இடம்பெயர்ந்த மக்கள் அரசியல் காரணங்களுக்காக தடுத்து வைக்கப்படவில்லை – மனித உரிமை ஆணைக்குழுவில் சட்ட மா அதிபர்

இலங்கையில் உள்நாட்டில் இடம்பெயர்ந்த மக்கள் அரசியல் காரணங்களுக்காக தடுத்து வைக்கப்பட்டிருப்பதாகத் தெரிவிக்கப்படுவது முற்றிலும் உண்மைக்குப் புறம்பானதாகும் என ஜெனீவாவில் நேற்று இடம்பெற்ற ஐ.நா மனித உரிமைகள் ஆணைக்குழுவின் 12 ஆவது கூட்டத்தொடரில் உரையாற்றிய சட்ட மா அதிபர் ஜனாதிபதி சட்டத்தரணி மொஹான் பீரிஸ் தெரிவித்துள்ளார். இங்கு அவர் தொடர்ந்தும் உரையாற்றுகையில்,

புலிப் பயங்கரவாதிகளால் பலவந்தமாக பணயம் வைக்கப்பட்டிருந்த இந்த மக்கள் தங்களை புலிகளிடமிருந்து விடுவித்து அரசாங்க நிவாரணக் கிராமங்களிலும் நலன்புரி நிலையங்களிலும் தங்களுக்கான பாதுகாப்பை வழங்கமாறு அவர்களாகவே அரசாங்கத்திடம் கேட்டிருந்தனர். அவர்கள் எங்களுடைய நாட்டு மக்கள். அவர்களை மக்கள் வாழ்வதற்கு ஏற்ற அமைதியான சூழலில் மீள் குடியேற்றம் செய்யும்வரை அவர்களுக்குத் தேவையான பாதுகாப்புகளை வழங்குவது அரசாங்கத்தின் அரசியல்யாப்பு ரீதியானதும் தார்மீக ரீதியானதுமான கடமையாகும்

பத்திரிகையாளர் திஸ்ஸாநாயகத்திற்கு வழங்கப்பட்டுள்ள தீர்ப்பு மற்றும் வழங்கப்பட்டுள்ள தண்டனை குறித்து கருத்துத் தெரிவித்த அவர் மனித உரிமைகளுக்கான ஐ. நா உயரிஸ்தானிகர் திருமதி நவனீதம் பிள்ளை திஸ்ஸநாயகத்திற்கு எதிரான குற்றச்சாட்டுக்களில் மூன்றாவதும் மிகவும் பாரதூரமானதுமான குற்றத்தை கவனிக்கத் தவறியுள்ளார்.

அது திஸ்ஸநாயகம் புலிகளிடமிருந்து நிதியினைப் பெற்றுக்கொண்டதும் அதனை புலிப்பயங்கரவாத பிரச்சாரத்திற்காக பயன்படுத்தி;யதுமாகும்.  இந்த உண்மைகள் திஸ்ஸநாயகத்தினாலும் மறுத்துரைக்கப் பட்டிருக்கவில்லை. எனவே திஸ்ஸநாயகம் இரண்டு வெளியீடுகளில் இலங்கை இராணுவத்தை விமர்சித்திருந்தார் என்பதற்காக மட்டும் அவர்மீது தண்டனை விதிக்கப்பட்டிருப்பதாக தெரிவிக்கப்படுவது நியாயமற்றதாகும்.

திஸ்ஸநாயகத்திற்கு எதிராக முன்வைக்கப்பட்டிருந்த குற்றச்சாட்டுக்கள் தொடர்பில் முறையான விசாரணைகள் மேற்கொள்ளப்பட்டுள்ளதுடன் குற்றம் சுமத்தப்பட்ட ஒருவருக்குறிய சகல உரிமைகளும் வசதிகளும் அவருக்கு வழங்கப்பட்டிருந்தது என்றும் தெரிவித்தார்.