உள்நாட்டுச் செய்திகள்

அமைச்சரவையில் முஸ்லீம் பிரதிநிதித்துவமின்மை இனவாதமா? மாவடிப்பால மரணங்களுக்கு யார் பொறுப்பு?

சட்டத்தரணி, மனித உரிமைவாதி மற்றும் அரசியல் ஆய்வாளர் செய்ட் பசீர்

இலங்கையிலிருந்து வெளிநாடுகளுக்கு கொண்டு செல்லப்பட்ட பணத்தை மீட்க அனுர அரசுடன் கைகோர்க்கும் அமெரிக்கா!

இலங்கையில் இருந்து வௌிநாடுகளுக்கு எடுத்துச் செல்லப்பட்ட பணத்தை மீளக் கொண்டுவருவதற்கான அரசாங்கத்தின் வேலைத்திட்டத்திற்கு தொழில்நுட்ப ஆதரவை வழங்கத் தயார் என தெற்கு மற்றும் மத்திய ஆசிய விவகாரங்களுக்கான அமெரிக்க உதவி இராஜாங்கச் செயலாளர் டொனால்ட் லூ தெரிவித்துள்ளார்.

ஜனாதிபதி அநுர குமார திசாநாயக்கவிற்கும் டொனால்ட் லூவுக்கும் இடையில் ஜனாதிபதி அலுவலகத்தில் இன்று (07) இடம்பெற்ற கலந்துரையாடலின் போதே அவர் இதனைத் தெரிவித்தார்.

தொடர்ந்து கருத்து தெரிவித்த அவர் தற்போதைய அரசாங்கத்தின் ஊழலுக்கு எதிரான வேலைத்திட்டத்திற்கு தேவையான போதெல்லாம் ஆதரவளிக்க தயார் எனவும் குறிப்பிட்டார்.

14 வயது சிறுமியை கொலை செய்து கழிவறை குழியில் வீசிய சோகம்  – இலங்கையை உலுக்கிய கொலையின் பின்னணி !

கம்பஹா, மாகவிட்ட பிரதேசத்தில் வசிக்கும் 14 வயது சிறுமியை கொலை செய்து, நிர்மாணிக்கப்பட்டு வரும் கழிவறை குழியில் சடலத்தை வீசிய சம்பவம் தொடர்பில் மேலும் பல தகவல்களை பொலிசார் தற்போது வௌியிட்டுள்ளனர்.

டிசம்பர் 5 ஆம் திகதி, 14 வயதுடைய தனது மகளை காணவில்லை என தாய் ஒருவர் கம்பஹா பொலிஸ் நிலையத்தில் முறைப்பாடு செய்திருந்தார்.

விசாரணையை தொடங்கிய பொலிசார் கொலைக்கான மூல காரணத்தை கண்டுபிடித்தனர்.

முறைப்பாட்டாளரான தாய், தனது இரண்டாவது திருமணமான தனது கணவர் மற்றும் மகளுடன், மாகவிட்ட பகுதியில் நிர்மாணிக்கப்பட்டு வரும் வேறு ஒருவருக்கு சொந்தமான மூன்று மாடி வீட்டில் தற்காலிகமாக வசித்து வந்துள்ளார்.

கணவர் கட்டுமான தொழிலும், மனைவி ஏக்கல பகுதியில் உள்ள தனியார் நிறுவனத்திலும் பணிபுரிந்து வருகின்றனர்.

02.12.2024 அன்று கணவனும் மகளும் வீட்டில் இருந்தபோது, ​​காலையில் வேலைக்குச் சென்றுவிட்டு இரவு வீடு திரும்பிய அந்தப் பெண் தன் மகள் இல்லாதது குறித்து கணவரிடம் விசாரித்துள்ளார்.

இதன்போது,  மகள் நண்பரின் குடும்ப உறுப்பினர்களுடன் சுற்றுலா சென்றிருப்பதாகவும், இன்று வரமாட்டார் மறுநாள்தான் வருவார் என்றும் கணவர் தெரிவித்துள்ளார்.

05.12.2024 வரை மகள் வீட்டுக்கு வராததால் இருவருக்கும் இடையில் தகராறு ஏற்பட்டு, பின்னர் பொலிஸ் நிலையத்தில் முறைப்பாடு செய்யப்பட்டுள்ளது.

இதன்போது, சிறுமி காணாமல் போனது குறித்து அவரது கணவர் சந்தேகம் தெரிவித்தார்.

சம்பவம் தொடர்பில் விசாரணைகளை மேற்கொண்ட பொலிஸார் முறைப்பாட்டாளரின் 42 வயதுடைய கணவரைக் கைது செய்து விசாரணைகளை மேற்கொண்டுள்ளனர்.

02.12.2024 அன்று கணவன் அடகு வைத்த தங்க நகையை விடுவிக்க மகளிடம் பணத்தை கொடுத்துவிட்டு, அந்த தங்க நகையை விடுவிக்க தந்தையுடன் செல்லுமாறு கூறிவிட்டு மனைவி பணியிடத்திற்கு சென்றுள்ளார்.

போதைக்கு அடிமையான கணவன், மகளிடம் தங்கப் பொருட்கள் வாங்க கொடுத்த பணத்தை கேட்டு, மகள் மறுத்ததால், மகளை தாக்கி, பணத்தை பறித்துக் கொண்டு வீட்டை விட்டு வெளியேறியுள்ளார்.

வீட்டுக்கு வந்த அவர், மகள் தாக்கப்பட்ட இடத்திலேயே இறந்து கிடந்ததைக் கண்டு,  சிறுமியின் சடலத்தை பொலித்தீன் பொதியொன்றில்  போட்டு, கட்டி வீட்டின் கழிவறை குழியில் போட்டு மூடியிருப்பது விசாரணையில் தெரியவந்தது.

கிடைத்த தகவலின் அடிப்படையில், கம்பஹா நீதவான் நீதிமன்ற உத்தரவுக்கமைய, கழிவறை குழியில் போடப்பட்டிருந்த மகளின் சடலம் மீட்கப்பட்ட நிலையில் பிரேத பரிசோதனைக்காக கம்பஹா வைத்தியசாலையின் பிரேத அறையில் சடலம் வைக்கப்பட்டுள்ளது.

கைது செய்யப்பட்ட சந்தேகநபர் 06.12.2024 அன்று கம்பஹா நீதவான் நீதிமன்றில் ஆஜர்படுத்தப்பட்டதன் பின்னர் 16.12.2024 வரை விளக்கமறியலில் வைக்கப்பட்டுள்ளார்.

சம்பவம் தொடர்பான மேலதிக விசாரணைகளை கம்பஹா பொலிஸார் மேற்கொண்டு வருகின்றனர்.

இன்றைய செய்திகள்: 06.12.2024

‘ஊத்திக்கொள்ள பார்பெர்மிட் போர்த்திக்கொள்ள தமிழ் தேசியம்’ பொறியில் சிக்கிய எலி யார்..? அடம்பிடிக்கும் சாணக்கியம்

வடக்கு – கிழக்கு தமிழ் தேசிய பா உ கள் தமிழ் இனவாதிகள்! வன்னியில் மலையக மாவீரர்கள் புறக்கணிப்பு! பா உ கிட்டிணன் செல்வராஜ்

1. வடக்கு – கிழக்கு தமிழ் தேசிய பா உ கள் தமிழ் இனவாதிகள்! வன்னியில் மலையக மாவீரர்கள் புறக்கணிப்பு! பா உ கிட்டிணன் செல்வராஜ்

வைத்தியர் அர்ச்சுனா தனது பாராளுமன்ற முதல் உரையில் விடுதலைப் புலிகள் தலைவர், ஜேவிபி தலைவர், ஈழப்போரில் உயிர் நீத்த போராளிகள், ஜேவிபி தோழர்கள் என ஒரு பட்டியலை வாசித்து அகவணக்கம் செய்திருந்தார். சர்ச்சை ஊசி; அருச்சுனாவின் ஸ்ரன்டுகளில் இதுவும் ஒன்றாகவே பார்க்கப்பட்டது. அப்படியிருக்க தேசிய மக்கள் சக்தியின் பாராளுமன்ற உறுப்பினரும் மலையகத் தமிழர்களை பிரதிநிதித்துவப்படுத்துபவருமான கிட்டிணன் செல்வராஜ் வன்னியில் மறக்கப்பட்ட மலையக மக்களை நினைவுகூர்ந்து அவர்களுக்காக தன்னுடைய பாராளுமன்ற முதல் உரையில் குரல் கொடுத்தார்:

