அருட்சல்வன் வி

பொசன் நிகழ்வுகளை முன்னிட்டு அநுராதபுரம் மற்றும் மிஹிந்தலை ஆகிய இரு நகரங்களிலுமுள்ள 25 பாடசாலைகளுக்கு இன்று முதல் எதிர்வரும் 9ஆம் திகதி வரை விடுமுறை வழங்கப்படவுள்ளதாக வட மத்திய மாகாண கல்வி அமைச்சு தெரிவித்துள்ளது. அநுராதபுரம் பொலிஸாரும் பொசன் ஏற்பாட்டுக் குழுவினரும் விடுத்த வேண்டுகோளையடுத்தே மாகாண கல்வி அமைச்சு இத்தீர்மானத்தை மேற்கொண்டது.

பொசன் நிகழ்வுகளில் கலந்துகொள்ள வருகை தரும் பக்தர்களின் பாதுகாப்பு நடவடிக்கைகளில் ஈடுபடுத்தப்படவுள்ள சுமார் 7000 பொலிஸாரையும் சிவில் பாதுகாப்புப் படையினரையும் தங்க வைப்பதற்கு இப்பாடசாலைகளைப் பயன்படுத்தும் நோக்கிலேயே விடுமுறை வழங்கப்படுவதாகவும் அறிவிக்கப்பட்டுள்ளது. 

ஐக்கிய நாடுகள் மனித உரிமைகள் பேரவையின் கூட்டத் தொடரில் கலந்துகொள்வதற்காக ஜெனீவா சென்றுள்ள மனித உரிமைகள் அமைச்சர் மஹிந்த சமரசிங்க ஐ. நா. மனித உரிமைகள் ஆணைக்குழுவின் தலைவர் நவநீதம்பிள்ளையை நேற்றுமுன்தினம் சந்தித்து பேச்சு நடத்தினார்.

ஐ. நா. மனித உரிமைகள் பேரவையின் முதல் மூன்று அமர்வுகளும் முடிவுற்ற நிலையில் வழமையான அமர்வு நேற்றுமுன்தினம் பிற்பகல் ஆரம்பமானது.

இந்த வழமையான அமர்வு ஆரம்பமாவதற்கு சுமார் 2 மணி நேரத்திற்கு முன்னர் ஐ. நா. மனித உரிமைகள் ஆணைக்குழுவின் தலைவர் நவநீதம்பிள்ளையை சந்தித்து பேசியதாக அமைச்சர் மஹிந்த சமரசிங்க ஜெனீவா விலிருந்து தெரிவித்தார்.

வழமையான அமர்வின்போது அமைச்சர் மஹிந்த சமரசிங்க இலங்கையின் சார்பில் விசேட அறிக்கையொன்றையும் சமர்ப்பித்தார்.

ஊவா மாகாணசபை தேர்தலில் பதுளை மாவட்டத்தில் ஜனநாயக மக்கள் முன்னணி போட்டியிடுவது தொடர்பில் கட்சியின் இறுதி முடிவு எதிர்வரும் சனிக்கிழமை நடைபெறவுள்ள மத்தியகுழு கூட்டத்தில் எடுக்கப்படுமென ஜனநாயக மக்கள் முன்னணியின் தேசிய அமைப்பாளரும். மேல்மாகாணசபை உறுப்பினருமான பிரபாகணேசன் தெரிவித்துள்ளார்.

இது தொடர்பில் விடுக்கப்பட்டுள்ள அறிக்கையில் பிரபா கணேசன் மேலும் தெரிவித்துள்ளதாவது.

தலைவர் மனோகணேசன் தலைமையில் எமது மத்தியகுழுக் கூட்டம் எதிர்வரும் சனிக்கிழமை கொழும்பில் நடைபெறவுள்ளது. இதற்கான அழைப்புகள் தற்சமயம் உறுப்பினர்களுக்கு அனுப்பப்படுகின்றன. இக்கூட்டத்தில் நாட்டின் இன்றைய அரசியல் நிலைமை, எமது கட்சி முன்னேடுக்கவேண்டிய நடைமுறைகள், மேல்மாகாண சபைத்தேர்தலில் பெறப்பட்டுள்ள மாபெரும் வெற்றி ஆகிய விவகாரங்கள் ஆராயப்பட்ட உள்ளதுடன், ஊவா மாகாணசபை தேர்தல் தொடர்பாகவும் இறுதி முடிவு எடுக்கப்படும்.

