16

தமிழ் தேசிய கூட்டமைப்பு தொடங்கிய போது சுமந்திரன் இருக்கவில்லை. ஆகவே அவர் மன்னிக்க வேண்டிய தேவையொன்று கிடையாதென தமிழ்த் தேசியக் கூட்டமைப்பின் பங்காளிக்கட்சியான  புளொட்டின் தலைவரும் நாடாளுமன்ற உறுப்பினருமான தர்மலிங்கம் சித்தார்த்தன் தெரிவித்தார்.

எம்.ஏ.சுமந்திரன், கஜேந்திரகுமார் பொன்னம்பலம் போன்றவர்கள் அண்மைக்காலமாக வெளியிட்டு வந்த கருத்துக்கள் தொடர்பாக கந்தரோடையிலுள்ள அவரது இல்லத்தில் இன்று நடத்திய செய்தியாளர் சந்திப்பிலேயே அவர் இதனை தெரிவித்தார்.

அவர் மேலும் தெரிவிக்கையில்,

ஐ.நா மனித உரிமைகள் பேரவைக்கு தமிழ் தரப்புக்கள் 3 கடிதங்கள் அனுப்பியுள்ளனர். தமிழ் தேசிய கூட்டமைப்பு, தமிழ் மக்கள் தேசிய கூட்டணி ஆகியவற்றின் 5 கட்சிகள் கையெழுத்திட்டு ஒரு கடிதம் அனுப்பினோம். இரா.சம்பந்தன் ஒரு கடிதம் அனுப்பினார். இன்னொரு கடிதமும் அனுப்பப்பட்டது. நாம் அனுப்பிய கடிதத்திற்கும் தமிழ் தேசிய கூட்டமைப்பின் ஒற்றுமைக்குமிடையில் சம்பந்தமில்லை. இரா.சம்பந்தன் அதை கூறியுள்ளார். மற்றைய கட்சிகளின் தலைவர்களான செல்வம் அடைக்கலநாதனும், நானும் அதையே கூறியிருந்தோம். ஆனால், நாடாளுமன்ற உறுப்பினர் எம்.ஏ.சுமந்திரனின் ஆவேசத்திற்குத் தான் என்ன காரணமென்பது தெரியவில்லை. அவர் யாழ்ப்பாணத்தில் செய்தியாளர் சந்திப்பை நடத்தி ஆவேசமாக பேசியிருந்தார். இரா.சம்பந்தன் கடிதம் எழுதுவதை தெரிந்து கொண்டு, அதை மீறி நாம் கையெழுத்திட்டதாகவும் கூறியிருந்தார்.
ஆனால், உண்மையில் அப்படி நடக்கவில்லை. நாங்கள் கையெழுத்திட வேண்டிய ஒரு கடிதமெனில், அதை எழுத தொடங்கும் போதே இரா.சம்பந்தன் எமக்கு தகவல் தந்து விடுவார். ஆனால் இந்த கடித விவகாரத்தில் கடைசிவரை எனக்கு ஒரு தகவலும் தரப்படவில்லை.

எம்மை துரோகிகள், காட்டிக் கொடுத்தவர்கள் என்றும் சுமந்திரன் கூறியிருந்தார். தமிழ் அரசு கட்சியினரும், தமிழ் தேசிய மக்கள் முன்னணியினரும் தேர்தல் காலத்தில் மேடை போட்டு இவற்றைத்தான் கதைத்துக் கொண்டிருப்பார்கள். எனக்கு மக்கள் மத்தியிலிருந்த மதிப்பையும், செல்வாக்கையும் குழப்ப அதை செய்தார்கள் என்பது எனக்கு நன்றாக தெரியும். அது பலனளிக்காது என்பதை தெரிந்ததால் நான் அதை கண்டுகொள்ளாமல் விட்டு விட்டேன். ஆனால் இப்பொழுதும் சுமந்திரனும், கஜேந்திரகுமாரும் மீண்டும் புலிகளின் போர்க்குற்றம் பற்றியும், புளொட் அமைப்பும் விசாரிக்கப்பட வேண்டுமென்றும் கூறியிருக்கிறார்கள்.

