செய்திகள்

செட்டிக் குளம் நிவாரண கிராமங்களில் மழையின் காரணமாகப் பாதிக்கப்படும் மக்களைத் தற்காலிகமாக வேறு இடங்களில் தங்கவைப்பதற்கு அரசாங்கம் நடவடிக்கை எடுக்குமென்று பிரதமர் ரத்னசிறி விக்கிரமநாயக்க நேற்று (18) பாராளுமன்றத்தில் தெரிவித்தார். இது தொடர்பாக சம்பந்தப்பட்ட அமைச்சருக்கு உரிய அறிவுறுத்தல் வழங்கப்படுமென்றும் பிரதமர் கூறினார்.

செட்டிக்குளம் நிவாரண கிராமங்களில் மழையின் காரணமாக ஏற்பட்டுள்ள பாதிப்புகள் குறித்து அமைச்சர் டியூ குணசேகர நேற்று அரசின் கவனத்திற்குக் கொண்டு வந்தார். இதற்குப் பதில் அளிக்கும் வகையிலேயே பிரதமர் இந்த அறிவிப்பைச் செய்தார். நிவாரணக் கிராமங்களில் உள்ள மக்களை அவசரப்பட்டு அரசாங்கம் குடியமர்த்தி அவர்களைக் கண்ணிவெடிகளுக்கு இரையாக்கப்போவதில்லை.

அவை நிதானமாக முற்றாக அகற்றப்பட்டதன் பின்னரே மக்களை மீளக்குடியமர்த்த முடியும். எனினும் மழையினால் ஏற்படும் பாதிப்புகள் காரணமாக மக்களைத் தற்காலிகமாக வேறு இடத்தில் தங்க வைப்பதுபற்றி அரசாங்கம் நடவடிக்கை எடுக்கும் எனவும் பிரதமர் கூறினார்.

பாராளுமன்றம் நேற்று சபாநாயகர் டபிள்யூ. ஜே. எம். லொக்குபண்டார தலைமையில் கூடியபோது, வாய்மூல விடைக்கான கேள்வி நேரத்திற்குப் பின்னர் விசேட அறிக்கையொன்றைச் சமர்ப்பித்த அரசியலமைப்பு விவகார, தேசிய நல்லிணக்க அமைச்சர் டியூ குணசேகர, கடந்த 16 ஆம் திகதி வவுனியா சென்ற போது செட்டிக்குளம் நிவாரண கிராமங்களில் உள்ள மக்களுக்கு மழையின் காரணமாக ஏற்பட்ட பாதிப்புகள் குறித்துக் கட்சித் தலைவர்கள் பலர் தமது கவனத்திற்குக் கொண்டு வந்ததாகக் கூறினார்.

இடைப் பருவப் பெயர்ச்சி மழையின் காரணமாக மக்கள் பெரும் நெருக்கடியைச் சந்தித்துள்ளதாகக் கட்சித் தலைவர்கள் முறையிட்டதாகக் கூறிய அமைச்சர் டியூ, அருணாச்சலம் முகாமுக்குச் சென்று நிலைமைகளை நேரில் அவதானித்ததாகவும், அதுபற்றி ஒரு கட்சித் தலைவர் என்ற வகையில் சபையில் அரசின் கவனத்திற்குக் கொண்டு வருவதாகவும் கூறினார்.

நாட்டின் வேறு பகுதிகளில் குறிப்பாக கலவானை, கிரியெல்லை, இரத்தினபுரி உள்ளிட்ட பகுதிகளில் வெள்ளப்பெருக்கு ஏற்பட்டுள்ளதாகவும் அமைச்சர் டியூ சுட்டிக்காட்டினார்.

அமைச்சர் வழங்கிய தகவல்களின் அடிப்படையில் உரிய நடவடிக்கை எடுக்கப்படுமென பிரதமர் தமது பதிலில் குறிப்பிட்டார்.

நல்லூர் கந்தசுவாமி கோயில் வருடாந்த தேர்த் திருவிழா இன்று காலை 7 மணிக்கு கோலாகலமாக நடைபெறவுள்ளது. இதற்கான சகல ஏற்பாடுகளும் செய்யப்பட்டுள்ளதாக ஆலய நிர்வாகம் அறிவித்துள்ளது.

இந்த ரதோற்சவத்தில் பல்லாயிரக்கணக்கான பக்தர்கள் கலந்து கொள்வார்கள் என எதிர்பார்க்கப்படுகின்றது. இதில் கலந்து கொள்வதற்காக வெளிநாடுகளிலிருந்தும், தென் இலங்கையில் இருந்தும் பெரும் எண்ணிக்கையில் பக்தர்கள் கலந்து கொள்ளவிருப்பதால் இரத்மலானைக்கும் – பலாலிக்குமிடையே நடைபெற்று வருகின்ற உள்ளூர் விமானச் சேவைகள் அதிகரிக்கப்பட்டுள்ளன.