மத்திய, மேல், சப்ரகமுவ மாகாண சபைகளுக்கான நடைபெற்று முடிந்துள்ள தேர்தல்களை தொடர்ந்தும் நடைபெறவுள்ள ஊவா மாகாணசபைத் தேர்தலில் போட்டியிட வேண்டுமென பதுளை மாவட்ட ஜனநாயக தொழிலாளர் காங்கிரஸின் உறுப்பினர்களும், ஆதரவாளர்களும் கோரிக்கை விடுத்துவருகின்றனர். இது தொடர்பில் கடந்த வார இறுதியில் ஊவா மாவட்ட அங்கத்தவர்கள், ஆதரவாளர்கள் அடங்கிய பிரதிநிதிகள் குழு தலைவர் மனோ கணேசனை சந்திந்து உரையாடியுள்ளது.

எமது கட்சியின் ஏணி சின்னத்தில் தனித்து போட்டியிடுவதா அல்லது ஐக்கிய தேசிய கூட்டணியில் போட்டியிடுவதா என்ற இரண்டு கருத்துகள் கட்சிக்குள்ளே நிலவும் அதேவேளையில் இணைந்து செயற்படுவது தொடர்பில் எமது ஆதரவை ஏனைய சில மலையக கட்சிகள் மற்றும் குழுவினர் கோரியுள்ளனர்.

இவ்வாறு ஆரம்பத்தில் நடைபெற்ற தலைமைக்குழு கூட்ட தீர்மானத்தின் படி இது தொடர்பில் பொது செயலாளர் கலாநிதி என்.குமரகுருபரன், உப தலைவர் பி.ஜெயபாலன். தேசிய அமைப்பாளர் பிரபா கணேசன். நுவரெலிய மாவட்ட அமைப்பாளர் பிரகாஷ் கணேசன், இரத்தினபுரி மாவட்ட அமைப்பாளர் ரூபன் பெருமாள், கண்டி மாவட்ட அமைப்பாளரும், ஜ.தொ.கா. நிர்வாக செயலாளருமான அய்யாசாமி இராமலிங்கம், நுவரெலியா மாவட்ட துணை அமைப்பாளர் முரளி ரகுநாதன் ஆகியோர் அடங்கிய குழுவை தலைவர் நியமித்துள்ளார். இக்குழுவின் சிபாரிசுகளின்படி மத்தியகுழு கூட்டத்தில் இறுதி முடிவு எடுக்கப்படுமெனவும் தெரிவித்துள்ளார்.

பத்தனை ஸ்ரீபாத கல்வியியல் கல்லூரியில் குறிப்பிட்ட மூன்று பாடநெறிகள் இரத்துச் செய்யப்பட்டதனால் இவ்வாண்டில் இக்கல்லூரியில் 150 ஆக இருந்த பெருந்தோட்டத்துறை சார்ந்த ஆசிரிய பயிலுநர்கள் எண்ணிக்கை 47 பேராக மட்டுப்படுத்தப்பட்டிருக்கின்றமை பெருந்தோட்ட ஆசிரிய பயிலுநர்களைப் பாதிக்கும் செயலென முன்னாள் ஊவா மாகாணசபை உறுப்பினரும் மலையக மக்கள் முன்னணியின் ஊவா மாகாணப் பொறுப்பாளருமான அ.அரவிந்குமார், பிரதிக் கல்வி அமைச்சர் எம். சச்சிதானந்தனுக்கு அனுப்பியுள்ள அவசரக் கடிதத்தில் குறிப்பிட்டுள்ளார்.

