செய்திகள்

திருகோண மலையில் பெரும் பரபரப்பை ஏற்படுத்திய 6 வயது சிறுமியான ஜூட் ரெஜி வர்ஷாவின் படுகொலை தொடர்பாக கைதான சந்தேக நபர்கள் 5 பேரும் அவசரகால சட்ட விதிகளின் கீழ் தடுத்து வைக்கப்பட்டுத் தொடர்ந்தும் விசாரணைக்கு உட்படுத்தப்பட்டு வருவதாக பொலிஸ் தகவல்கள் தெரிவிக்கின்றன. சந்தேக நபர்களில் இருவர் பயன்படுத்திய தொலைபேசி இலக்கங்கள் தொடர்பாகவும் தமது விசாரணைகளில் விசேட கவனம் செலுத்தி வருவதாகப் பொலிஸார் குறிப்பிடுகின்றனர்.

அதேவேளை, சந்தேக நபர்கள் ஏற்கனவே இப்பிரதேசத்தில் இடம் பெற்ற 30இற்கும் மேற்பட்ட ஆட்கொலைகள், கப்பம், ஆட்கடத்தல் சம்பவங்களுடன் தொடர்புடையவர்கள் என்றும் பொலிஸ் விசாரணைகளிலிருந்து தெரிய வருகின்றது.

வர்த்தகர்கள் ,சினிமா திரையங்கு உரிமையாளர்கள் உட்பட பல்வேறு தரப்பினரிடம் கப்பம் பெற்றுள்ளமையும் தெரிய வந்துள்ளதாகப் பொலிஸ் தகவல்கள் தெரிவிக்கின்றன.

இந்நபர்கள் கொலை செய்தவர்களின் சடலங்கள் கடந்த காலங்களில் நடுக்கடலில் வீசப்பட்டுள்ளன. சிறுமியின் சடலத்தையும் இதே பாணியில் கடலில் போடுவதற்கே இவர்கள் திட்டமிட்டிருந்த போதிலும் அன்றைய தினம் கடற்படையினரால் விதிக்கப்படடிருந்த மீன் பிடித்தடை காரணமாக அது சாத்தியப்படவில்லை என்றும் தமது விசாரணைகளின் போது தெரிய வந்துள்ளதாகப் பொலிஸார் கூறுகின்றனர்

உயிர்நீத்த மற்றும் படுகாயமுற்ற இராணுவ வீரர்களின் குடும்ப உறுப்பினர்களை பாதூகாப்புச் செயலாளர் கோதாபய ராஜபக்ஷ (17) சந்தித்து உரையாடினார். அநுராதபுரம் சாலியபுரவில் அமைந்துள்ள கஜபா படைப்பிரிவின் முகாமில் இச்சந்திப்பு இடம்பெற்றது. பாதுகாப்பு அமைச்சின் முக்கிய அதிகாரிகளும் இச்சந்திப்பில் கலந்துகொண்டனர்.

படை வீரர்களின் குடும்பத்தினரின் துயரங்களைக் கேட்டறிந்த பாதுகாப்புச் செயலாளர் அவர்களுக்கு ஆறுதல் கூறியதோடு அவர்களின் பிரச்சினைகளைத் தீர்க்க உடனடி நடவடிக்கை எடுக்குமாறு பாதுகாப்பு அமைச்சின் அதிகாரிகளுக்கு உத்தரவிட்டார்.
 
இங்கு ஏற்பாடு செய்யப்பட்டிருந்து வைபவத்தில் உரையாற்றிய அவர், தாய் நாட்டை மீட்பதற்காக உயிர் தியாகம் செய்த படை வீரர்கள் எக்காலத்திலும் நினைவுகூரப்படுவர் என்றும் நாட்டுக்காக உயிர்நீத்த தேசிய வீரர்களின் பட்டியலில் அவர்கள் பெயர்கள் சேர்க்கப்படும் என்றும் கூறினார்.

இந்தியாவிலிருந்து புல்மோட்டைக்கு வருகை தந்திருப்பவர்கள் இராணுவ டாக்டர்கள் அல்லர் என்று சபை முதல்வரும், அமைச்சருமான நிமல் சிறிபால டி சில்வா நேற்று பாராளுமன்றத்தில் தெரிவித்தார்.

