியாலயத்தில் மட்டக்களப்பு வலயக் கல்விப் பணிப்பாளர் ஏ. எம். ஈ. போல் தலைமையில் ஒரு கூட்டம் நடைபெற்றது.

மட்டக்களப்பு மாவட்டத்தில் பாடசாலை மாணவர்களின் பாதுகாப்பை உறுதிப்படுத்தும் விசேட ஆரம்பக் கூட்டம் நேற்று பட்டிருப்பு தேசிய பாடசாலையில் இடம்பெற்றது. நேற்றுக் காலை ஆரம்பமாகி பிற்பகல் வரை இடம்பெற்ற கூட்டம் உதவிப் பொலிஸ் அத்தியட்சகர் (சமந்த த சில்வா) தலைமையில் இடம்பெற்றது. பட்டிருப்பு வலயக் கல்விப் பணிமனையின் பிரதிக் கல்விப் பணிப்பாளர், நகுலேஸ்வரி புள்ளநாயகமின் வேண்டுகோளின்படி வலயத்தின் சகல அதிபர்களும் கலந்துகொண்டதுடன், உதவிக் கல்விப் பணிப்பாளர்கள், கோட்டக் கல்விப் பணிப்பாளர்கள், பாடசாலை அபிவிருத்திச் சங்க உறுப்பினர்களும் கலந்துகொண்டனர். மட்டக்களப்பு பொலிஸ் அத்தியட்சகர் பிரியந்த வீரசுரியாவும் கலந்துகொண்ட இவ்விசேட கூட்டத்தில் பாடசாலை மட்டத்தில் பாதுகாப்புக் குழுக்கள் அமைப்பதெனவும், மாணவர்கள் பாதுகாப்பு தொடர்பான விசேட அறிவுரைகள் குழுக்களுக்கு வழங்குவதெனவும் முடிவு செய்யப்பட்டது.

கடந்த வியாழக்கிழமை அனைத்து பாடசாலை மாணவர்களும் பாடசாலைகளுக்கு முற்றாக சமுகமளிக்காமையைத் தொடர்ந்து பாடசாலைகள் தொடர்ச்சியாக இயங்கவில்லை.மட்டக்களப்பு நகரையும், அதனைச் சூழவுள்ள பிரதேசங்களிலும் சுமார் 25 பாடசாலைகள் செயலிழந்துள்ளன. மேற்படி சிறுமியின் கொலையுடன் சம்பந்தப்பட்ட இருவரை இன்னும் கைதுசெய்ய வேண்டுமென பெற்றோர்கள் கோரிக்கை விடுத்துள்ளனர்.

சம்பவத்துடன் தொடர்புடைய மூவர் செவ்வாய் அதிகாலை பொலிஸாரினால் சுட்டுக்கொல்லப்பட்டமை தெரிந்ததே.மேற்படி சந்தேக நபர்கள் கைதாகும் வரை தொடர்ச்சியாகப் பாடசாலைகளைப் பகிஷ்கரிக்குமாறு பெற்றோர்கள் கோரிக்கை விடுத்துள்ளனர். இதனால், நேற்றுக் காலை பாடசாலைகளுக்கு வருகைதந்த பெரும்பாலான மாணவர்கள் வீடுகளுக்குத் திரும்பிச் சென்றதை அவதானிக்க முடிந்தது.

இதேவேளை கிழக்கு மாகாணத்திலுள்ள சகல பாடசாலைகளின் அதிபர்கள் தமது பாடசாலை மாணவ மாணவியரின் பாதுகாப்பை உறுதிப்படுத்த உச்சக் கட்ட நடவடிக்கையினை எடுக்குமாறு கிழக்கு மாகாண கல்வி அமைச்சின் செயலாளர் எச். கே. யூ. கே. வீரவர்த்தன சகல வலயங்களுக்கும் அவசர அறிவித்தலை விடுத்துள்ளார்.

அவரது அறிவித்தலில் குறிப்பிடப்பட்டுள்ளதாவது :- பாடசாலைகளில் கல்வி பயிலும் மாணவ மாணவியருக்கு பாதுகாப்பை வழங்குவது அதிபரின் கடமையாகும். தாய், தந்தை, பாதுகாவலரைத் தவிர்ந்த எந்தவொரு நபரோடும் பாடசாலை நேரத்தில் பிள்ளைகளை அனுப்ப வேண்டாம்.  தாய், தந்தை சட்ட ரீதியான எழுத்துமூல ஆலோசனைக்கு அதிபர் தனிப்பட்ட ரீதியில் திருப்தி அடைந்தால் மட்டும் அனுப்ப முடியும். எனினும் தரம் 1 – 5 வரையுள்ள பிள்ளைகளை பாடசாலைகளிலிருந்து தாய், தந்தை, சட்ட ரீதியான பாதுகாவலரைத் தவிர வேறொருவருடனும் அனுப்பவே கூடாது. சந்தேகமெனின் பாதுகாப்பு அதிகாரிகளது உதவியை நாடவும்.

