செய்திகள்

தனியார் பஸ் கட்டணங்கள் எதிர்வரும் முதலாம் திகதி முதல் 5.3 வீதத்தினால் அதிகரிக்கப்படவுள்ளதாக தனியார் பஸ் உரிமையாளர் சங்கம் அறிவித்துள்ளது.  ஆரம்பக் கட்டணமான ஆறு ரூபா அதிகரிக்கப் படாதெனவும் ஏனைய கட்டணங்களே 5.3 வீதத்தினால் அதிகரிக்கப்படுமெனவும் சங்கம் தெரிவித்துள்ளது.

பஸ் உரிமையாளர் சங்கம் நாரஹன்பிட்டியிலுள்ள அதனது தலைமையலு வலகத்தில் நேற்று திங்கட் கிழமை நடத்திய ஊடகவியலாளர் மகாநாட்டில் அதன் தலைவர் கெமுனு விஜயரட்ண உரையாற்றுகையிலேயே மேற்கண்டவாறு தெரிவித்தார்.

அங்கு அவர் மேலும் கூறியதாவது;  பஸ் உதிரிப்பாகங்கள் விலை உயர்வு மற்றும் எரிபொருள் கட்டணம் என்பவற்றைக் கருத்தில் கொண்டு 7 வீத பஸ் கட்டண உயர்வைக் கோரினோம். எனினும், தேசிய போக்குவரத்து ஆணைக்குழு 5.3% அதிகரிப்பையே அனுமதித்தது. ஜூலை 1 முதல் பஸ் கட்டணங்களை அதிகரிக்க வேண்டிய நிலையில் நாம் அரசுக்கு காலக்கெடு வழங்கினோம்.

நாம் 45 நாள் காலக்கெடு வழங்கி கடந்த சனிக்கிழமை முடிவடைந்துள்ளது. இந்நிலையில், மக்களின் நலன்கருதி 5.3 வீத அதிகரிப்புக்கு இணங்குகின்றோம். இந்நிலையில், இக்கட்டண அதிகரிப்பை அடுத்த மாதம் முதல் அமுல்படுத்தத் தீர்மானித்துள்ளோம்.

இவ்விலையதிகரிப்பின் படி ஆரம்பக் கட்டணமான 6 ரூபா அதிகரிக்கப்படமாட்டாது. எனினும், ஏனைய கட்டணங்கள் அதிகரிப்பு வீதத்திற்கு ஏற்ற வகையில் அதிகரிக்கப்படும். பஸ் கட்டண அதிகரிப்பை அரசியல் கட்சிகள் அரசியலுக்கு பயன்படுத்தக் கூடாது.  நாம் நீதிமன்ற உத்தரவை அமுல்படுத்துமாறு கோருகின்றோம். குறிப்பாக ஒன்றிணைக்கப்பட்ட நேர அட்டவணை இதுவரை முழுமையாக அமுல்படுத்தாத வகையில் இதனை மேற்கொள்ளுமாறு கோருகின்றோம்.  இதேவேளை, தனியார் பஸ் உரிமையாளர் சங்கம் முதலில் 7 வீத கட்டண உயர்வைக் கோரியது. தற்போது 5.3% உயர்வுக்கு இணங்கியுள்ளதாகத் தெரிவித்துள்ள போதும் எமக்கு உத்தியோகபூர்வமாக அறிவிக்கவில்லையெனத் தேசிய போக்குவரத்து ஆணைக்குழு தெரிவித்துள்ளது.

இது குறித்து தனியார் பஸ் உரிமையாளர் சங்கம் இன்று செவ்வாய்க்கிழமை தேசிய பஸ் போக்குவரத்து ஆணைக்குழுவுடன் பேசவுள்ளதாகத் தெரியவருகின்றது.

இந் நாட்டில் சட்டம், ஒழுங்குக்கு அப்பால் செயற்பட எவருக்கும் இடமளிக்க முடியாது. அவ்வாறு செயற்படுபவர்களைப் பாதுகாக்கவும் நாம் தயாரில்லை என்று ஜனாதிபதி மஹிந்த ராஜபக்ஷ தெரிவித்தார்.

தோற்கடிக்கப்பட்டிருக்கும் பயங்கரவாதிகள் மீண்டும் அணி சேர்கின்றார்களா என்பதை மிகுந்த அவதானத்துடன் நோக்கி வருகின்றோம். இதேவேளை வெளிநாடுகளில் ஒழிந்திருக்கும் பயங்கரவாதிகளின் தலைவர்களைக் கைது செய்வதற்கும் நடவடிக்கை எடுத்திருக்கின்றோம்.