சுமந்திரன் தயாரித்த கடிதத்தில், தருஸ்மன் அறிக்கையில் குறிப்பிடப்பட்ட புலிகளும் போர்க்குற்றத்தில் ஈடுபட்ட பகுதி இணைக்கப்பட்டுள்ளது. அது அவர்களின் நிலைப்பாடு. அது வேறு விடயம். ஆனால் நாங்கள் தமிழ் தரப்பாக இருந்து கொண்டு, நாங்களே எங்களை விசாரிக்க கோருவது எவ்வளவு புத்திசாலித்தனம் என எனக்கு தெரியவில்லை.
அடுத்தது, நாங்களே விசாரிக்க கோருவது, நாங்கள் ஏதோ பெரிய குற்றம் செய்து விட்டோம் என நாங்களே ஒத்துக் கொள்வதை போல அமையும்.

எல்லா இயக்கங்களிற்கிடையிலும் ஒருவருக்கொருவர் பல பிரச்சனைகள் இருந்தன. மோதல்களும் நடந்தன. அது உண்மை. அதற்காக எந்த சந்தர்ப்பத்திலும், புலிகளை விசாரியுங்கள் என நான் கூற தயாராக இல்லை. எங்களை விசாரிப்பதென ஒரு நிலை வந்தால், அதற்கு நாம் தயாராக இருக்கிறோம். ஒரு சர்வதேச விசாரணை நடத்த நாம் தயாராக இருக்கிறோம். அப்படியொன்று நடந்தால்தான், நாம் எந்தவித குற்றங்களும் செய்யவில்லை என்பதை நிரூபிக்க முடியும். நாம் சர்வதேச விசாரணையை கோர மாட்டோம் என சுமந்திரன் கூறியிருந்தார். அவருக்கு தெரியாது, நாம் ஏற்கனவே பலமுறை அதை கோரி விட்டோம்.

1994களின் போது நாடாளுமன்றில் பேசும்போது,  விடுதலைப்புலிகளுடன் எமக்கு பிரச்சனைகள் இருந்தாலும், பேச்சுவார்த்தையென வந்தால், அரசாங்கம், விடுதலைப் புலிகளுடன் பேச்சு நடத்த வேண்டுமென பலமுறை கூறியிருக்கிறேன். ஏனெனில், அவர்கள் இல்லாத தீர்வு முழுமையடையாது. எங்களுடன் பேசாவிட்டாலும், புலிகளுடன் பேசி ஒரு தீர்வை நடைமுறைப்படுத்தினால் எமக்கும்  அதில் பிரச்சனை வராது என கூறியிருந்தேன். ஏனெனில், புலிகள் மிகப்பெரியளவிலான அதிகார பரவலாக்கத்தையே கோருவார்கள்.

சுமந்திரனும், கஜேந்திரகுமார் பொன்னம்பலமும் கூறியிருக்கிறார்கள், கே.பி, கருணா, பிள்ளையான் போல புளொட்டையும் விசாரிக்க வேண்டுமென. கே.பி, கருணா, பிள்ளையான் ஆகியோர் விடுதலைப் புலிகளை விட்டு வெளியேறிய பின்னர் நடந்தவற்றிற்கு இவர்கள் விசாரணை கோரவில்லை. அவர்கள் புலிகள் அமைப்பில் இருந்த போது செயற்பட்டமைக்கே இப்பொழுது இருவரும் விசாரணை கோருகிறார்கள்.

கே.பி யுத்தம் முடிந்த பின்னர் கைது செய்யப்பட்டு இலங்கைக்கு கொண்டு வரப்பட்டவர். அவர் அதன் பின்னர் இலங்கையில் கிட்டத்தட்ட வீட்டுக்காவலில் இருக்கிறார். அவருக்கு பாதுகாப்பாக 10-15 இராணுவச் சிப்பாய்கள் உள்ளனர். அவரை விசாரிப்பதெனில் முழுக்க முழுக்க அவர் விடுதலைப் புலிகள் காலத்தில் செயற்பட்டமைக்காகவே விசாரிக்க வேண்டும்.

இதில் இன்னொரு விடயமுள்ளது. அவரை விசாரிப்பதெனில், அவருடன் செயற்பட்ட ஏராளம் புலம்பெயர் தமிழர்கள் உள்ளனர். இந்த விசாரணை வலைப்பின்னல் பெரிதாகிக் கொண்டே போகும். இது அரசாங்கத்தின் நிகழ்ச்சி நிரல். அரசாங்கத்தின் நிலைப்பாட்டை ஒத்ததாகவே இவர்களின் கோரிக்கை உள்ளது. சுமந்திரனும், கஜேந்திரகுமாரும் கூறியதற்கு பின்னர், இப்பொழுது வாசுதேவ நாணயக்காரவும், புலிகள் மீது விசாரணை நடத்த வேண்டுமென கூறியுள்ளார்.