1948 ஆம் ஆண்டில் ஐக்கிய தேசியக்கட்சியானால் திட்டமிட்ட ரீதியில் பிராஜாவுரிமை பறிக்கப்பட்டு மலையகத் தமிழ்மக்கள் நாடற்றவர்களாக்கப்பட்டார்கள். 1956 களில் இதன் தொடர்ச்சியாக ஐக்கிய தேசியக்கட்சி முடுக்கிவிட்ட இனக்கலவரங்களால் பெரிதும் பாதிக்கப்பட்ட மலையக தமிழ்மக்கள் றெட்பானா பின் காந்தியம் அமைப்பினூடாக வன்னி மற்றும் கிளிநொச்சி பிராந்தியகளிலும் எல்லைப்புறக் கிராமங்களிலும் குடியேற்றப்பட்டார்கள். பிற்காலத்தில் வடக்கு கிழக்கு தமிழர்களிடையே ஈழவாத அரசியல் தலை தூக்கிய போது அந்த கருத்தியலுக்கு வலு சேர்க்கும் வகையில் மலையக தமிழ் இளைஞர்கள் விடுதலைப் புலிகள் அமைப்பில் இணைந்து போராடினார்கள். ஆனால் வன்னியில் உள்ள மலையக மக்கள் யுத்தத்திற்குப் பின் கறிக்கு கருவேற்பிலையாக தூக்கி எறியப்பட்டார்கள். இதனையே கிட்டிணன் செல்வராஜ் தனது பாராளுமன்ற உரையில் சுட்டிக்காட்டி இருந்தார்.

“வடக்கையும், கிழக்கையும் இணைத்து தனி நாட்டு கருத்தியலை முன்வைப்பதை முழுமையாக நிராகரிக்கிறோம். தேசிய ஒற்றுமையை கட்டியெழுப்புவதற்கும், அதனூடான தமிழ், முஸ்லிம், சிங்களம் என ஒட்டுமொத்த மக்களின் நலனையும், வாழ்வியலையும் மேம்படுத்த தேசிய மக்கள் சக்தி கடமைப்பட்டுள்ளது. பெருந்தோட்ட மக்களின் காணி மற்றும் காணி உரிமையை பெற்றுக்கொடுக்க உரிய நடவடிக்கைகைள முன்னெடுப்போம்” என தேசிய மக்கள் சக்தியின் பாராளுமன்ற உறுப்பினர் கிட்ணன் செல்வராஜ் தனது உரையில் தெரிவித்தார். பாராளுமன்றத்தில் நடைபெற்ற இடைக்கால கணக்கறிக்கை மீதான விவாதத்தில் அவர் உரையாற்றும் போதே கிட்டிணன் செல்வராஜ் மேற்கண்டவாறு கூறியிருந்தார்.

” கிட்டிணனுடைய வார்த்தைகளை ஓர் பாராளுமன்ற உறுப்பினரின் வார்த்தைகளாக கடந்து செல்ல முடியாது. அது 200 ஆண்டு கால மலையகத் தமிழரின் வலிகளை சொல்லும் ஓர் கதை. அது ஈழத்தமிழர் தம்முள் இருக்கும் இன்னுமொரு மக்கள் கூட்டத்தை அரசியல் அநாதைகளாக கைவிட்ட கதை’ என ஓர் சமூக ஆர்வலர் தன் பேஸ்புக் வலைத்தள கணக்கில் கருத்து பகிர்ந்துள்ளார்.

சில ஆண்டுகளுக்கு முன் காணாமல் போன தமிழீழ விடுதலைப் புலிகளின் அரசியல் பொறுப்பாளர் தமிழ்செல்வனுக்கு மொழிபெயர்பாளராகக் கடமையாற்றிய சமூக செயற்பாட்டாளர் பொன்னையா சுப்பிரமணியன் தேசம்நெற்க்கு வழங்கிய நேர்காணலில், முஸ்லீம் மக்கள் வடக்கிலிருந்து வெளியேற்றப்பட்டது போல் மலையக மக்களையும் வடக்கிலிருந்து வெளியேற்றும் ஒரு திட்டம் தமிழீழ விடுதலைப் புலிகளிடம் இருந்ததாகக் குற்றம்சாட்டியிருந்தார். மலையகத் தமிழர்கள் சரளமாக சிங்கள மொழியையும் பேசக்கூடியவர்களாக இருந்ததால் அரசுக்கு தகவல்கள் வழங்குகிறார்கள் என்ற சந்தேகத்தின் அடிப்படையில் மலையகத் தமிழர்களையும் வெளியேற்ற புலிகள் திட்டமிட்டிருந்ததாக அவர் தெரிவித்தார்.

2. ‘கஜா – சிறி வாத்தி நீங்களெல்லம் எலிக்குஞ்சுகள் புலிக்குட்டியைப் பாருங்கள்’ ஊசி அர்ச்சுனா – “பனை மரத்தில வெளவாலா…”

பாராளுமன்றத்தில் ஊசி அர்ச்சுனாவின் கன்னி உரை 04.12.2024 அன்று ஆற்றப்பட்டது. அதில் மருத்துவ மாபியா தொடர்பான விடயங்களையும் அதற்கு எதிராக தான் போராடியது பற்றியதும் சிறை சென்றது பற்றியும் பேசுவார் என்று பார்த்தால் வழமையான தூண்டிவிடும் தமிழ்தேசிய அரசியல்வாதிகள் போல தலைவருக்கு வணக்கம், மாவீரர்களுக்கு வீரவணக்கம் என்றும் முழங்கித் தள்ளினார். ஏற்கனவே தன்னை எதிர்த்து கேள்வி கேட்பவர்களை புலிகள் பாணியில் துரோகி முத்திரை குத்திச் செல்லும் ஊசி அர்ச்சுனா மாவீரர்கள் பற்றியும் புலம்பெயர் தேசத்து முதலீடுகள் பற்றியும் பேசியதன் மூலம் புலம்பெயர் புலிக்குட்டிகளை உசுப்பி விட்டு அதன் மூலம் தனது பொக்கெட்டினை நிரப்ப போகிறார் என ஊசி எதிர்ப்பு குழுவினர் பலரும் குறிப்பிட்டு வருகின்றனர். இதேவேளை ஊசி அர்ச்சுனாவின் மொழிப்புலமை அவரை ஏனைய தமிழ் பாராளுமன்ற உறுப்பினர்களிடம் இருந்து வேறுபடுத்தி காட்டுவதனை குறிப்பிட்டு பல தரப்பினரும் பாராட்டி வருகின்றனர்.

3. இனவாதத்தை தூண்டியதற்காக ராஜபக்சக்களின் சகாக்கள் மீதும் பயங்கரவாதத் தடைச்சட்டம் பாய்ந்தது!

ராஜபக்சக்களின் நெருங்கிய சகாவும் சிறிலங்கா பொதுஜன பெரமுனவின் நிர்வாகச் செயலாளருமான ரேணுக்க பெரேரா குற்றப் புலனாய்வுப் பிரிவினரால் கைது செய்யப்பட்டு, பின்னர் பிணையில் விடுவிக்கப்பட்டார். மாவீரர் கொண்டாட்டம் குறித்து பொய்யான தகவல்களை பரப்பியமைக்காகவும் – இனவாத கருத்துக்களை தூண்டியமைக்காகவும் அவர் கைது செய்யப்பட்டிருந்தார்.