அதனால் இலங்கையின் சுதந்திரத்திற்கு அச்சுறுத்தலாக அமையக் கூடியவர்கள் உலகின் எந்த இடத்தில் இருந்தாலும் அவர்களை முறியடிக்க நாம் தயாராக உள்ளோம் என்பதையும் சொல்லி வைக்க விரும்புகிறேன் என்றும் ஜனாதிபதி மஹிந்த ராஜபக்ஷ குறிப்பிட்டார்.

பயங்கரவாதிகளின் பிடியிலிருந்து நாட்டையும் நாட்டு மக்களையும் விடுவித்த ஜனாதிபதி மஹிந்த ராஜபக்ஷவையும், பாதுகாப்புச் செயலாளரையும், முப்படைத் தளபதிகள் மற்றும் பொலிஸ் மா அதிபர், சிவில் பாதுகாப்பு அதிகாரி ஆகியோரை சப்ரகமுவ மாகாண சர்வமதத் தலைவர்களும், மாகாண மக்களும் இணைந்து பாராட்டு சாசன பத்திரம் மற்றும் பேரானந்தி விருது வழங்கி கெளரவித்த வைபவம் இரத்தினபுரி சமன் தேவாலய வளாகத்தில் நேற்று பிற்பகல் நடைபெற்றது. அந்நிகழ்வில் கலந்து கொண்டு உரையாற்றும் போதே ஜனாதிபதி மேற்கண்டவாறு கூறினார்.

ஜனாதிபதி மஹிந்த ராஜபக்ஷ தொடர்ந்தும் உரையாற்றுகையில், பயங்கரவாதத்தின் பிடியிலிருந்து நாட்டை விடுவிக்கும் யுத்தத்தில் சப்ரகமுவ மாகாணத்தைச் சேர்ந்த சுமார் இரண்டாயிரம் இளைஞர், யுவதிகள் தம்முயிர்களைத் தியாகம் செய்திருக்கிறார்கள். பலர் ஊனமுற்றிருக்கிறார்கள்.

மாவிலாற்றை விடுவிக்கும் மனிதாபிமான இராணுவ நடவடிக்கை ஆரம்பிக்கப்பட்டு இம்மாதம் 16 ஆம் திகதியுடன் 3 வருடங்கள் நிறைவுற்றன. மூன்று வருட காலப் பகுதியில் பயங்கரவாதிகளையும் அவர்களது தலைவர்களையும் தோற்கடித்துள்ளோம். இப்பணி நிறைவுற்று மூன்று மாதங்களாகின்றன. இவ்வாறு குறுகிய காலப்பகுதியில் இப்பாரிய பணியை எம்மால் செய்யமுடியும் என்பதை உலகில் எவரும் நம்பவில்லை.

மனிதாபிமான இராணுவ நடவடிக்கையைக் கண்டு பயங்கரவாதிகள் ஆச்சரியமடைந்தார்கள். நாம் அவர்களை மட்டுமல்லாமல் முழு உலகையுமே ஆச்சரியப்படச் செய்தோம். அதனால் உலகம் இன்று எம்மை வலுவான புதுமை மிக்க நாட்டினராகப் பார்க்கின்றனர். அப்படியிருந்தும் நாம் இந்த வெற்றியைக் கண்டதும் மகிழ்ச்சியடைந்ததோடு எம்பணியை நிறுத்திக் கொள்ளவில்லை.

பயங்கரவாதத் தலைவர்களையும், அவர்களது தற்கொலையாளர்களையும் ஒழித்துக் கட்டிவிட்டோம் என்பதற்காக தேசிய பாதுகாப்பு பூரணத்துவம் அடையாது. அதன் காரணத்தினால் இதற்கு ஏற்ப நடவடிக்கைகளை மேற்கொண்டு வருகின்றோம். அதேநேரம் மக்களின் தேவைகளை நிறைவேற்றி வைப்பதில் தொடர்ந்தும் கவனம் செலுத்தி வருகின்றோம்.

மனிதாபிமான இராணுவ நடவடிக்கையை அற்ப அரசியல் லாபம் பெறும் நோக்கில் முன்னெடுத்திருந்தால் இப்பாரிய வெற்றியை எம்மால் பெற்றிருக்கவே முடியாது.

மாறாக நாம் பாரிய நோக்கத்தை முன்நிறுத்தியே இந்நடவடிக்கையை முன்னெடுத்தோம். அதுவே தேசிய பாதுகாப்பு ஆகும். நாம் பயங்கரவாதத்தைத் தோற்கடித்து வெற்றி பெற்றதுடன் மக்கள் பாரிய சந்தோஷத்திற்கு உள்ளாகினர். இருந்தும் நாம் நாட்டின் பாதுகாப்பு, சுதந்திரம் என்பவற்றில் செலுத்தி வருகின்ற கவனத்தில் சிறிதளவேனும் குறைவை ஏற்படுத்தவில்லை. உலக வல்லரசுகளின் அழுத்தங்களுக்கு அடிபணியாமல் நாம் நாட்டை விடுவித்திருக்கிறோம். அது எமக்கு மிகவும் பெறுமதியானது.

