எழுத்தாளர்கள்

இலங்கை தமிழர் பிரச்சினை மற்றும் தனது தந்தை ராஜீவ் காந்தி கொலை வழக்கு ஆகியன தொடர்பில் இந்திய அரசாங்கம் நடவடிக்கை எடுத்துவருவதாக ராஜீவ் காந்தியின் மகனும் காங்கிரஸ் கட்சியின் இந்திய மக்களவை உறுப்பினருமான ராகுல் காந்தி தெரிவித்துள்ளார்.

புதுச்சேரி மாநில காங்கிரசாருடன் தேர்தல் குறித்து ஆலோசனைகள் நடத்துவதற்காக ராகுல் காந்தி புதுச்சேரி சென்றிருந்தார். இந்த ஆலோசனைக் கூட்டத்தில் முக்கிய காங்கிரஸ பிரமுகர்கள் தவிர வேறு எவரும் அனுமதிக்கப்படவில்லை. அத்துடன் ஊடகவியலாளர்களும் அனுமதிக்கப்படவில்லை. இக்கூட்டத்திற்கு பின்னர் ராகுல் காந்தி ஊடகவியலாளர்களைச் சந்தித்தார்.

இதன்போது ராஜீவ் காந்தி விடுதலைப் புலிகளால் கொல்லப்பட்டதாகக் கூறப்படும் வழக்கு பற்றியும், இலங்கை தமிழர் பிரச்சினை பற்றியும் ராகுல் காந்தியிடம் கேள்வி எழுப்பினர். இதற்குப் பதிலளித்த அவர், “இரண்டு விடயங்கள் குறித்தும் அரசாங்கம் நடவடிக்கை எடுத்து வருகிறது. தந்தை கொலை செய்யப்பட்ட வழக்கில் அரசாங்கம் நடவடிக்கை எடுத்தது. தற்போதும் நடவடிக்கை எடுத்து வருகிறது” என்றார்.

ஜனாதிபதி மஹிந்த ராஜபக்ஷ முன்வைத்துள்ள பொருளாதார மறுமலர்ச்சித் திட்டத்தை முழுமையாக நடைமுறைப்படுத்தும் வகையில் ஏழு நிதித் திருத்தச் சட்டமூலங்கள் பாராளுமன்றத்தில் நேற்று (25) நிறைவேற்றப்பட்டன. கடந்த 2008 டிசம்பர் 30ஆம் திகதி ஜனாதிபதியால் பிரகடனப்படுத்தப்பட்ட 16 பில்லியன் ரூபாய் பெறுமதியான பொருளாதார நிவாரணத் திட்டத்தை நடைமுறைப்படுத்தும் வகையில், நிதிச் சட்டங்களில் திருத்தங்கள் செய்யப்பட்டுள்ளன.

ஜனாதிபதி சமர்ப்பித்த 2009ஆம் ஆண்டுக்கான வரவு-செலவுத் திட்டத்திற்குப் புறம்பாக பொருளாதார நிவாரணத் திட்டம் அறிமுகப்படுத்தப்பட்டதால், அமைச்சரவையின் அங்கீகாரத்துடன் நிதிச் சட்டமூலங்களில் திருத்தங்கள் மேற்கொள்ளப்பட்டு நிறைவேற்றப்படுவதாக அரச வருவாய்த்துறை மற்றும் பிரதி நிதியமைச்சரான ரஞ்சித் சியம்பலாபிட்டிய தெரிவித்தார்.

அடுத்த புதிய நிதியாண்டு ஆரம்பமாகும் ஏப்ரல் முதலாம் திகதிக்கு முன்னர் இந்த நிதித் திருத்தச் சட்டமூலங்களை விவாதித்து நிறைவேற்றுவதற்காக நேற்றைய தினம் பாராளுமன்றம் விசேட அமர்வாகக் கூட்டப்பட்டிருந்தது.

வழமையான அமர்வுகளைப் போலன்றி, வாய்மூல விடைக்கான கேள்வி நேரம் நேற்று இடம்பெறவில்லை. சபாநாயகர் டபிள்யூ. ஜே. எம். லொக்குபண்டார தலைமையில் பாராளுமன்றம் நேற்றுக் காலை 9.30 இற்குக் கூடியபோது, அமைச்சர் சியம்பலாபிட்டிய ஏழு நிதித் திருத்தச் சட்டமூலங்களைச் சமர்ப்பித்து உரையாற்றினார்.