இக்கல்லூரியில் தமிழ், ஆரம்பக்கல்வி, சமூகக்கல்வி போன்ற பாடநெறிகளை இவ்வாண்டு முதல் இரத்துச் செய்யத் தாங்களே காரணமாக இருப்பதாகவும் கூறப்பட்டு வருகின்றது. இக்கல்லூரி பெருந்தோட்டத்துறை சார்ந்த இந்திய வம்சாவளித் தமிழர்களுக்கே உருவாக்கப்பட்டது. ஆனால், காலப்போக்கில் ஏனைய சமூகத்தவர்களையும் இக்கல்லூரியில் அனுமதிக்கும் நிலை ஏற்பட்டது. அனுமதி பெற்றவர்களின் உள்ளக பயிற்சிகளைப் பெறும் வகையில் பத்தனைப் பகுதியின் ஐந்து பாடசாலைகள் அபிவிருத்தியும் செய்யப்பட்டன.

எமது சகோதர சமூகமான முஸ்லிம் சமூகம் இன்றைய நிலையில் கல்வியில் உயர்வதற்கு அமைச்சராக இருந்த அமரர் பதியூதீன் முகம்மத்தே காரணமாக இருந்திருக்கின்றார். அவரது தொலைநோக்குப் பார்வையின் பிரகாரம் தரம் 8 இல் சித்தியடைந்தவர்களுக்கு ஆசிரிய நியமனங்கள் வழங்கப்பட்டதை இங்கு குறிப்பிடவிரும்புகின்றேன். எமது நாட்டின் தேசிய கல்லூரிகளில் இக்கல்லூரி மாத்திரமே அதிகளவிலான எமது சமூகம் சார்ந்த ஆசிரியர் பயிலுனர்கள் உள்வாங்கப்படுகின்றனர். இதன் பிரகாரம் ஆண்டுதோறும் இக்கல்லூரியில் அனுமதிக்கப்படும் 200 பயிலுநர் ஆசிரியர்களில் 150 பேர் பெருந்தோட்டத்துறை சார்ந்த இந்திய வம்சாவளியினர். இக்கல்லூரியின் ஆரம்பந்முதலே தமிழ்மொழி, ஆரம்பக்கல்வி, சமூகக்கல்வி, கணிதம், விஞ்ஞானம், நாடகம், சங்கீதம், தகவல் தொழில்நுட்பம் போன்ற பாடநெறிகள் கடந்த வருடம் வரை பயிற்றப்பட்டு வந்தன.

க.பொ.த. உயர்தரத்தில் கலை, வர்த்தகப்பிரிவுகளில் அதிகமான பெருந்தோட்டத்துறை சார்ந்த மாணவர்கள் சித்தியடைவதால் பல்கலைக்கழக அனுமதிக்கு தகுதி பெறாமல் கல்வியியல் கல்லூரிகளில் அனுமதிக்கப்படுகின்றனர். இவர்களில் பெரும்பாலானோர் பத்தனை ஸ்ரீபாத கல்வியியல் கல்லூரியில் அனுமதிக்கப்பட்டு வந்தனர். இவர்கள் மூன்று ஆண்டு பயிற்சியின் பின்னர் டிப்ளோமாப் பட்டம் பெற்று ஆசிரியர்களாக வெளியேறுகின்றனர். மலையகத்தில் கணிதம், விஞ்ஞானம் போன்ற துறைகளில் உயர்தரம் கற்கப் போதிய பாடசாலைகள் இல்லாமையினால், எமது மாணவ சமூகத்தினர் கலை மற்றும் வர்த்தகத்துறை பாடநெறிகளில் விரும்பியோ விரும்பாமலோ தொடர நிர்ப்பந்திக்கப்படுகின்றனர்.

இதன் பிரதான காரணம் கணிதம் , விஞ்ஞானம் போன்ற பாடநெறிகளில் பயிற்சிகளை மேற்கொள்வதற்கு மலையகப் பாடசாலைகளில் இருந்து 150 பயிலுநர்களைத் தேர்ந்தெடுக்க முடியாமல் போனதேயாகும். இந்நிலையில் 103 பயிலுநர்களுக்கான வெற்றிடங்களை ஏனைய சமூகத்தைச் சார்ந்தவர்களால் நிரப்பப்படுகிறது. ஆரம்பக்கல்வி, தமிழ்மொழி, சமூகக்கல்வி போன்ற பாடநெறிகளுக்கு இனிமேல் புதிதாக ஆசிரியர்கள் தேவையில்லையென்ற நிலைப்பாடே இம்முடிவிற்கு காரணமென்று கருதப்படுகின்றது.