இவ்வருட உற்சவ காலங்களில் நேர்த்திக் கடன்களை நிறைவு செய்வதற்காக பெருந்தொகையான பறவைக் காவடிகள், தூக்குக் காவடிகள், பாற்காவடிகள் என பல்வேறுபட்ட பெயருடைய காவடிகள் இடம்பெறவுள்ளன.

பக்தர்களினது வசதியினைக் கருத்தில் கொண்டு யாழ். மாநகர சபையின் நிர்வாகத்தினர் அதிகமான கழிவறைகள், குடி தண்ணீர் தாங்கிகள் என்பவற்றினை ஆலய வீதிகளிலும் முக்கியமான இடங்களிலும் வைத்துள்ளனர். ஆலயத்திற்கு வருகை தரவிருக்கும் பக்தர்கள் அதிக அளவிலான தங்க நகைகளையோ, பணங்களையோ, கையடக்க தொலைபேசிகளையோ, ஒலிப்பதிவு கருவி மற்றும் கமரா போன்ற பொருட்களை கொண்டு வருவதை தவிர்த்துக் கொள்ளுமாறு அங்கு கடமையில் அமர்த்தப்பட்ட பொலிஸார் அறிவித்துள்ளனர்.

இந்த நிகழ்ச்சிகளை இலங்கை ஒலிபரப்புக் கூட்டுத்தாபனமும், இலங்கை ரூபவாஹினிக் கூட்டுத்தாபனமும் நேரடி அஞ்சல் செய்யவுள்ளன. இலங்கை போக்குவரத்துச் சபை யாழ்ப்பாணம், பருத்தித்துறை, காரைநகர் ஆகிய இடங்களில் உள்ள பஸ் டிப்போக்கள் மேலதிக பஸ் சேவைகளை நடாத்தி வருவதற்கான ஏற்பாடுகளை செய்திருக்கின்றன.

இதேபோன்று, குடாநாட்டில் உள்ள தனியார் சிற்றூர்தி சேவை சங்கத்தினரும் பக்தர்களினதும் போக்குவரத்து வசதிகளைக் கருதி அதிக அளவிலான பஸ்களை சேவையில் அமர்த்துவதற்கு முன்வந்துள்ளனர்.

ஆலயத்திற்கு வந்து செல்கின்ற பக்தர்கள் தங்கி இருந்து செல்வதற்கும் தாக சாந்தி அருந்திச் செல்வதற்கும் பல வீதி சந்திகளில் பந்தல்கள் அமைக்கப்பட்டு குருகு மணல்கள் பரப்பில் போடப்பட்டிருக்கின்றன. இரவில் தாக சாந்தி பந்தல்களில் கோப்பி, தேனீர் என்பன வழங்கப்பட்டும் வருகின்றன.

இந்தியா வில் தடைசெய்யப்பட்ட இயக்கங்களுக்கு ஆதரவாக செயற்படுவோர்மீது நடவடிக்கை எடுக்கப்படும் என்று தமிழக அரசு அறிவித்துள்ளது. தடைசெய்யப்பட்ட இயக்கங்களை ஆதரித்துப் பேசுவது அவற்றின் கொடி மற்றும் சின்னங்கள், தலைவர்களின் படங்களைப் பயன்படுத்தி விளம்பரம் செய்வது போன்ற நடவடிக்கைகள் சட்டவிரோத நடவடிக்கைத் தடுப்புச் சட்டத்தின் கீழ் தண்டனைக்குரிய குற்றம் என அறிவிக்கப்பட்டுள்ளது.

கருத்தரங்குகள், மாநாடுகள் மற்றும் கூட்டங்களில் நடத்துபவர்கள் இவற்றைக் கருத்தில் கொள்ளவேண்டும் எனவும் இல்லாவிட்டால் நடவடிக்கை எடுக்கப்படும் எனவும் அரசு குறிப்பிடப்பட்டுள்ளது.

சென்னையில் இலங்கைத் தமிழர் பாதுகாப்பு இயக்கத்தின் ஈழத்தமிழர் வாழ்வுரிமை பிரகடன நிகழ்வு எதிர்வரும் வெள்ளிக்கிழமை நடைபெறவுள்ள நிலையில் இந்த அறிவிப்பு வெளியாகியுள்ளது.