முழு உலகமும் எதிர்நோக்கியுள்ள பொருளாதார நெருக்கடியைக் கருத்திற்கொண்டு, நாட்டின் வர்த்தக சமூகத்தினர் குறிப்பாக ஏற்றுமதித்துறையின் மூலம் நாட்டுக்கு அந்நியச் செலாவணியைத் தேடித் தரும் வர்த்தக நிறுவனங்களுக்கு வரிவிலக்களிக்கும் வகையில் ஜனாதிபதி முன்வைத்த நிவாரணத் திட்டத்தில் குறிப்பிடப்பட்டுள்ள வரிச்சலுகையை நடைமுறைப்படுத்துவதற்கும் நிதித் திருத்தச் சட்டமூலம் சமர்ப்பிக்கப்பட்டிருப்பதாக அமைச்சர் தெரிவித்தார்.

அரசாங்கம் பொதுமக்கள் மீது வரிச் சுமையைத் திணித்திருப்பதாக எதிர்க்கட்சியினர் கூறினாலும், இந்தச் சட்டமூலங்களால் பாரிய வரிச்சலுகை வழங்கப்படுவதாக அமைச்சர் கூறினார்.

முக்கியமாக தேசிய உற்பத்தி ஊக்குவிக்கப்பட்டுள்ளது. இதன்படி, தேசிய ரீதியாக உற்பத்தி செய்யப்படும், தேயிலைத் தொழிற்துறைக்குத் தேவையான இயந்திர, உபகரணங்களுக்கு வரிவிலக்களிக்கப்பட்டுள்ளது. பயங்கரவாத செயற்பாடுகளால் சேதமடைந்த பஸ் வண்டிகளுக்காக நிவாரணம் வழங்கப்பட்டுள்ளதுடன், உள்ளூர் பித்தளை தொழிற்துறைக்கு ஊக்குவிப்பு வழங்கப்பட்டுள்ளது.

நகைத்தொழிலில் ஈடுபட்டுள்ள பெருந்திரளானோரை மேம்படுத்தும் வகையில் உள்ளூரில் தயாரிக்கப்படும் தங்கநகைகளுக்கு வற்வரி நீக்கப்பட்டுள்ளது.

தேயிலையை பக்கற்செய்து ஏற்றுமதி செய்வோருக்கு வருமான வரி விலக்களிக்கப்பட்டுள்ளதுடன் இலங்கை நிறுவனமொன்றோ, தனி நபரோ இலங்கைக்கு வெளியில் சேவையாற்றி ஈட்டும் வருமானத்தை வங்கி ஊடாக நாட்டுக்குக்கொண்டு வரும் வருமானத்துக்கு வரிவிலக்கு அளிக்கப்பட்டுள்ளது.

மக்கள் பங்களிப்புடன் மேற்கொள்ளப்படும் கமநெகும, மக நெகும, சமுர்த்தி அபிவிருத்தி ஆகிய திட்டங்களுக்கு வற்வரி நீக்கப்பட்டுள்ளது.

அத்துடன் இதுவரை எந்தவொரு அரசாங்கமும் வழங்காத வரிச்சலுகை கலைஞர்களுக்கு வழங்கப்பட்டுள்ளது.

புத்தகமொன்றை எழுதுவதன் மூலம், மேடை நாடகத் தயாரிப்பின் மூலம், பாடலொன்றை எழுதுவதன் மூலம், இசையமைப்பதன் மூலம், பாடுவதன் மூலம் கலைஞர்கள் பெறும் வருமானத்திற்கும் வரி விலக்களிக்கப்பட்டுள்ளது” என்று அமைச்சர் சியம்பலாபிட்டிய பாராளுமன்றத்தில் தெரிவித்தார்.

“பயங்கரவாதத்திற்கு எதிரான செயற்பாடுகளை முன்னெடுத்து வரும் நிலையிலும் அரசாங்கம் பொருளாதார மேம்பாட்டுக்காக நடவடிக்கைகளை மேற்கொண்டுள்ளது. இந்த இரண்டு பாரிய சவால்களையும் எதிர்கொண்டு அரசாங்கம் வெற்றிப் பாதையில் சென்று கொண்டிருக்கிறது.