நாம் பொருளாதார ரீதியாக வலுவான தேசமாக மாறவேண்டும். நாட்டை விடுவிக்கவென மனிதாபிமான நடவடிக்கையை முன்னெடுத்த நாம் இப்போது நாட்டை கட்டியெழுப்புவதற்கான மனிதாபிமான நடவடிக்கையை ஆரம்பித்திருக்கின்றோம்.

எவரிடமும் கையேந்தாமல் வாழக் கூடிய நாட்டைத் துரிதகதியில் கட்டியெழுப்புவது அவசியம். பயங்கரவாதத்தை ஒழித்து கட்டியது போல் நாட்டையும், கட்டியெழுப்ப வேண்டும் என்ற எதிர்பார்ப்பு மக்களிடம் உள்ளது. இதனை சகல அரசியல்வாதிகளும் புரிந்து கொள்ளவேண்டும்.

அதேநேரம் எம்மிடம் ஒழுக்கம் இருக்க வேண்டும். எம்மிடம் காணப்படுகின்ற ஒழுக்கம் காரணமாக உலக நாடுகளின் கெளரவத்தைக் கடந்த காலங்களில் எம்மால் பெற்றுக்கொள்ள முடிந்தது.

என்றாலும் இந்த ஒழுக்க நிலை தொடர்ந்தும் காணப்பட வேண்டும். ஒரு சிலரின் தவறான செயற்பாடுகள் முழு நாட்டிலுமே அபகீர்த்தியை தேடித்தர முடியும். தம்மைத் தாமே கட்டுப்படுத்திக் கொள்ள முடியாத எவரும் முப்படையிலோ, பொலிஸ் துறையிலோ கடமையாற்ற முடியாது. இந்நாட்டின் சட்டம், ஒழுங்குக்கு அப்பால் யாரும் செல்லவும் முடியாது.

இந்த புனித பூமியில் முப்படையினருக்கும், பொலிஸாருக்கும் அளிக்கப்படும் கெளரவம் பேணிப்பாதுகாக்கப்பட வேண்டும் என்றார்.

இலங்கையின் வடக்கே வவுனியாப் பகுதியில் இடைத்தங்கல் முகாம்களில் உள்ள தமிழ் மக்களை தமிழர் ஐக்கிய விடுதலைக் கூட்டணியின் தலைவர் ஆனந்த சங்கரி செவ்வாய்கிழமை சென்று சந்தித்துள்ளார்.  முகாம்களில் மன்னார் பகுதியைச் சேர்ந்தவர்கள் கூட இன்னமும் தங்கியிருப்பது எதனால் என்றும், எதனால் என்று தனக்கு தெரியவில்லை என்றும் ஆனந்தசங்கரி தெரிவிக்கிறார்.

“முகாம்களில் இருக்கும் கூடாரங்களில் எலிகளே வாழ முடியும்” என்றும் அங்கு மனிதர்கள் பல மாதங்களாக வாழ்ந்து வருவதாகவும் அவர் BBC தமிழோசையிடம் தெரிவித்தார்.  எனினும் முகாம்களில் உள்ள மக்களுக்கு தேவையான வசதிகளை செய்து கொடுக்க அரசு முன்வந்துள்ளதையும் தாம் காணக் கூடியதாக இருந்தது என்றும் ஆனந்த சங்கரி கூறுகிறார்.

விடுதலைப் புலிகள் சிறார்களை பிடித்துச் சென்றார்கள் என்கிற குற்றச்சாட்டை கடுமையாக முன்வைத்த அரசு தற்போது முகாம்களில் சிறார்களை தொடர்ந்தும் தடுத்து வைத்திருப்பதில் நியாயம் இல்லை என்று அங்குள்ளவர்கள் தம்மிடம் தெரிவித்ததாகவும் அவர் தெரிவிக்கிறார்.

ஹிஜ்ரி 1430 ரமழான் மாதத்திற்கான தலைப்பிறை தீர்மானிக்கும் மாநாடு நாளை மறுதினம் (21) வெள்ளிக்கிழமை மஃரிப் தொழுகையைத் தொடர்ந்து கொழும்பு பெரிய பள்ளிவாசலில் அமைந்துள்ள மத்ரஸதுல் ஹமீதிய்யா மண்டபத்தில் நடைபெறவுள்ளது.

அன்றைய தினம் மஃரிப் தொழுகை நேரமாகிய 6.24 மணி தொடக்கம் ரமழான் மாதத்திற்கான தலைமைப்பிறையை பார்க்குமாறு சகல முஸ்லிம்களையும் கொழும்பு பெரிய பள்ளிவாசல் கேட்டுக் கொள்கின்றது.