என்னை விசாரிக்க வேண்டுமென கஜேந்திரகுமார் பொன்னம்பலம் கூறுவதில் ஒரு நியாயம் உள்ளது. அவரிடம் எங்களைப்பற்றிய ஒரு ஆதாரமுள்ளது. அவரது தந்தையார் குமார் பொன்னம்பலம் எம்மை தொடர்பு கொண்டு, எந்த தரப்பாலோ தமக்கு உயிராபத்து உள்ளது, அதனால் எமது தோழர்கள் சிலரை அனுப்பி தமது வீட்டுக்கு பாதுகாப்பு தரும்படி கேட்டிருந்தார். எங்கள் தோழர்கள் அவர்களது வீட்டுக்கு பாதுகாப்பு வழங்கினார்கள். அப்பொழுது சிறுவனாக அதையெல்லாம் பார்த்து வளர்ந்தவர் கஜேந்திரகுமார். தனது தந்தையுடன் சேர்ந்து இவர்கள் சட்டவிரோதமாக ஏதோ செய்கிறார்கள் என அப்போது அவருக்கு விளங்கியிருக்கவில்லை, இப்பொழுது விளங்கி, விசாரணை கோருகிறார் என நினக்கிறேன்.

இவர்கள் இருவரும் இப்பொழுது ஏன் இவற்றை கதைக்கிறார்கள் என தெரியவில்லை.அண்மையில் யாழ்ப்பாணத்தில் ஒரு பத்திரிகையில் செய்தி வெளியாகியிருந்தது- “இராணுவத்தின் இறுதி யுத்த வெற்றியில் பங்கு கொண்டாடியவர் சித்தார்த்தன்” என. இதை எழுதியவருக்கோ, சுமந்திரனுக்கோ தெரிந்திருக்குமோ இல்லையோ, யுத்தம் முடிந்த பின்னர் இரா.சம்பந்தன்,மஹிந்த ராஜபக்சவை நாடாளுமன்றத்தில் வைத்து பாராட்டினார். பயங்கரவாதத்தை நீங்கள் கட்டுப்படுத்தி மக்களை விடுவித்திருக்கிறீர்களென. அப்போது சிங்கள எம்.பிக்கள் மேசையில் தட்டி வாழ்த்து தெரிவித்தனர். இதை சம்பந்தன் மேல் குற்றம் சொல்வதற்காக சொல்லவில்லை. இவையெல்லாம் 2010 இற்கு முன்னர் நடந்த விடயங்கள். சுமந்திரன் அரசியலுக்கு வருவதற்கு முன்னர் நடந்தவை. அவருக்கு தெரிந்திருக்க நியாயமில்லை.

அவர் 2010 இற்கு முன்னர் நடந்தவற்றை பேசுவது பிரச்சனையில்லை. அவற்றை படித்து, அறிந்து விட்டு பேசுவதே நல்லது. எம்மை தூண்டி விடுவதற்கே இந்த குற்றச்சாட்டுக்களை இவர்கள் தெரிவிக்கிறார்கள். நாம் இதற்கு சரியாக பதில் சொல்ல முயன்றால், அந்த பதில்கள் எமக்கு எதிராக மட்டுமல்ல, புலிகளிற்கு எதிராகவும் அவை பயன்படுத்தப்படும். ஆகவேதான் எங்களை தூண்டிவிட இருவரும் முயற்சிக்கிறார்களோ என்ற சந்தேகமும் எனக்குண்டு.
எங்களை மன்னித்துத்தான் தமிழ் தேசிய கூட்டமைப்பில் இணைத்ததாக சுமந்திரன் கூறியிருந்தார். தமிழ் தேசிய கூட்டமைப்பு தொடங்கிய போது சுமந்திரன் இருக்கவில்லை. ஆகவே அவர் மன்னிக்க வேண்டிய தேவையொன்று கிடையாது.

