20

கொரோனா வைரஸுக்கு எதிரான தடுப்பு மருந்தை இலங்கையில் உற்பத்தி செய்வதற்கு அமைச்சரவை அனுமதியளித்துள்ளது.

விசேட அமைச்சரவை கூட்டத்தில் இதற்கான அமைச்சரவை பத்திரத்தை சுகாதார அமைச்சர் பவித்ரா வன்னியாரச்சி முன்வைத்த நிலையில், இதற்கான அனுமதி வழங்கப்பட்டுள்ளது.

அரச மருந்தாக்க கூட்டுத்தாபனமும் சிநோவெக் பயோடெக் மற்றும் கெலுன் லைஃப் சயன்ஸ் தனியார் கம்பெனியும் இணைந்து கொரோனா தடுப்பு மருந்தை இலங்கையில் உற்பத்தி செய்வது தொடர்பில் யோசனை முன்வைக்கப்பட்டுள்ளது.

“பெரும்பான்மை பௌத்தவாதிகள் ஈழத்தைப் பற்றி பேசிக் கொண்டிருக்கும் தருணத்தில் சீலம் எனும் சீனாவுக்கு உரிய நாடு ஒன்று இலங்கையில் உருவாகியுள்ளது.” என தமிழ்த் தேசிய கூட்டமைப்பின் நாடாளுமன்ற உறுப்பினர் எம்.ஏ.சுமந்திரன் தெரிவித்துள்ளார்.

நாடாளுமன்றத்தில் இன்று(20.05.2021)  இடம்பெற்ற துறைமுக நகர பொருளாதார ஆணைக்குழு சட்டமூலத்தின் மீதான விவாதத்தில் உரையாற்றிய போதே அவர் மேற்கண்டவாறு கூறினார்.

இதன்போது மேலும் உரையாற்றிய அவர்,

இலங்கையர் சீனாவிற்கு வரி கட்டும் நிலையும் உருவாகியுள்ளது. துறைமுக நகரத்திற்குள்ள நுழைய வேண்டும் என்றால் உங்களிடம் அதற்கான அனுமதிப் பத்திரம் கோரப்படும். இது இந்த சட்டமூலத்தில் இருக்கின்றது.

இதேவேளை இந்த ஆணைக்குழு எமது குடிவரவு மற்றும் குடியகல்வு அதிகாரத்தைப் பெறுகின்றது. எல்லைக் கட்டுப்பாட்டை ஆணைக்குழுக்கு கிடைக்கின்றது. இலங்கையைச் சேர்ந்தவர்கள் குறித்த நகரத்திற்குள் உள்நுழையலாம் ஆனால் வெளியில் வரும் போது வரி செலுத்த வேண்டும். இதுவும் சட்டமூலத்தில் இருக்கின்றது.

நீங்கள் ஈழத்தைப் பற்றி கதைத்துக் கொண்டிருக்க சீலம் இலங்கையில் உருவாகி வருகின்றது. இது சீனம். இது சீலம் உங்கள் நிலத்தை உங்கள் நீரை பரிசாக சீனாக்கு வழங்கியுள்ளீர்கள். ஆனால் இதற்கான பாதிப்புக்களை மிகவிரைவில் சந்திப்பீர்கள் என்றார்.

கொழும்பு துறைமுக நகர பொருளாதார ஆணைக்குழு சட்டமூலம் கடந்த ஏப்ரல் மாதம் 8ஆம் திகதி நாடாளுமன்றில் சமர்பிக்கப்பட்டது. குறித்த சட்டமூலம் தொடர்பான விவாதம் நேற்றும் இன்றும் நடைபெற்றிருந்த நிலையில், 89 மேலதிக வாக்குகளால் குறித்த சட்டமூலம் நிறைவேற்றப்பட்டமை குறிப்பிடத்தக்கது.

இலங்கையின் புதிய சட்டமா அதிபராக சஞ்சய் ராஜரத்தினத்தை நியமிக்க நாடாளுமன்ற தெரிவுக்குழு ஒப்புதல் அளித்துள்ளது.

ஜனாதிபதி கோட்டபய ராஜபக்ஷவின் முன்மொழிவை ஏற்று நாடாளுமன்றத் தெரிவுக்குழு இந்த ஒப்புதலை அளித்துள்ளதாக வெளியிடப்பட்டுள்ள அறிக்கையில் தெரிவிக்கப்பட்டுள்ளது.

கடந்த 2019, மே 10இல் சட்டமா அதிபராகப் பொறுப்பேற்ற ஜெனரல் தப்புல டி லிவேராவின் உத்தியோகபூர்வ பதவிக்காலம் இன்றுடன் நிறைவடைந்துள்ளது.