போதியளவு பயிலுநர்களை கணிதம் மற்றும் விஞ்ஞானப் பாடநெறிகளில் உள்வாங்க தொலைநோக்குப் பார்வையோடு அதனை அதிகரிப்பதற்கான ஆக்கபூர்வமான எந்தவொரு நடவடிக்கைகளும் இல்லாத நிலையில் வருடத்திற்கு 150 கணித, விஞ்ஞானப் பயிலுநர்களை முழுமையாக எப்போது தயார்ப்படுத்தப் போகின்றோமென்ற கேள்விக்கு சரியான பதில் இல்லை. எமக்குக் கிடைத்திருக்கும் இவ் அரியவாய்ப்பினை ஏனையவர்களுக்கு தாரைவார்த்துக் கொடுக்கும் நிலையினை நாமே ஏற்படுத்தியிருக்கின்றோம்.

நிறுத்தப்பட்டிருக்கும் பாட நெறிகளில் போதியளவு ஆசிரியர்கள் மலையகப் பாடசாலைகளில் பற்றாக்குறை நிலவும் இவ்வேளையில், குறிப்பிட்ட பாடநெறிகளை இரத்துச் செய்வதை எவ்வகையிலும் நியாயப்படுத்த முடியாது. ஆகவே, தாங்கள் இதுவிடயத்தில் கூடிய கவனம் செலுத்தி இரத்துச் செய்யப்பட்ட பாடநெறிகளை மீளவும் ஆரம்பிப்பதுடன், எமது சமூகத்திற்கென்று ஆரம்பிக்கப்பட்ட இக்கல்வியியல் கல்லூரியையாவது பாதுகாத்துத் தரும்படி கேட்டுக்கொள்கின்றேன் என்று குறிப்பிட்டுள்ளார்.

யுத்தத்தின் பின்னரான உண்மை நிலையை வெளிநாடுகளில் வாழும் இலங்கையர்களுக்குத் தெளிவு படுத்தும் தொடர் கருத்தரங்குகளை சர்வதேச ரீதியில் நடத்த நடவடிக்கை எடுக்கப்பட்டுள்ளது.

இதன் முதலாவது கருத்தரங்கு எதிர்வரும் வாரத்தில் அவுஸ்திரேலியாவில் நடைபெறவுள்ளதுடன் ஜூன் 10ம் திகதி முதல் 14ம் திகதி வரை “மெல் பேர்னில் இலங்கை வாரம்” என்ற தொனியில் தொடர் நிகழ்வுகள் பலவும் ஏற்பாடு செய்யப்பட்டுள்ளன.

இதன் ஒரு அம்சமாக மெல்பேர்ன் பாராளுமன் றத்தில் நடைபெறும் விசேட செயலமர்வில் கல்வியமைச்சர் சுசில் பிரேமஜயந்த சிறப்புரையாற்றவுள்ளார்.

“இலங்கையின் தற்போதைய நிலைவரமும் மஹிந்த சிந்தனை அபிவிருத்தித் திட்டமும் என்ற பொருளில் அமைச்சர் உரையாற்றவுள்ளார்.

அவுஸ்திரேலியாவில் வாழும் இலங்கையர்களின் சமூக அமைப்புகள் இணைந்து ஏற்பாடு செய்துள்ள இந்நிகழ்வுகளில் அமைச்சர் சுசில் பிரேமஜயந்த, மனோ விஜேரத்ன, ஜனாதிபதியின் ஆலோசகர் ரவீந்ரரந்தெனிய, இலங்கை முதலீட்டுச் சபையின் தலைவர் தம்பிக்க பெரேரா அவுஸ்திரேலியாவுக்கான இலங்கைத் தூதுவர் சேனக வெல் கம்பாய ஆகியோர் கலந்து கொள்ளவுள்ளனர்.

