அமெரிக்கா, இங்கிலாந்து , ரஷ்யா உள்ளிட்ட வளர்ந்த நாடுகளில் கொரோனாவை கட்டுப்படுத்தும் தடுப்பூசி பயன்பாட்டிற்கு வந்துள்ளது. மேலும் பல நாடுகள் மருந்துகளை கொள்முதல் செய்யத் தொடங்கி உள்ளன.
இந்நிலையில் இஸ்ரேல் நாட்டில் பைசர் தடுப்பூசிக்கு அரசு அங்கீகாரம் அளித்துள்ளது. இதனையடுத்து இஸ்ரேலில் தடுப்பூசி போடும் பணி தொடங்கியது.
தடுப்பூசி போட்டுக்கொண்ட ரமத் கானில் உள்ள ஷேபா மருத்துவ மையத்தில் செய்தியாளர்களிடம் பேசிய நேதன்யாகு, நாட்டில் தடுப்பூசி பயன்பாட்டிற்கு வந்ததை இஸ்ரேலுக்கு மிகச் சிறந்த நாள் என்று பாராட்டினார். மேலும், இந்த மாத இறுதிக்குள் பல லட்சம் டோஸ்கள் மருந்து வர உள்ளதால், மக்கள் அனைவரும் தடுப்பூசி போட்டுக்கொள்ள வேண்டும் என்று கேட்டுக்கொண்டார்.
தனிப்பட்ட முன்மாதிரியாக இருக்கவும், தடுப்பூசி போட உங்களை (மக்களை) ஊக்குவிக்கவும், சுகாதாரத்துறை மந்திரியுடன் இணைந்து நானும் தடுப்பூசி போட்டுக்கொள்ள வேண்டும் என கேட்டு, அதன்படி தடுப்பூசி போட்டுக்கொண்டேன் என்றும் பிரதமர் கூறினார்.
இஸ்ரேலில் இதுவரை 3.72 லட்சம் பேருக்கு கொரோனா பாதிப்பு உறுதி செய்யப்பட்டுள்ளது. கொரோனாவுக்கு 3,070 பேர் பலியாகி உள்ளனர் என்பது குறிப்பிடத்தக்கது.