இந்நிலையில், பதில் மன்றாடியார் நாயகம், ஜனாதிபதி சட்டத்தரணி சஞ்சய் ராஜரத்தினம் சட்டமா அதிபராகப் பொறுப்பேற்கவுள்ளதாக தெரிவிக்கப்பட்டுள்ளது.

இதன்படி, சோசலிசக் குடியரசாக அறிவிக்கப்பட்டதற்குப் பின்னர் இலங்கையின் சட்டமா அதிபராகப் பொறுப்பேற்கவுள்ள மூன்றாவது தமிழரும் நான்காவது சிறுபான்மையினராகவும் சஞ்சய் ராஜரத்தினம் உள்ளார் என்பது குறிப்பிடத்தக்கது.

கொழும்பு துறைமுக நகர பொருளாதார ஆணைக்குழு சட்டமூலம் 89 மேலதிக வாக்குகளால் நிறைவேற்றப்பட்டது.

அதன்படி, இந்த சட்டமூலத்திற்கு ஆதரவாக 148 பேரும் எதிராக 59 பேரும் வாக்களித்திருந்தனர்.

கொழும்பு துறைமுக நகர பொருளாதார ஆணைக்குழு சட்டமூலம் கடந்த ஏப்ரல் மாதம் 8ஆம் திகதி நாடாளுமன்றில் சமர்பிக்கப்பட்டது. குறித்த சட்டமூலம் தொடர்பான விவாதம் நேற்றும் இன்றும் நடைபெற்றிருந்த நிலையில், 89 மேலதிக வாக்குகளால் குறித்த சட்டமூலம் நிறைவேற்றப்பட்டமை குறிப்பிடத்தக்கது.

இவ்வாண்டுக்கான கல்விப் பொதுத்தராதர சாதாரணதர மற்றும் உயர்தரப் பரீட்சைகளை மீண்டும் பிற்போடுவதற்கு தீர்மானிக்கப்பட்டுள்ளதாக வெளியாகும் தகவல் உண்மைக்கு புறம்பானது என கல்வி அமைச்சு அறிவித்துள்ளது.

கல்வி அமைச்சின் செயலாளர் இதனை எமது செய்தி பிரிவுக்கு உறுதிப்படுத்தினார்.

2021ஆம் ஆண்டுக்கான கல்விப் பொதுத்தராதர உயர்தரப் பரீட்சை இந்த ஆண்டு ஒக்டோபர் மாதம் 4ஆம் திகதி முதல் 30ஆம் திகதி வரையில் நடத்துவதற்கு தீர்மானிக்கப்பட்டுள்ளது.

5ஆம் தரப் புலமைப்பரிசில் பரீட்சையை ஒக்டோபர் மாதம் 3ம் திகதி நடத்துவதற்கு தீர்மானிக்கப்பட்டுள்ளது.

அத்துடன் 2021ஆம் ஆண்டுக்கான கல்விப்பொதுத் தராதர சாதாரண தரப் பரீட்சையை அடுத்த ஆண்டு ஜனவரி மாதத்தில் நடத்துவதற்கு தீர்மானிக்கப்பட்டுள்ளதாக கல்வி அமைச்சு அறிவித்துள்ளது.

“தமிழ் தேசியம் பேசுவதை நீங்கள் பேசிக் கொண்டே தான் இருக்கின்றீர்கள். இந்த அறுபது வருடகாலமாக அதைத்தான் பேசிக் கொண்டிருக்கிறீர்கள்.” என நாடாளுமன்ற உறுப்பினர் சிவநேசதுரை சந்திரகாந்தன் இன்றைய தினம் நாடாளுமன்றில் தெரிவித்துள்ளார்.

அங்கு தொடர்ந்தும் கருத்துத் தெரிவித்த அவர்,

சபையில் நான் இல்லாவிட்டாலும் கூட எங்களைப்பற்றி புலிகள் என்றும் சிங்கங்கள் என்றும் பறவைகள் என்றும் கூறக் கூடிய பல உறுப்பினர்களை நான் பார்த்தேன். அந்த நேரத்தில் நான் சபையில் அமர்ந்திருக்கவில்லை இருந்தாலும் குறிப்பாக தம்பி சாணக்கியன் அவரை குறை சொல்லவில்லை என்னுடைய அரசியல் பொது வாழ்க்கையும் அவருடைய வயதும் ஒன்று.