மாலபே யிலுள்ள இலங்கை தகவல் தொழில்நுட்ப நிறுவனத்தின் SLIIT மாணவரான நிபுன ராமநாயக்காவின் தாக்குதல் சம்பவத்துடன் தொடர்புடைய பிரதான சந்தேக நபரான ரவிது வாஸ் குணவர்தனவை எதிர்வரும் 31 ஆம் திகதி வரை விளக்கமறியலில் வைக்குமாறு கங்கொடவில பிரதம நீதவான் வசந்த ஜினதாச உத்தரவிட்டுள்ளார். மனநோயால் பாதிக்கப்பட்டுள்ளதாக கூறி களுபோவில போதனா வைத்தியசாலையின் 3 ஆம் மாடியில் சிகிச்சை பெற்று வந்த எஸ். எஸ். பி. வாஸ் குணவர்தனவின் மகனான ரவிது வாஸ் குணவர்தனவின் உடல் நிலை குறித்து ஆராய்வதற்காக கங்கொடவில பிரதம நீதவான் வசந்த ஜினதாச நேரில் சென்று பார்வையிட்ட போதே இந்த உத்தரவை பிறப்பித்துள்ளார்.

இதேவேளை, நிபுன ராமநாயக்காவின் தாக்குதல் சம்பவத்துடன் தொடர்புடைய வாஸ் குணவர்தனவின் மனைவிக்கு எதிராக சாட்சிகள் இருந்தால் அவரை கைது செய்து நீதிமன்றத்தில் ஆஜர் செய்யுமாறும் நீதவான் உத்தரவிட்டுள்ளார். இந்த உத்தரவை அடுத்து வாஸ் குணவர்தனவின் மனைவியை கைது செய்வதற்கு தேவையான நடவடிக்கையை பொலிஸார் மேற்கொண்டுள்ளதாக பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சகர் ரஞ்சித் குணசேகர தெரிவித்தார்.

இந்தச் சம்பவம் தொடர்பாக மேலும் தெரியவருவதாவது, மாணவன் நிபுன ராமநாயக்காவின் தாக்குதல் சம்பவத்துடன் தொடர்புடையவர்களை கைது செய்து அவர்களுக்கு எதிராக உரிய சட்ட நடவடிக்கை எடுக்குமாறு பொலிஸ் மாஅதிபர் ஜயந்த விக்ரமரத்னவின் உத்தரவின் பேரில் பொலிஸ் தலைமையகத்தின் குற்றத் தடுப்பு பிரிவுக்கு பொறுப்பான பிரதி பொலிஸ் மாஅதிபர் அனுர சேனாநாயக்கவின் தலைமையில் குழுவொன்று நியமிக்கப்பட்டிருந்தது.

விசாரணைகளை மேற்கொண்ட இந்தக் குழு, சம்பவத்துடன் தொடர்புடையவர்கள் என்ற சந்தேகத்தின் பேரில் 03 சப் இன்ஸ்பெக்டர்கள், பொலிஸ் சார்ஜன்ட் மற்றும் ஏழு பொலிஸ் கான்ஸ்டபிள்களை (11 பேர்) கைது செய்து நேற்று முன்தினம் 17 ஆம் திகதி கடுவெல நீதிமன்றில் ஆஜர் செய்யப்பட்டு அவர்களை எதிர்வரும் 31 ஆம் திகதி வரை விளக்கமறியலில் வைக்குமாறு உத்தரவிடப்பட்டது.

கொழும்பு குற்றப் புலனாய்வு பிரிவின் முன்னாள் பொறுப்பாளர் எஸ். எஸ். பி. வாஸ் குணவர்தனவின் மகனும் சம்பவத்துடன் தொடர்புடைய பிரதான சந்தேக நபருமான ரவிது வாஸ் குணவர்தன அன்றைய தினம் நீதிமன்றில் ஆஜராகவில்லை. 17 ஆம் திகதி திங்கட்கிழமை களுபோவில போதனா வைத்தியசாலையில் சிகிச்சைக்காக அனுமதிக்கப்பட்டிருந்த ரவிது வாஸ் குணவர்தனவின் உடல் நிலை குறித்து பரிசோதித்து உரிய நடவடிக்கை எடுக்குமாறு கடுவெல மேலதிக நீதவான் மஹதில் பிரசன்ன த சில்வா கங்கொடவில பிரதம நீதவானை கோரியிருந்தார்.

இந்தக் கோரிக்கையை அடுத்து வைத்தியசாலைக்கு சென்று பார்வையிட்ட கங்கொடவில பிரதம நீதவான் வசந்த ஜினதாச பிரதான சந்தேக நபரை எதிர்வரும் 31ம் திகதி வரை விளக்கமறியலில் வைக்குமாறு உத்தரவு பிறப்பித்துள்ளார்.