ஆனால், இரா.சம்பந்தன் சொல்லியிருக்கிறார்- தான் விடுதலைப் புலிகளின் கொலைப்பட்டியலில் இருந்ததாக.கொலைப்பட்டியலில் இருப்பவர்கள், தண்டிக்கப்பட்டவர்கள் தான் மன்னிக்கப்படுவார்கள். ஆயுத இயக்கங்களை பொறுத்தவரை நாம் மோதலில் ஈடுபட்டோம். பின்னர் சமாதானமாகினோம். அங்கு ஒருவரையொருவர் மன்னிப்பதல்ல. இதுதான் நடந்த விடயம். இவையெல்லாம் சுமந்திரனிற்கு தெரியாமலிருக்கலாம். உண்மையில் தமிழ் அரசு கட்சிதான் மன்னிக்கப்பட்டது.
இதேவேளை, சுமந்திரன் இன்றுவரை மன்னிக்கப்படவில்லை. சுமந்திரனிற்கு தாக்குதல் நடத்த முயன்றதாக கூறி, சுமந்திரனின் பெயராலேயே இளைஞர்கள் இன்றும் சிறைகளில் உள்ளனர். சுமந்திரனின் பாசையில் சொல்வதென்றால், சுமந்திரன் காட்டிக் கொடுத்து இன்றும்  இளைஞர்கள் சிறைகளில் உள்ளனர். இதுதான் உண்மை.
அந்த நேரத்தில் விடயம் அறிந்தவர்களிற்கு தெரியும் “எமக்கும், புலிகளிற்கும், ஆயுத இயக்கங்களிற்கிடையில் மோதலில் என்ன நடந்ததென்பது”. இது தெரியாமல் மக்களில்லை. இவர்கள் எத்தனை தரம் திரும்பத்திரும்ப சொன்னாலும், ஆயுத இயக்கங்களை குறைகூறுவதில் பயனில்லையென்பது நன்றாக தெரியும்.

இங்கு மாத்திரமல்ல, சர்வதேச ரீதியாகவும் இதுதான் நடந்தது. ஆயுத இயக்கங்களிற்கிடையில் மோதல் வரும். பின்னர் இணக்கத்திற்கு வருவார்கள். பலஸ்தீனத்தில் இதை பலமுறை நேரிலேயே பார்த்திருக்கிறேன்.
இதைவிட, நாங்களும் குற்றம் செய்தோம் என சொன்னால்தான், சர்வதேச சமூகம் எம்மை நடுநிலையானவர்கள் என நினைக்குமென்ற விடயம் எனக்கு விளங்கவில்லை. உலகத்தில் போராடிய எந்த இனமும் அப்படி சொன்னதில்லை. நான் குற்றம் செய்து விட்டேன், அவையும் செய்தவை, ஒரு மாதிரி பார்த்து இரண்டு பேரையும் விசாரியுங்கள் என சொல்லும் ஒரு விடயம் நடந்ததாக நான் இன்று வரை கேள்விப்படவில்லை.
ஆனால், இங்கு சுமந்திரன் கூறுகிறார்.  அவர் எங்களை விசாரியுங்கள் என தன்னை விசாரிக்கக் கோரவில்லை. புலிகளை விசாரிக்கவே கோருகிறார் என்றார்.

ஐரோப்பிய ஒன்றியத்தின் குழு ஒன்று இலங்கைக்கு உத்தியோகபூர்வ விஜயம் மேற்கொள்ளவுள்ளதாகத் தெரிவிக்கப்பட்டுள்ளது.

GSP+ சலுகை தொடர்பில் கலந்துரையாடுவதற்காகவே குறித்த குழு இலங்கை வரவுள்ளதாக வெளிநாட்டுத்துறை அமைச்சின் செயலாளர், பேராசிரியர் ஜயநாத் கொலம்பகே தெரிவித்துள்ளார்.

அதற்கமைய எதிர்வரும் 27 ஆம் திகதி குறித்த குழு இலங்கையை வந்தடையவுள்ளதாகவும் தெரிவிக்கப்படுகின்றது.

ஐரோப்பிய ஒன்றியத்தினால் இலங்கைக்கு 2015ஆம் ஆண்டில் மீள வழங்கப்பட்டுள்ள ஜி.எஸ்.பி வரிச்சலுகை மீண்டும் இரத்து செய்யப்படும் அபாயம் ஏற்பட்டுள்ள நிலையில், அதுகுறித்து பேச்சு நடத்த ஐரோப்பிய ஒன்றியத்தின் விசேடக் குழு இலங்கைக்கு விஜயம் செய்யவுள்ளதாக தெரிகிறது.

மிகநீண்டகாலமாக தமிழர் பிரச்சினை தொடர்பில் எதுவித மாற்றங்களும் முறையாக ஏற்பட்டிராத சூழலில் இந்த ஐரோப்பிய ஒன்றியத்தின் குழுவினரின் வருகையை சரியாக தமிழ்தலைவர்கள் பயன்படுதட்துவார்களா என்பதை பொறுத்திருந்து பாரப்போம்.