அவ்வாறு புனித ரமழான் மாதத்திற்கான தலைப்பிறையை கண்டவர்கள் தகுந்த ஆதாரங்களுடன் நேரிலோ அல்லது 011-2390783, 2432110, 2434651 மற்றும் 0777-366099 ஆகிய தொலைப்பேசி இலக்கங்களுடனோ தொடர்பு கொண்டு அறியத்தருமாறு கொழும்பு பெரிய பள்ளவாசலின் செயலாளர் நதுஷான் ஹஸன் வேண்டுகோள் விடுத்துள்ளார்.

உலமாக்கள், கதீப்மார்கள், ஜும்ஆப் பள்ளிவாசல் நிர்வாகிகள், அகில இலங்கை ஜம்இய்யதுல் உலமா, முஸ்லிம் சமய கலாசார திணைக்கள அதிகாரிகள், ஸாவியா, தக்கியா, ஷரீஆ கவுன்ஸில் பிரதிநிதிகள் கலந்து கொள்ளவுள்ளனர்.

இலங் கைக்கு கடந்த 24 மணி நேரத்தில் 31 பில்லியன் ரூபா நிதி கிடைத்துள்ளது. இந்த பணத்தின் மூலம் ஹில்டன் ஹோட்டல் போன்று மூன்று ஹோட்டல்கள் அமைக்க முடியும். இலங்கைக்கு சர்வதேச நாணய நிதியக் கடன் கிடைத்துள்ள நிலையில் பல நாடுகள் இலங்கையில் முதலீடு செய்ய தயாராகி வருகின்றதென ஏற்றுமதி ஊக்குவிப்பு அமைச்சர் ஜீ. எல். பீரிஸ் நேற்று (18) பாராளுமன்றத்தில் தெரிவித்தார்.

சர்வதேச நாணய நிதிய கடன் தொடர்பான விவாதத்தில் உரையாற்றிய அமைச்சர் மேலும் கூறியதாவது :-

நாம் சர்வதேச நாணய நிதியத்திடம் கோரிய தொகையை விட கூடுதலான தொகை எமக்குக் கிடைத்துள்ளது. 2011 மே மாதம் வரை 8 தவணைகளில் இந்த கடன் தொகை இலங்கைக்கு கிடைக்க உள்ளது. இலங்கை மீதான நம்பிக்கை காரணமாகவே சர்வதேச நாணய நிதியம் இந்தளவு பாரிய கடன் தொகையை வழங்கியுள்ளது.

இந்தக் கடனின் மூலமாக நாட்டுக்கு என்ன பயன் கிடைக்கப் போகிறதென ஐ. தே. க. கேள்வி எழுப்பியுள்ளது. இந்த கடனின் காரணமாக நாடு மேலும் அபிவிருத்தி அடையும். பெருமளவு பணம் கிடைத்திருப்பதால் மத்திய வங்கிக்கு தனியார் வங்கிகளிடம் கடன்பெற வேண்டிய தேவை ஏற்படாது.

இலங்கைக்கு பெருமளவு பணம் கிடைத்திருப்பதால் தனியார் வங்கிகளுக்கு சிறப்பாக வியாபார நடவடிக்கைகளில் ஈடுபட வாய்ப்பு ஏற்பட்டுள்ளது.

முன்னர் வட்டி வீதம் அதிகமாக காணப்பட்டதோடு சர்வதேச நாணய நிதிய கடன் காரணமாக வட்டி வீதம் மேலும் குறையும், தொழில் வாய்ப்புகள் மேலும் அதிகரிக்கும். கடந்த 24 மணி நேரத்தில் இலங்கைக்கு 31 பில்லியன் ரூபா கிடைத்துள்ளது.

இந்த நிதியினூடாக ஹில்டன் ஹோட்டல் போன்று 3 ஹோட்டல்கள் நிர்மாணிக்க முடியும்.

வரவு – செலவுத் திட்ட துண்டு விழும் தொகையை 7 வீதமாக வைத்திருக்க முடியும் என சர்வதேச நாணய நிதியம் கூறியுள்ளது. ஆனால், 2010ஆம் ஆண்டாகும் போது துண்டு விழும் தொகையை 5 வீதமாக வைத்திருக்க அரசாங்கம் திட்டமிட்டுள்ளது.

நாட்டை அபிவிருத்தி செய்ய பெருமளவு நிதி செலவிட வாய்ப்பு ஏற்பட்டுள்ளது.

இந்தக் கடன் எம்மீது பலாத்காரமாக திணிக்கப்பட்டதாக ஜே. வி. பி. தெரிவித்துள்ள குற்றச்சாட்டு முற்றிலும் தவறானது. அரசாங்கம் முன்னெடுக்கத் திட்டமிட்டுள்ள திட்டங்களுக்கு ஒத்துழைப்பு வழங்குவதாக சர்வதேச நாணய நிதியம் தெரிவித்துள்ளது. இந்தக் கடனின் மூலம் நாணய நிதிய தேவைகள் நிறைவேறுவதாக கருத முடியாது என்றார்.