புதிய நடைமுறை

இதற்கிடையில் மட்டு. கோட்டைமுனை கனிஷ்ட வித்தியாலயத்தில் பயிலும் மாணவர்களின் பாதுகாப்பு கருதி புதிய நடைமுறைகள் பின்பற்றப்படவுள்ளன. இதற்கான தீர்மானம் பாடசாலை அபிவிருத்திச் சங்கக் கூட்டத்தில் எடுக்கப்படவுள்ளதாக மேற்படி வித்தியாலய அதிபர் சி. வி. விஸ்வலிங்கம் தெரிவித்தார். இத்தீர்மானங்களின்படி தினமும் காலையில் மாணவர்கள் பெற்றார் அல்லது அறிமுகமான உறவினர் அல்லது அறிமுகமான ஆட்டோ சாரதியினால் அழைத்துவரப்பட்டு வகுப்பாசிரியரிடம் ஒப்படைத்தல் வேண்டும். வகுப்பாசிரியர் இல்லாதவிடத்து அடுத்த வகுப்பாசிரியரிடம் ஒப்படைக்க வேண்டும்.

இதேபோன்று பாடசாலை முடிந்த பின்னரும் வகுப்பாசிரியரிடமிருந்து பிள்ளைகளை பொறுப்பேற்று செல்ல வேண்டும். எந்த சந்தர்ப்பத்திலும் மாணவர்கள் பாடசாலை நேரத்தில் வெளியேற அனுமதிக்கப்படமாட்டார்கள். இந்த நடைமுறை கண்டிப்பாக பின்பற்றப்படவுள்ளதாக அதிபர் மேலும் தெரிவித்தார்.

இலங்கைக்கான விஜயம் ஒன்றினை மேற்கொண்டுள்ள பிரிட்டனின் நாடாளுமன்ற உறுப்பினர்களின் குழு, வடபகுதியில் மோதல் நடக்கும் பகுதியில் சிக்கியுள்ள மக்களின் நிலை மிகவும் பயங்கரமாக உள்ளதாக கூறியுள்ளது.

பொதுமக்களை விடுவிக்க வேண்டும் என விடுக்கப்படும் கோரிக்கைகளை விடுதலைப் புலிகள் தொடர்ந்து நிராகரித்து வருவதாகவும் டேஸ் பிரவுண் தலைமையிலான அந்தக் குழுவினர் தெரிவித்துள்ளனர்.

அவர்களின் இலங்கைக்கான விஜயம் குறித்து பிரிட்டனின் வெளியுறவு அமைச்சகம் வெளியிட்டுள்ள அறிக்கையிலேயே இந்தக் கருத்துக்கள் வெளியாகியுள்ளன. மோதல்கள் நடக்கும் பகுதிகளில், இலங்கை அரசு கனரக ஆயுதங்களை பயன்படுத்துவதில்லை என்று கூறியுள்ளதை உறுதியாக கடைபிடிக்க வேண்டும் எனவும், அதிகபட்ச கட்டுப்பாட்டை கடைபிடிக்க வேண்டும் எனவும் அந்த குழுவினர் கோரியுள்ளனர்.

வவுனியாப் பகுதிக்கு சென்ற அந்தக் குழுவினர் அங்கு இடைத் தங்கல் முகாம்களில் தங்கியுள்ள மக்களுடன் கலந்துரையாடியதாகவும் அப்போது அவர்கள் தாங்கள் விடுதலைப் புலிகளின் பிடியிலிருந்து வெளியேறி தற்போது பாதுகாப்பாக தங்கியுள்ளதாக தம்மிடம் தெரித்ததாகவும் அந்த அறிக்கையில் தெரிவிக்கப்பட்டுள்ளது.

உடனடியாக அரசியல் தீர்வு முன்வைக்கப்பட வேண்டும் எனவும் பிரிட்டனின் நாடாளுமன்ற குழுவினரின் அறிக்கை கோருகிறது.

இலங்கை நாடாளுமன்றத்தின் இரண்டு உறுப்பினர்கள் இருவேறு கிரிமினல் குற்றச் சாட்டுக்களின் பேரில் இருவேறு நீதிமன்றங்களினால் விளக்கமறியலில் வைக்கப்பட்டுள்ளனர்.

ஆளும் ஐக்கிய மக்கள் சுதந்திரக் கூட்டமைப்பின் கம்பஹா மாவட்ட நாடாளுமன்ற உறுப்பினர் சரனா குணவர்தன, சிறார் கடத்தல் சம்பவமொன்றுடன் தொடர்புபட்டார் என்ற குற்றச்சாட்டின்பேரில் இன்று நீதிமன்றத்தினால் விளக்கமறியலில் வைக்கப்பட்டனர்.