கங்கொடவில நீதவானின் அறிக்கைப்படியும், கடுவெல மேலதிக நீதவானின் உத்தரவின் பிரகாரமும் ரவிது வாஸ் குணவர்தனவை சிறைச்சாலை காவலர்களின் கட்டுப்பாட்டின் கீழ் எடுத்துக் கொள்ள நடவடிக்கை எடுக்கப்பட்டது.

இதேவேளை, இந்த சம்பவத்துடன் சிரேஷ்ட பொலிஸ் அதிகாரி வாஸ் குணவர்தன மற்றும் அவரது மனைவிக்கும் எதிரான சாட்சிகள் இருக்கும் பட்சத்தில் அவர்களை நீதிமன்றத்தில் ஆஜர்படுத்துமாறும் நீதவான் உத்தரவிட்டுள்ளார். இந்நிலையில் வாஸ் குணவர்தனவின் மனைவியை கைது செய்ய தேவையான சகல நடவடிக்கைகளையும் பொலிஸார் எடுத்துள்ளதாக பொலிஸ் ஊடகப் பேச்சாளர் சுட்டிக்காட்டினார்.

இலங்கை – நியூசிலாந்து அணிகளுக்கிடையிலான முதலாவது டெஸ்ட் போட்டியில் முதலில் துடுப்பெடுத்தாடிய இலங்கை அணி 3 விக்கெட் இழப்புக்கு 293 ஓட்டங்களைப் பெற்றது.

நியூசிலாந்து அணித் தலைவர் டேனியல் விட்டோரி நாணயச் சுழற்சியில் வெற்றி பெற்று தனது அணி களத்தடுப்பில் ஈடுபடுவதாக அறிவித்தார்.

இப்போட்டி நேற்று காலி சர்வதேச விளையாட்டு அரங்கில் ஆரம்பமானது. அதற்கு இணங்க முதலில் ஆரம்பத் துடுப்பாட்ட வீரர்களாகக் களமிறங்கிய இலங்கை அணியின் ஆரம்பத் துடுப்பாட்ட வீரர்களான டில்சான், தரங்க பரணவித்தான ஆகியோர் களமிறங்கினர்.

தரங்க பரணவித்தான இரண்டு பந்துகளை எதிர்கொண்டு எதுவித ஓட்டமும் பெறாமல் ஆட்டமிழந்து சென்றார். அப்போது இலங்கை அணி எதுவித ஓட்டமும் பெறவில்லை.

பின்னர் வந்த இலங்கை அணியின் தலைவர் குமார் சங்கக்கார, 8 ஓட்டங்கள் பெற்ற போது மாட்டினின் பந்து வீச்சுக்கு ஆட்டமிழந்து சென்றார். அப்போது அணியின் ஓட்ட எண்ணிக்கை 16 ஓட்டங்கள் பெற்றிருந்தனர்.

பின்னர் டில்சானுடன் ஜோடி சேர்ந்த ஜயவர்தன நிதானமாக ஆடி இலங்கை அணியின் ஓட்ட வேகத்தை உயர்த்த அடித்தளமிட்டார்.

சிறப்பாகவும் நிதானமாகவும் ஆடிக்கொண்டிருந்த டில்சான் 30 பந்துகளை எதிர்கொண்டு 50 ஓட்டங்களைப் பெற்றார். அத்துடன் டில்சான் 92 ஓட்டங்கள் பெற்றிருந்த போது ஆட்டமிழந்து சென்றார்.

ஜயவர்தன ஆட்டமிழக்காமல் 108 ஓட்டங்களையும் அவருடன் இணைந்த டிலான் சமரவீர 82 ஓட்டங்களைப் பெற்று துடுப்பெடுத்தாடி வந்தார்.

இதேவேளை இப்போட்டியில் மலிந்த வர்ணபுரவிற்கு பதிலாக ஆரம்பத் துடுப்பாட்ட வீரராக டில்சான் களமிறங்கினார்.  முரளிதரன் மீண்டும் அணியில் இணைத்துக்கொள்ளப்பட்டார். அத்துடன் இலங்கை அணியின் டெஸ்ட் விக்கெட் காப்பாளராக பிரசன்ன ஜயவர்தன மீண்டும் அணியில் இணைத்துக்கொள்ளப்பட்டார்.

SCORECARD
SRI LANKA 1st innings
T. Paranavitana c McCullum b Martin   00
T. Dilshan b O’Brien     92
K. Sangakkara c Flynn b Martin    08
M. Jayawardene not out   108
T. Samaraweera not out   82
Extras: (b1, lb1, w1)     03
TOTAL (for 3 wkts, 78 overs)   293

To bat: Angelo Mathews, Prasanna Jayawardene, Muttiah Muralitharan, Ajantha Mendis, Thilan Thushara, Nuwan Kulasekara.