செட்டிக் குளம் நிவாரண கிராமங்களில் மழையின் காரணமாகப் பாதிக்கப்படும் மக்களைத் தற்காலிகமாக வேறு இடங்களில் தங்கவைப்பதற்கு அரசாங்கம் நடவடிக்கை எடுக்குமென்று பிரதமர் ரத்னசிறி விக்கிரமநாயக்க நேற்று (18) பாராளுமன்றத்தில் தெரிவித்தார். இது தொடர்பாக சம்பந்தப்பட்ட அமைச்சருக்கு உரிய அறிவுறுத்தல் வழங்கப்படுமென்றும் பிரதமர் கூறினார்.

செட்டிக்குளம் நிவாரண கிராமங்களில் மழையின் காரணமாக ஏற்பட்டுள்ள பாதிப்புகள் குறித்து அமைச்சர் டியூ குணசேகர நேற்று அரசின் கவனத்திற்குக் கொண்டு வந்தார். இதற்குப் பதில் அளிக்கும் வகையிலேயே பிரதமர் இந்த அறிவிப்பைச் செய்தார். நிவாரணக் கிராமங்களில் உள்ள மக்களை அவசரப்பட்டு அரசாங்கம் குடியமர்த்தி அவர்களைக் கண்ணிவெடிகளுக்கு இரையாக்கப்போவதில்லை.

அவை நிதானமாக முற்றாக அகற்றப்பட்டதன் பின்னரே மக்களை மீளக்குடியமர்த்த முடியும். எனினும் மழையினால் ஏற்படும் பாதிப்புகள் காரணமாக மக்களைத் தற்காலிகமாக வேறு இடத்தில் தங்க வைப்பதுபற்றி அரசாங்கம் நடவடிக்கை எடுக்கும் எனவும் பிரதமர் கூறினார்.

பாராளுமன்றம் நேற்று சபாநாயகர் டபிள்யூ. ஜே. எம். லொக்குபண்டார தலைமையில் கூடியபோது, வாய்மூல விடைக்கான கேள்வி நேரத்திற்குப் பின்னர் விசேட அறிக்கையொன்றைச் சமர்ப்பித்த அரசியலமைப்பு விவகார, தேசிய நல்லிணக்க அமைச்சர் டியூ குணசேகர, கடந்த 16 ஆம் திகதி வவுனியா சென்ற போது செட்டிக்குளம் நிவாரண கிராமங்களில் உள்ள மக்களுக்கு மழையின் காரணமாக ஏற்பட்ட பாதிப்புகள் குறித்துக் கட்சித் தலைவர்கள் பலர் தமது கவனத்திற்குக் கொண்டு வந்ததாகக் கூறினார்.

இடைப் பருவப் பெயர்ச்சி மழையின் காரணமாக மக்கள் பெரும் நெருக்கடியைச் சந்தித்துள்ளதாகக் கட்சித் தலைவர்கள் முறையிட்டதாகக் கூறிய அமைச்சர் டியூ, அருணாச்சலம் முகாமுக்குச் சென்று நிலைமைகளை நேரில் அவதானித்ததாகவும், அதுபற்றி ஒரு கட்சித் தலைவர் என்ற வகையில் சபையில் அரசின் கவனத்திற்குக் கொண்டு வருவதாகவும் கூறினார்.

நாட்டின் வேறு பகுதிகளில் குறிப்பாக கலவானை, கிரியெல்லை, இரத்தினபுரி உள்ளிட்ட பகுதிகளில் வெள்ளப்பெருக்கு ஏற்பட்டுள்ளதாகவும் அமைச்சர் டியூ சுட்டிக்காட்டினார்.

அமைச்சர் வழங்கிய தகவல்களின் அடிப்படையில் உரிய நடவடிக்கை எடுக்கப்படுமென பிரதமர் தமது பதிலில் குறிப்பிட்டார்.

நல்லூர் கந்தசுவாமி கோயில் வருடாந்த தேர்த் திருவிழா இன்று காலை 7 மணிக்கு கோலாகலமாக நடைபெறவுள்ளது. இதற்கான சகல ஏற்பாடுகளும் செய்யப்பட்டுள்ளதாக ஆலய நிர்வாகம் அறிவித்துள்ளது.

இந்த ரதோற்சவத்தில் பல்லாயிரக்கணக்கான பக்தர்கள் கலந்து கொள்வார்கள் என எதிர்பார்க்கப்படுகின்றது. இதில் கலந்து கொள்வதற்காக வெளிநாடுகளிலிருந்தும், தென் இலங்கையில் இருந்தும் பெரும் எண்ணிக்கையில் பக்தர்கள் கலந்து கொள்ளவிருப்பதால் இரத்மலானைக்கும் – பலாலிக்குமிடையே நடைபெற்று வருகின்ற உள்ளூர் விமானச் சேவைகள் அதிகரிக்கப்பட்டுள்ளன.