“வெலிக்கடை சம்பவம் மற்றும் மஹர சம்பவம் தொடர்பாக குற்றம் சாட்டப்பட்ட கைதிகளின் சார்பாக தற்போதைய அரசாங்கம் மனிதாபிமானமற்ற கட்டாயக் கொள்கையை பின்பற்றுகிறது.“ என ஜேவிபி பொதுச் செயலாளர் ரில்வின் சில்வா தெரிவித்தார்.

இது தொடர்பில் மேலும் பேசிய அவர் ,

கைதியை மிரட்டிய சம்பவம் தொடர்பில் சிறைச்சாலை முகாமைத்துவம் மற்றும் மறுவாழ்வு இராஜாங்க அமைச்சர் லொஹான் ரத்வத்தவின் பதவி விலகல் மட்டும் போதாது.  அவர் மீது சுமத்தப்பட்டுள்ள குற்றச்சாட்டுகள் குறித்து அரசு முறையாக விசாரணை நடத்தி சட்டத்தை அமுல்படுத்த வேண்டும்.

இந்த சம்பவம் தொடர்பாக உள்ளூர் மற்றும் சர்வதேச அளவில் எழுந்த எதிர்ப்பைத் தவிர்ப்பதற்காகவே அவர் பதவி விலக்கல் செய்யப்பட்டுள்ளார். பிரச்சினையைத் தவிர்ப்பதற்காக ஒரு ராஜினாமா செய்யப்பட்டால், அது விசாரணையின் திசையில் சரியான நடவடிக்கை அல்ல.

முன்னாள் இராஜாங்க அமைச்சர் குற்றவியல் வற்புறுத்தல் மற்றும் மிரட்டல் ஆகியவற்றை தெளிவாக செய்துள்ளார். ராஜினாமாவின் போது அவர் மீது சுமத்தப்பட்ட குற்றச்சாட்டுகள் ஏற்றுக்கொள்ளப்பட்டுள்ளது. எனவே இந்த சம்பவத்தை ராஜினாமா செய்து அரசு விடுவிக்க முடியாது.

வெலிக்கடை சம்பவம் மற்றும் மஹர சம்பவம் தொடர்பாக குற்றம் சாட்டப்பட்ட கைதிகளின் சார்பாக தற்போதைய அரசாங்கம் மனிதாபிமானமற்ற கட்டாயக் கொள்கையை பின்பற்றுகிறது என்பதை இந்த நிகழ்வுகளின் சங்கிலி நிரூபிக்கிறது என அவர் மேலும் தெரிவித்துள்ளார்.

க.பொ.த உயர்தர பரீட்சைக்கு 2 ஆயிரத்து 922 விண்ணப்பங்கள் மட்டுமே கிடைத்துள்ளதாக கல்வியமைச்சு தெரிவித்துள்ளது.

அத்துடன், தரம் 5 புலமைப்பரிசில் பரீட்சைக்கு தோற்ற 6 ஆயிரத்து 589 விண்ணப்பங்கள் மட்டுமே கிடைக்கப்பெற்றுள்ளதாகவும் கல்வியமைச்சு குறிப்பிட்டுள்ளது.

இரண்டு பரீட்சைகளுக்குமான விண்ணப்ப முடிவுத்திகதி செப்டம்பர் 15ஆம் திகதி (நேற்று) என அறிவிக்கப்பட்டிருந்தது.

இதேவேளை, பாடசாலை விண்ணப்பதாரர்கள் தங்கள் விண்ணப்பங்களை அதிபர்கள் மூலம் கல்வி அமைச்சிற்கு அனுப்ப வேண்டும் என்று அறிவிக்கப்பட்டுள்ளது.

எவ்வாறாயினும், தற்போது சம்பள முரண்பாடுகள் காரணமாக வேலைநிறுத்தத்தில் ஈடுபட்டுள்ள முதன்மை தொழிற்சங்கங்கள் உயர்தர மாணவர்களின் விண்ணப்பங்களை அங்கீகரிக்கப் போவதில்லை என அறிவித்திருந்தன.

இந்த நிலையில், கல்வியமைச்சில் சமர்ப்பிக்கப்பட்ட விண்ணப்பங்களின் எண்ணிக்கை குறைவாக உள்ளதாக தெரிவிக்கப்படுகின்றது.

2020ஆம் ஆண்டில் உலகெங்கிலும் காடுகள், இயற்கை வளங்கள் போன்றவற்றைப் பாதுகாக்கும் முயற்சியில் ஈடுபட்டிருந்தபோது  சுமார்  227 பேர்  உயிரிழந்துள்ளதாக ‘கிளோபல் விட்னஸ்’ எனும் மனித உரிமைக் குழு நடத்திய ஆய்வின் ஊடாக கண்டறியப்பட்டுள்ளது.