ஐ.தே.க. வினர் நாட்டின் பொருளாதாரத்தைச் சிதைத்துவிட்டு 45 ஆயிரம் கோடிக்காக உலகைச் சுற்றினர். ஆனால், நாம் பொருளாதார அபிவிருத்திக்காக சர்வதேச நாணய நிதியத்திடமிருந்து கடன் பெறுகின்றோம் என்றும் அமைச்சர் மேலும் தெரிவித்தார்

இந்திய கடல் எல்லைக்குள் மீன் பிடிக்கச் சென்ற மற்றுமொரு இலங்கை மீனவர்கள் குழு ஒன்றை இந்திய கரை யோர பாதுகாப்புப் படையினர் நேற்று முன்தினம் (24) இரவு கைது செய்துள்ள தாக மீன்பிடித்திணைக்கள உதவிப் பணிப் பாளர் லால் பெரேரா தெரிவித்தார். 7 படகுகளில் சென்ற சுமார் 30 மீனவர்கள் இவ்வாறு கைதாகியுள்ளனர்.

கடந்த மூன்று தினங்களில் மாத்திரம் 75 மீனவர்கள் இந்தியக் கரையோரப் பாதுகாப்புப் படையினரால் கைது செய்யப்பட்டுள்ளதோடு அவர்களின் 15 படகுகளும் கைப்பற்றப்பட்டுள்ளன. இதுவரை சுமார் 200 மீனவர்களும் 37 படகுகளும் இந்தியாவில் தடுத்து வைக்கப்பட்டுள்ளன.

இவர்கள் தமிழ்நாடு, ஆந்திரா, சென்னை மற்றும் நிகோபார், அந்தமான் தீவுகளில் தடுத்து வைக்கப்பட்டுள்ளதாக லால் பெரேரா கூறினார்.

இதேவேளை விடுதலை செய்யப்பட்ட 27 இலங்கை மீனவர்கள் நேற்று (25) இலங்கைக்கு திருப்பி அனுப்பப்பட ஏற்பாடாகியிருந்ததாகவும் அவர் குறிப்பிட்டார். இவர்களின் 4 படகுகளும் விடுவிக்கப்பட்டுள்ளன. இவர்கள் வெள்ளிக்கிழமை இலங்கை வந்தடைவரென எதிர்பார்க்கப்படுகிறது.

தடுத்து வைக்கப்பட்டுள்ள ஏனைய மீனவர்களை விடுதலை செய்வது தொடர்பாக சென்னை பிரதி உயர்ஸ்தானிகராலயத்துடன் இணைந்து நடவடிக்கை எடுத்து வருவதாகவும் லால் பெரேரா தெரிவித்தார். 

சர்வதேச நிதியத்திடம் கடன்பெறுவது தொடர்பிலான முக்கிய பேச்சுவார்த்தை யொன்று நேற்றும் இடம்பெற்றதாக அமைச்சர் சரத் அமுனுகம பாராளுமன்றத்தில் தெரிவித்தார்.

எனினும், பாரிய நிபந்தனைகள் எதுவும் விதிக்கப்படமாட்டாதென சர்வதேச நாணய நிதியப் பிரதிநிதிகள் ஏற்கனவே தெரிவித்துள்ளதாகவும் அமைச்சர் தெரிவித்தார்.

எவ்வாறாயினும் நாடு நிதிநெருக்கடியை எதிர்நோக்கும் வேளையில் ஆட்சியைப் பிடிக் கும் தந்திரோபாய நோக்கிலேயே ஐக்கிய தேசி யக் கட்சி இது தொடர்பில் பல்வேறு விமர்ச னங்களை முன்னெடுக்கிறது. உலகின் பொருளாதார நெருக்கடியைக் கருத் திற்கொண்டு சர்வதேச நாணய நிதியம் இலகு கடன் திட்ட மொன்றை அறிமுகப்படுத்தியுள்ளது.