Fall of wickets: 1-0 (Paranavitana), 2-16 (Sangakkara), 3-134 (Dilshan). Bowling: Martin 15-2-59-2, O’Brien 14-1-90-1 (w1), Oram 7-1-25-0, Vettori 24-5-48-0, Patel 15-1-60-0, Ryder 3-1-9-0.

கலேவெல ஸ்ரீ முத்துமாரியம்மன் தேவஸ்தானம் மற்றும் அது அமைந்துள்ள காணி தொடர்பாக நீண்ட காலமாக இருந்து வந்த இழுபறி நிலை முடிவிற்கு வந்திருப்பதாக மாத்தளை மாவட்ட ஸ்ரீலங்கா சுதந்திரக் கட்சியின் அமைப்பாளர் மாயழகு சசீகரன் தெரிவித்தார்.
ஆரம்ப காலத்தில் இக்கோவிலுக்கென 53 பேர்ச்சஸ் காணி இருந்த போதிலும் காலப்போக்கில் சில தீய சக்திகளின் ஆக்கிரமிப்பு நடவடிக்கைகள் காரணமாக கோவிலும் கோவிலுக்கான காணியும் அபகரிக்கப்பட்டு மூன்று பேர்ச்சஸில் கோவில் பகுதி மாத்திரம் தான் எஞ்சுகின்ற நிலை உருவானது.

இந்நிலையில் இக்கோவில் தொடர்பாக கோவில் நிர்வாகம் மாயழகு சசீகரனின் கவனத்திற்கு கொண்டு வந்ததையடுத்து அவர் ஜனாதிபதி மகிந்த ராஜபக்ஷவிடம் முறையிட்டுள்ளார். அதன் பலனாக சுமுகநிலை தோன்றும் அறிகுறிகள் தென்பட்டதாக கலேவெலஸ்ரீ முத்துமாரியம்மன் தேவஸ்தான நிர்வாகம் தெரிவித்தது.

கலேவெல ஸ்ரீ முத்துமாரியம்மன் தேவஸ்தானத்திற்கு 32 பேர்ச்சஸ் நிலத்தைக் கையளிப்பதற்கு நடவடிக்கைகள் மேற்கொள்ளுமாறு ஜனாதிபதி மகிந்த ராஜபக்ஷ மாத்தளை மாவட்ட செயலாளர் காமினி செனவிரத்னவிற்கு பணிப்புரை வழங்கியிருந்தார்.

அதனைத் தொடர்ந்து கலேவெல பிரதேச செயலாளர் பீ.ஏ.யூ. வீரசிங்க மாயழகு சசீகரனுக்கு அனுப்பியுள்ள கடிதத்தில் கலேவெல ஸ்ரீ முத்துமாரியம்மன் தேவஸ்தானத்திற்கு 32 பேர்ச்சஸ் காணி ஒதுக்கப்பட்டிருப்பதாகவும் காணி அளவீடு செய்யும் நடவடிக்கைகள் அரச நில அளவையாளரால் மேற்கொள்ளப்படவிருப்பதாகவும் குறிப்பிட்டிருக்கிறது.

1958,1977 மற்றும் 1983 ஆம் ஆண்டுகளில் இடம்பெற்ற வன்செயல் சம்பவங்களின் போது கலேவெல ஸ்ரீ முத்துமாரியம்மன் தேவஸ்தானம் தீயிட்டுக் கொளுத்தப்பட்டும் சிலைகள் திருடப்பட்டும் சூறையாடப்பட்டும் சின்னா பின்னமாக்கப்பட்டிருந்தமை குறிப்பிடத்தக்கது.

உயர்தரப் பரீட்சை தொடர்பான எந்த ஒரு வினாத்தாளும் முன்கூட்டி வெளியாகவில்லை எனவும், அது தொடர்பாக வெளியான செய்திகள் உண்மைக்குப் புறம்பானவை எனவும் கல்வி அமைச்சர் சுசில் பிரேம ஜயந்த் நேற்று (18) பாராளுமன்றத்தில் தெரிவித்தார். க.பொ.த. உயர் தரப் பரீட்சை வினாத்தாள் வெளியானதாகக் கூறப்படும் குற்றச்சாட்டு தொடர்பாக பரீட்சைத் திணைக்களமும் பொலிஸ¤ம் விசாரணை நடத்தி வருவதாகவும் அவர் குறிப்பிட்டார்.