தேசிய மக்கள் சக்தி அரசாங்கம் தொடர்ச்சியாக இனவாதமில்லாத ஓர் நாடு என்ற தொனிப்பொருளில் இயங்கிவருவதை தனித்து தேர்தல் விஞ்ஞாபனத்தில் மட்டுமில்லாமல் நடைமுறையிலும் காட்டி வருகின்றது. பெரும்பாலும் இலங்கையில் பயங்கரவாத தடைச் சட்டம் சிறுபான்மை இனங்களின் மீது மட்டுமே கடந்த அரசாங்க காலங்களில் பிரயோகிக்கப்பட்டு வந்ததுடன் தென்னிலங்கை அரசியல்வாதிகளோ அல்லது பிரஜைகளோ இனவாத கருத்துக்களை முன்வைத்த போது அதுசார்ந்த கைதுகள் இடம்பெறுவதில்லை. பொலிஸாரும் அதனை கண்டுகொள்ளாமல் விட்டனர்.

இந்த நிலையில் முதன்முறையாக பயங்கரவாத கருத்துக்களை முன்வைத்தவர்கள் பயங்கரவாத தடைச் சட்டத்தின் கீழ் தென்னிலங்கையிலும் கைது செய்யப்பட்டு வருகின்றனர். தேசிய மக்கள் சக்தியின் தென்னிலங்கை பாராளுமன்ற உறுப்பினர்களே இனவாத கருத்துக்களை எதிர்ப்பது, தேசிய மக்கள் சக்தி மீதான நம்பிக்கையை சிறுபான்மை மக்களிடையே ஏற்படுத்தியுள்ளது. இந்த நிலையில் ராஜபக்ஷ தரப்பை சேர்ந்த பிரதான நபர் கைது செய்யப்பட்டு உள்ளமையானது இலங்கை அரசியலில் அதிர்வலைகளை ஏற்படுத்தியுள்ளது.

4. ‘ஊத்திக்கொள்ள பார்பெர்மிட் போர்த்திக்கொள்ள தமிழ் தேசியம்’ பொறியில் சிக்கிய எலி யார்..? அடம்பிடிக்கும் சாணக்கியம்

மதுபானசாலை அனுமதி பத்திரங்களுடன் தொடர்புடைய விசாரணைகள் குறித்த தகவல்களை அரசாங்கம் வெளியிட வேண்டும் என இலங்கைத் தமிழரசுக் கட்சியின் நாடாளுமன்ற உறுப்பினர் இராசமாணிக்கம் சாணக்கியன் கேட்டுக்கொண்டுள்ளார். யாரையோ அம்பலப்படுத்தி அம்மணமாக விடவேண்டும் என்பதில் சாணக்கியன் சாணக்கியமாக காய் நகர்த்துகின்றார். “அண்மையில் மதுபானசாலை அனுமதிப் பத்திரங்களைப் பெற்றுக் கொண்டவர்களின் விபரங்கள் வெளியிடப்பட்டன. எனினும் அதற்குப் பின்னால் உள்ள அரசியல் தலைவர்களின் பெயர்களும் வெளிப்படுத்தப்பட வேண்டும். எனவும் கிளிநொச்சி பார்பெர்மிட் தொகையை மேற்கோள் காட்டியும் இரா சாணக்கியன் மறுபடியும் பாராளுமன்றத்தில் வலியுறுத்தியது பார்பெர்மிட் எனும் எலிப்பொறியில் சிக்கிய அந்த எலி யார் என்ற கேள்வியை தமிழ் அரசியல் பரப்பில் மீள எழுப்பியுள்ளது.

ஏற்கனவே சூசகமாக பாராளுமன்ற தேர்தல் காலத்தில் முன்னாள் பாராளுமன்ற உறுப்பினர் சுமந்திரன் “ஊத்திக் கொள்ள பார் பெர்மிட் – போர்த்திக்கொள்ள தமிழ்தேசியம்” என பேஸ்புக் பதிவில் எழுதியிருந்ததை தொடர்ந்து தமிழ் அரசியல் பரப்பில் யார் அந்த பார் பெர்மிட் எடுத்த தமிழ்தேசிய அரசியல்வாதி என்ற கேள்வி எழுந்தது. இதற்கிடையில் முன்னாள் வடக்கு மாகாண முதலமைச்சர் விக்னேஸ்வரன், முன்னாள் பாராளுமன்ற உறுப்பினர் சார்ள்ஸ் நிர்மலநாதன் ஆகியோர் பார்பெர்மிட் அலையில் அடிபட்டு காணாமல் போயினர். இதன்போது சுமந்திரன் முன்வைத்த குற்றச்சாட்டு அவருடைய அரசியல் எதிரியாக பார்க்கப்பட்ட சிறீதரன் எம்.பி பக்கம் திரும்பியது. இருந்தாலும் சிறீதரன் எம்.பி பொலிஸ் வழக்கு, தன் தரப்பு ஆதரவாளர்கள் மூலமான பிரச்சாரம் மூலம் அந்த அலையை சமாளித்திருந்தார்.

5. மதுவரி அனுமதிப் பத்திரங்களை சும்மா தூக்கிக் கொடுக்காதீர்கள் – அதிகாரிகளுக்கு ஜனாதிபதி உத்தரவு !

ஜனவரி முதலாம் திகதிக்கு பின்னர் மதுபானசாலை அனுமதிப்பத்திரங்கள் பட்டியல் பாராளுமன்றத்தில் வெளியிடப்பட்டிருந்தது. குறித்த காலப்பகுதியில் 361 அனுமதிப்பத்திரங்கள் வழங்கப்பட்டுள்ளதாகவும், அதில் 172 பேர் முன்னாள் ஜனாதிபதி ரணில் விக்ரமசிங்கவினால் அரசியல் லஞ்சமாக வழங்கப்பட்டவை எனவும் புதிதாக வேறு மதுபான சாலை அனுமதி வழங்குவதை நிறுத்திவைக்க ஜனாதிபதி உத்தரவிட்டுள்ளதாகவும் அமைச்சர் பிமல் ரத்நாயக்க தெரிவித்திருந்தார்.

இதேவேளை மதுவரி அனுமதிப் பத்திரங்களை வழங்குவதில் ஒழுங்கான முறைமையொன்றைப் பின்பற்றுமாறு அதிகாரிகளுக்கு ஜனாதிபதி அநுரகுமார திஸாநாயக்க பணிப்புரை விடுத்துள்ளார். மதுவரித் திணைக்களத்தின் சிரேஷ்ட அதிகாரிகளுடன் ஜனாதிபதி அலுவலகத்தில் இடம்பெற்ற கலந்துரையாடலின் போதே ஜனாதிபதி இந்த அறிவுறுத்தல்களை வழங்கியுள்ளார். மதுவரித் திணைக்களத்தின் செயற்பாடுகள் தொடர்பில் மக்களிடையில் நல்லபிப்பிராயம் கிடையாது என சுட்டிக்காட்டிய ஜனாதிபதி அநுரகுமார திசாநாயக்க, நாட்டின் பொருளாதாரத்திற்கு சாதகமான வகையில் அந்த நிறுவனங்களை முன்னெடுத்துச் செல்ல வேண்டியதன் அவசியத்தையும் வலியுறுத்தினார்.

6. மென்டிஸ் அன்ட் கம்பெனியின் உரிமம் இடைநிறுத்தம் !

டிசம்பர் 05 திகதி முதல் மென்டிஸ் அன்ட் கம்பனியின் மதுபான உரிமைத்தை உடனடியாக அமுலுக்கு வரும்படியாக இடைநிறுத்தி வைப்பதற்கான ஆணையை சிறிலங்கா மதுவரித் திணைக்கள ஆணையாளர் வழங்கியுள்ளார். மென்டிஸ் நிறுவனமானது மாதாந்தம் செலுத்த வேண்டிய வருமானவரியை செலுத்த தவறியமையே இந்த அனுமதி இரத்துக்குக் காரணமாக கூறப்படுகின்றது. நிலுவைத் தொகை மற்றும் தண்டப்பணமான மேலதிக கட்டணங்கள் செலுத்தப்படாவிடில் இந்த வருடம் டிசம்பர் 31 ஆம் ஆண்டுக்கு மேல் மென்டிஸ் கம்பனியின் அனைத்து உரிமங்களும் முழுமையாக இரத்து செய்யப்படும் என எச்சரிக்கை விடுக்கப்பட்டுள்ளது. ஊழலை முடிவுக்கு கொண்டுவரும் தேசிய மக்கள் சக்தியின் இலக்குகளில் ஒன்றே அரசாங்கத்திற்கு முறையாக வரி செலுத்தாது கல்லா கொடுப்பவர்களுக்கு பாடம் புகட்டுவதே.