நாட்டின் பொருளா தாரத்தைக் கருத்திற்கொண்டு இலங்கையும் இக்கடனைப் பெறத் தீர்மானித்துள்ளது. இதற்கான பேச்சு வார்த்தைகள் தொடர்ச்சியாக இடம் பெற்று வருகின்றன எனவும் அமைச்சர் தெரிவித்தார். பாராளுமன்றத்தில் நேற்று நிதியமைச்சின் சட்டமூலம் மீதான விவாதத்தில் கலந்து கொண்டு உரையாற்றிய அமைச்சர், யுத்தம் நிறைவடைந்ததும் பல்வேறு துறைகளும் பாரிய அபிவிருத்தி காண்பது உறுதியெனவும் தெரிவித்தார்.

அமைச்சர் தமதுரையில் மேலும் தெரிவித்ததாவது, மேல் மாகாணத்தைப் பொறுத்தவரை இன்று இந்தியா, சீனா போன்ற அபிவிருத்தி இடம்பெற்று வருகிறது. அரசாங்கம் பாரிய அபிவிருத்திகளுக்குச் செலவிடவே சர்வதேச நிதியத்திடம் கடன் பெறுகிறது.

சர்வதேச நாணய நிதியத்திடம் பெறவுள்ள கடன் சம்பந்தமாக பல்வேறு கருத்துக்கள் எதிர்க் கட்சியினரால் முன்வைக்கப்படுகின்றன. இம் முறை கடன் பெறப்போவது வழமையான நிபந்தனைகளுடனல்ல என்பது தெளிவுபடுத்திக் கொள்ளப்பட வேண்டும் எனவும் அமைச்சர் மேலும் தெரிவித்தார்

நாட்டில் சமாதானத்தை உருவாக்கும் மனித நேய நடவடிக்கையை படையினர் சிறப்பாக மேற்கொண்டு வருகின்றனர். நாட்டில் நடைபெறும் கொலைச் சம்பவங்களுக்காக அரசாங்கத்தின்மீது குற்றஞ்சுமத்துவது அர்த்தமற்றது என தேசிய நல்லிணக்க அமைச்சர் விநாயமூர்த்தி முரளிதரன் (25) பாராளுமன்றத்தில் கூறினார்.

சபை ஒத்திவைப்பு பிரேரணைக்கான விவாதத்தில் கலந்துகொண்டு உரையாற்றும்போதே அவர் இவ்வாறு கூறினார். அவர் தொடந்தும் உரையாற்றுகையில்,

கிழக்கில் வாழும் இனங்களுக்கு இடையில் ஒற்றுமையை ஏற்படுத்தாமல் அங்கு அபிவிருத்தி நடவடிக்கைகளை முன்னெடுக்க முடியாது.

கிழக்கு மாகாண சபையில் உள்ள குறைபாடுகள் தொடர்பில் ஜனாதிபதியின் கவனத்துக்கு கொண்டுவந்துள்ளோம். அக்குறைபாடுகளை நிவர்த்திப்பதில் ஜனாதிபதி அதிக அக்கரை கொண்டுள்ளார்.

கிழக்கில் அதிகாரப் பரவலாக்கம் இடம்பெறும்போது சகல இனங்களுக்கும் சம வாய்ப்புக்கள் வழங்கப்படவேண்டும். ஜனாதிபதியின் முயற்சியினால்தான் எமக்கு கிழக்கு மாகாண சபை கிடைத்தது.

மக்களின் சம்மதம் இன்றியே அன்று வடக்கும் கிழக்கும் ஒன்றிணைக்கப்பட்டது. இதில் எமக்கு உடன்பாடில்லை.

ஒரே நாளில் புலிகளை அழித்துவிட முடியாது. ஆங்காங்கே நடக்கும் பயங்கரவாதத் தாக்குதல்களைத் தடுக்க கால அவகாசம் தேவை. அச்சுறுத்தலுக்குள்ளான கிராமங்களைப் பாதுகாக்க பாதுகாப்புச் செயலாளர் உரிய நடவடிக்கை எடுததுள்ளார்.

புலிகளிடமிருந்து விடுவிக்கப்பட்டுள் கிழக்கு மாகாணத்தில் இன்று பாரிய அபிவிருத்தித் திட்டங்கள் நடைமுறைப்படுத்தப்பட்டுள்ளன. இதற்காக பெருந்தொகைப் பணம் ஒதுக்கப்பட்டுள்ளது என்றும் அமைச்சர் கூறினார்.