இவ்வருட உற்சவ காலங்களில் நேர்த்திக் கடன்களை நிறைவு செய்வதற்காக பெருந்தொகையான பறவைக் காவடிகள், தூக்குக் காவடிகள், பாற்காவடிகள் என பல்வேறுபட்ட பெயருடைய காவடிகள் இடம்பெறவுள்ளன.

பக்தர்களினது வசதியினைக் கருத்தில் கொண்டு யாழ். மாநகர சபையின் நிர்வாகத்தினர் அதிகமான கழிவறைகள், குடி தண்ணீர் தாங்கிகள் என்பவற்றினை ஆலய வீதிகளிலும் முக்கியமான இடங்களிலும் வைத்துள்ளனர். ஆலயத்திற்கு வருகை தரவிருக்கும் பக்தர்கள் அதிக அளவிலான தங்க நகைகளையோ, பணங்களையோ, கையடக்க தொலைபேசிகளையோ, ஒலிப்பதிவு கருவி மற்றும் கமரா போன்ற பொருட்களை கொண்டு வருவதை தவிர்த்துக் கொள்ளுமாறு அங்கு கடமையில் அமர்த்தப்பட்ட பொலிஸார் அறிவித்துள்ளனர்.

இந்த நிகழ்ச்சிகளை இலங்கை ஒலிபரப்புக் கூட்டுத்தாபனமும், இலங்கை ரூபவாஹினிக் கூட்டுத்தாபனமும் நேரடி அஞ்சல் செய்யவுள்ளன. இலங்கை போக்குவரத்துச் சபை யாழ்ப்பாணம், பருத்தித்துறை, காரைநகர் ஆகிய இடங்களில் உள்ள பஸ் டிப்போக்கள் மேலதிக பஸ் சேவைகளை நடாத்தி வருவதற்கான ஏற்பாடுகளை செய்திருக்கின்றன.

இதேபோன்று, குடாநாட்டில் உள்ள தனியார் சிற்றூர்தி சேவை சங்கத்தினரும் பக்தர்களினதும் போக்குவரத்து வசதிகளைக் கருதி அதிக அளவிலான பஸ்களை சேவையில் அமர்த்துவதற்கு முன்வந்துள்ளனர்.

ஆலயத்திற்கு வந்து செல்கின்ற பக்தர்கள் தங்கி இருந்து செல்வதற்கும் தாக சாந்தி அருந்திச் செல்வதற்கும் பல வீதி சந்திகளில் பந்தல்கள் அமைக்கப்பட்டு குருகு மணல்கள் பரப்பில் போடப்பட்டிருக்கின்றன. இரவில் தாக சாந்தி பந்தல்களில் கோப்பி, தேனீர் என்பன வழங்கப்பட்டும் வருகின்றன.

இந்தியா வில் தடைசெய்யப்பட்ட இயக்கங்களுக்கு ஆதரவாக செயற்படுவோர்மீது நடவடிக்கை எடுக்கப்படும் என்று தமிழக அரசு அறிவித்துள்ளது. தடைசெய்யப்பட்ட இயக்கங்களை ஆதரித்துப் பேசுவது அவற்றின் கொடி மற்றும் சின்னங்கள், தலைவர்களின் படங்களைப் பயன்படுத்தி விளம்பரம் செய்வது போன்ற நடவடிக்கைகள் சட்டவிரோத நடவடிக்கைத் தடுப்புச் சட்டத்தின் கீழ் தண்டனைக்குரிய குற்றம் என அறிவிக்கப்பட்டுள்ளது.

கருத்தரங்குகள், மாநாடுகள் மற்றும் கூட்டங்களில் நடத்துபவர்கள் இவற்றைக் கருத்தில் கொள்ளவேண்டும் எனவும் இல்லாவிட்டால் நடவடிக்கை எடுக்கப்படும் எனவும் அரசு குறிப்பிடப்பட்டுள்ளது.

சென்னையில் இலங்கைத் தமிழர் பாதுகாப்பு இயக்கத்தின் ஈழத்தமிழர் வாழ்வுரிமை பிரகடன நிகழ்வு எதிர்வரும் வெள்ளிக்கிழமை நடைபெறவுள்ள நிலையில் இந்த அறிவிப்பு வெளியாகியுள்ளது.