கொலம்பியாவில் பழங்குடியினருக்குச் சொந்தமான நிலம், காடுகள் அல்லது கோக்கோ பயிர்களை அழிவிலிருந்து காப்பாற்ற முயன்ற சுமார் 65 பேர் உயிரிழந்துள்ளனர்.

அதுபோன்ற காரணத்துக்காக உலகில் மிக அதிகமானோர் கொலம்பியாவில் உயிரிழந்துள்ளதாகவும் குறிப்பிடப்படுகின்றது. அதற்கு இரண்டாம் நிலையில் மெக்சிகோ உள்ளது. அங்கு 30 பேர், காடுகளைப் பாதுகாக்கும் முயற்சியில் ஈடுபட்டபோது உயிரிழந்துள்ளனர்.

பிலிப்பைன்ஸில் 29 பேர் இவ்வாறு உயிரிழந்துள்ளனர். அவர்கள் சுரங்கவேலைகள், மரம் வெட்டுதல், அணை கட்டும் திட்டம் ஆகியவற்றை நிறுத்தும் முயற்சியின்போது உயிரிழந்திருக்கலாம் என நம்பப்படுகிறது.

கால நிலை மாற்றம் தொடர்பான பாரிஸ் உடன்படிக்கை 2015 ஆம் ஆண்டு கைச்சாத்தானது தொடக்கம் ஒவ்வொரு வாரமும் சராசரியாக நான்கு இயற்கை ஆர்வலர்கள் உயிரிழந்துள்ளதாக குறிப்பிடப்படுகின்றது.

கொழும்பு – நாரஹேன்பிட்டியிலுள்ள தனியார் வைத்தியசாலை ஒன்றின் கழிவறையிலிருந்து கைக்குண்டு மீட்கப்பட்ட சம்பவம் தொடர்பிலான விசாரணைகளில் சந்தேக நபர் ஒருவர் கைது செய்யப்பட்டுள்ளார்.

நாரஹேன்பிட்டி பொலிஸர், கொழும்பு தெற்கு குற்ற விசாரணை பிரிவு ஆகியவற்றுடன் இணைந்து கொழும்பு குற்றத் தடுப்புப் பிரிவினர் முன்னெடுத்த விசாரணைகளில் சந்தேக நபர் கைது செய்யப்பட்டுள்ளார்.

கைது செய்யப்பட்டவர், திருகோணமலையைச் சேர்ந்தவர் எனவும், அவரே குண்டு தொடர்பில் முதல் தகவலை அளித்துள்ளதாகவும் தெரிவித்த பொலிஸார், முன்னெடுத்த விசாரணைகளில் அவரே குண்டை குறித்த இடத்துக்கு எடுத்து வந்தமை தொடர்பில் தகவல்கள் வெளிப்படுத்தப்பட்டுள்ளதாக தெரிவித்தனர்.

நிர்மாண நடவடிக்கைகளை முன்னெடுக்கும் நிறுவனம் ஒன்றின் ஊழியரான சந்தேக நபர், குறித்த வைத்தியசாலையில் முன்னெடுக்கப்படும் நிர்மாண பணிகளுக்காக அங்கு கடந்த 12 நாட்களுக்கு முன்னர் வேலைக்கு வந்தவர் என விசாரணையில் தெரிய வந்துள்ளது.

இந்நிலையில் குறித்த நபர் குண்டை எடுத்து வந்த நோக்கம் தொடர்பில் விசேட விசாரணைகள் கொழும்பு குற்றத் தடுப்புப் பிரிவின் சிறப்புக் குழுவினரால் ஆரம்பிக்கப்பட்டுள்ளன.

முன்னதாக குறித்த வைத்தியசாலையின் முதலாம் மாடியிலுள்ள கழிவறை ஒன்றில் வெளிப்புறத்துக்கு தெளிவாக தெரியும் வண்ணம் வைக்கப்பட்டிருந்த நிலையில் நேற்று முன்தினம் (14) இந்த குண்டு மீட்கப்பட்டமை குறிப்பிடத்தக்கது.

அநுராதபுரம் சிறைச்சாலையில் தடுத்து வைக்கப்பட்டுள்ள தமிழ் அரசியல் கைதிகளை அமைச்சர் நாமல் ராஜபக்ஷ இன்று(வியாழக்கிழமை) சந்தித்து பேசவுள்ளதாக தகவல்கள் வெளியாகியுள்ளன.