இது தொடர்பான செய்தியாளர் மாநாடொன்று கொழும்பு ஹில்டன் ஜெய்க் ஹோட்டலில் நடைபெற்றது. பிரதமர் அலுவலகம் ஏற்பாடு செய்திருந்த இம் மாநாட்டில் கல்வியமைச்சர் சுசில் பிரேமஜயந்த, அவுஸ்திரேலிய நிகழ்வுகளுக்கான ஏற்பாட்டுக் குழு உறுப்பினர் சுசந்த கடுகம்பொல, ஜனாதிபதியின் ஆலோசகர் ரவீந்ர ரந்தெனிய ஆகியோர் கலந்து கொண்டு விளக்கமளித்தனர்.

அமைச்சர் சுசில் பிரேம ஜயந்த இது தொடர்பில் விளக்குகையில், இலங்கையின் தற்போதைய சூழ்நிலை மற்றும் மஹிந்த சிந்தனை அபிவிருத்தித் திட்டம் தொடர்பாக அவுஸ் திரேலியாவில் வாழும் இலங்கையர்களுக்குத் தெளிவுபடுத்துவதே ”மெல்பேர்னில் இலங்கை வாரம்” நிகழ்ச்சியின் நோக் கமாகும்.

இந்நிகழ்வுகளில் இலங் கையின் வர்த்தக, உல்லாசப் பிரயாண துறையை ஊக்குவிக்கும் வகையிலான சந்திப்புகளும், இலங்கை தொடர்பான புகைப்படக் கண்காட்சி, கலாசார நிகழ்ச்சிகளும் ஏற்பாடு செய்யப்பட்டுள்ளன.

மெல்பேர்னில் ஒரு இலட்சம் இலங்கையர்கள் வாழ்கின்றனர். பயங்கரவாதத்திற்குப் பின்னரான இலங்கையின் சிறந்த சூழல் தொடர்பில் அவர்களுக்கு தெளிவுபடுத்த வேண்டியுள்ளது. மெல்பேர்ன் பாராளுமன்றத்தில் நடைபெறவுள்ள விசேட நிகழ்வில் இலங்கை தொடர்பாக  சிறப்புரையாற்றவுள்ளதுடன் அந்நாட்டின் பாராளுமன்ற உறுப்பினர்கள் மற்றும் முக்கியஸ்தர்கள் பலரும் கலந்து கொள்ளவுள்ளனர். இது போன்ற நிகழ்வுகளை ஏனைய நாடுகளிலும் நடாத்துவதற்கு வெளிநாட்டமைச்சு நடவடிக்கை மேற்கொண்டு வருகிறது எனவும் அமைச்சர் மேலும் தெரிவித்தார்.

டெங்கு காய்ச்சல் தீவிரமாகப் பரவும் பிரதேசங்களாக 68 மருத்துவ அதிகாரிகள் பிரிவு (எம். ஓ. எச்) கள் அடையாளப்படுத்தப் பட்டிருப்பதாக சுகாதாரப் பராமரிப்பு, போஷாக் குத்துறை அமைச்சின் பொது சுகாதாரத்துறையின் பிரதிப் பணிப்பாளர் நாயகம் டாக்டர் பாலித மஹீபால நேற்றுத் தெரிவித்தார்.

அதேநேரம் நுளம்புகள் பெருகுவதற்கு ஏதுவான சுற்றாடலைக் கொண்டிருப்பவர்கள் தொடர்பாக 0112665329 என்ற தொலைபேசி இலக்கத்துடன் தொடர்பு கொண்டு பிரதம பொது சுகாதாரப் பரிசோதகருக்கு அறியக் கொடுக்குமாறு சுகாதார அமைச்சு கேட்டுள்ளது.

இதேவேளை டெங்கு நுளம்பு ஒழிப்பு நடவடிக்கைகளை மேலும் வலுப்படுத்தும் நோக்கில் சிவில் பாதுகாப்பு படைவீரர்கள் ஆயிரம்பேருக்கு விசேட பயிற்சி அளிக்கப்படவிருக்கின்றன. இவர்களுக்கான பயிற்சி இன்று 4 ஆம் திகதி கொழும்பில் ஆரம்பிக்கப்படவிருக் கிறது. கடந்த ஜனவரி முதலாம் திகதி முதல் ஜூன் மாதம் இரண்டாம் திகதி வரையும் டெங்கு காய்ச்சல் காரணமாக 90 பேர் உயிரிழந்துள்ளனர். 7110 பேர் இக்காய்ச்சலுக்கு இக் காலப் பகுதியில் உள்ளாகியுள்ளனர் என்றும் டாக்டர் மஹீபால குறிப்பிட்டார்.