மாலபே யிலுள்ள இலங்கை தகவல் தொழில்நுட்ப நிறுவனத்தின் SLIIT மாணவரான நிபுன ராமநாயக்காவின் தாக்குதல் சம்பவத்துடன் தொடர்புடைய பிரதான சந்தேக நபரான ரவிது வாஸ் குணவர்தனவை எதிர்வரும் 31 ஆம் திகதி வரை விளக்கமறியலில் வைக்குமாறு கங்கொடவில பிரதம நீதவான் வசந்த ஜினதாச உத்தரவிட்டுள்ளார். மனநோயால் பாதிக்கப்பட்டுள்ளதாக கூறி களுபோவில போதனா வைத்தியசாலையின் 3 ஆம் மாடியில் சிகிச்சை பெற்று வந்த எஸ். எஸ். பி. வாஸ் குணவர்தனவின் மகனான ரவிது வாஸ் குணவர்தனவின் உடல் நிலை குறித்து ஆராய்வதற்காக கங்கொடவில பிரதம நீதவான் வசந்த ஜினதாச நேரில் சென்று பார்வையிட்ட போதே இந்த உத்தரவை பிறப்பித்துள்ளார்.

இதேவேளை, நிபுன ராமநாயக்காவின் தாக்குதல் சம்பவத்துடன் தொடர்புடைய வாஸ் குணவர்தனவின் மனைவிக்கு எதிராக சாட்சிகள் இருந்தால் அவரை கைது செய்து நீதிமன்றத்தில் ஆஜர் செய்யுமாறும் நீதவான் உத்தரவிட்டுள்ளார். இந்த உத்தரவை அடுத்து வாஸ் குணவர்தனவின் மனைவியை கைது செய்வதற்கு தேவையான நடவடிக்கையை பொலிஸார் மேற்கொண்டுள்ளதாக பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சகர் ரஞ்சித் குணசேகர தெரிவித்தார்.

இந்தச் சம்பவம் தொடர்பாக மேலும் தெரியவருவதாவது, மாணவன் நிபுன ராமநாயக்காவின் தாக்குதல் சம்பவத்துடன் தொடர்புடையவர்களை கைது செய்து அவர்களுக்கு எதிராக உரிய சட்ட நடவடிக்கை எடுக்குமாறு பொலிஸ் மாஅதிபர் ஜயந்த விக்ரமரத்னவின் உத்தரவின் பேரில் பொலிஸ் தலைமையகத்தின் குற்றத் தடுப்பு பிரிவுக்கு பொறுப்பான பிரதி பொலிஸ் மாஅதிபர் அனுர சேனாநாயக்கவின் தலைமையில் குழுவொன்று நியமிக்கப்பட்டிருந்தது.

விசாரணைகளை மேற்கொண்ட இந்தக் குழு, சம்பவத்துடன் தொடர்புடையவர்கள் என்ற சந்தேகத்தின் பேரில் 03 சப் இன்ஸ்பெக்டர்கள், பொலிஸ் சார்ஜன்ட் மற்றும் ஏழு பொலிஸ் கான்ஸ்டபிள்களை (11 பேர்) கைது செய்து நேற்று முன்தினம் 17 ஆம் திகதி கடுவெல நீதிமன்றில் ஆஜர் செய்யப்பட்டு அவர்களை எதிர்வரும் 31 ஆம் திகதி வரை விளக்கமறியலில் வைக்குமாறு உத்தரவிடப்பட்டது.

கொழும்பு குற்றப் புலனாய்வு பிரிவின் முன்னாள் பொறுப்பாளர் எஸ். எஸ். பி. வாஸ் குணவர்தனவின் மகனும் சம்பவத்துடன் தொடர்புடைய பிரதான சந்தேக நபருமான ரவிது வாஸ் குணவர்தன அன்றைய தினம் நீதிமன்றில் ஆஜராகவில்லை. 17 ஆம் திகதி திங்கட்கிழமை களுபோவில போதனா வைத்தியசாலையில் சிகிச்சைக்காக அனுமதிக்கப்பட்டிருந்த ரவிது வாஸ் குணவர்தனவின் உடல் நிலை குறித்து பரிசோதித்து உரிய நடவடிக்கை எடுக்குமாறு கடுவெல மேலதிக நீதவான் மஹதில் பிரசன்ன த சில்வா கங்கொடவில பிரதம நீதவானை கோரியிருந்தார்.

இந்தக் கோரிக்கையை அடுத்து வைத்தியசாலைக்கு சென்று பார்வையிட்ட கங்கொடவில பிரதம நீதவான் வசந்த ஜினதாச பிரதான சந்தேக நபரை எதிர்வரும் 31ம் திகதி வரை விளக்கமறியலில் வைக்குமாறு உத்தரவு பிறப்பித்துள்ளார்.

கங்கொடவில நீதவானின் அறிக்கைப்படியும், கடுவெல மேலதிக நீதவானின் உத்தரவின் பிரகாரமும் ரவிது வாஸ் குணவர்தனவை சிறைச்சாலை காவலர்களின் கட்டுப்பாட்டின் கீழ் எடுத்துக் கொள்ள நடவடிக்கை எடுக்கப்பட்டது.