7. பெண்கள் அதிகாரத்திற்கு வருகின்றனர்! பொறுப்பான பதவிகளில் அமர்த்தப்படுகின்றனர்!

குற்றப்புலனாய்வு திணைக்களத்தின் (CID) பணிப்பாளராக இமேஷா முத்துமாலை, பொலிஸ் களப்படைத்தலைமையகத்தின் கட்டளைத் தளபதியாக தர்ஷிகா குமாரி, பொலிஸ் விஷேட புலனாய்வுப்பிரிவின் பணிப்பாளராக லங்கா ரஜினி அமரசேனவும் நியமனம் பெற்றுள்ளனர். மேலும் காவல்துறை மருத்துவ சேவைகள் பிரிவின் இயக்குநராக ஒரு மூத்த பெண் காவலதிகாரி நியமிக்கப்பட்டுள்ளார்.

இவ்வாறு பதவியுயர்வு பெற்ற பெண் அதிகாரிகள் நான்கு பேரும் நீண்டகாலம் இலங்கை பொலிஸில் பணியாற்றிய அனுபவமுடையவர்கள். இலங்கை போன்ற பல்லின சமூகங்கள் வாழும் ஒரு நாட்டில் நிலவுகின்ற பல்வேறுவகையான சமூகப், பொருளாதார, அரசியல் பிரச்சினைகளுடன் சேர்ந்து பெண்களும் சிறுவர்களும் பாலின சமத்துவமின்மையின் எதிர்மறையான விளைவுகளை தொடர்ந்தும் அனுபவித்து வருகின்றனர்.

பெண்கள் அதிகாரத்திற்கு வருவதில் தொடர்ந்து ஓரங்கட்டப்பட்டு வந்தனர். இதிலிருந்து மாறுபட்டு இலங்கையை ஆளும் தேசியமக்கள் சக்தி அரசாங்கம் தன்னை முற்போக்கான அரசாங்கமாகவும் நிரூபித்து வருகின்றது.

8. பெண் பாராளுமன்ற உறுப்பினர்கள் ஒன்றியத்தின் தலைவியாக சரோஜா சாவித்திரி போல்ராஜ்

நடந்து முடிந்த பொதுத் தேர்தலில் தேசிய மக்கள் சக்தியை பிரதிநிதித்துவப்படுத்தி 19 பெண் உறுப்பினர்கள் வெற்றிபெற்று பாராளுமன்றத்திற்கு தெரிவு செய்யப்பட்டுள்ளமையும் குறிப்பிடத்தக்கது. இம்முறை பாராளுமன்றத்திற்கு தெரிவுசெய்யப்பட்ட தமிழ்ப் பெண் பாராளுமன்ற உறுப்பினர்கள் மலையகத்திலும் மாத்தறையிலிருந்துமே தெரிவுசெய்யப்பட்டுள்ளனர். இலங்கையின் அரசியல் வரலாற்றில் குடும்ப அரசியல் பின்னணி இல்லாமல் பெண்கள் பாராளுமன்றத்திற்கு தெரிவு செய்யப்பட்டுள்ளமை தெற்காசியாவிலே சிறந்த முன்மாதிரியாக கருதப்படுகிறது.

30 ஆண்டுகள் விடுதலைப் போராட்டத்தை முன்னெடுத்த தமிழீழ விடுதலைப் புலிகளோ அல்லது அதற்குப் பின் அவர்களைத் துதி பாடி அரசியல் செய்கின்ற தமிழ் தேசியமோ பெண்களை கருவேற்பிலைகளாகவே பயன்படுத்தி தூக்கி எறிந்து வந்தனர். இந்தப் பின்னணியிலிருந்து இன்னமும் தமிழ் சமூகம் விடுபடவில்லை. ஆனால் தெற்கில் நிலைமை மிகவேகமாக மாறிவருகின்றது. அந்த மாற்றத்துக்கு தோளோடு தோள் நின்றவர்கள் அதன் பலனை சமூகத்திற்கு வழங்குகின்றனர்.

நாட்டின் பிரதமர் கதிரையை ஹரிணி அமரசூரிய என்ற சிறந்த கல்வியலாளர் அலங்கரிக்க மகளிர் மற்றும் சிறுவர் விவகார அமைச்சரான சரோஜா சாவித்ரி போல்ராஜ் பெண் பாராளுமன்ற உறுப்பினர்கள் ஒன்றியத்தின் தலைவராக தெரிவு செய்யப்பட்டுள்ளார். அவருடைய பெயரை பாராளுமன்ற உறுப்பினர் சமன்மலி குணசிங்க முன்மொழிய பாராளுமன்ற உறுப்பினர் அனுஷ்கா திலகரத்ன வழிமொழிந்தார். மேலும் பெண்கள் பாராளுமன்ற ஒன்றியத்தின் பிரதி இணைத்தலைவர்களும் இதன் போது தெரிவு செய்யப்பட்டனர்.

இந்நிகழ்வின் போது கருத்து தெரிவித்த ஹரிணி அமரசூரிய, பொதுமக்களின் வாக்குகளால் குறிப்பிடத்தக்கவீதமான பெண்கள் பாராளுமன்ற உறுப்பினர்களாக தெரிவு செய்யப்பட்டமை சிறந்த வெற்றி எனவும் அரசியல் வேறுபாடுகளுக்கு அப்பால் இந்த ஒன்றியம் செயற்பட்டு அனைத்துப் பெண்களுக்கும் பாதுகாப்பான நாடாக இலங்கையை உருவாக்குவதே இந்த ஒன்றியத்தின் நோக்கமாக இருக்க வேண்டும் என்றார்.

தேசியப்பட்டியலில் கூட ஒரு பெண்ணை தெரிவு செய்ய வக்கில்லாத மேட்டுக்குடி ஆணாதிக்கவாதிகளாகவே வடக்கு கிழக்கை பிரதிநிதித்துவப்படுத்தும் தமிழ்க்கட்சிகள் காணப்படுகின்றனர். இது தமிழ்மக்களை பொறுத்தவரை ஒரு இழி நிலையே ஆகும். 30 வருட யுத்தத்தில் ஆயுதம் ஏந்திய பெண்கள். யுத்த முடிவில் தமது சுயமரியாதையை இழந்து முடக்கப்பட்டுள்ளனர். தமிழ் மக்களும் அவர்களை பிரதிநிதித்துவப்படுத்தும் தமிழ்க்கட்சிகளும் தேசிய மக்கள் சக்தியிடமிருந்து பாடம் கற்றுக்கொள்ள வேண்டும்.

9. கனடாவுக்கு செல்லவுள்ளோருக்கு செக் வைத்த கனடா – சுற்றுலா விசாவில் சென்றவர்கள் திருப்பி அனுப்பப்படவுள்ளனர் !

அண்மைய காலங்களில் இலங்கையின் வடக்கு மற்றும் கிழக்கு பகுதிகளில் இருந்து நூற்றுக்கணக்கானவர்கள் கனடா நோக்கி விசிட் விசாவில் படையெடுக்க ஆரம்பித்துள்ளனர். இதுதாண்டி கனடா மோகம் தமிழர் பகுதிகளில் உள்ள மாணவர்கள் இடையே ஆழமாக ஊடுருவியுள்ளதை சர்வசாதாரணமாக அவதானிக்க முடிவதாகவும், இதனால் மாணவர்களின் கல்வி மீதான ஆர்வம் மிக பின்தங்கிய நிலையை அடைந்துள்ளதாகவும் கல்வியாளர்கள் பலரும் குற்றச்சாட்டி வருகின்றனர். இந்த நிலையில் கனடாக் கனவை வளர்த்துள்ள பல இலங்கை வாழ் தமிழர்களுக்கு இடியாய் ஓர் செய்தியை கனேடிய அரசு வெளியிட்டுள்ளது.