ருபெல்லா தடுப்பு மருந்து ஒவ்வாமை குறித்து ஆராய்வதற்காக இலங்கைக்கு வருகை தந்துள்ள உலக சுகாதார ஸ்தாபன மருந்துவ நிபுணர்கள் குழுவினர் தங்களது இடைக்கால அறிக்கையை நாளை 27ம் திகதி சுகாதாரப் பராமரிப்பு, போஷாக்குத் துறை அமைச்சர் நிமல் சிறிபால டி சில்வாவுக்குக் கையளிக்கவுள்ளனர்.

ருபெல்லா தடுப்பு மருந்து ஒவ்வாமை குறித்து ஆராய்வதற்காக கடந்த 22ம் திகதி கொழும்புக்கு வருகை தந்த இம்மருத்துவ நிபுணர்கள் மறுநாள் அமைச்சரைச் சந்தித்துக் கலந்துரையாடியதுடன் மாத்தறைக்கு நேரில் சென்று ருபெல்லா தடுப்பு மருந்து ஒவ்வாமை குறித்து ஆய்வுகளை மேற்கொண்டனர்.

கடந்த 19ம் திகதி மாத்தறை சென் தோமஸ் உயர் தர மகளிர் கல்லூரியின் 8ம் தர மாணவிகளுக்கு ருபெல்லா தடுப்பு மருந்து வழங்கப்பட்டது.

இச்சம்பவத்தையடுத்து சுகாதாரப் பராமரிப்பு, போஷாக்குத் துறை அமைச்சர் நிமல் சிறிபால டி சில்வா விடுத்த வேண்டுகோளுக்கு ஏற்ப உலக சுகாதார ஸ்தாபனம் இரு மருத்துவ நிபுணர்களை கொழும்புக்கு அனுப்பிவைத்தது.

இவர்கள் மாத்தறையில் ருபெல்லா தடுப்பு மருந்து ஒவ்வாமைக்கு உள்ளான மாணவிகள் கற்கும் பாடசாலைக்கும், மாணவி களின் வீடுகளுக்கும் நேரில் சென்று விசாரணைகளை நடத்தினர். குறித்த தடுப்பு மருந்து தொடர்பாகவும் பரிசோதனைகளை நடாத்தி இருப்பதாகவும் தெரிவிக்கப்படு கிறது.

இச்சம்பவம் தொடர்பான விசாரணைகளையும், பரிசோதனையையும் முடித்துக் கொண்டு இக்குழுவினர் நேற்று கொழும்பு திரும்பியதாகவும் தெரிவிக்கப்படுகிறது.

தற்கொலைக் குண்டுத் தாக்குதலில் பாதிக்கப்பட்டு கடந்த இரண்டு வாரங்களுக்கு மேலாக கொழும்பு பெரியாஸ்பத்திரி தீவிர சிகிச்சைப் பிரிவில் சிகிச்சை பெற்று வந்த தபால் தொலைத் தொடர்பு அமைச்சர் மஹிந்த விஜேயசேகரவின் உடல் நிலை தேறிவருவதையடுத்து அவர் கட்டணம் செலுத்தி சிகிச்சை அளிக்கும் பிரிவுக்கு மாற்றப்பட்டுள்ளார்.

இதேவேளை, நீதி மறுசீரமைப்பு அமைச்சர் அமரசிறி தொடங்கொட ஆபத்தான நிலையில் தீவிர சத்திரசிகிச்சை கண்காணிப்புப் பிரிவில் அனுமதிக்கப்பட்டுள்ளதாக கொழும்பு பெரியாஸ்பத்திரி பணிப்பாளர் ஹெக்டர் வீரசிங்க நேற்று (25) தெரிவித்தார்.

தீவிர சத்திரசிகிச்சைப் பிரிவில் ஒரு வாரத்திற்கு மேல் சிகிச்சை பெற்று வந்த அமைச்சர் மஹிந்த விஜேசேகர பின்னர் நரம்பியல் சத்திர சிகிச்சைப் பிரிவுக்கு மாற்றப்பட்டார். தற்பொழுது அமைச்சர் சுயமாக எழுந்து உட்காருவதோடு உதவியாளரின் உதவியுடன் நடந்து வருவதாகவும் அவசர சிகிச்சைப் பிரிவு பணிப்பாளர் பி. ஆரியவர்தன தெரிவித்தார். அவரின் உடல் நிலை தேரிவருவதையடுத்தே அவரை கட்டணம் செலுத்தி சிகிச்சை பெறும் வார்டுக்கு மாற்றியதாகவும் அவர் குறிப்பிட்டார்.