இதேவேளை, இந்த சம்பவத்துடன் சிரேஷ்ட பொலிஸ் அதிகாரி வாஸ் குணவர்தன மற்றும் அவரது மனைவிக்கும் எதிரான சாட்சிகள் இருக்கும் பட்சத்தில் அவர்களை நீதிமன்றத்தில் ஆஜர்படுத்துமாறும் நீதவான் உத்தரவிட்டுள்ளார். இந்நிலையில் வாஸ் குணவர்தனவின் மனைவியை கைது செய்ய தேவையான சகல நடவடிக்கைகளையும் பொலிஸார் எடுத்துள்ளதாக பொலிஸ் ஊடகப் பேச்சாளர் சுட்டிக்காட்டினார்.

இலங்கை – நியூசிலாந்து அணிகளுக்கிடையிலான முதலாவது டெஸ்ட் போட்டியில் முதலில் துடுப்பெடுத்தாடிய இலங்கை அணி 3 விக்கெட் இழப்புக்கு 293 ஓட்டங்களைப் பெற்றது.

நியூசிலாந்து அணித் தலைவர் டேனியல் விட்டோரி நாணயச் சுழற்சியில் வெற்றி பெற்று தனது அணி களத்தடுப்பில் ஈடுபடுவதாக அறிவித்தார்.

இப்போட்டி நேற்று காலி சர்வதேச விளையாட்டு அரங்கில் ஆரம்பமானது. அதற்கு இணங்க முதலில் ஆரம்பத் துடுப்பாட்ட வீரர்களாகக் களமிறங்கிய இலங்கை அணியின் ஆரம்பத் துடுப்பாட்ட வீரர்களான டில்சான், தரங்க பரணவித்தான ஆகியோர் களமிறங்கினர்.

தரங்க பரணவித்தான இரண்டு பந்துகளை எதிர்கொண்டு எதுவித ஓட்டமும் பெறாமல் ஆட்டமிழந்து சென்றார். அப்போது இலங்கை அணி எதுவித ஓட்டமும் பெறவில்லை.

பின்னர் வந்த இலங்கை அணியின் தலைவர் குமார் சங்கக்கார, 8 ஓட்டங்கள் பெற்ற போது மாட்டினின் பந்து வீச்சுக்கு ஆட்டமிழந்து சென்றார். அப்போது அணியின் ஓட்ட எண்ணிக்கை 16 ஓட்டங்கள் பெற்றிருந்தனர்.

பின்னர் டில்சானுடன் ஜோடி சேர்ந்த ஜயவர்தன நிதானமாக ஆடி இலங்கை அணியின் ஓட்ட வேகத்தை உயர்த்த அடித்தளமிட்டார்.

சிறப்பாகவும் நிதானமாகவும் ஆடிக்கொண்டிருந்த டில்சான் 30 பந்துகளை எதிர்கொண்டு 50 ஓட்டங்களைப் பெற்றார். அத்துடன் டில்சான் 92 ஓட்டங்கள் பெற்றிருந்த போது ஆட்டமிழந்து சென்றார்.

ஜயவர்தன ஆட்டமிழக்காமல் 108 ஓட்டங்களையும் அவருடன் இணைந்த டிலான் சமரவீர 82 ஓட்டங்களைப் பெற்று துடுப்பெடுத்தாடி வந்தார்.

இதேவேளை இப்போட்டியில் மலிந்த வர்ணபுரவிற்கு பதிலாக ஆரம்பத் துடுப்பாட்ட வீரராக டில்சான் களமிறங்கினார்.  முரளிதரன் மீண்டும் அணியில் இணைத்துக்கொள்ளப்பட்டார். அத்துடன் இலங்கை அணியின் டெஸ்ட் விக்கெட் காப்பாளராக பிரசன்ன ஜயவர்தன மீண்டும் அணியில் இணைத்துக்கொள்ளப்பட்டார்.

SCORECARD
SRI LANKA 1st innings
T. Paranavitana c McCullum b Martin   00
T. Dilshan b O’Brien     92
K. Sangakkara c Flynn b Martin    08
M. Jayawardene not out   108
T. Samaraweera not out   82
Extras: (b1, lb1, w1)     03
TOTAL (for 3 wkts, 78 overs)   293

To bat: Angelo Mathews, Prasanna Jayawardene, Muttiah Muralitharan, Ajantha Mendis, Thilan Thushara, Nuwan Kulasekara.

Fall of wickets: 1-0 (Paranavitana), 2-16 (Sangakkara), 3-134 (Dilshan). Bowling: Martin 15-2-59-2, O’Brien 14-1-90-1 (w1), Oram 7-1-25-0, Vettori 24-5-48-0, Patel 15-1-60-0, Ryder 3-1-9-0.