இந்தியா தொடர்ந்தும் வழங்கி வருகின்ற முழுமையான ஒத்துழைப்பு காரணமாகவே பயங்கரவாதத்தை இந்தளவுக்கு ஒழிக்க முடிந்தது எனவும் அவர் குறிப்பிட்டார். இலங்கைக்கு இந்தியா முழுமையான ஆதரவை வழங்கி வருகிறது. ஜனாதிபதி மஹிந்த ராஜபக்ஷ, ஜனாதிபதியின் சிரேஷ்ட ஆலோசகர் பசில் ராஜபக்ஷ, வெளிவிவகார அமைச்சர் ரோஹித போகொல்லாகம ஆகியோர் இந்தியாவுடன் மேற்கொண்ட இராஜதந்திர மட்டத்திலான உறவுகளின் அடிப்படையில் இந்தியா மனிதாபிமான உதவிகளை இலங்கைக்கு வழங்கி வருகிறது.

புல்மோட்டைக்கு டாக்டர்களை இந்தியா அனுப்பி வைத்துள்ளது. அவர்கள் இராணுவ டாக்டர்கள் அல்லர். இந்த விடயத்தை பிரதானமாக்கிக் கொண்டு ஜே. வி. பியினர் தங்களது போஸ்டர் பிரசாரத்துக்கான புதிய தொணியொன்றை ஏற்படுத்த முயற்சிக்கிறது எனவும் சுகாதார அமைச்சர் நிமல் சிறிபால டி சில்வா தெரிவித்தார். இந்திய டாக்டர்கள் குழுவினர் இலங்கை வந்துள்ளமை தொடர்பாகவும், அவர்கள் புல்மோட்டையில் மருத்துவ நடவடிக்கைகளில் ஈடுபட்டுள்ளமை தொடர்பாகவும் ஜே. வி. பி. எம்.பி. அனுரகுமார திஸாநாயக்க நேற்று பாராளுமன்றத்தில் விசேட அறிக்கையொன்றை சமர்ப்பித்துப் பேசினார்.

இலங்கை வந்துள்ள மருத்துவக் குழு இராணுவ மருத்துவக் குழு என்றும் அவர் குற்றம் சாட்டினார். இதற்கு பதிலளிக்கும் வகையில் பேசும் போதே அமைச்சர் நிமல் மேற்கண்டவாறு குறிப்பிட்டார். புல்மோட்டை பொருளாதார ரீதியில் மிகவும் முக்கியத்துவம் வாய்ந்தது. அங்கு கனியப் பொருட்கள் உள்ளன. எனவே இந்த இந்திய டாக்டர்களின் புல்மோட்டை வருகையை ஜே. வி. பியினர் விமர்சனத்திற் குள்ளாக்குகின்றனர். ஜே. வி. பியினர் தேவையில்லாத கற்பனையை செய்து கொண்டு உச்சந்தலைக்கும் முழங்காலுக்கும் முடிச்சுப்போட்டுக் கொண்டு இருக்கின்றனர்.

மேலும் சுனாமி நேரத்தில் இந்தியா உதவி வழங்கிய போது ஏன் இந்தியாவின் உதவியை ஏற்கவில்லை என கேட்டனர். இப்போது ஏன் உதவியை பெறுகிaர்கள் என கேட்கிறார்கள் ஜே. வி. பி. இரட்டை வேடம் போட்டுக்கொண்டிருக்கிறது. புல்மோட்டையில் 45 கட்டில்களைக் கொண்ட நடமாடும் ஆஸ்பத்திரியே அமைக்கப்பட்டுள்ளது. இங்கு அடிப்படை சிகிச்சையை பெறுபவர்கள் பதவிய, கந்தளாய், திருமலை ஆஸ்பத்திரிகளுக்கு அனுப்பப்படுவார்கள். உடனடியாக கழற்றி வேறு இடத்திற்கு கொண்டு செல்லக்கூடியவாறுதான் இந்த ஆஸ்பத்திரி இயங்குகிறது. இதனாலேயே இதனை நடமாடும் ஆஸ்பத்திரி என்று கூறுகிறோம். இது கூட தெரியாமல் நடமாடும் ஆஸ்பத்திரி என்றால் என்ன? என ஜே. வி. பி. கேள்வி கேட்கிறது.

இந்தியா பெருந்தொகையான மருத்துவப் பொருட்களை எமக்கு வழங்கியிருக்கிறது. அவர்களுக்கு தேவையான மருந்து வகைகள் அல்ல. எமது நாட்டிற்கு ஏற்ற எம்மால் வழங்கப்பட்ட பட்டியலின் அடிப்படையில் மருந்துப் பொருட்களை வழங்கியிருக்கிறது. இந்தியா மட்டுமல்ல வெளிநாடுகள் பலவும் உதவி வழங்க முன்வந்துள்ளன. எவரையும் நாம் நிராகரிக்கவில்லை.