வினாத்தாள் வெளியானதாக கூறப்படும் சம்பவம் தொடர்பாக விசேட அறிக்கையொன்றை வெளியிட்ட கல்வி அமைச்சர் மேலும் கூறியதாவது:- உயிரியல் விஞ்ஞான பாட வினாத்தாள் முன்கூட்டி வெளியாகவில்லையென பரீட்சை ஆணையாளர் எழுத்து மூலம் கல்வி அமைச்சிற்கு அறிவித்துள்ளார். ஆனால் மேற்படி குற்றச்சாட்டு தொடர்பாக பரீட்சை சட்டத்திற்கு அமைவாக விசாரணை நடத்தப்படுவதாகவும் அவர் அறிவித்துள்ளார். சில ஊடகங்கள் இது தொடர்பாக வெளியிட்டுள்ள செய்திகள் தவறானதாகும். பெளதீகவியல் பாட வினாக்களை முன்கூட்டி வெளியிட்டதாக கூறப்படும் தனியார் வகுப்பு ஆசிரியருக்கு எதிராகவும் பொலிஸார் விசாரணை நடத்தி வருகின்றனர்.

கம்பஹா தக்சிலா வித்தியாலய மாணவர்கள் மூவருக்கு தவணைப் பரீட்சையில் பெளதீகவியல் பாட வினாத்தாள்கள் கிடைக்கவில்லை என்ற சம்பவம் தொடர்பாகவும் விசாரணை நடத்தப்படுகிறது. மூன்று வினாத்தாள்கள் குறைவாக அனுப்பப்பட்டதாலே இந்தப் பிரச்சினை ஏற்பட்டது. ஆனால் துரிதமாக அவர்களுக்கு வினாத்தாள்கள் வழங்க நடவடிக்கை எடுக்கப்பட்டது. பரீட்சை தாமதமின்றி நடத்த ஒழுங்குகள் செய்யப்பட்டது என்றார்.

இங்கு கருத்துத் தெரிவித்த ஜே.வி.பி. எம்.பி. அநுரகுமார திஸாநாயக்க கூறியதாவது, பெளதீகவியல் வினாத்தாள்களன்றி சில வினாக்களே வெளியாகியுள்ளன. தனியார் வகுப்பு நடத்தும் ஆசிரியர் ஒருவர் பெளதீகவியல் பாட வினாத்தாளில் உள்ள ஆறு வினாக்களை மாணவர்களுக்கு தபால் மூலம் அனுப்பியுள்ளார். கம்பஹா தக்சிலா வித்தியாலய தவணைப் பரீட்சையில் 3 மாணவர்களுக்கு பெளதீகவியல் பாட வினாத்தாள்கள் கிடைக்காததாலும் பிரச்சினை ஏற்பட்டது என்றார்.

ஒரு இலட்சத்து 96 ஆயிரம் (பல்வேறு வகையான) ரவைகள், 110 கிலோ எடையுள்ள 32 கிளேமோர் குண்டுகள் உட்பட பெருந்தொகையான வெடிபொருட்களை பாதுகாப்புப் படையினர் வெள்ளைமுள்ளி வாய்க்கால் பிரதேசத்திலிருந்து மீட்டெடுத்துள்ளதாக இராணுவப் பேச்சாளர் பிரிகேடியர் உதய நாணயக்கார தெரிவித்தார்.

இதேவேளை, புதுக்குடியிருப்பின் பல்வேறு பிரதேசங்களிலும் பாதுகாப்புப் படையினர் பாரிய தேடுதல்களை மேற்கொண்டுள்ளதாகவும் இங்கிருந்து குண்டுகள் தயாரிப்பதற்கு பயன்படுத்தப்படும் 70 கிலோ எடையுள்ள சைக்கிள் குண்டுகள் உட்பட பல்வேறு வெடிபொருட்களையும் மீட்டெடுத்துள்ளதாக அவர் மேலும் தெரிவித்தார்.

வெள்ளைமுள்ளி வாய்க்கால் பிரதேசத்தில் இராணுவத்தின் எட்டாவது அதிரடிப் படையினர் நடத்திய தேடுதல்களின் போது 39 மி. மீ. ரவைகள் – 135000, 0.22 மி. மீ. ரவைகள் – 4600, 1.7 பிஸ்டல் ரவைகள் – 55815, தொலைத் தொடர்பு கருவிகள் மற்றும் ஆயிரக் கணக்கான கிரனைட் லோஞ்சர்களையும் மீட்டெடுத்துள்ளனர்.