அதேவேளை, ஆளும் ஐக்கிய மக்கள் சுதந்திரக் கூட்டமைப்பின் பங்காளிக் கட்சியான தேசிய விடுதலை முன்னணியின் களுத்துறை மாவட்டப் நாடாளுமன்ற உறுப்பினர் பியசிறி விஜேநாயக்க நேற்றைய தினம் கம்பஹா அத்தனகல்ல நீதிமன்றில் சரணடைந்திருக்கிறார்.

அண்மையில் ஜே.வி.பியின் உறுப்பினர் ஒருவரின் கொலை தொடர்பில் சந்தேகத்தின்பேரில் இவரும் ஏனைய ஐந்து நபர்களும் தேடப்பட்டுவந்தனர்.

தமிழீழ விடுதலைப்புலிகளை அழிக்க, பாதுகாப்பு வலயத்தின் மீது தாக்குதல் நடத்தப்படவேண்டும் என புத்தளம் மாவட்ட நாடாளுமன்ற உறுப்பினர் பாலித ரங்கே பண்டார தெரிவித்த கருத்தை மேல்மாகாண மக்கள் முன்னணியின் தலைவர் மனோ கணேசன் கண்டித்துள்ளார்.

கடந்த திங்கட்கிழமையன்று ரங்கே பண்டார, தெரிவித்த இந்த கருத்து இனவாதத்தை தூண்டும் செயல் என அவர் குறிப்பிட்டுள்ளார். இந்தநிலையில் ஐக்கிய தேசியக்கட்சியும் தமிழர்களுக்கு எதிரான கட்சியே என மனோ கணேசன் குறிப்பிட்டுள்ளார்.

இலங்கைக்குள்ளும், இலங்கையைச் சூழவுள்ள பிரதே சங்களிலும் ஏற்படுகின்ற நில அதிர்வுகளைப் பதிவு செய்யவும், அதற்கேற்ப முன்னெச்சரிக்கை நடவடிக்கை களை மேற்கொள்ளுவதற்குமென ஜேர்மன் நாட்டின் உத வியுடன் இரண்டு நில அதிர்வு பதிவு, மத்திய நிலையங்கள் அமைக்கப்படவிருக்கின்றது.

இந்த நிலையங்கள் அனுராதபுரம், கனதராவ விகாரை வளாகத்திலும், ஹக்மன விகாரை வளாகத்திலும் அமைக்கப்படவிருப்பதாக புவிச்சரிதவியல் ஆய்வு மற்றும் சுரங்கப் பணியக பூகற்பவியல் நிபுணர் நில்மினி தல்வெல நேற்றுத் தெரிவித்தார். இந்த இரண்டு நிலையங்களும் இவ்வருட இறுதிக்குள் நிர்மாணிக்கப்படுவதுடன் அவை செயற்படவும் தொடங்கும் என்றும் அவர் குறிப்பிட்டார்.

இது தொடர்பாக அவர் மேலும் கூறுகையில், இலங்கைக்குள்ளும், இலங்கைக்கு அண்மித்த பிரதேசங்களிலும் அண்மைக் காலமாக அடிக்கடி நில அதிர்வுகள் ஏற்படுகின்றன. இதனைக் கருத்திற் கொண்டு தான் ஜேர்மன் நாட்டின் ஜி. எப். இஸட் நிறுவனத்தின் உதவியோடு நில அதிர்வு பதிவு மையங்கள் இரண்டை அமைப்பதற்கு நடவடிக்கை எடுத்திருக்கிறோம்.

இந்த இரண்டு மையங்களுக்கும் அவசியமான உபகரணங்களை வழங்குவதற்கு ஜேர்மன் நிறுவனம் இணக்கம் தெரிவித்திருக்கிறது. இந்த நிலையங்களை அமைப்பதற்கென நாம் இரண்டு மில்லியன் ரூபாவை செலவிடவிருக்கின்றோம்.

தற்போது இந் நாட்டில் நில அதிர்வுகளை பதிவு செய்யவென ஒரே ஒரு நிலையம் தான் கண்டி, பள்ளேகலையில் இயங்குகின்றது. இதற்கு மேலதிகமாக இந்த இரு நிலையங்களும் செயற்படத் தொடங்கும் போது 4 ரிச்டர் அளவுக்கு குறைவான நில அதிர்வுகளையும் துள்ளியமாகப் பதிவு செய்யக் கூடியதாக இருக்கும்.

இவற்றை அடிப்படையாக வைத்து நில அதிர்வு ஏற்பட்ட இடம். ஆழம், நேரம் என்பவற்றை மிகவும் இலகுவாக கணிப்பிட்டு விட முடியும் என்றும் அவர் கூறினார்