இந்திய டாக்டர்கள் இலங்கைக்கு வந்துவிட்டார்கள் என்பதற்காக இலங்கையின் இறைமைக்கும், ஒருமைப்பாட்டுக்கும் பாதிப்பு ஏற்பட்டுவிடாது. முப்படைகளுக்கும் நிரந்தர டாக்டர்கள் நியமனத்திற்காக விண்ணப்பங்கள் கோரப்பட்டிருந்தன. எனினும் ஒரு விண்ணப்பம் கூட வரவில்லை. நாட்டுப் பற்றாளர்கள் என கூறிக்கொள்பவர்களின் விண்ணப்பங்கள் கூட கிடைக்கவில்லை.

இந்த நிலையில் 50 டாக்டர்களை கட்டாயமாக முப்படையின் மருத்துவ பிரிவுக்கு அனுப்ப வேண்டி வந்தது என்றும் அமைச்சர் நிமல் சிறிபால டி சில்வா தெரிவித்தார்.

இலங்கையில் நடைபெற்று வரும் மோதல்களில் பெருமளவிலான பொதுமக்கள் இடையில் சிக்கிக் கொண்டிருக்கும் நிலையில், அவர்களுக்கு ஏற்பட்டுள்ள பாதிப்புக்கள் குறித்து செவ்வாய்க்கிழமை புதுடெல்லியில் ஆலோசனை நடைபெற்றது.

மனித உரிமைகளுக்கான நாடாளுமன்றக் குழுவின் இந்தியத் தலைவரும், காங்கிரஸ் கட்சியின் மாநிலங்களவை உறுப்பினருமான சுதர்சன நாச்சியப்பன் அவர்கள், கொழும்பில் உள்ள சர்வதேச செஞ்சிலுவைச் சங்கத்தின் தலைவர் பால் கேஸ்டெல்லா மற்றும் புதுடெல்லியில் இருக்கும் பிராந்திய தலைவர் ஃபிராங்காய்ஸ் ஸ்டேம் ஆகியோருடன் ஆலோசனை நடத்தினார்.

அப்போது, இலங்கையில் நடைபெற்று வரும் போரில் பொதுமக்களுக்கு ஏற்பட்டுள்ள பாதிப்புக்கள் குறித்தும், அவர்களுக்கு வழங்கப்படும் உதவிகள் குறித்தும் செஞ்சிலுவைச் சங்கப் பிரதிநிதிகளிடம் அவர் கேட்டறிந்தார்.

வடக்கிலும் பாதிக்கப்பட்ட மக்களுக்கு எதிர்காலத்தில் வீடமைப்பு அபிவிருத்திப் பணிகளை முன்னெடுத்துச் செல்ல தேசிய வீடமைப்பு அதிகார சபை நடவடிக்கை எடுத்து வருவதாக தேசிய வீடமைப்பு அதிகாரசபையின் பொது முகாமையாளர் எல்.எஸ். பலன்சூரிய தெரிவித்தார்.

ஜேர்மன் தொழில்நுட்ப ஒத்துழைப்பு நிறுவனத்தின் நிதியுதவியுடன் 60 இலட்சம் ரூபா செலவில் மட்டக்களப்பு கல்லடியில் நிர்மாணிக்கப்பட்ட தேசிய வீடமைப்பு அதிகார சபையின் புதிய அலுவலக திறப்பு விழாவில் கலந்துகொண்டு உரையாற்றும் போதே அவர் இவ்வாறு கூறினார்.

தொடர்ந்து பேசிய அவர்; யுத்தம் மற்றும் கடல்கோள் அனர்த்தங்களால் பாதிக்கப்பட்ட கிழக்கு மாகாண மக்களுக்கு கடந்த இரண்டு வருடகாலத்தில் புதிய வீடுகள் நிர்மாணித்துக் கொடுக்கப்பட்டுள்ளன.

யுத்தம் மற்றும் கடல்கோளினால் வீடுகளை இழந்த 15 ஆயிரம் குடும்பங்கள் இதனால், நன்மையடைந்தன. சர்வதேச அரச சார்பற்ற நிறுவனங்கள், மற்றும் சில அமைப்புகளின் நிதி உதவிகளுடன் இந்த வீடுகள் கட்டப்பட்டன.