இது எல்லோரும் சிந்திக்க மறந்த விடயம் தான், நாங்கள் வன்முறை புலிகளாக இருக்கவில்லை வன்முறையை கைவிட்டு புலிகளில் இருந்து பிரிந்து வந்ததென்று இந்த உலகம் அறிந்தது.  இந்த நாடாளுமன்றம் வரைக்கும் தெரியும். இருந்தாலும் நான் பயப்பட வேண்டிய தேவை கிடையாது. தமிழ் மக்கள் விடுதலைப்புலிகள் கட்சியின் தலைவர் என்ற அடிப்படையிலேயே நான் இவ்விடத்தில் பேசிக் கொண்டிருக்கின்றேன்.

தயவுசெய்து எங்களை பழிவாங்க வேண்டும் என்று நினைத்து எங்களை கீழ்த்தரமாக பேசுகின்ற நடவடிக்கைகளை இந்த நாடாளுமன்றத்தில் முன்னெடுக்க வேண்டாம். இந்த நாட்டினுடைய பொருளாதார வளர்ச்சியில் மிக பின்னடைவு ஏற்பட்டு கொண்டிருக்கின்ற பொழுது இவ்வாறான ஆணைக் குழுக்களை நியமித்து பொருளாதாரத்தை கட்டியெழுப்ப வேண்டிய பொறுப்பு இருக்கின்ற காரணத்தினால் பொதுஜன பெரமுன கட்சியின் ஒரு பங்காளி கட்சி என்ற ரீதியில் நாங்கள் இந்த வாக்கெடுப்புக்கு ஆதரவாக வாக்களிக்க இருக்கின்றோம்.

என்னுடைய மாவட்டத்திலும் பல தேவைகள் பல பொருளாதார பிரச்சினைகள் இருக்கின்ற காரணத்தினால் நாட்டினுடைய ஒட்டுமொத்த பொருளாதாரத்தைக் கட்டியெழுப்ப முடியா விட்டால் எங்களாலும் எதுவும் செய்ய இயலாத நிலை உருவாகும். குறிப்பாக எதிர்க்கட்சி என்ற வகையில் இந்த நாட்டில் ஏற்பட்டுள்ள பொருளாதார பிரச்சனைகள் உலகத்தில் உள்ள கொரோனா பிரச்சினைகளை முன் வைத்து எங்களை தோற்கடிக்க முடியும் என்ற ரீதியில் செயற்பட்டு வருகின்றனர்.

அரசாங்கம் என்ற வகையிலே உயர் நீதிமன்றத்தில் வழங்கப்பட்ட தீர்ப்பின் ஊடாக நிச்சயமாக அதை நாங்கள் நிறைவேற்ற போகின்றோம். இன்று எதிர்க்கட்சியினர் ஏப்ரல் குண்டு தாக்குதல் சம்பந்தமாக முன்வைக்கப்பட்ட பிரச்சினைகளை மையப்படுத்தி கைதுகள் இடம்பெறுகின்ற பொழுது ஏதோ ஒரு அரசியல் பழிவாங்கல் பிரச்சினையாக அதை முன்வைத்து அரசாங்கத்துக்கு சேறு பூசுகின்ற நடவடிக்கையில் ஈடுபடுகின்றனர்.

நல்லாட்சி அரசாங்கம் என்று கூறிக்கொண்டு வந்தவர்கள் பயங்கரவாத தடைச்சட்டத்தை எனக்குத்தான் முதலில் பிரயோசனப்படுத்தினார்கள். அதை இன்று மறந்துவிட்டு இன்று அதை பார்த்து கைதட்டி சிரித்தவர்கள் அல்லது அவர்களுக்கு கஷ்டம் வராமல் எதிரிகளுக்கு கஷ்டம் வருகின்ற பொழுது பங்கரவாத தடை சட்டத்தை வைத்து எங்களை அழிக்க வேண்டும் என்று நினைத்தவர்கள் இன்று கூச்சல் இடுவதைப் பார்த்து நான் வேதனை அடைகின்றேன்.

என்னையும் சுமார் 65 நாட்கள் புலனாய்வுத்துறையினர் அடைத்து வைத்திருந்தார்கள் படுக்க பாய் இல்லை எனது தாய் தந்தையரை கூட வீட்டில் அடைத்து வைத்திருந்தார்கள். இதையெல்லாம் மறந்துவிட்டு இன்று பயங்கரவாத தடை சட்டம் தொடர்பாக பேசுவது ஒரு வேடிக்கையான விடயமாக தான் இருக்கின்றது.