இதேவேளை நீதி, நீதி மறுசீரமைப்பு அமைச்சர் அமரசிறி தொடங்கொட கடந்த இரு தினங்களுக்கு முன் ஆபத்தான நிலையில் கொழும்பு பெரியாஸ்பத்திரியில் அனுமதிக்கப்பட்டதாக ஹெக்டர் வீரசிங்க கூறினார். அவரின் நிலை கவலைக்கிடமாக இருப்பதாக அறியவருகிறது. அவருக்கு செயற்கை சுவாசம் அளிக்கப்பட்டுள்ளதாகவும் ஆஸ்பத்திரி வட்டாரங்கள் தெரிவித்தன

“யாழ் தேவி’ ரயில் சேவையை மீண்டும் வடக்கு நோக்கி ஆரம்பிக்க வவுனியாவிலிருந்து காங்கேசன்துறை வரையான 159 கிலோமீற்றர் தூர ரயில் தண்டவாளங்களுக்கும் சிலிப்பர் கட்டைகளுக்கு மட்டும் 700 கோடி ரூபா தேவைப்படுவதாக போக்குவரத்து அமைச்சர் டலஸ் அழகப்பெரும தெரிவித்துள்ளார்.

ஜனாதிபதி செயலகத்தில் நடைபெற்ற “யாழ்தேவி’ ரயில் சேவையை மீண்டும் வடக்கிற்கு ஆரம்பிப்பதற்கான ரயில் பாதை புனரமைப்புக்கான வேலைத்திட்டத்தின் ஆரம்ப வைபவத்தில் பேசும் போதே அமைச்சர் அழகப்பெரும இவ்வாறு தெரிவித்தார்.

அங்கு அவர் மேலும் பேசுகையில்;  “வவுனியாவிலிருந்து காங்கேசன்துறை வரையான 159 கிலோமீற்றர் ரயில் பாதைக்கு இடையே 85 பெரிய பாலங்களும், 58 சிறிய பாலங்களும் 28 ரயில் நிலையங்களும் நிறுவ வேண்டியுள்ளது. இவையனைத்தையும் நிர்மாணித்து யாழ்தேவியை உடனடியாக வடக்கிற்கு கொண்டு செல்வதென்பது இலகுவான விடயமல்ல.

எனினும், ஜனாதிபதி அரசுத் தலைவரென்ற வகையில் எமது வார்த்தைகளிலிருந்து  “முடியாது’ என்ற சொல்லை அகற்றியுள்ளார். எனவே, ரயில் சேவை பணியாளர்களின் அர்ப்பணிப்பு, திடசங்கற்பம், நேர்மைத் தன்மை மூலம் இந்த பாரிய சவாலை விருப்பத்துடன் முகம் கொடுக்க முடியுமென நாம் நம்புகிறோம்.

இதேநேரம், நிலப்பரப்பை வெற்றி கொண்டது நின்று விடாது. எமது படையினர் யாழ்தேவிக்காக பாதை அமைப்பதிலும் விஷேடமான பொறுப்பை நிறைவேற்ற எதிர்பார்த்துக்கொண்டிருக்கின்றனர். நாம் எவ்வளவு திடசங்கற்பம் கொண்டாலும் இந்த பாரிய நடவடிக்கைக்காக செலவாகும் நிதியானது உலகிலேயே மிக மோசமான பயங்கரவாதிகளுடன் 3 தசாப்தங்களாக போராடிய எம்மைப் போன்ற நாட்டுக்கு இலகுவானதல்ல.

உதாரணமாக, 159 கிலோமீற்றர் தூரமான தண்டவாளங்களுக்கு மட்டும் 450 கோடி ரூபா தேவைப்படுகிறது. அந்த தூரத்திற்கான சிலிப்பர் கட்டைகளுக்கு மட்டும் 250 கோடி ரூபா தேவைப்படுகிறது ‘ என்றார்.