கிழக்கில் மேற்கொள்ளப்பட்ட இந்த வீடமைப்பு நிர்மாண நடவடிக்கைகளைப் போலவே வட மாகாணத்திலும் வீடுகளை நிர்மாணிக்க ஆவண செய்யுமாறு வீடமைப்பு பொது வசதிகள் அமைச்சர் பேரியல் அஷ்ரப் அறிவுறுத்தல் வழங்கியுள்ளார்.

யுத்த சூழல் மாறி வடக்கில் சிவில் நிர்வாகம் ஏற்பட்ட பகுதிகளில் மக்கள் சென்று குடியேறும்போது அவர்களுக்கு புதிய வீடுகளை நிர்மாணிக்க தேசிய வீடமைப்பு அதிகாரசபை உதவும்.

இதன்படி வடபகுதியில் இடம்பெயர்ந்தவர்கள் தொடர்பான விபரங்களை பெற்றுக்கொள்ளவும், இந்த வேலைத்திட்டத்தை வீடுகளைப் பெறுபவர்களின் பங்களிப்புடன் குறைந்த செலவில் செயற்படுத்தவும் வீடமைப்பு அதிகாரசபை திட்டமிட்டுள்ளது என்றார்.

பல்கலைக் கழகங்களினுள் பொலிஸ் சோதனை நிலையங்கள் அமைக்கப்படுமாயின் அனைத்து பல்கலைக்கழகங்களையும் இணைத்து ஆர்ப்பாட்டங்களை நடத்தப் போவதாக அனைத்துப் பல்கலைக்கழக மாணவர் ஒன்றியம் தெரிவித்துள்ளது. ரஜரட்ட மற்றும் களனி பல்கலைக்கழகங்களில் பொலிஸ் சோதனை நிலையங்களை அமைப்பதற்கு அரசு மேற்கொண்டுள்ள நடவடிக்கைக்கு எதிர்ப்புத் தெரிவித்து நேற்று திங்கட்கிழமை கொழும்பில் இடம்பெற்ற ஊடகவியலாளர் சந்திப்பிலேயே ஒன்றியத்தின் இணைப்பாளர் உதேவ பிரேமரட்ன இதனைத் தெரிவித்தார்.

இவ்விரு பல்கலைக்கழகங்களிலும் சோதனை நிலையங்கள் அமைக்கப்படுவது தொடர்பாக பல்கலைக்கழக மாணவர்கள் பல்வேறுபட்ட குற்றச்சாட்டுகளை முன்வைத்து வருகின்றனர்.

இந்நிலையில் இந்த செயற்பாட்டை கைவிடுமாறு நாம் கோருகின்றோம். எமது வேண்டுகோளையும் மீறும் பட்சத்தில் இதற்குத் எதிர்ப்புத் தெரிவித்து அனைத்துப் பல்கலைக்கழகங்களையும் இணைத்து ஆர்ப்பாட்டங்களை மேற்கொள்ள நடவடிக்கை எடுக்கப்படுமென்றார்.

ஏ9  பாதையூடாக கொழும்புக்கும் யாழ்ப்பாணத்திற்கும் இடையில் பஸ் போக்குவரத்தை ஆரம்பிக்க தனியார் பஸ் உரிமையாளர்கள் விருப்பம் தெரிவித்து தன்னிடம் அது தொடர்பாக கோரிக்கை விடுத்துள்ளதாக தனியார் பஸ் உரிமையாளர் சங்கத்தின் தலைவர் கெமுனு விஜயரட்ன தெரிவித்துள்ளார்.  இதன்படி சாதாரண தனியார் பஸ்களும் சொகுசு பஸ்களும் சேவையிலீடுபடவுள்ளன.

சுமார் 500 தனியார் பஸ்கள் ஏ9 பாதையூடாக சேவையிலீடுபடுவதற்கு தயாராகவுள்ளதாகவும் அவர் கூறினார். தெற்கில் இருந்து பௌத்த யாத்திரிகர்கள் நயீனாதீவுக்கு போய்வர விருப்பம் தெரிவித்துள்ளனர்.

இது குறித்து போக்குவரத்து அமைச்சர் டலஸ் அழகப்பெருமவிடமும் ஆலோசனை நடத்தியுள்ளோம். இதேபோல இ.போ.ச.பஸ்களும் இச் சேவையில் ஈடுபடவுள்ளன. இது தொடர்பாக போக்குவரத்து அமைச்சு அதிகாரிகள் பாதுகாப்புத் தரப்பினர்களுடன் பேச்சு நடத்தியுள்ளனர் எனவும் அவர் தெரிவித்தார்.