வெலிக்கடை சிறைச்சாலைக்குள் பிரவேசித்து குழப்பத்தை விளைவிக்கும் வகையில் செயற்பட்டதாகக் கூறப்படும் இராஜாங்க அமைச்சரொருவர், கடந்த 12ஆம் திகதி அனுராதபுரம் சிறைச்சாலைக்குள் தனது பாதுகாவலர்கள் மற்றும் துப்பாக்கியுடன் உள்நுழைந்திருந்ததாக தகவல்கள் வெளியாகியிருந்தன.

அத்துடன், சிறைச்சாலைக்குள் உள்நுழைந்த சந்தர்ப்பத்தில் குறித்த இராஜாங்க அமைச்சர் மதுபோதையில் காணப்பட்டதாகவும் கூறப்படுகின்றது.

குறித்த இராஜாங்க அமைச்சர் சிறைச்சாலையில் தடுத்து வைக்கப்பட்டுள்ள தமிழ் அரசியல் கைதிகள் 8 பேரில் 2 பேரை வெளியே அழைத்து முழந்தாளிடச் செய்து, தலையில் துப்பாக்கியை வைத்து மிரட்டியுள்ளதாகவும் குறிப்பிடப்பட்டுள்ளது.

இந்த நிலையில், சிறைச்சாலைகள் முகாமைத்துவம் மற்றும் சிறைக்கைதிகள் புனர்வாழ்வு நடவடிக்கைகள் இராஜாங்க அமைச்சு பதவியில் இருந்து லொஹான் ரத்வத்த நேற்று விலயிருந்தார்.

இதேவேளை, குறித்த சம்பவம் தொடர்பில் அனுராதபுரம் சிறைச்சாலையில் தடுத்து வைக்கப்பட்டுள்ள தமிழ் அரசியல் கைதிகளை அமைச்சர் நாமல் ராஜபக்ஷவிற்கு எழுத்து மூலம் தெரியப்படுத்தியுள்ளதாக குறிப்பிடப்பட்டுள்ளது.

அத்துடன், தாம் எதிர்கொண்டுள்ள பாதுகாப்பின்மை தொடர்பில் தௌிவுபடுத்துவதற்கு நாமல் ராஜபக்ஷவுடன் அவசர சந்திப்பொன்றை மேற்கொள்ளவேண்டும் எனவும் அவர்கள் தெரிவித்துள்ளதாக சுட்டிக்காட்டப்பட்டுள்ளது.

இதற்கமைய, அநுராதபுரம் சிறைச்சாலையில் தடுத்து வைக்கப்பட்டுள்ள தமிழ் அரசியல் கைதிகளை அமைச்சர் நாமல் ராஜபக்ஷ இன்று சந்தித்து பேசவுள்ளதாக தகவல்கள் வெளியாகியுள்ளன.

அரசாங்கத்தை சங்கடப்படுத்த விரும்பாத காரணத்தாலேயே தானாக முன்வந்து ராஜினாமா செய்ததாக சிறைச்சாலைகள் மறுசீரமைப்பு மற்றும் சிறை மறுவாழ்வு இராஜாங்க அமைச்சர் லொகன் ரத்வத்த தெரிவித்துள்ளார்.

சிறைச்சாலை தன்னிடம் ஒப்படைக்கப்பட்டபோது, ​​அது ஒரு பெரிய நெருப்புக் குவியலாக இருந்ததாகவும், குறுகிய காலத்தில் தீயை அணைத்து, சிறையை ஒரு நிலையான இடத்திற்கு கொண்டு வர முடிந்தது என்றும் அவர் கூறினார். எனவே, தான் இராஜாங்க அமைச்சர் பதவியில் இருந்து ராஜினாமா செய்வதில் மகிழ்ச்சி அடைவதாகவும் தெரிவித்தார்.

தன்னைப் பற்றி வெளியான சில ஊடக அறிக்கைகளால் அரசுக்கு சங்கடமாக இருக்கும் என்று கருதியதால் அவர் தானாக முன்வந்து இராஜாங்க அமைச்சர் பதவியை ராஜினாமா செய்த போதிலும், அவர் தொடர்ந்து மாணிக்கம் மற்றும் மாணிக்கம் தொழில்துறை இராஜாங்க அமைச்சர் பதவியை வகிப்பார் என குறிப்பிட்டார் .