அக்கரைப்பற்று, அளிக்கம்பை பிரதேசத்தில் மறை த்து வைக்கப்பட்டிருந்த 40 கிலோ கிறாம் எடை கொண்ட கிளேமோர் குண்டொன் றைப் பாதுகாப்பு படையி னர் நேற்று பிற்பகல் மீட் டெடுத்ததாக இராணுவப் பேச்சாளர் அலுவலக அதிகாரியொருவர் தெரிவித்தார்.

குண்டு செயலிழக்கச் செய்யும் படையினரின் உதவியோடு பொலிஸார் இக்குண்டை செயலிழக்கச் செய்ததாகவும் அவர் குறிப்பிட்டார்.

அதேநேரம் 15 மிதி வெடிகளையும், ரி 56 ரக துப்பாக்கிக்குரிய 1456 ரவைகளையும், மிதிவெடி களுக்குப் பயன்படுத்தப்படும் 204 பியூஸ்களையும் பாதுகாப்பு படையினர் இந்த இடத்திலிருந்து மீட்டெடுத்திருப்பதாக வும் அவர் கூறினார்.

பிலிபித் தொகுதியில் தான் பேசியது தொடர்பாக தன் மீது தேர்தல் ஆணையம் தொடர்ந்துள்ள மத துவேஷ வழக்கை தள்ளுபடி செய்ய வேண்டும் என்று கோரிய வருண் காந்தியின் மனுவை அலகாபாத் உயர்நீதிமன்றம் தள்ளுபடி செய்து விட்டது. இதையடுத்து சுப்ரீம் கோர்ட்டை அணுக பாஜக முடிவு செய்துள்ளது.

பிலிபித் தொகுதியில் முஸ்லீம்களுக்கு எதிராக வெறித்தனமாக பேசியிருந்தார் வருண் காந்தி. இதுதொடர்பான சிடி வெளியாகி பெரும் பரபரப்பை ஏற்படுத்தியது.உடனடியாக நடவடிக்கையில் இறங்கிய தேர்தல் ஆணையம், வருண் காந்தி, பாஜகவுக்கு நோட்டீஸ் அனுப்பியது. வருண் காந்தி மீது கிரிமினல் வழக்குப் பதிவு செய்ய உ.பி. தலைமைத் தேர்தல் அதிகாரிக்கு உத்தரவிட்டது.

இதையடுத்து தேர்தல் அதிகாரியின் புகாரின் பேரில், வருண் காந்தி பிலிபித் போலீஸார் வழக்குப் பதிவு செய்தனர். இதை ரத்து செய்ய வேண்டும் என்று கோரி அலகாபாத் உயர்நீதிமன்றத்தில் வருண் காந்தி மனு தாக்கல் செய்தார். மேலும் முன்ஜாமீன் கோரி டெல்லி உயர்நீதிமன்றத்தில் மனு செய்தார்.

டெல்லி உயர்நீதிமன்றம், விசாரணை நடத்தி, அலகாபாத் உயர்நீதிமன்றத்தில் வருண் காந்தி தொடர்ந்துள்ள வழக்கில் தீர்ப்பு வரும் வரை அவரைக் கைது செய்ய தடை விதித்தது.  இந்த நிலையில் அலகாபாத் உயர்நீதிமன்றம், வருண் காந்தியின் மனுவை இன்று தள்ளுபடி செய்து விட்டது. இந்த மனுவைத் தள்ளுபடி செய்த அலகாபாத் உயர்நீதிமன்றம், வருண் காந்தி டெல்லி உயர்நீதிமன்றத்தில் ஏற்கனவே முன்ஜாமீன் பெற்றுள்ளதால், அவரது கைதுக்கு இடைக்காலத் தடை விதிக்க வேண்டிய அவசியம் இல்லை என்று கூறியுள்ளது.

ஆனால் இந்த முன்ஜாமீன் 27ம் தேதியுடன் முடிவடைகிறது. எனவே அதன் பின்னர் வருண் காந்தி கைது செய்யப்படக் கூடியவாய்ப்புகள் உள்ளன. எனவே அலகாபாத் உயர்நீதிமன்ற தீர்ப்பை எதிர்த்து உச்சநீதிமன்றத்தில் மேல் முறையீடு செய்ய பாஜக திட்டமிட்டுள்ளது.