குறிப்பாக தமிழ் தேசியவாதிகள் நீங்கள் சொல்லுங்கள் நீங்கள் நான்கு வருடங்களில் என்ன செய்தீர்கள். பங்கரவாத தடை சட்டத்தை மாற்றுவதற்கு எந்த விதமான நடவடிக்கையும் எடுக்கப்படவில்லை. எதிரிகளை அழிப்பதற்கு எடுத்த நடவடிக்கையே தவிர மக்களை கட்டியெழுப்புவதற்கு எதுவும் எடுக்கவில்லை. தமிழ் தேசியம் பேசுவதை நீங்கள் பேசிக் கொண்டே தான் இருக்கின்றீர்கள். இந்த அறுபது வருடகாலமாக அதைத்தான் பேசிக் கொண்டிருக்கிறீர்கள் எனவும் அவர் தெரிவித்துள்ளார்.

தமிழ் அரசியல் கைதிகளின் விடுதலை தொடர்பாக அமைச்சர் தினேஸ் குணவர்த்தனவை சந்திந்து தமிழ் அரசியல் கட்சிகளின் நாடாளுமன்ற உறுப்பினர்கள் கலந்துரையாடியுள்ளனர்.

இந்த சந்திப்பு நாடாளுமன்ற கட்டடத் தொகுதியில் இன்று (20.05.2021) இடம்பெற்றதாகத் தெரிவிக்கப்படுகிறது.

இதன்போது, அரசியல் கைதிகள் பற்றிய விபரங்களை தமிழ் தரப்பினர் அமைச்சரிடம் ஒப்படைத்தனர்.

அதன்படி, விசாரணை முடியாத கைதிகள், தண்டனை வழங்கப்பட்ட கைதிகள் என அரசியல் கைதிகள் குறித்த முழுமையான விபரத்தை கையளித்ததுடன், அவர்களை விடுவிக்க வேண்டுமென கோரிக்கை விடுத்தனர்.

இந்த நிலையில், இது குறித்து ஜனாதிபதியுடன் கலந்துரையாடி முடிவை அறிவிப்பதாக அமைச்சர் தெரிவித்தார்.

தமிழ்த் தேசியக் கூட்டமைப்பு சார்பில் செல்வம் அடைக்கலநாதன், த.சித்தார்த்தன், எம்.ஏ.சுமந்திரன், கோவிந்தம் கருணாகரம், வினோ நோகராதலிங்கம், சி.சிறிதரன்இ சாள்ஸ் நிர்மலநாதன், இரா.சாணக்கியன், த.கலையரசன் ஆகியோர் இந்த சந்திப்பில் கலந்துகொண்டனர்.

அதேநேரம், தமிழ் தேசிய மக்கள் முன்னணி சார்பில் கஜேந்திரகுமார் பொன்னம்பலம், செல்வராஜா கஜேந்திரன் ஆகியோரும் தமிழ் முற்போக்கு கூட்டணி சார்பில் மனோ கணேசன், வே.இராதகிருஷ்ணன் ஆகியோரும் இந்த சந்திப்பில் கலந்துகொண்டனர்.

அதேபோல அரசாங்கத் தரப்பில் அமைச்சர் தினேஸ் குணவர்த்தன, இராஜாங்க அமைச்சர் தாரக பாலசூரிய ஆகியோர் கலந்துகொண்டனர்.

அரசியல் கைதிகளின் விடுதலை தொடர்பாக தமிழ் அரசியல் கட்சிகளின் நாடாளுமன்ற உறுப்பினர்கள் கையெழுத்திட்டு ஜனாதிபதி கோட்டாபய ராஜபக்ஷவிற்கு அண்மையில் அனுப்பிய கடிதத்தை தொடர்ந்து இந்த சந்திப்பு இடம்பெற்றுள்ளமை குறிப்பிடத்தக்கது.

முல்லைத்தீவு மாவட்டத்தின் புதுக்குடியிருப்பு ஆடைத் தொழிற்சாலை கொத்தணியுடன் தொடர்புடைய 400 இற்கும் அதிகமானவர்கள், கொரோனா பரிசோதனைகளிற்கு ஒத்துழைக்காமல் தலைமறைவாகியுள்ளனர் என அறியமுடிகிறது

இதனால் சமூகத்தில் தொற்று மேலும் பரவலடையும் அபாயம் ஏற்பட்டுள்ளது. அவர்களை வலைவீசி பிடிக்கும் பணியில் இராணுவம் களமிறக்கப்பட்டுள்ளது.