அம்பலவான்பொக்கனை, சுகந்திரபுரம், புதுக்குடியிருப்பு, சர்வார் தோட்டம் ஆகிய பகுதிகளில் மேற்கொண்ட தேடுதல்களின் போது பல்வேறு கிலோ எடையுள்ள கிளேமோர் குண்டுகள் – 50, இரசாயன போத்தல்கள் – 25, 60 மி. மீ. மோட்டார் குண்டுகள் – 40, 81 மி. மீ. மோட்டார் குண்டுகள் – 40, கைக்குண்டுகள் – 50, பெருந்தொகையான வெடிமருந்துகள், திசைகாட்டி மற்றும் உபகரணங்களையும் மீட்டெடுத்துள்ளனர் என்று பிரிகேடியர் மேலும் தெரிவித்தார்.

எவர் என்ன சொன்னாலும் வன்னியிலிருந்து இடம்பெயர்ந்த மக்களை உடனடியாக மீள் குடியேற்ற முடியாதென கூட்டுப் படைகளின் தலைமை அதிகாரி ஜெனரல் சரத் பொன்சேகா தெரிவித்துள்ளார்.  கண்டிக்கு திங்கட்கிழமை வருகை தந்த ஜெனரல் சரத் பொன்சேகா, தலதா மாளிகைக்குச் சென்று வழிபட்டதுடன், மல்வத்தை மற்றும் அஸ்கிரிய பீடாதிபதிகளையும் சந்தித்து ஆசிகளைப் பெற்றார். இதன் போது பீடாதிபதிகள் தெரிவித்த கருத்துகளுக்குப் பதிலளிக்கையிலேயே ஜெனரல் பொன்சேகா இவ்வாறு தெரிவித்ததுடன் மேலும் கூறுகையில்;

எவர் எதைச் சொன்னாலும் கண்டபடி அகதி முகாம்களிலிருந்து மக்களை உடனடியாக மீள் குடியமர்த்திவிட முடியாது. மக்கள் அங்கு வழமையான அமைதி நிலையில் வாழ்வதற்கான வழிவகைகளை ஏற்படுத்திக் கொடுக்க வேண்டும். அங்கு அங்குலத்திற்கு அங்குலம் நிலக் கண்ணிவெடிகள் புதைக்கப்பட்டுள்ளன. அவற்றை அகற்ற வேண்டும். எஞ்சியுள்ள புலிப் பயங்கரவாதிகள் அகதி முகாம்களில் அகதிகளுடன் கலந்துள்ளனர்.அவர்களும் அங்கிருந்து வெளியேற தருணம் பார்த்துக் கொண்டிருக்கின்றனர்.

எனவே, அனைத்தும் சீர் செய்யப்பட்ட பின்னரே அகதி முகாம்களிலுள்ள மக்கள் உரிய வகையில் மீள் குடியேற்றம் செய்யப்படுவார்களெனத் தெரிவித்தார். வெளிநாடுகளும் பல தரப்பினர்களும் எதனைக் கூறினாலும் நிலக் கண்ணி வெடிகள் அகற்றப்பட்ட பின்னரே அம் மக்கள் பாதுகாப்பாகக் குடியேற்றப்பட வேண்டுமென பௌத்த பீடாதிபதிகளும் தெரிவித்தனர்.

அரூஷாவை தளமாகக்கொண்ட ருவாண்டாவுக்கான சர்வதேச குற்றவியல் நீதிமன்ற வழக்கு விசாரணையில் சட்டத்தரணியாக பணிபுரிந்த ஷியாம் லால் ராஜபக்ஷவின் மரணத்திற்கு அதிகளவு போதைவஸ்து காரணமாக இருக்கலாம் என்று பொலிஸார் சந்தேகிக்கின்றனர். ஷியாம் லால் ராஜபக்ஷ தனது வீட்டில் கடந்த புதன்கிழமை இறந்த நிலையில் கண்டுபிடிக்கப்பட்டிருந்தார்.

ஆரம்பகட்ட பிரேதப் பரிசோதனையின் பிரகாரம் ஷியாம் லால் ராஜபக்ஷ மருந்தைப் பயன்படுத்தியிருந்தமை கண்டுபிடிக்கப்பட்டிருப்பதாக அரூஷாப் பகுதிக்கான பிராந்திய பொலிஸ் தளபதி மாதேய் பசிலியோ “திஸ்டே’க்கு கூறியுள்ளார்.  இரசாயன பகுப்பாய்வுக்காக இறந்தவரின் உடலிலிருந்து எடுக்கப்பட்ட அடையாளங்கள் தார் எஸ் சலாமுக்கு அனுப்பப்பட்டிருப்பதாக அவர் தெரிவித்திருக்கிறார்.