கண்டி, கொழும்பு, களுத்துறை, குருணாகல், கேகாலை, கம்பஹா, திருமலை, மட்டக்களப்பு, ஹம்பாந்தோட்டை, மாத்தறை ஆகிய மாவட்டங்களிலுள்ள 68 மருத்துவ அதிகாரிகள் பிரிவுகளே டெங்கு காய்ச்சல் தீவிரமாக பரவும் பிரதேசங்களாக அடையாளப்படுத்தப்பட்டிருப்பதாகவும் அவர் கூறினார்.

இப் பிரதேசங்களில் நுளம்புகளின் பெருக்கத்தை கட்டுப்படுத்தவென பல்வேறு நடவடிக்கைகள் முன்னெடுக்கப்பட்டு வருவதாக குறிப்பிட்ட அவர், நுளம்புகளின் பெருக்கத்தைக் கட்டுப்படுத்துவதற்காகச் சுற்றாடலை சுத்தமாகவும் உலர் நிலையிலும் வைத்து கொள்ள உதவுமாறு பொது மக்களைக் கேட்டுக்கொண்டார்.

நுளம்புகள் பெருகக் கூடிய சுற்றாடலைக் கொண்டிருப்பவர்களுக்கு எதிராக ஜூன் மாதம் முதலாம் திகதி முதல் சட்ட நடவடிக்கை எடுக்கப்பட்டு வருகின்றது. 2007 ஆம் ஆண்டின் 11ம் இலக்க நுளம்புகள் பெருகுவதைத் தவிர்ப்பதற்கான சட்டத்தின் கீழ் இந்நடவடிக்கை எடுக்கப்படுகின்றது.

இதற்கேற்ப, சுகாதாரத் திணைக்கள மருத்துவ அதிகாரிகள், பொது சுகாதார பரிசோதகர்கள், நகர சபைகளின் பிரதம மருத்துவ அதிகாரிகள், மாகாணமட்ட பொது சுகாதார பரிசோதகர்கள் போன்றோருக்கு விசேட சுற்றறிக்கைகள் நேற்று அனுப்பி வைக்கப்பட்டன.

யாழ். மாநகர, சபை மற்றும் வவுனியா நகர சபைத் தேர்தல்களுக்கான வேட்பு மனுக்கள் எதிர்வரும் 18 ஆம் திகதி முதல் 25 ஆம் திகதி நண்பகல் 12.00 மணி வரை ஏற்கப்படும் என தேர்தல் திணைக்களம் நேற்று (3) அறிவித்தது. இது தொடர்பான வர்த்தமான அறிவித்தல் இன்று (4) வெளியிடப்படும் என மேலதிக தேர்தல் ஆணையாளர் டபிள்யூ. பி. சுமணசிறி தெரிவித்தார்.

சுயேச்சைக்குழுக்கள் 18 ஆம் திகதி முதல் 24 ஆம் திகதி நண்பகல் 12.00 மணிவரை கட்டுப்பணம் செலுத்த முடியும் எனவும் அவர் குறிப்பிட்டார். வேட்பு மனுக்கள் யாழ். மற்றும் வவுனியா மாவட்ட செயலகங்களில் ஏற்கப்பட உள்ளதாகவும் அறிவிக்கப்படுகிறது. 2008 ஆம் ஆண்டு வாக்காளர் இடாப்பின்படி இரு உள்ளூராட்சி சபைகளுக்குமான தேர்தல்கள் நடத்தப்பட உள்ளன. யாழ். மாநகர சபை தேர்தலில் வாக்களிக்க ஒரு இலட்சத்து 417 பேர் தகுதி பெற்றுள்ளதோடு வவுனியா நகர சபைத் தேர்தலில் வாக்களிக்க 24 ஆயிரத்துக்கு 626 பேர் தகுதி பெற்றுள்ளனர். யாழ். மாநகர சபைக்கு 23 உறுப்பினர்களும் வவுனியா நகர சபைக்கு 12 உறுப்பினர்களும் தெரிவாக உள்ளனர்.