சர்வதேச ரீதியில் புலம்பெயர்வோரையும், அகதிகளையும் பெரும் எண்ணிக்கையில் உள்வாங்கும் நாடாக இருந்துவரும் கனடா, தற்போது அகதி அந்தஸ்த்து கோரும் செயன்முறை கடினமாக்கப்பட்டிருப்பதாக எச்சரிக்கும் வகையிலான இணையவழி விளம்பர பிரசாரமொன்றை உலகளாவிய ரீதியில் ஆரம்பித்துள்ளது.

சமீப வருடங்களில் கனடா வாழ் உறவினர்களின் சுற்றுலா அழைப்பிதழை பயன்படுத்தி பெருந்தொகை பணத்தையும் வங்கில் பிணையாக இட்டுக்காட்டி கனடாவிற்கு குடும்பமாகவும் தனியாகவும் வடக்கில் கிழக்கில் இருந்த சென்ற தமிழர்கள் நாடு திரும்பும் நிர்ப்பந்தமும் தற்போது ஏற்பட்டுள்ளது.

கனடாவின் குடிவரவுத்துறை அமைச்சர் மார்க் மில்லர் கூற்றின்படி 2025 வருட இறுதிக்குள் கனடாவில் தற்காலிக அனுமதியுடன் புலம்பெயர்ந்தவர்கள் நாடு திரும்ப வேண்டி வரும் என்கிறார். ஏனெனில் தற்காலிக அனுமதி அதாவது சுற்றுலா விசா போன்றவற்றுடன் கனடாவில் குடிபுகுந்தவர்களின் பல மில்லியன் அனுமதிகள் காலாவதியாகியமையே காரணமாகும்.

விசா முடிவடைந்ததும் அவர்கள் தாமாகவே கனடாவை விட்டு வெளியேறுவார்கள் என மார்க் மில்லர் கூறுகிறார். எவ்வாறெனினும் கிட்டத்தட்ட 4.9 மில்லியன் பேரின் தற்காலிக அனுமதி முடிவடையவுள்ள நிலமையில் அவர்கள் தாமாகவே வெளியேறுவதை கனடா அரசு எப்படி உறுதி செய்யும் என கொன்சேர்வேட்டிவ் கட்சி எம்பி ரொம் சந்தேகமாக கேட்கின்றார். அதற்கு பதிலளித்த மில்லர் கனடாவிற்கு தற்காலிக விசாவில் வந்தவர்களுக்கு விசா முடிந்தும் கனடாவில் தங்க உரிமையில்லை எனவும் அவர்கள் வெளியேற மறுக்கும் பட்சத்தில் அவர்களை வெளியேற்றும் உரிமை கனடா எல்லை பாதுகாப்பு முகவர்களுக்கு உண்டு எனவும் எச்சரிக்கின்றார்.

வடக்கு கிழக்கில் வினைத்திறனான அபிவிருத்தித் திட்டங்கள் முன்னெடுக்கப்பட்டு கைத்தொழில் துறை, விவசாயம் என்பன வளர்ச்சியடைந்திருந்தால் சாரை சாரையாக வடக்கு கிழக்கு வாழ் தமிழ்மக்கள் நாட்டை விட்டு வெளியேற முற்பட மாட்டார்கள். ஏமாற்று முகவர்களிடம் சிக்கி ஐரோப்பிய போர் முனைகளிலும் மாட்டுப்பட்டிருக்க மாட்டார்கள். இந்நிலமைக்கு போலித் தமிழ்த்தேசியம் பேசி மக்கள் வாக்கை பெற்று பாராளுமன்றம் சென்றவுடன் அவர்களை கைகழுவிய தமிழ்க்கட்சிகளே பொறுப்பாளிகளாகும்.

10. செல்வாக்கு இழந்துவரும் கஜா அணி சைக்கிளோடி மன்னார் சென்று செல்வத்தாரோடு கூட்டமைக்க முயற்சி!

தேர்தலுக்குப் பின் செல்வாக்கு இழந்துவரும் கஜா அணிக்கு இருப்புக்கான ஆபத்து ஏற்பட்டுள்ளது. நீண்டகாலம் யாழ் ஊடக மையத்திற்குப் போகாமல் முரண்டு பண்ணியவர்கள் தேர்தலுக்கு முன்னரேயே ஊடக மையத்திற்குப் போகவேண்டியதாகிவிட்டது. கொள்கைப் புலிகள் என்று வீரம்பேசி வந்தவர்கள் தேர்தலுக்குப் பின் சிறி வாத்தியிடம் சென்று அவரின் இல்லத்தில் சந்தித்தனர். இப்போது தங்களுடைய சாதிய பிரதேசவாதத் பணக்காரத் திமிர்களை எல்லாம் ஓரம்கட்டி வைத்துவிட்டு மன்னாருக்கு சைக்கிள் ஓட வேண்டிய நிலையேற்பட்டுள்ளது. செல்வத்தாரை மன்னாருக்குப் போய் பார்க்கும் ஒரே தலைவர் கஜா என்ற பெயர் வரலாற்றில் இடம்பெறும். அதில் செல்வத்தாருக்கு ஒரு கிலு கிலுப்பு இல்லாமலில்லை. கஜா கஜா இவ்வளவு கீழிறங்குவதற்குக் காரணம் யூலி சங் போட்ட மந்திரம் என தமிழ் அரசியல் அவதானிகள் கருதுகின்றனர்.

மேலும் தமிழ் அரசியல் கைதிகளை விடுவிப்பதில் அனுரா அரசு ஏற்கனவே நடவடிக்கை எடுத்து வருகின்ற நிலையில், கஜா கஜா இதனை ஒரு அரசியலாக்கி சர்வதேச தலையீட்டைக் கொண்டு வருவது, இன்னமும் விடுவிக்கப்படாமல் இருக்கும் அரசியல் கைதிகளை தொடர்ந்தும், சிறையில் வைத்திருக்கும் நடவடிக்கையாகவே பார்க்கப்படுகின்றது. மிகப் பெரும்பான்மை பலத்தோடு ஆட்சிக்கு வந்துள்ள தேசிய மக்கள் சக்தி, விளம்பரப்படுத்தி, ஆர்ப்பாட்டம் பண்ணாமல் தமிழ் மக்களுடைய காணி விடுவிப்பு, இராணுவ முகாம்களை நீக்குவது, பாதைகள் விடுவிப்பு என்பனவற்றை கச்சிதமாகச் செய்து வருகின்றது. அந்த வகையில் அரசியல் கைதிகளது விடுதலையும் காலக் கிரமத்தில் நடக்கும்.

சுர்வதேசத்தை கொண்டுவந்து படம்காட்டுகிறேன் என சர்வதேசத்தைக் கொண்டு அரசியல் கைதிகள் விடுதலையை சர்வதேசப் பிரச்சினையாக்கி அதனை சிங்கள பேரினவாதிகளது கையில் கொண்டுபோய் சேர்ப்பதற்கான வேலையை கஜா கஜா அணி கச்சிதமாக மேற்கொண்டுள்ளது. இது அரசியல் கைதிகளது விடுதலையை இன்னும் காலத்துக்கு தள்ளிச்செல்லவே வழிவகுக்கும் எனச் சிலர் கருதுகின்றனர்.

இலங்கையில் சிறுவர்கள் விளம்பர படங்களில் நடிக்க தடை – அனுர அரசின் வர்த்தமானி விரைவில்!

ஜனவரி முதலாம் திகதி முதல் 12 வயதுக்குட்பட்ட சிறுவர்களை விளம்பரங்களில் பயன்படுத்துவதை தடை செய்ய நடவடிக்கை எடுக்கப்படும் என சுகாதார மற்றும் வெகுஜன ஊடக பிரதி அமைச்சர் வைத்தியர் ஹசங்க விஜேமுனி தெரிவித்துள்ளார்.