ஜனாதிபதி தன்னை நம்பி சிறை அமைச்சகத்தை தன்னிடம் ஒப்படைத்ததற்காக இதயத்தின் அடிப்பகுதியில் இருந்து நன்றி தெரிவித்தார். தான் அமைச்சராக இருந்த காலத்தில் தனக்கு ஆதரவளித்த அனைத்து அதிகாரிகளுக்கும் மற்றவர்களுக்கும் நன்றி தெரிவித்தார்.

“தற்போது மனித உரிமை பேரவை தனது பொதுக் கொள்கைக்கு அப்பாற்பட்டு செயற்படுகிறது. ” என நீர்வழங்கல்துறை அமைச்சர் வாசுதேவ நாணயக்கார ஆதங்கம் வெளியிட்டுள்ளார்.

ஐக்கிய நாடுகள் மனித உரிமைகள் பேரவையின் ஆணையாளரின் அறிக்கை தொடாபில் மேலும் தெரிவிக்கையில், .

ஐக்கிய நாடுகள் மனித உரிமைகள் பேரவையில் சோடிக்கப்பட்ட குற்றச்சாட்டுக்களை அடிப்படையாகக் கொண்டு இலங்கை தொடர்பில் விவாதம் ஒவ்வொரு முறையும் இடம்பெறுகிறது. இராணுவத்தினர் தொடர்பில் அதிக கவனம் செலுத்தும் ஐக்கிய நாடுகள் மனித உரிமைகள் பேரவையின் ஆணையாளர் விடுதலைப் புலிகள் அமைப்பினரால் முன்னெடுக்கப்பட்ட மனித உரிமை மீறல் குற்றங்கள் குறித்து கவனம் செலுத்தவில்லை. இலங்கை விவகாரத்தில் ஐ.நா.மனித உரிமைகள் பேரவை ஒருதலைப்பட்சமாக செயற்படுகின்றமை பல விடயங்கள் ஊடாக வெளிப்பட்டுள்ளன.

ஐ.நா. மனித உரிமை பேரவையின் தீர்மானங்கள் நடுநிலையானதாக காணப்பட வேண்டும். ஆனால் தற்போது மனித உரிமை பேரவை தனது பொதுக் கொள்கைக்கு அப்பாற்பட்டு செயற்படுகிறது. 30 வருட கால யுத்தம் ஒரு இனத்திற்கு மாத்திரம் பாதிப்பை ஏற்படுத்தவில்லை. இலங்கை மக்கள் அனைவருக்கும் பல்வேறு வழிமுறையில் பாதிப்பை ஏற்படுத்தியது.

விடுதலைப் புலிகள் அமைப்பினை பெரும்பாலான தமிழ் மக்கள் ஏற்றுக் கொள்ளவில்லை. விடுதலைப் புலிகள் அமைப்பினரால் பாதிக்கப்பட்ட மக்களை பாதுகாக்க வேண்டிய பொறுப்பு அரசாங்கத்திற்கு உண்டு. இறுதிக்கட்ட யுத்தத்தில் மனித உரிமை மீறல் குற்றங்கள் இடம்பெற்றதாக குற்றஞ்சாட்டுபவர்கள் இலங்கையில் வாழ்பவர்கள் அல்ல. புலம் பெயர் அமைப்புக்கள் தங்களின் சுய தேவைக்காக ஐக்கிய நாடுகள் மனித உரிமை பேரவையை சாதகமாக பயன்படுத்திக்கொள்கிறார்கள்.

யுத்தத்தின் பின்னர் வடக்கு மற்றும் கிழக்கு மாகாணங்களில் முன்னெடுக்கப்பட்ட துரிதகர அபிவிருத்தி குறித்து இவர்கள் கருத்துரைப்பதில்லை. இராணுவத்தினர் தொடர்பில் அதிக கவனம் செலுத்தும் ஐக்கிய நாடுகள் மனித உரிமை பேரவையின் ஆணையாளர் விடுதலைப் புலிகள் அமைப்பினரால் முன்னெடுக்கப்பட்ட மனித உரிமை மீறல் குற்றங்கள் குறித்து கவனம் செலுத்தவில்லை.

யுத்தம் நிறைவுப் பெற்றதன் பின்னர் சுதந்திரம் உறுதிப்படுத்தப்பட்டுள்ளது. ஒரு தரப்பினரால் இடம்பெற்ற குற்றங்களை அரசாங்கத்தின் சர்வாதிகார போக்கு என கருத முடியாது எனவும் குறிப்பிட்டுள்ளார்.