இரு உள்ளூராட்சி சபைகளுக்குமான தேர்தல்கள் ஆகஸ்ட் மாதத்தில் நடத்தப்படவுள்ளன.

அமரர் அமரசிறி தொடங்கொடவின் இறுதிக் கிரியைகள் இன்று (04) வியாளக் கிழமை காலி கராப்பிட்டியில் நடைபெறுகிறது. நீதி, சட்ட மறுசீரமைப்பு அமைச்சரான அமரசிறி தொடங்கொட கடந்த சனிக்கிழமை இரவு காலமானார். அன்னாரின் பூதவுடல் அஞ்சலிக்காக பாராளுமன்றத்திற்குக் கொண்டு செல்லப்பட்டு, கராப்பிட்டிய இல்லத்திற்கு கொண்டு செல்லப்பட்டது.

அன்னாரின் மறைவு குறித்து பிரதமர் ரத்னசிறி விக்கிரமநாயக்க விடுத்துள்ள இரங்கல் செய்தியில் காலி மாவட்ட பாராளுமன்ற உறுப்பினராகவும், நீதி, சட்ட மறுசீரமைப்பு அமைச்சராகவும், ஸ்ரீ லங்கா சுதந்திரக் கட்சியின் உப தலைவராகவும் பணியாற்றிய அமரசிறி தொடங்கொடவின் இழப்பு இலங்கை மக்களுக்குப் பேரிழப்பாகும். குறிப்பாக காலி மக்களுக்கு ஈடுசெய்ய முடியாததாகும்” என்று குறிப்பிட்டுள்ளார்.

ஊவா மாகாண சபைத் தேர்தல் 2008 வாக்காளர் இடாப்பின் படி நடத்தப்படும் எனவும் இம்முறை தேர்தலில் வாக்களிக்க சுமார் 8 இலட்சத்து 75 ஆயிரம் பேர் தகுதி பெற்றுள்ளதாகவும் தேர்தல் திணைக்களம் தெரிவித்தது. வேட்பு மனு கோருவது தொடர்பான வர்த்தமானி அறிவித்தல் இந்த வாரத்தினுள் அறிவிக்கப்படும் என மேலதிக தேர்தல் ஆணையாளர் டபிள்யு. பி. சுமனசிறி தெரிவித்தார்.

இம்முறை தேர்தலில் பதுளை மாவட்டத்தில் இருந்து 5 இலட்சத்து 74 ஆயிரத்து 815 பேர் வாக்களிக்கத் தகுதி பெற்றுள்ளதோடு மொனராகலை மாவட்டத்தில் 3 இலட்சம் பேர் தகுதி பெற்றுள்ளதாக பதுளை மற்றும் மொனராகலை உதவித் தேர்தல் ஆணையாளர்கள் தெரிவித்தனர். பதுளை மாவட்டத்தில் 507 வாக்களிப்பு நிலையங்கள் அமைக்கப்பட உள்ளதாகவும் அறிவிக்கப்படுகிறது.

ஊவா மாகாண சபை கடந்த 28 ஆம் திகதி மாகாண ஆளுநரால் கலைக்கப்பட்டது. மாகாண சபை கலைக்கப்பட்ட ஒரு வாரத்தில் வேட்புமனுத் திகதி அறிவிக்கப்பட வேண்டும் எனவும் தேர்தல் செயலக வட்டாரங்கள் கூறின.

இதேவேளை ஐ. ம. சு. கூட்டமைப்பு, ஐ. தே. க, ஜே. வி. பி. அடங்கலான பல கட்சிகள் வேட்பாளர் பட்டியல் தயாரிப்பதில் மும்முரமாக ஈடுபட்டுள்ளன. சு.க. வேட்பாளர் பட்டியல் பூர்த்தி செய்யப்பட்டுள்ளதோடு ஏனைய கூட்டுக் கட்சிகளிடம் தமது கட்சி சார்பாக போட்டியிடும் வேட்பாளர்களின் விபரங்கள் கோரப்பட்டுள்ளதாக அமைச்சர் சுசில் பிரேம் ஜெயந்த் தெரித்துள்ளார்.