அத்தியாவசிய சேவைகள் ஆணையாளரால் ஏ9 வீதியூடாக லொறிகளில் அனுப்பிவைக்கப்பட்ட உணவுப்பொருட்கள் தனியார் வர்த்தகர்களுக்கு வழங்கப்படவுள்ளதாக யாழ். மாவட்ட அரசாங்க அதிபர் கே. கணேஷ் தெரிவித்துள்ளார்.  சிவப்பு நாட்டரிசி , கோதுமை மா, சீனி, பருப்பு, தேயிலை, லக்ஸ்பிறே, அங்கர் பால்மா வகைகள் என்பனவே இவ்வாறு வழங்கப்படவுள்ளன.

குடா நாட்டில் உணவுப்பொருட்களின் விலைகளை தரமாக கட்டுப்படுத்துவதற்காக கூட்டுறவு சங்கங்களுக்கு விற்பனை செய்யப்படும் விலைகளிலேயே தனியார் வர்த்தகர்களுக்கும் விநியோகிக்கப்படும் எனவும் அரச அதிபர் குறிப்பிட்டார்.

இத்திட்டத்தின் கீழ் 2500 மெற்றிக்தொன் உணவுப்பொருட்கள் களஞ்சியங்களில் இருந்து தனியார் வர்த்தகர்களுக்கும் கூட்டுறவுச்சங்கங்களுக்கும் விநியோகிக்கப்படவுள்ளன.

சிவப்பு நாட்டரிசி ஒரு கிலோ 75 ரூபாவுக்கும் சீனி ஒரு கிலோ 69 ரூபாவுக்கும் பருப்பு கிலோ 138 ரூபாவுக்கும் தேயிலை கிலோ 150 ரூபாவுக்கும் லக்ஸ்பிறே 400 கிராம் பைக்கட் 200 ரூபாவுக்கும் அங்கர் 400 கிராம் பைக்கற் 278 ரூபாவுக்கும் விற்பனை செய்யப்படவுள்ளன.

கூட்டுறவுச்சங்கங்கள் தமக்கு தேவையான பொருட்களை இம்மாதம் 20 ஆம் திகதிக்கு முன்பும் தனியார் வர்த்தகர்கள் 21 ஆம் திகதிக்கு முன்பும் செயலக புனர்வாழ்வுப் பகுதியுடன் தொடர்பு கொள்ளுமாறும் அரசாங்க அதிபர் அறிவித்துள்ளார். இதேநேரம் குடாநாட்டில் பொருட்களுக்கு நிலவிய தட்டுப்பாடு நீங்கிவருவதாகவும் அதிகாரிகள் தெரிவித்தனர்.

மன்னார் மூர்வீதி பிரதான வீதி மற்றும் சின்னக்கடை ஆகிய பகுதிகளில் செவ்வாய்க்கிழமை காலை 8.30 மணிமுதல் 10.30 மணிவரை இராணுவத்தினரும் பொலிஸாரும் இணைந்து சுற்றிவளைப்பு தேடுதல்களினை மேற்கொண்டனர்.

இதன் போது அப்பகுதியிலுள்ள வீடுகள் மற்றும் அலுலகங்களுக்குச் சென்ற இராணுவத்தினரும் பொலிஸாரும் தேடுதல்களை மேற்கொண்டதோடு வீடுகளில் உள்ளவர்களது பெயர் விபரங்கள்களையும் பதிவு செய்து கொண்டனர்.

இதேவேளை மன்னார் அரச பேருந்து தரிப்பிடத்தில் காலை 10.30 மனிமுதல் 11.30 மணிவரை பொலிஸார் வரவழைக்கப்பட்டு சோதனைகள மேகொள்ளப்பட்டது.

இதன் போது போக்குவரத்திற்காக காத்திருந்த மற்றும் தேவைகளுக்கா வந்திருந்தவர்கள் என சுமார் 500 பேர் வரை சோதனைக்குற்படுத்தப்பட்டனர்.எனினும் இந்த நடவடிக்கைகளின் போது எவரும் கைது செய்யப்படவில்லை எனபது குறிப்பிடத்தக்கது.