மரணத்திற்கான உண்மையான காரணம் தொடர்பாக சில சர்ச்சைகள் உள்ளன.போதைவஸ்து பயன்படுத்தப்பட்டிருக்கலாம் என்று டாக்டர்கள் கூறியுள்ளனர். உடலிலிருந்த மாதிரிகள் தார் எஸ் சலாமிலுள்ள அரச பிரதம இரசாயனவியலாளருக்கு பகுப்பாய்வு பரிசோதனைகளுக்காக அனுப்பப்பட்டிருப்பதாக பசிலியோ கூறியுள்ளார். பரிசோதனைகளின் இறுதி அறிக்கையானது அவரின் மரணத்திற்கான உண்மையான காரணத்தை வெளியிடும் என்றும் பசிலியோ கூறியுள்ளார்.

பிரேத பரிசோதனையானது ஷியாம் லால் ராஜபக்ஷவின் உறவினர்கள் மற்றும் கென்யாவிலுள்ள இலங்கை உயர்ஸ்தானிகராலய அதிகாரிகள் முன்னிலையில் இடம்பெற்றதாகவும் அவர் தெரிவித்துள்ளார்.  மரணம் சம்பவித்த இரவில் ஷியாம் லால் ராஜபக்ஷவுடன் மது அருந்தியதாக கூறப்படும் ஆட்களை கண்டுபிடிக்க பொலிஸார் நடவடிக்கை எடுத்துள்ளனர்.அவர்களை கண்டுபிடித்தால் அன்றைய தினம் இரவு என்ன நடந்தது என்பது தொடர்பான சில தகவல்களை பெற்றுக்கொள்ள அவர்கள் எமக்கு உதவுவார்கள்.இறந்தவரின் உடலில் காயத்திற்கான அடையாளம் எதுவும் காணப்படவில்லை என்றும் பசிலியோ கூறியுள்ளார்.

1994 ருவாண்டா இனப்படுகொலை குற்றவாளிகள் என்று சந்தேகிக்கப்படுவோரை கண்டு பிடிக்க விசாரணை நடத்தி வரும் சர்வதேச குற்றவியல் நீதிமன்றத்தில் பணியாற்றும் வழக்கறிஞர்களில் ஒருவர் ஷியாம் லால் ராஜபக்ஷவாகும்.  கொழும்பு றோயல் கல்லூரியில் கற்ற ஷியாம் லால் 1999 – 2004 வரை தென்மாகாணசபை உறுப்பினராக இருந்தவராகும்.

பக்கிங்ஹாம் பல்கலைக்கழகத்தில் எல்.எல்.பி.பட்டம் பெற்ற ஷியாம் லால் லண்டன் பல்கலைக்கழகத்தில் எல்.எல்.எம். பட்டத்தைப் பெற்றவராகும்.பிரிட்டிஷ் சட்டத்துறையில் பாரிஸ்டராக இருந்தவர். 1993 – 1999 வரை சட்ட மா அதிபர் திணைக்களத்தில் அரச சட்டத்தரணியாக பணியாற்றியிருந்தார்.

அவரின் மனைவி பிரசாந்தி ஹேக்கிலுள்ள யூகோசிலவாக்கியாவுக்கான ஐ.நா. சர்வதேச குற்றவியல் நீதிமன்ற வழக்கறிஞராக பணியாற்றி வருகிறார். ஷியாம் லால் ராஜபக்ஷ மரணமடைந்த தருணத்தில் போர்க்குற்றங்கள் தொடர்பான அறிக்கையை அவர் பூர்த்தி செய்திருந்ததாக அவரின் தாயார் லலிதா ராஜபக்ஷ கூறியுள்ளார். வீட்டுக்கு திருட வந்த கோஷ்டியால் ஷியாம் லால் கொலை செய்யப்பட்டதாக நம்பப்படுவதாக முதலில் செய்திகள் வெளியாகியிருந்தன.

இவரின் மரணத்திற்கான காரணம் இன்னமும் தீர்மானிக்கப்படவில்லை என்று கென்யாவிலுள்ள இலங்கைத் தூதுவர் ஜே.திஸாநாயக்கா கூறியுள்ளார். மூக்கிலிருந்து இரத்தம் வழிந்ததைத் தவிர இறந்தவரின் உடலில் காயத்திற்கான அடையாளங்கள் இல்லை என்றும் திஸாநாயக்கா கூறியுள்ளார்.

மூன்று வருடங்களுக்கு முன்னர் ஷியாம் லால் இதய சத்திரசிகிச்சை மேற்கொண்டிருந்ததாக தகவல் கிடைத்திருப்பதாகவும் தூதுவர் கூறியுள்ளார்.