இலங்கை உழைக்கும் பத்திரிகையாளர் சங்கத்தின் பொதுச் செயலாளரும் ஊடகவியலாளருமான போத்தல ஜயந்த மீது நடத்தப்பட்ட தாக்குதல் தொடர்பாக கண்டனம் எதுவும் வெளியிடாமல் கவலைமட்டுமே தெரிவித்த ஊடக அமைச்சர் லக்ஷ்மன் யாப்பா அபேவர்தன, இராணுவத்தினர், வர்த்தகர்கள், அரசியல் வாதிகள் போன்று விடுதலைப்புலிகளுடன் தொடர்பு வைத்திருந்த ஊடகவியலாளர்களும் இருப்பதாகவும் அவ்வாறானவர்கள் பற்றிய தகவல்களை வெளிப்படுத்துமாறு பாதுகாப்பு அமைச்சிடம் கேட்டிருப்பதாகவும் கூறினார்.

ஊடக அமைச்சில் நேற்று செவ்வாய்க்கிழமை நடைபெற்ற ஊடக வியலாளர் மாநாட்டிலேயே அமைச்சர் லக்ஷ்மன் யாப்பா அபேவர்தன இந்தக் கருத்தை வெளியிட்டார். போத்தல ஜயந்த மீது நடத்தப்பட்ட தாக்குதல் தொடர்பாக நாம் கவலைப்படுகிறோம். கடந்த காலங்களில் பல்வேறு காரணங்களுக்காக பலதரப்பட்ட செய்திகள் வெளிவந்திருக்கின்றன. இதில் சகல ஊடகவியலாளர்களையும் குற்றம் சாட்ட முடியாது.

யுத்தம் காரணமாக சகல துறைகளிலும் பிரச்சினை இருந்தது. வர்த்தகர்கள் மட்டுமல்லாது, இராணுவத்தில் இருப்பவர்களும் விடுதலைப் புலிகளுடன் தொடர்பு வைத்திருந்தது கண்டு பிடிக்கப்பட்டு அரசாங்கத்தினால் விசாரணை செய்யப்பட்டு வருகிறது.

அரசியல்வாதிகளும் புலிகளுடன் தொடர்பு வைத்திருந்தனர். இது தொடர்பிலும் விசாரணை நடத்த வேண்டியிருக்கிறது. யுத்த காலத்தின் போது இவர்களால் தெரிந்தோ அல்லது தெரியாமலோ உதவிகள் செய்யப்பட்டிருக்கின்றன. இது வேறு பிரச்சினை. அது மட்டுமல்லாது, விடுதலைப் புலிகளுடன் தொடர்பு வைத்திருந்த ஊடகவியலாளர்களும் இருக்கின்றனர். இது தொடர்பிலும் அரசாங்கம் விசாரிக்கும்.

எவ்வாறாயிருப்பினும் போத்தல ஜயந்த மீதான தாக்குதல் குறித்து கவலையடைகிறோம். இது குறித்து ஜனாதிபதிக்கும் உடனடியாக அறிவிக்கப்பட்டது. அத்துடன், சம்பவம் தொடர்பில் ஒருவரிடம் வாக்குமூலம் பெறப்பட்டுள்ளது. இதற்கு மேல் எதுவும் கூற முடியாது என்றும் அமைச்சர் தெரிவித்தார்.  அத்துடன், விடுதலைப் புலிகளுடன் தொடர்பு வைத்திருந்தவர்கள் தொடர்பாக 2 வாரங்களுக்குள் சட்ட ரீதியான நடவடிக்கைகள் ஆரம்பிக்கப்படும் என்றும் அவர் கூறினார்.

இதேநேரம், விடுதலைப் புலிகளுடன் தொடர்பு வைத்திருந்த ஊடகவியலாளர்களது விபரங்கள் குறித்து கேள்வி எழுப்பப்பட்ட போது;  அது பாதுகாப்பு அமைச்சின் வேலை. இது தொடர்பான தகவல்களை வெளிப்படுத்துமாறு நாம் பாதுகாப்பு அமைச்சிடம் கேட்டிருக்கிறோம் என்று லக்ஷ்மன் யாப்பா அபேவர்தன தெரிவித்தார்.