முல்லைத்தீவு மாவட்டத்தில் புதுக்குடியிருப்பு,முல்லைத்தீவு,முள்ளியவளை காவல்துறை பிரிவுகள் கடந்த 17.05.21 ஆம் திகதி இரவு 11.00 மணி தொடக்கம் தனிமைப்படுத்தப்பட்டுள்ள பகுதிகளாக அறிவித்து இன்று இரண்டு நாட்கள் கடந்துள்ள நிலையிலும் மக்கள் தனிமைப்படுத்தல் விதியினை சரியாக நடைமுறைப்படுத்த தவறிவருவதாகவும் குற்றஞ்சாட்டப்பட்டுள்ளது

எரியூட்டப்பட்டு உருக்குலைந்த நிலையில் ஆண் ஒருவரின் சடலம் கண்டறியப்பட்டுள்ளதாக சுன்னாகம் பொலிஸார் தெரிவித்தனர்.

சுன்னாகம் மயிலங்காடு வைரவர் ஆலயத்துக்கு பின்பாக இன்று(வியாழக்கிழமை) காலை இந்தச் சடலம் காணப்பட்டதாக பொலிஸார் தெரிவித்தனர்.

சடலத்தை அடையாளம் காண்பதற்கான விசாரணைகள் ஆரம்பிக்கப்பட்டுள்ளதாகவும் சுன்னாகம் பொலிஸார் குறிப்பிட்டுள்ளனர்.

“தேசிய கொடியில் தமிழ் முஸ்லிம் மக்களின் அடையாளங்கள் நீக்க வேண்டும் எனக்குறிப்பிட்ட தேசபற்றாளர்கள் துறைமுக நகர சட்டம் தொடர்பில் மௌனம் காப்பது வேடிக்கையாகவுள்ளது.” என நாடாளுமன்ற உறுப்பினர் இரா.சாணக்கியன் தெரிவித்தார்.

கொழும்பில் இடம்பெற்ற ஊடகவியலாளர் சந்திப்பில் கலந்துக்கொண்டு கருத்துரைக்கையில் மேற்கண்டவாறு குறிப்பிட்டார்.

அவர் மேலும் குறிப்பிடுகையில்,

கொழும்பு துறைமுக நகரத்தின் நிர்வாகங்கள் ஒரு பிரத்தியேக ஆணைக்குழுவிற்கு வழங்கப்படுவதால் ஏற்படும் பாதிப்புக்கள் குறித்து பெரும்பாலான மக்கள் அறிந்திருக்கவில்லை. நாட்டின் தேசிய பிரச்சினைகள் தலைதூக்கும் போது அதனை மூடிமறைத்து மக்களின் கவனத்தை திசைத்திருப்ப அரசாங்கம் ஏதாவதொரு நாடகத்தை அரங்கேற்றும்.

கொழும்பு துறைமுக நகரத்திற்குள் சர்வதேச பாடசாலை, சர்வதேச வைத்தியசாலை நிர்மாணிக்கப்படுவதாக குறிப்பிடப்படுகிறது. இந்த சர்வதேச பாடசாலை மற்றும் வைத்தியசாலைகளில் இலங்கையின் சாதாரண பிரஜைகளுக்கு அனுமதி வழங்கப்படாது. சீனர்களின் தேவைக்காகவே இவை உருவாகக்கப்படுகிறது.

கடந்த காலங்களில் நாடாளுமன்ற உறுப்பினர்களான விமல் வீரவன்ச, உதய கம்மன்பில மற்றும் ஆளும் தரப்பின் ஒரு சிலர் தேசப்பற்றாளர்களை போல் வீரவசனம் பேசி இனங்களுக்கிடையில் தேவையில்லாத பிரச்சினைகளை தோற்றுவித்தார்கள்.

சிங்களே போன்ற அமைப்புக்களும் தேசிய கொடியில் தமிழ் முஸ்லிம் மக்களின் அடையாளங்கள் நீக்கப்பட வேண்டும் என்று தேவையற்ற கருத்துக்களை சமூகத்தின் மத்தியில் குறிப்பிட்டு வந்தார்கள். நாட்டின் இறையாண்மைக்கு பாதிப்பு ஏற்படுத்தும் பல விடயங்கள் கொழும்பு துறைமுக நகர சட்டமூலத்தில் உள்வாங்கப்பட்டுள்ளது என உயர்நீதிமன்றம் குறிப்பிட்டுள்ள நிலையில் தேசபற்றாளர்கள் என வீரவசனம் பேசியவர்கள் மௌனம் காப்பது வேடிக்கையாகவுள்ளது ஆகவே மக்கள் இவ்விடயம் குறித்து அதிக கவனம் செலுத்த வேண்டும். என்றார்.