2005 ஆம் ஆண்டுடன் ஒப்பிடுகையில் 2009 ஆம் ஆண்டு இலங்கை சுகாதார துறையில் பாரிய வளர்ச்சியை கண்டுள்ளதாக வெளிவிவகார அமைச்சர் ரோஹித்த போகொல்லாகம தெரிவித்தார். ஐக்கிய நாடுகள் சபையின் பொருளாதார மற்றும் சமூக பிராந்திய அமைச்சர்களின் மாநாடு (17) கொழும்பில் ஆரம்பமானது இதில் பல நாடுகளின் பிராந்திய அமைச்சர்கள் கலந்து கொண்டனர்.இம்மாநாட்டில் கலந்துகொண்டு உரையாற்றுகையிலேயே அமைச்சர் இவ்வாறு தெரிவித்தார்.அங்கு அவர் மேலும் தெரிவித்ததாவது,

“சுகாதாரம் தொடர்பான கல்வியினை இன்று நாட்டில் அனைவருக்கு பெற்றுக்கொடுக்க கூடியதாக அமைந்துள்ளது.ஐக்கிய நாடுகள் சபையின் பொருளாதார மற்றும் சமூக அமைச்சர்களின் மாநாடு இம்முறை இலங்கையில் நடைபெறுவது எமக்கு கௌரவத்தை ஈட்டித்தந்துள்ளது. அதேவேளை எதிர்வரும் ஜூலை மாதம் ஜெனிவாவில் நடைபெறவிருக்கும் ஐ நா கூட்டத்தொடரில் சுகாதார சேவை அபிவிருத்தி தொடர்பான யோசனைகளை முன்வைத்து விளக்கமளிப்பதற்கு தேவையான அனுபவங்களை பெறக்கூடிய ஒரு சந்தர்ப்பமாக இம்மாநாடு அமைந்துள்ளது.

இதற்கு ஒத்துழைப்பு வழங்கிய சுகாதர சேவைகள் அமைச்சு மற்றும் சக துறையை சாந்தவர்கள் அனைவருக்கும் இத்தருணத்தில் நன்றியை தெரிவிக்கிறோம்.உலக பொருளாதார நெருக்கடியான் நிலையில் காணப்பட்டபோதிலும் எமது பொருளாதார வளர்ச்சி மற்றும் சுகாதார கல்வி அறிவை அரசு உரிய வகையில் நடைமுறைப்படுத்துகிறது. ஜப்பான் இத்தாலி போன்ற நாடுகள் எமது சுகாதார சேவையின் அபிவிருத்திற்கு பல வழிகளில் உதவி உள்ளன. இன்று இலங்கை அனைவரது கவனத்திற்கும் வந்துள்ளது.எனவே தான் இவ்வருடம் பல நிகழ்வுகளையும், மாநாடுகளையும் இலங்கையில் நடத்த தீர்மானிக்கப்பட்டுள்ளது.அவற்றுள் முக்கியமாக சார்க் வலய நாடுகளின் கல்வி அமைச்சர்களின் மாநாடு இலங்கையில் நடைபெறவுள்ளது” என அமைச்சர் தெரிவித்தார்.

.தொடர்ந்து ஊடகவியலாளர் ஒருவர் எழுப்பிய கேள்விக்கு பதிலளித்த அமைச்சர், “இலங்கையில் பயங்கரவாதத்தை ஒழிக்க பல படை நடவடிக்கைகள் மேற்கொள்ளப்பட்டு வருகின்றன. நாட்டில் சமாதானத்தினை ஏற்படுத்தி ஜனநாயகத்தை நிலைநாட்டுவது எமது நோக்கம் இவை அனைத்தும் ஜனாதிபதியே சாரும்.எமது நாட்டிற்கு சர்வதேச சமூகம் பல உதவிகளை செய்து வருகிறது. வடக்கு, கிழக்கு என்ற பாரபட்சம் இன்றி மக்கள் ஒரே இன மக்கள் என நோக்கப்படுகிறார்கள்.” என தெரிவித்தார்.

அதேவேளை ஜெனீவாவில் தமிழ் மக்களால் மேற்கொள்ளப்பட்ட ஆர்ப்பாட்டம் தொடர்பாக ஊடகவியலாளர் ஒருவர் எழுப்பிய கேள்விக்கு பதில் அளித்த அமைச்சர், “விடுதலை புலிகளிற்கு ஆதரவு தெரிவித்ததே இவ் ஆர்ப்பாட்டம் மேற்கொள்ளப்பட்டுள்ளது. எல்லோரிற்கும் தெரியும் நேரடியாகவோ மறைமுகமாகவோ விடுதலை புலிகளை ஆதரிப்பது பயங்கரவாதிகளை நேரடியாக ஆதரிப்பதாகவே கருதப்படும்.” எனத்தெரிவித்தார்