அதற்கான வர்த்தமானி அறிவித்தலை அமுல்படுத்துவதற்கான அனைத்து ஏற்பாடுகளும் செய்யப்பட்டுள்ளதாக பாராளுமன்றத்தில் உரையாற்றிய பிரதி அமைச்சர் தெரிவித்தார்

“குறிப்பாக 12 வயதுக்குட்பட்ட சிறுவர்களை ஜனவரி 1ம் திகதி முதல் விளம்பரங்களுக்கு பயன்படுத்துவதை தடுக்க நடவடிக்கை எடுக்கப்படுகிறது. அதற்கான வர்த்தமானியை அமல்படுத்துவதற்கான அனைத்து பணிகளையும் செய்துள்ளோம்.  ஏனெனில் கடந்த அரசாங்கங்கள் இதனை 7-8 வருடங்களாக இழுத்தடிப்பு செய்தன. கடந்த வாரம் நாங்கள் ஒரு முடிவை எடுத்தோம், அதை நாங்கள் இழுத்தடிக்க போவதில்லை. ஜனவரி 1 முதல் இதை அமல்படுத்துவோம்.” என சுகாதார மற்றும் வெகுஜன ஊடக பிரதி அமைச்சர் வைத்தியர் ஹசங்க விஜேமுனி தெரிவித்துள்ளார்.

இலங்கைக்கு வருகை தந்திருக்கும் தென் மற்றும் மத்திய ஆசிய விவகாரங்களுக்கான அமெரிக்காவின் உதவிச் செயலாளர் டொனால்ட் லூ, வெளிவிவகார அமைச்சர் விஜித்த ஹேரத்தை சந்தித்து கலந்துரையாடியுள்ளார்.

இந்த சந்திப்புக் குறித்து தனது எக்ஸ் பக்கதில் பதிவிட்டுள்ள இலங்கைக்கான அமெரிக்கத் தூதுவர் ஜூலி சங்,

இலங்கையின் மீட்புக்கு முக்கிய பங்காற்றிய யுஎஸ் எய்ட் மற்றும் அமெரிக்க திறைசேரி திணைக்களத்தைப் பிரதிநிதித்துவப்படுத்தி, தென் மற்றும் மத்திய ஆசிய விவகாரங்களுக்கான அமெரிக்காவின் உதவிச் செயலாளர் டொனால்ட் லூ, இலங்கையின் வெளிவிவகார அமைச்சர் விஜித்த ஹேரத்துடன் சந்திப்பை மேற்கொண்டார்.

இதன்போது, இலங்கையின் புதிய அரசாங்கத்திற்கு வாழ்த்துக்களை தெரிவித்ததுடன்  முக்கிய விடயங்கள் பற்றி கலந்துரையாடினோம்.

மேலும், இலங்கையின் மக்கள் நலனுக்காக பொருளாதார மற்றும் நிர்வாக சீர்திருத்தங்களை ஆதரிக்கத் தகுந்த திட்டங்கள், திறன் வளர்ச்சி மற்றும் தொழில்நுட்ப உதவிகள் மூலம் நாம் இணைந்து செயல்படக்கூடிய வழிகளை இதன்போது ஆராய்ந்தோம் என குறிப்பிட்டுள்ளார்.

கட்டிடங்களை நிர்மாணிப்பதனால் மாத்திரம் ஒரு நாடு அபிவிருத்தியடையாது – டிஜிட்டல் அமைச்சராக பொறுப்பேற்றார் ஜனாதிபதி அனுர!

தேசிய மக்கள் சக்தியின் பொருளாதார திட்டங்கள் வெறுமனே ஐந்தாண்டு திட்டங்களை கொண்டவை அல்ல மாறாக அது இலங்கையின் நிலையான அபிவிருத்திக்கான பயணம் எனவும் டிஜிட்டல் பொருளாதாரம் தொடர்பில் தங்களுடைய அதிக பார்வையும் கவனமும் இன்னமும் ஆழமாக இருக்கும் என தேசம் நெட் நேர்காணலில் தேசிய புத்தி ஜீவிகள் அமைப்பின் வடக்கு மாகாண இணைப்பாளர் அருள் கோகிலன் தெரிவித்திருந்தார். பாரம்பரிய பொருளாதார செயல்முறைகளை டிஜிட்டல்  தொழில்நுட்பங்களைப் பயன்படுத்தி மறுசீரமைப்பதன் மூலம் சிறு மற்றும் நடுத்தர நிறுவனங்கள் இணையவெளி தளங்களை பயன்படுத்துவதை உறுதி செய்வதுடன் இலங்கையின் உற்பத்தி துறையை விருத்தி செய்யும் போது குறித்த உற்பத்தி பொருட்கள் மற்றும் சேவைகளுக்கு புதிய சந்தைகளை உருவாக்கி, ஏற்றுமதியை உயர்த்த நாம் எதிர்பார்ப்பதாகவும் அருள் கோகிலன் தெரிவித்திருந்தார்.

இந்த நிலையில் அண்மையில் 05.12.2024 அன்று ஜனாதிபதி அனுர குமார திசாநாயக்க டிஜிட்டல் அமைச்சராக பொறுப்பேற்றிருந்ததானது இலங்கையை  டிஜிட்டல் துறை மற்றும் அதனூடாக டிஜிட்டல் பொருளாதாரத்திற்கு தேசிய மக்கள் சக்தி கொடுக்கும் முக்கியத்துவத்தை தெளிவாக வெளிக்காட்டியிருந்தது. டிஜிட்டல் அமைச்சை  பொறுப்பேற்றதனை தொடர்ந்து கருத்து தெரிவித்த ஜனாதிபதி அனுர குமார திசாநாயக்க, அரசியல் அதிகாரத்தினதும் டிஜிட்டல் தொழிநுட்ப நிபுணர்களினதும் எதிர்பார்ப்புகள் ஒன்றாக இருக்கும் நிலையில் , நாட்டை டிஜிட்டல் மயமாக்கும் செயற்பாட்டிற்கு அனைத்து தொழில் வல்லுநர்களினதும் ஆதரவையும் எதிர்பார்ப்பதாகவும், வறுமையை ஒழித்தல், சமூக மனப்பாங்குகளை மாற்றுதல் மற்றும் டிஜிட்டல் மயமாக்கல் என்பன அரசாங்கத்தின் பிரதான இலக்குகளாகும். கட்டிடங்களை நிர்மாணிப்பதனால் மாத்திரம் ஒரு நாடு அபிவிருத்தியடையாது, இரண்டு தசாப்தங்களுக்கு முன்னர் நிர்மாணத்துறை அமைச்சொன்று இருந்ததை நினைவு கூர்ந்ததோடு, தற்போது ஒவ்வொரு அமைச்சும் நிர்மாணப் பணிகளையே மேற்கொண்டு வருவதாகவும்  தெரிவித்துள்ளார்.

தேசிய கொடியையும் தேசிய கீதத்தையும் மனதார ஏற்கவில்லை .ஆனால் மதிப்பளிக்கிறோம் என தமிழரசுக்கட்சியின் செயலாளரும் பாராளுமன்ற உறுப்பினருமான வைத்தியர் ப. சத்தியலிங்கம் தெரிவித்துள்ளார்.

பாராளுமன்றத்தில் தனது கன்னி உரையிலேயே அவர் இவ்வாறு தெரிவித்தார்.

தொடர்ந்தும் உரையாற்றிய அவர்,

நாங்கள் எதிர்க்கட்சி என்ற பெயருடன் அமர்ந்துள்ளோம்.ஆனாலும் அரசாங்கம் முன்னெடுக்கும் அனைத்து முற்போக்கான செயற்பாடுகளுக்கும் நாம் உங்களுடன் இருப்போம். சிறுபராயத்தில் இருந்தே ஆட்சியாளர்களுக்கு எதிரான மனநிலையுடன் வளர்ந்தவர்கள் நாங்கள்.

