யுத்தம் இனநெருக்கடிக்கு தீர்வாக இருக்க முடியாது’ – முன்னாள் ஜனாதிபதி சந்திரிகா

இலங்கை அரசாங்கத்துக்கும் விடுதலைப்புலிகளுக்கும் இடையில் தற்போது இடம்பெற்று வரும் யுத்தம் இன நெருக்கடிக்கு தீர்வாக இருக்க முடியாது என்றும் பேச்சுவார்த்தை மூலமான இணக்கப்பாடே இறுதியான சமாதானத்தை கொண்டு வரும் எனவும் முன்னாள் ஜனாதிபதி சந்திரிகா பண்டாரநாயக்க குமாரதுங்க கூறியுள்ளார். இந்திய மத்திய அமைச்சர் மணிசங்கர் ஐயரின் ராஜீவ்காந்தி; “மாற்றத்திற்கான காலம்’ என்ற நூல் தொடர்பான குழு ஆய்வு நிகழ்வு புதுடில்லியில் நேற்று முன்தினம் செவ்வாய்க்கிழமை இடம்பெற்றது. இதில் பங்கு பற்றிய திருமதி குமாரதுங்க, நெடிவ்கொம்மிற்கு இலங்கைப் பிரச்சினை தொடர்பாக கருத்து தெரிவிக்கையிலேயே மேற்கண்டவாறு கூறியுள்ளார்.

இலங்கையின் தற்போதைய நிலைவரம் தொடர்பாக அவரிடம் கேட்கப்பட்டபோது, அப்பாவி பொது மக்கள் கொல்லப்படுவதை நாங்கள் மிகுந்த கவலை கொண்டுள்ளோம்’ என்று கூறியுள்ளார்.  ஜனாதிபதி மகிந்த ராஜபக்ஷவின் அணுகு முறை பற்றியும் மோதலை முடிவுக்கு கொண்டு வருவதற்கான சிறந்த வழியென்ன என்பது குறித்து அவர் நினைப்பது என்ன என்பது தொடர்பாகவும் கருத்துக் கேட்கப்பட்டபோது, நான் கூறுவதை கேட்க ஜனாதிபதி விரும்புவாரென நான் நினைக்கவில்லை என்று சந்திரிகா கூறியுள்ளார்.

ஆகக் குறைந்தளவு பாதிப்புடன் மோதலை முடிவுக்கு கொண்டு வருவது தொடர்பான அவரின் அபிப்பிராயம் பற்றி கேட்கப்பட்டபோது தமிழ் மக்களுடன் பேசுவதே ஒரே வழி முறையென்று கூறியுள்ளார். “இந்த மோதலுக்கு பேச்சுவார்த்தை மூலமான இணக்கப்பாடு மட்டுமே இறுதித் தீர்வு’ என்றார் சந்திரிகா.

ராஜீவ் காந்தியின் கொள்கைக்கு அப்பால் 21 ஆவது நூற்றாண்டு சென்று விட்டதா என்பது தொடர்பான குழு நிலை ஆய்வில் கருத்து தெரிவித்த சந்திரிகா ராஜீவ் காந்தியினதும் அவரின் மதச் சார்பற்ற கொள்கைகளும் 21 ஆம் நூற்றாண்டால் தாண்டிச் சென்றுவிடவில்லை என்று கூறியுள்ளார்.  சூழ்நிலைகளால் அவர் நிலைவரத்தில் ஆழமாக ஈடுபடுத்திக் கொண்டார். அது கறுப்பு ஜூலையென கூறப்படும் 1983 ஜூலை கலவர காலமாகும். அதனால், 6 இலட்சம் தமிழர்கள் நாட்டை விட்டு வெளியேறினர். தமிழத்திற்கு சென்றனர். ராஜீவ் காந்தி அதிகாரத்திற்கு வந்த கால கட்டம் அதுவாகும் என்று சந்திரிகா கூறியுள்ளார்.

தனிப்பட்ட ரீதியில் ராஜீவ் காந்தியுடன் தான் அதிகளவு உரையாடியதில்லை என்று குறிப்பிட்ட சந்திரிகா, ஆயினும் இந்திய விஜயத்தின் போது பண்டிட் ஜவஹர்லால் நேரு தனது தந்தையாரான மறைந்த எஸ்.டபிள்யூ. ஆர்.டி.பண்டாரநாயக்கவை பிள்ளைகளையும் அழைத்து வருமாறு வலியுறுத்தியதையும் அவர் நினைவு கூர்ந்தார்.