எனது தந்தை ஒரு பொதுநலவாதி, தனது வாழ்க்கை முழுவதும் தூய்மையான கம்யூனிசவாதியாக வாழ்ந்தவர். நான் அவரின் வளர்ப்பில் வந்ததால் இன,மத, குல வேறுபாடு எனக்கில்லை. ஆனால் இந்த நாட்டில் எண்ணிக்கையில் சிறுபான்மையானவர்கள் அனைத்து விதத்திலும் இந்த நாட்டின் ஏனைய மக்களுடன் சமனாக நடத்தைப்படவில்லை என்ற எண்ணத்துடன் வளர்ந்தவர்கள். அதனாலோ என்னவோ எமது நாட்டின் தேசியகீதத்தையும் தேசியக்கொடியையும் நாங்கள் மனதார விரும்பவில்லை, ஆனால் மதிப்பளிக்கின்றோம். இந்த மனநிலை எனக்கு மட்டுமல்ல எனது வயதையொட்டிய இன்னும் பல ஆயிரக்கணக்கனவர்களுக்கு உள்ளது.

ஆனால் அதை வெளிப்படுத்தும் சந்தர்ப்பம் அவர்களுக்கு கிடைக்கவில்லை. இந்த நிலை ஏற்பட்டதையிட்டு பல சந்தர்ப்பங்களில் நான் மனவேதனை அடைந்துள்ளேன் .நான் விரும்பும் தேசியகீதத்தையும் நான் விரும்பும் தேசியக்கொடியையும் எனது வாழ்க்கைக்காலத்திற்குள் ஏற்படுத்திக்கொடுக்கவேண்டிய பாரிய பொறுப்பு இந்த அரசினுடையது.

நான் சொல்ல விழையும் விடயத்தை நீங்கள் அனைவரும் புரிந்திருப்பீர்கள் என எண்ணுகிறேன். பொதுமக்கள் பாதுகாப்பு அமைச்சர் தனது உரையில் சமாதானம் ஒவ்வோர் மனதிலும் இருந்து தொடங்கவேண்டும் என குறிப்பிட்டார். உண்மை, ஆனால் அதை எங்கிருந்து தொடங்கலாம் என்று சிந்தித்தாலத அது உங்கள் பக்கத்திலிருந்துதான் தொடங்க வேண்டும் என நான் நினைக்கிறேன்.

யுத்தத்தால் இறந்த உறவுகளை வணங்கும் நினைவேந்தலுக்கு நீங்கள் தடை போடவில்லை, அது உங்கள் நல்லெண்ணத்தை காட்டுகிறது. அதேநேரம் பலநூற்றுக்கணக்கான இறந்தவர்களின் உடல் புதைக்கப்பட்ட துயிலும் இல்லத்தில் இன்று இராணுவமுகாம் உள்ளது, இவ்விடத்தை விடுவிக்க நடவடிக்கை எடுத்து நல்லெண்ணத்தை காட்டுங்கள்.

அரசியல் கைதிகளை விரைவில் விடுதலை செய்யுங்கள். காணாமல் ஆக்கப்பட்ட உறவுகளுக்கு என்ன நடந்தது என்பதற்கு மனச்சாட்சியுடன் விடையை தேடுங்கள், அதனூடாக உங்கள் நல்லெண்ணத்தை காட்டுங்கள். மகாவலி – எல் வலயத்தில் மூவினமக்களிற்கும் காணிகளை பகிர்ந்தளியுங்கள்.

ஜனாதிபதி தலைமையில் வரும் அரசாங்கம் நாட்டில் காணப்படும் இருமுக்கிய பிரச்சனைகளுக்கு தீர்வுகாணும் என்ற நம்பிக்கையில்தான்.

முதலாவதாக இந்தநாட்டில் காணப்படும் அரசியல் பிரச்சனைக்கான தீர்வு

இரண்டாவதாக பொருளாதார பிரச்சனைக்கான தீர்வு.

முதலாவது பிரச்சனைக்கு தீர்வுகாணாமல் இரண்டாவதற்கு முழுமையான தீர்வொன்றை காணமுடியாது.

ஜனாதிபதி தனது உரையில் அரசியல் தீர்வு தொடர்பாக பேசவில்லை என எமது உறுப்பினர்கள் சொன்னாலும், இரு தினங்களுக்கு முன்னரவ அவரை சந்தித்தபோது அரசியல் தீர்வு விடயத்தில் தனது நேர்மையான நல்லென்னத்தை வெளிக்காட்டினார்.

முன்னாள் ஜனாதிபதி மைத்திரிபால சிறிசேன ஆட்சிக்காலத்தில் புதிய அரசியல் யாப்பின் வரைபு தயாரிக்கப்பட்டபோது வழிநடத்தல் குழுவில் இருந்து மக்கள் விடுதலை முன்னணி தனது பங்களிப்பை வழங்கியிருந்தனர்.

அந்த முயற்சி தொடரவேண்டுமென கேட்டுக்கொள்கிறேன். உங்களுடன் சேர்ந்து முன்செல்ல நாங்கள் தயாராகவே உள்ளோம்.

பொருளாதார பிரச்சனை ஏற்பட காரணம் இடம்பெற்ற யுத்தம், நாட்டின் வளங்களையும் இந்த நாட்டிற்கு உள்ள சந்தர்ப்பங்களையும் பிரதிபலிக்கும் பொருளாதாரக் கொள்கை இன்மையாலம்.

ஆட்சியாளர்களினதும் சகபாடிகளினதும் ஊழல், துஸ்பிரயோகம், வீண்விரயம் யுத்தம் முடிவிற்கு வந்து 15 வருடங்களாகிவிட்டது.

வடக்கு-கிழக்கு மாகாணங்களில் பொருளாதாரத்தை கட்டியெழுப்ப எந்த நடவடிக்கையும் எடுக்கப்படவில்லை. மொத்த தேசிய வருமானத்தில் வடக்கு-கிழக்கு மாகாணங்களின் பங்களிப்பு எவ்வளவு? இன்று எமது மக்களின் பொருளாதாரம் மிக நலிவடைந்துள்ளது. 15,000 மேற்பட்ட முன்னாள் போராளிகள், 75,000 விசேட தேவைகள் உள்ள மக்கள், பெண் தலைமைத்துவகுடும்பங்கள், பெற்றோரை இழந்த குழந்தைகள், குழந்தைகளை இழந்த பெற்றோர்கள் என சமூகத்தில் 1/3 பகுதியினர் ஏனையவர்களின் உதவியின்றி சுயமாக எழுந்து நிற்க முடியாதவர்கள்.

எனவே வடக்கு- கிழக்கு மாகாணங்களில் விசேட பொருளாதார மீட்சித்திட்டங்களை ஆரம்பிக்கவேண்டிய பொறுப்பு இந்த அரசிற்குள்ளது, அதற்கான முயற்சியில் உங்களுக்கு கை கொடுக்க நாங்கள் உள்ளோம்.

தொடர்ந்தும் நிவாரணத்தை நம்பி வாழும் மற்றவர்களில் தங்கிவாழும் சமூகத்தை உருவாக்கதீர்கள். அரசாங்கத்தாலும் சர்வதேச மற்றும் உள்ளூர் அரச சார்பற்ற நிறுவனங்களாலும் நடைமுறைப்படுத்தப்பட்ட வாழ்வாதாரத்திட்டங்களை ஆராய்ந்து பாருங்கள். அவற்றில் வெற்றியடைந்த திட்டங்கள் எத்தனை?. தமது சொந்த உழைப்பில் வாழும் சமூகத்தை கட்டியெழுப்ப பொருளாதார திட்டங்களை தீட்டுங்கள். பாழடைந்த குளங்களை புனருத்தாரணம் செய்து விவசாயக்காணியற்ற குடும்பங்களிற்கு குறைந்தது 2 ஏக்கர் வயல் காளிகளை வழங்குங்கள். இவ்வாறான திட்டங்கள் வெற்றியடைய நாமும் உங்களுடன் சேர்ந்து உழைக்க ஆயத்தமாக உள்ளோம்

சர்வதேச சட்டத்திற்கு முரணாக ஆட்கடத்தல்காரர்களால் கடத்திச்செல்லப்பட்டு ரஸ்ய ராணுவத்தில் பலவந்தமாக இணைக்கப்பட்டுள்ளதாகவும் அவர்களை விடுவித்து தருமாறும் வடக்கு மாகாணத்தை சேர்ந்த அவர்களது உறவுகள் கோரிக்கை விட்டுள்ளார்கள். இது தொடர்பாக நடவடிக்கை எடுக்குமாறு தயவுடன் கேட்டுக்கொள்கிறேன்.

அத்துடன் அண்மையில் ஏற்பட்ட அனர்த்தம் தொடர்பிலும் சில வார்த்தைகள் சொல்ல எண்ணுகிறேன். திட்டமிடப்படாத கட்டுமானங்களும், வடிகால் அமைப்பு சீரின்மையும் அனுமதியற்ற கட்டிட நிர்மானங்களும் வெள்ளமேற்பட முக்கிய காரணங்களாகும்.

பாதிக்கப்பட்ட மக்களிற்கான உடனடி நிவாரணம் வழங்கப்பட வேண்டும் என்பதையும் இங்கும் சுட்டிக்காட்ட நான் கடமைப்பட்டுள்ளேன்

இறுதியாக நாங்கள் இந்த நாட்டின் பூர்வ குடியாக, ஒரு தேசிய இனமாக எங்களின் அடையாளங்களை பேணிக்கொண்டு ஒரு பன்முகத்தன்மை உள்ள வளமான நாட்டை கட்டியெழுப்ப ஒன்றுபடுவோம் என தெரிவித்தார்.

ரஷ்ய இராணுவத்தில் வலிந்து இணைக்கப்பட்ட யாழ் இளைஞர்களை மீட்டுத்தாருங்கள் – பாராளுமன்றத்தில் சிறீதரன் எம்.பி – தொடர்ந்தும் குற்றச்சாட்டுக்களை மறுக்கும் ரஷ்யா !

இலங்கையிலிருந்து  முகவர்களால் ஏமாற்றப்பட்ட நிலையில் ரஷ்ய இராணுவத்தில் வலுக்கட்டாயமாக சேர்க்கப்பட்ட யாழ்ப்பாணத்தை சேர்ந்த இளைஞர்களை மீட்டுத் தருமாறு நாடாளுமன்றத்தில் சி.சிறிதரன் எம்.பி வேண்டுகோள் விடுத்துள்ளார்.

யாழ்ப்பாணம் – கச்சேரியைச் சேர்ந்த 24 வயதுடைய மற்றும் கரவெட்டியைச் சேர்ந்த 21 வயதுடைய இளைஞன் சுயனிகாந் பகீரதன் மற்றும் முல்லைத்தீவைச் சேர்ந்த 46 வயதுடைய சுந்தரலிங்கம் பாலச்சந்திரன் மற்றும் யாழ். குருநகரைச் சேர்ந்த 37 வயதுடைய கீதபொன்பலம் பிரதாப் மற்றும் 31 வயது ஸ்ரீபன் சுரேஸ் ஆகியோர் ஏமாற்றப்பட்டு ரஷ்யா  இராணுவத்தில் வலிந்து இணைக்கப்பட்டுள்ளார்கள் என்றும் அவர் குறிப்பிட்டுள்ளார்.மேலும், இராணுவத்தில் இணைக்கப்பட்டுள்ள அவர்களுடைய புகைப்படங்களையும் அனுப்பியிருக்கிறார்கள். ஆகவே கெளரவ சபாநாயகர் அவர்களே இதில் 3 பேரினுடைய படங்களும் இருக்கின்றது. தயவு செய்து இவர்களை இந்த நாட்டுக்கு எடுப்பதற்கு ஒரு வழிமுறையை எடுத்து எம்மிடம் மீட்டுத் தருமாறு கேட்டுக் கொள்கின்றேன் என சபையில் சிறிதரன் எம்.பி தெரிவித்துள்ளார்.

இதேவேளை, விசிட் விசா ஊடாக பிரான்ஸ், பெல்ஜியம் நாடுகளுக்கு பயணிக்க முற்பட்ட யாழ்.இளைஞர்களை உக்ரைன் யுத்தத்தில் கட்டாயப்படுத்தி ஈடுபடுத்தியதாக வௌியான செய்திகள் ஆதராமற்றவை என ரஷ்ய தூதரகம் 04.12.2024 அன்று வௌியிட்டுள்ள அறிக்கையில் தெரிவிக்கப்பட்டுள்ளது.

இலங்கை – ரஷ்யா இடையிலான பாரம்பரிய நட்பு ரீதியான உறவை இழக்கச் செய்வதை நோக்காகக் கொண்டு வௌிப்படுத்தப்படும் உறுதிப்படுத்தப்படாத தரவுகள் தொடர்பில் தூதரகம் உன்னிப்பாக அவதானித்து வருவதாகவும்  எனினும் உள்நாட்டிலுள்ள சட்டவிரோத வௌிநாட்டு முகவரகங்கள் இலங்கையர்களை ரஷ்யாவிற்கு அனுப்பியமை தொடர்பில் தூதரகத்திற்கு எந்தவொரு உத்தியோகபூர்வ தகவல்களும் வழங்கப்படவில்லை எனவும் தெரிவித்துள்ள கொழும்பிலுள்ள ரஷ்ய தூதரகம் இந்த விடயம் தொடர்பில் விசாரணைகளை மேற்கொள்ள இலங்கை தரப்பிலிருந்து ஏதேனும் கோரிக்கைகள் விடுக்கப்படும் பட்சத்தில் ஆதரவு வழங்க ரஷ்யா தயாராக இருப்பதாகவும் ரஷ்ய தூதரகத்தின் அறிக்கையில் குறிப்பிடப்பட்டுள்ளது.

அரசாங்கத்தை கேள்விக்குட்படுத்தவோ அல்லது விமர்சிக்கவோ ஊடகங்களுக்கு எந்தத் தடையும் இல்லை. – ஜனாதிபதி அனுர குமார திசாநாயக்க

அரசியல், பொருளாதார விடயங்கள் தொடர்பில் எந்த நேரத்திலும் அரசாங்கத்தை கேள்விக்குட்படுத்தவோ அல்லது விமர்சிக்கவோ ஊடகங்களுக்கு எந்தத் தடையும் இல்லை. எனினும் தேசிய ஒருமைப்பாட்டுக்கு பாதகமான போலித் தகவல்களை வெளியிட வேண்டாமென இலத்திரனியல் ஊடக நிறுவன பிரதானிகளிடம் ஜனாதிபதி அநுர குமார திசாநாயக்க கோரிக்கை விடுத்தார்.

இலத்திரனியல் ஊடக நிறுவனங்களின் பிரதானிகளுடன்  ஜனாதிபதி அலுவலகத்தில் நடைபெற்ற சந்திப்பிலேயே, ஜனாதிபதி இதனைக் குறிப்பிட்டார். மிகச்சிறந்த அரசாங்கமொன்றைக் கட்டியெழுப்பி அனைத்து பிரஜைகளுக்கும் சிறந்த வாழ்க்கைத்தரத்தை ஏற்படுத்தும் பணியில், ஊடகங்களை வெளிநபர்களாக அன்றி பங்குதாரர்களாகவே, தாம் கருதுவதாகவும் ஜனாதிபதி அநுர குமார திசாநாயக்க தெரிவித்தார்.

சிறந்த அரசியல் கலாசாரத்தை மக்கள் எதிர்பார்ப்பதாகவும், அதற்காகவே தற்போதைய அரசாங்கத்தை மக்கள் தெரிவு செய்துள்ளதாகவும், மக்கள் எதிர்பார்க்கும் புதிய அரசியல், சமூக மற்றும் பொருளாதார மாற்றத்தை ஏற்படுத்துவதற்கு இணையுமாறு அனைத்து ஊடக நிறுவனங்களுக்கும் அழைப்பு விடுப்பதாகவும் ஜனாதிபதி குறிப்பிட்டார்.

பல தசாப்த காலங்கள் நாடு யுத்தத்துக்கு முகம் கொடுத்ததை நினைவு கூர்ந்த ஜனாதிபதி அநுர குமார திசாநாயக்க, இனவாதத்தை மீண்டும் ஒருபோதும் அனுமதிக்கப் போவதில்லை என்றும், ஊடக சுதந்திரத்தை எந்த வகையிலும் தடுக்கவோ, மட்டுப்படுத்தவோ தாம் தயாரில்லை எனவும் தெரிவித்தார்.